“ວັນທີ 14–20 ເດືອນເມສາ: ‘ເຮົາຄືເຂົາຜູ້ນັ້ນທີ່ມີຊີວິດ, ເຮົາຄືຜູ້ນັ້ນທີ່ຖືກປະຫານ’: ອີດສະເຕີ,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ອີດສະເຕີ,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

ວັນທີ 14–20 ເດືອນເມສາ: “ເຮົາຄືເຂົາຜູ້ນັ້ນທີ່ມີຊີວິດ, ເຮົາຄືຜູ້ນັ້ນທີ່ຖືກປະຫານ”

ອີດສະເຕີ

ວັນທີ 3 ເດືອນເມສາ, 1836, ເປັນວັນອາທິດ ບຸນອີດສະເຕີ. ຫລັງຈາກໄດ້ຊ່ວຍປະຕິບັດສິນລະລຶກແກ່ໄພ່ພົນໃນພຣະວິຫານເຄີດແລນ ທີ່ຫາກໍຖືກອຸທິດໃໝ່ໆ, ໂຈເຊັບ ສະມິດ ແລະ ອໍລີເວີ ຄາວເດີຣີ ໄດ້ພົບບ່ອນທີ່ມິດງຽບ ຢູ່ທາງຫລັງຜ້າກັ້ງຂອງພຣະວິຫານ ແລະ ໄດ້ກົ້ມຫົວລົງອະທິຖານຢູ່ໃນໃຈ. ແລ້ວ, ໃນວັນທີ່ສັກສິດນີ້ເອງ ທີ່ຊາວຄຣິດໃນທຸກແຫ່ງຫົນ ໄດ້ລະນຶກເຖິງການຟື້ນຄືນພຣະຊົນຂອງພຣະເຢຊູຄຣິດ, ພຣະຜູ້ຊ່ວຍໃຫ້ລອດທີ່ຊົງຟື້ນ ໄດ້ມາປະກົດຢູ່ໃນພຣະວິຫານຂອງພຣະອົງ, ປະກາດວ່າ, “ເຮົາຄືເຂົາຜູ້ນັ້ນທີ່ມີຊີວິດ, ເຮົາຄືຜູ້ນັ້ນທີ່ຖືກປະຫານ” (ຄຳສອນ ແລະ ພັນທະສັນຍາ 110:4).

ມັນໝາຍຄວາມວ່າແນວໃດ ທີ່ພຣະເຢຊູຄຣິດ ໄດ້ເປັນ “ເຂົາຜູ້ນັ້ນທີ່ມີຊີວິດ”? ມັນບໍ່ໄດ້ໝາຍຄວາມພຽງແຕ່ວ່າພຣະອົງໄດ້ລຸກຂຶ້ນຈາກອຸບມຸງ ແລະ ໄດ້ປະກົດຕົວຕໍ່ບັນດາອັກຄະສາວົກຂອງພຣະອົງໃນຄາລີເລເທົ່ານັ້ນ. ມັນໝາຍຄວາມວ່າ ພຣະອົງຊົງພຣະຊົນຢູ່ ໃນທຸກວັນນີ້. ພຣະອົງກ່າວຜ່ານທາງສາດສະດາ ໃນທຸກວັນນີ້. ພຣະອົງນຳພາສາດສະໜາຈັກຂອງພຣະອົງ ໃນທຸກວັນນີ້. ພຣະອົງໄດ້ປິ່ນປົວຈິດວິນຍານທີ່ເຈັບປວດ ແລະ ໃຈທີ່ຊອກຊ້ຳ ໃນທຸກວັນນີ້. ສະນັ້ນ ເຮົາຈຶ່ງສາມາດສະທ້ອນປະຈັກພະຍານອັນຊົງພະລັງຂອງໂຈເຊັບ ສະມິດ ທີ່ວ່າ: “ຫລັງຈາກປະຈັກພະຍານຫລາຍຢ່າງທີ່ໃຫ້ໄວ້ເຖິງພຣະອົງ, ນີ້ຄືປະຈັກພະຍານ … ຊຶ່ງພວກເຮົາມອບໃຫ້ເຖິງພຣະອົງ: ວ່າພຣະອົງຊົງພຣະຊົນ!” (ຄຳສອນ ແລະ ພັນທະສັນຍາ 76:22). ເຮົາສາມາດໄດ້ຍິນສຸລະສຽງຂອງພຣະອົງໃນການເປີດເຜີຍເຫລົ່ານີ້, ເຫັນພຣະຫັດຂອງພຣະອົງໃນຊີວິດຂອງເຮົາ, ແລະ ຮູ້ສຶກເຖິງ “ຄວາມຫວານນີ້ແສນສຸກລົ້ນ: ‘ເຮົາຮູ້ພຣະຜູ້ໄຖ່ຊົງພຣະຊົນ!’” (ເພງສວດ ແລະ ເພງຂອງເດັກນ້ອຍ, ເລກທີ 42).

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ພຣະເຢຊູຄຣິດຊົງພຣະຊົນ.

ຫລາຍຄົນໃນພວກເຮົາບໍ່ເຄີຍເຫັນພຣະເຢຊູຄຣິດດັ່ງທີ່ສາດສະດາໂຈເຊັບ ສະມິດ ໄດ້ເຫັນ. ແຕ່ເຮົາສາມາດຮູ້ໄດ້, ດັ່ງທີ່ເພິ່ນໄດ້ຮູ້, ວ່າພຣະຜູ້ຊ່ວຍໃຫ້ລອດຊົງພຣະຊົນຢູ່, ວ່າພຣະອົງຮູ້ຈັກຄວາມສຳເລັດ ແລະ ການດີ້ນລົນຂອງເຮົາ, ແລະ ວ່າ ພຣະອົງຈະຊ່ວຍເຮົາໃນຊ່ວງເວລາທີ່ຂັດສົນ. ໃຫ້ພິຈາລະນາປະຈັກພະຍານຂອງທ່ານເອງເຖິງພຣະຄຣິດທີ່ຊົງພຣະຊົນ ຂະນະທີ່ທ່ານໄຕ່ຕອງຄຳຖາມຢູ່ຂ້າງລຸ່ມນີ້ ແລະ ສຶກສາແຫລ່ງຊ່ວຍເຫລືອທີ່ມານຳກັນນີ້.

ພຣະເຢຊູຄຣິດແມ່ນໃຜ? ເປັນຫຍັງເຮົາຈຶ່ງນະມັດສະການພຣະອົງ? (ເບິ່ງ “ພຣະຄຣິດທີ່ຊົງພຣະຊົນ: ປະຈັກພະຍານຂອງອັກຄະສາວົກ”).
ພຣະວິນຍານໄດ້ສິດສອນຫຍັງເຮົາກ່ຽວກັບປະສົບການຂອງໂຈເຊັບ ສະມິດ ແລະ ຄົນອື່ນໆທີ່ໄດ້ເຫັນພຣະຜູ້ຊ່ວຍໃຫ້ລອດ? ປະຈັກພະຍານຂອງພວກເພິ່ນເຮັດໃຫ້ປະຈັກພະຍານຂອງເຮົາເຂັ້ມແຂງຂຶ້ນແນວໃດ? (ເບິ່ງ ຄຳສອນ ແລະ ພັນທະສັນຍາ 76:11–14, 20–24; 110:1–10; ໂຈເຊັບ ສະມິດ—ປະຫວັດ:17).
ທ່ານຮຽນຮູ້ຫຍັງແດ່ກ່ຽວກັບພາລະກິດ ແລະ ຄວາມເປັນພຣະເຈົ້າຂອງພຣະຜູ້ຊ່ວຍໃຫ້ລອດຈາກພຣະຄຳຂອງພຣະອົງເອງ? (ເບິ່ງ ຄຳສອນ ແລະ ພັນທະສັນຍາ 29:5; 38:7).
ພຣະຜູ້ຊ່ວຍໃຫ້ລອດຈະສາມາດຊ່ວຍເຮົາໃນທຸກວັນນີ້ແນວໃດ? (ເບິ່ງ ເອຊາຢາ 53:3–5; ເຮັບເຣີ 2:17–18; ໂມໄຊຢາ 3:7; ແອວມາ 7:11–13; 36:3; ອີເທີ 12:27; ໂມເຊ 5:10–12).

ພະລັງມາຈາກການທ່ອງຈຳ. ແອວເດີ ຣິເຈີດ ຈີ ສະກາດ ໄດ້ອະທິບາຍວ່າ: “ພະລັງທີ່ຍິ່ງໃຫຍ່ສາມາດມາຈາກການທ່ອງຈຳຂໍ້ພຣະຄຳພີ. ການທ່ອງຈຳພຣະຄຳພີກໍຄືການສ້າງມິດຕະພາບໃໝ່. ມັນຄືກັນກັບການຄົ້ນພົບບຸກຄົນໃໝ່ ຜູ້ທີ່ສາມາດຊ່ວຍເຮົາໃນຍາມຕ້ອງການ, ດົນໃຈ ແລະ ປອບໂຍນເຮົາ, ແລະ ເປັນແຫລ່ງແຮງຈູງໃຈສຳລັບການປ່ຽນແປງທີ່ຈຳເປັນ” (“The Power of Scripture,” Ensign, Nov. 2011, 6). ຖ້າທ່ານພົບຂໍ້ພຣະຄຳພີກ່ຽວກັບພຣະຜູ້ຊ່ວຍໃຫ້ລອດ ທີ່ມີຄວາມໝາຍຕໍ່ທ່ານຢ່າງເປັນພິເສດ—ບາງທີຂໍ້ໜຶ່ງສາມາດໃຫ້ການປອບໂຍນທ່ານໃນຍາມຕ້ອງການ—ໃຫ້ພິຈາລະນາທີ່ຈະທ່ອງຈຳມັນ.

ໃນວິດີໂອ “My Spiritual Goal,” ຍິງໜຸ່ມຄົນໜຶ່ງຕັດສິນໃຈທີ່ຈະທ່ອງຈຳ “ພຣະຄຣິດທີ່ຊົງພຣະຊົນ” (ຫ້ອງສະໝຸດພຣະກິດຕິຄຸນ). ແມ່ນຫຍັງທີ່ປະທັບໃຈທ່ານກ່ຽວກັບປະສົບການຂອງນາງ? ທ່ານຮູ້ສຶກໄດ້ຮັບການດົນໃຈໃຫ້ເຮັດຫຍັງ ເພື່ອຮັບຄວາມຈິງຕ່າງໆໃນ “ພຣະຄຣິດທີ່ຊົງພຣະຊົນ” ໃນຫົວໃຈ ແລະ ຈິດໃຈຂອງທ່ານ?

ເພື່ອຮຽນຮູ້ເພີ່ມເຕີມກ່ຽວກັບວິທີທີ່ພຣະຜູ້ຊ່ວຍໃຫ້ລອດອວຍພອນເຮົາໃນທຸກວັນນີ້, ທ່ານສາມາດສຶກສາ, ຟັງ, ຫລື ຮ້ອງເພງ “ເຮົາຮູ້ພຣະຜູ້ໄຖ່ຊົງພຣະຊົນ” (ເພງສວດ ແລະ ເພງຂອງເດັກນ້ອຍ, 42). ມັນອາດເປັນທີ່ດົນໃຈທີ່ຈະຊອກຫາຄວາມຈິງໃນເພງສວດນີ້ ທີ່ສິດສອນເຊັ່ນກັນໃນ ຄຳສອນ ແລະ ພັນທະສັນຍາ 6:34; 84:77; 98:18; 138:23.

ເບິ່ງ Topics and Questions, “Jesus Christ,” ຫ້ອງສະໝຸດພຣະກິດຕິຄຸນ ນຳອີກ.

ເພາະພຣະເຢຊູຄຣິດ, ເຮົາຈຶ່ງຈະໄດ້ຟື້ນຄືນຊີວິດ.

ໂຈເຊັບ ສະມິດ ຮູ້ວ່າການອາໄລອາວອນກັບການຕາຍຂອງຄົນທີ່ເຮົາຮັກນັ້ນຮູ້ສຶກແນວໃດ, ລວມທັງພໍ່ຂອງເພິ່ນ ແລະ ອ້າຍນ້ອງຂອງເພິ່ນສອງຄົນ. ໂຈເຊັບ ແລະ ເອມມາ ໄດ້ຝັງລູກຂອງພວກເພິ່ນຫົກຄົນ, ແຕ່ລະຄົນມີອາຍຸຕ່ຳກວ່າສອງປີ. ຈາກການເປີດເຜີຍທີ່ພຣະເຈົ້າໄດ້ປະທານໃຫ້, ໂຈເຊັບ ແລະ ເອມມາ ໄດ້ຮັບມຸມມອງນິລັນດອນ.

ຊອກຫາຄວາມຈິງກ່ຽວກັບຄວາມຕາຍ ແລະ ແຜນນິລັນດອນຂອງພຣະເຈົ້າໃນ ຄຳສອນ ແລະ ພັນທະສັນຍາ 29:26–27; 42:45–46; 63:49; 88:14–17, 27–31; 93:33–34. ຄວາມຈິງເຫລົ່ານີ້ມີຜົນກະທົບຕໍ່ມຸມມອງຂອງທ່ານກ່ຽວກັບຄວາມຕາຍແນວໃດ? ມັນມີຜົນກະທົບຕໍ່ວິທີທີ່ທ່ານດຳລົງຊີວິດແນວໃດ?

ເບິ່ງ 1 ໂກຣິນໂທ 15; Teachings of Presidents of the Church: Joseph Smith (2007), 174–76; Easter.ChurchofJesusChrist.org ນຳອີກ.

ພຣະເຢຊູຄຣິດໄດ້ສຳເລັດ “ການຊົດໃຊ້ທີ່ສົມບູນ” ເພື່ອເຮົາ.

ວິທີໜຶ່ງທີ່ຈະສຸມໃຈໃສ່ຕໍ່ພຣະຜູ້ຊ່ວຍໃຫ້ລອດໃນຊ່ວງບຸນອີດສະເຕີ ແມ່ນການສຶກສາການເປີດເຜີຍ ຢູ່ໃນ ຄຳສອນ ແລະ ພັນທະສັນຍາ ທີ່ສິດສອນກ່ຽວກັບການເສຍສະລະຊົດໃຊ້ຂອງພຣະອົງ. ບາງຢ່າງສາມາດພົບໄດ້ໃນ ຄຳສອນ ແລະ ພັນທະສັນຍາ 18:10–13; 19:16–19; 45:3–5; 76:69–70. ໃຫ້ພິຈາລະນາຂຽນລາຍການຂອງຄວາມຈິງທີ່ທ່ານພົບໃນຂໍ້ເຫລົ່ານີ້. ເພື່ອທີ່ຈະເຮັດໃຫ້ການສຶກສາຂອງທ່ານເລິກເຊິ່ງຍິ່ງຂຶ້ນ, ທ່ານສາມາດຕື່ມໃສ່ລາຍການຂອງທ່ານ ໂດຍການຄົ້ນຫາໃນ ລູກາ 22:39–44; 1 ໂຢຮັນ 1:7; 2 ນີໄຟ 2:6–9; ໂມໄຊຢາ 3:5–13, 17–18; ໂມໂຣໄນ 10:32–33.

ຕໍ່ໄປນີ້ແມ່ນຄຳຖາມບາງຂໍ້ ທີ່ສາມາດນຳພາການສຶກສາຂອງທ່ານ:

ແມ່ນຫຍັງຄືການຊົດໃຊ້ຂອງພຣະເຢຊູຄຣິດ?
ເປັນຫຍັງພຣະເຢຊູຄຣິດຈຶ່ງເລືອກທີ່ຈະທົນທຸກທໍລະມານ ແລະ ສິ້ນພຣະຊົນເພື່ອພວກເຮົາ?
ເຮົາຕ້ອງເຮັດສິ່ງໃດ ເພື່ອທີ່ຈະໄດ້ຮັບພອນຂອງການເສຍສະລະຂອງພຣະອົງ?
ເຮົາຮູ້ສຶກແນວໃດກ່ຽວກັບພຣະເຢຊູຄຣິດ ຫລັງຈາກທີ່ອ່ານຂໍ້ເຫລົ່ານີ້ແລ້ວ?

ເບິ່ງ ຄູ່ມືພຣະຄຳພີ, “ການຊົດໃຊ້,” ຫ້ອງສະໝຸດພຣະກິດຕິຄຸນ; “The Savior Suffers in Gethsemane” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ເພາະພຣະເຢຊູຄຣິດ, ເຮົາຈຶ່ງຈະໄດ້ຟື້ນຄືນຊີວິດ.

ເພື່ອສິດສອນລູກໆຂອງທ່ານກ່ຽວກັບການຟື້ນຄືນຊີວິດ, ທ່ານສາມາດເລີ່ມໄດ້ໂດຍການເອົາຮູບຂອງການສິ້ນພຣະຊົນ ແລະ ການຟື້ນຄືນພຣະຊົນຂອງພຣະຜູ້ຊ່ວຍໃຫ້ລອດໃຫ້ພວກເຂົາເບິ່ງ. ໃຫ້ລູກໆຂອງທ່ານແບ່ງປັນສິ່ງທີ່ພວກເຂົາຮູ້ກ່ຽວກັບເຫດການເຫລົ່ານີ້. ພວກທ່ານຍັງສາມາດຮ້ອງເພງເຊັ່ນ “ພຣະຄຣິດເຈົ້າຄືນຊີບວັນນີ້” (ເພງສວດ ແລະ ເພງຂອງເດັກນ້ອຍ, 58) ນຳອີກ.
ໃຫ້ພິຈາລະນາທີ່ຈະໃຊ້ບົດຮຽນທີ່ໃຊ້ສິ່ງຂອງ ທີ່ສາມາດຊ່ວຍໃຫ້ລູກໆຂອງທ່ານເຂົ້າໃຈສິ່ງທີ່ເກີດຂຶ້ນເມື່ອເຮົາຕາຍ (ວິນຍານ ແລະ ຮ່າງກາຍຂອງເຮົາແຍກອອກຈາກກັນ) ແລະ ເມື່ອເຮົາຟື້ນຄືນຊີວິດ (ວິນຍານ ແລະ ຮ່າງກາຍກັບຄືນເຂົ້າຫາກັນອີກ, ແລະ ຮ່າງກາຍຂອງເຮົາກໍສົມບູນແບບ ແລະ ເປັນອະມະຕະ). ຍົກຕົວຢ່າງ, ແມ່ນຫຍັງຈະເກີດຂຶ້ນ ເມື່ອເຮົາເອົາຖ່ານອອກຈາກໄຟສາຍ ຫລື ເອົາຫລອດນໍ້າມຶກອອກຈາກປາກກາ? ແມ່ນຫຍັງຈະເກີດຂຶ້ນເມື່ອພວກມັນຖືກເອົາມາໃສ່ກັນອີກ? (ເບິ່ງ ແອວມາ 11:44–45.)
ລູກໆຂອງທ່ານຮູ້ຈັກໃຜບາງຄົນທີ່ໄດ້ເສຍຊີວິດໄປແລ້ວບໍ່? ໃຫ້ພວກເຂົາແບ່ງປັນໜ້ອຍໜຶ່ງກ່ຽວກັບບຸກຄົນເຫລົ່ານີ້, ແລະ ອ່ານ ຄຳສອນ ແລະ ພັນທະສັນຍາ 138:17 ນຳກັນ. ເວົ້າລົມກັນກ່ຽວກັບວ່າ ການທີ່ຮູ້ວ່າຄົນທີ່ເຮົາຮັກຈະຟື້ນຄືນຊີວິດ ແລະ ມີຮ່າງກາຍອີກຄັ້ງນັ້ນ ຮູ້ສຶກແນວໃດ.
ຖ້າຫາກທ່ານມີລູກໃຫຍ່ແດ່ແລ້ວ, ທ່ານອາດເຊື້ອເຊີນພວກເຂົາໃຫ້ຊອກຫາວະລີຕ່າງໆທີ່ຈັບໃຈຄວາມຂ່າວສານຂອງອີດສະເຕີໃນຂໍ້ພຣະຄຳພີຕໍ່ໄປນີ້: ຄຳສອນ ແລະ ພັນທະສັນຍາ 63:49; 88:14–17, 27; 138:11, 14–17. ພວກເຂົາສາມາດເຮັດຢ່າງດຽວກັນກັບວິດີໂອ “Because He Lives” (ຫ້ອງສະໝຸດພຣະກິດຕິຄຸນ). ເຮົາຈະສາມາດແບ່ງປັນຂ່າວສານນີ້ກັບຄົນອື່ນໄດ້ແນວໃດ?

ການຝັງພຣະສົບ ແລະ ການຟື້ນຄືນພຣະຊົນຂອງພຣະຄຣິດ

ສາດສະດາ ໂຈເຊັບ ສະມິດ ໄດ້ເຫັນພຣະເຢຊູຄຣິດ.

ທ່ານ ແລະ ລູກໆຂອງທ່ານອາດສົນໃຈທີ່ຈະອ່ານກ່ຽວກັບສາມຄັ້ງທີ່ແຕກຕ່າງກັນ ທີ່ພຣະເຢຊູຄຣິດໄດ້ປະກົດຕົວຕໍ່ໂຈເຊັບ ສະມິດ ແລະ ຄົນອື່ນໆ, ຕາມທີ່ໄດ້ບັນທຶກໄວ້ໃນ ໂຈເຊັບ ສະມິດ—ປະຫວັດ 1:14–17; ຄຳສອນ ແລະ ພັນທະສັນຍາ 76:11–24; 110:1–10. ລູກໆຂອງທ່ານຍັງສາມາດເບິ່ງຮູບພາບຂອງເຫດການເຫລົ່ານີ້ໃນ ໜ້າກິດຈະກຳ ຂອງອາທິດນີ້. ເຮົາຮຽນຮູ້ຫຍັງແດ່ກ່ຽວກັບພຣະເຢຊູຄຣິດ ຈາກປະສົບການເຫລົ່ານີ້? ເປັນຫຍັງມັນຈຶ່ງເປັນພອນທີ່ຈະຮູ້ວ່າ ໂຈເຊັບ ສະມິດ ແລະ ຄົນອື່ນໆໄດ້ເຫັນພຣະຜູ້ຊ່ວຍໃຫ້ລອດທີ່ຟື້ນຄືນພຣະຊົນແລ້ວ?

ເພາະພຣະເຢຊູຄຣິດ, ເຮົາຈຶ່ງສາມາດຮັບການໃຫ້ອະໄພຈາກບາບຂອງເຮົາ.

ຄວາມຈິງທີ່ໂຈເຊັບ ສະມິດ ໄດ້ຮຽນຮູ້ກ່ຽວກັບການໃຫ້ອະໄພຜ່ານທາງພຣະຄຣິດ ສາມາດມອບຄວາມຫວັງໃຫ້ແກ່ລູກໆຂອງທ່ານວ່າ ພວກເຂົາສາມາດຮັບການໃຫ້ອະໄພຈາກຄວາມຜິດພາດ ແລະ ຄວາມບາບຂອງພວກເຂົາ. ໃຫ້ພິຈາລະນາທີ່ຈະເຊື້ອເຊີນລູກໆຂອງທ່ານໃຫ້ສ້າງຕາຕະລາງດ້ວຍຫົວຂໍ້ເຊັ່ນນີ້: ສິ່ງທີ່ພຣະຜູ້ຊ່ວຍໃຫ້ລອດໄດ້ກະທຳເພື່ອເຮົາ ແລະ ສິ່ງທີ່ເຮົາຕ້ອງເຮັດເພື່ອທີ່ຈະຮັບການໃຫ້ອະໄພຈາກພຣະອົງ. ຊ່ວຍລູກໆຂອງທ່ານຄົ້ນຫາໃນຂໍ້ພຣະຄຳພີຕໍ່ໄປນີ້ ເພື່ອຊອກຫາສິ່ງທີ່ຄວນຢູ່ໃຕ້ຫົວຂໍ້ເຫລົ່ານີ້: ຄຳສອນ ແລະ ພັນທະສັນຍາ 18:10–13; 19:16–19; 45:3–5; 58:42–43. ໃຫ້ແບ່ງປັນນຳກັນເຖິງຄວາມຊື່ນຊົມ ແລະ ຄວາມກະຕັນຍູຂອງພວກທ່ານສຳລັບສິ່ງທີ່ພຣະຜູ້ຊ່ວຍໃຫ້ລອດໄດ້ກະທຳເພື່ອເຮົາ.
ທ່ານຍັງສາມາດເບິ່ງວິດີໂອ “The Shiny Bicycle” ກັບລູກໆຂອງທ່ານ (ຫ້ອງສະໝຸດພຣະກິດຕິຄຸນ) ແລະ ແບ່ງປັນປະສົບການຕອນທີ່ທ່ານຮູ້ສຶກເຖິງການໃຫ້ອະໄພຂອງພຣະຜູ້ຊ່ວຍໃຫ້ລອດ ຂະນະທີ່ທ່ານກັບໃຈ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ພຣະຄຣິດທີ່ຟື້ນຄືນພຣະຊົນ ປະກົດຕົວຕໍ່ນາງມາຣີ — Christ and Mary at the Tomb [ພຣະຄຣິດ ແລະ ນາງມາຣີ ທີ່ອຸບມຸງ], ໂດຍ ໂຈເຊັບ ບຣິກກີ