Tokāteline mo e Ngaahi Fuakava 23–26

Naʻe foaki ʻa e fakahā ʻi he Tokāteline mo e Ngaahi Fuakava 24 ke “poupouʻi hake, fakalotolahiʻi mo fakahinohinoʻi” ʻa Siosefa Sāmita mo ‘Ōliva Kautele lolotonga ha taimi ʻo e faingataʻá (‘uluʻi vahé: vakai foki, Kau Māʻoniʻoní,, 1:102–04). Kumi ha ngaahi foʻi lea ʻi he Tokāteline mo e Ngaahi Fuakava 24 ʻokú ke ongoʻi naʻe mei fakamālohia mo fakalotolahi kiate kinautolu.

Ko e hā ʻoku fokotuʻu atu ʻe he ngaahi potufolofola ko ʻení fekauʻaki mo e founga ʻoku tokoni atu ai ʻa e Fakamoʻuí kiate koe ʻi ho ngaahi faingataʻaʻiá?

Tokāteline mo e Ngaahi Fuakava 24:1–3

Tokāteline mo e Ngaahi Fuakava 24:8

Tokāteline mo e Ngaahi Fuakava 121:7–8

ʻĪsaia 40:28–31

Mōsaia 24:14–15

ʻI he vakai ʻa ʻEma Sāmita ki hono Fakafoki Mai ʻo e ongoongoleleí ʻo fakafou ʻi hono husepāniti ko Siosefa Sāmitá, mahalo naʻá ne fifili pe ko e hā hono fatongiá. Kumi ha ngaahi tali naʻe ʻomi ʻe he ʻEikí ʻi he Tokāteline mo e Ngaahi Fuakava 25. ʻOkú ke maʻu nai ha meʻa ʻi he vahe ko ʻení ʻokú ke ongoʻi ko Hono “leʻó ia [kiate koe]”? (veesi 16).

Vakai foki, “An Elect Lady” (video), Gospel Library; “Thou Art an Elect Lady,” ʻi he Revelations in Context, 33–39; Joy D. Jones, “Ko ha Uiuiʻi Fakaʻeiʻeiki Makehe,” Liahona, Mē 2020, 15–18.

5:20

Ko e hā ʻene ʻuhinga kiate koe ʻa e kupuʻi lea “laumālie ʻo e angamalū”? Fakakaukau ke kumi ʻi he vahe 25 ha ngaahi foʻi lea mo ha ngaahi kupuʻi lea ʻoku tokoni ke mahino kiate koe ʻa e ʻuhinga ʻo e angamaluú. ʻE lava foki ke tokoni ʻa e pōpoaki ʻa ʻEletā Tēvita A. Petinā “Angamalū mo Loto-Fakatōkilalo” (Liahona, Mē 2018, 30–33). ʻOku hoko fēfē ʻa Sīsū Kalaisi ko ha sīpinga ʻo e angamaluú kiate koe? (vakai, Mātiu 11:28–30). Fakakaukau ki ha ngaahi meʻa ʻi hoʻo moʻuí te ke lava ʻo fai “ʻi he laumālie ʻo e angamalū.”

ʻI hoʻo fakalaulauloto ki he faleʻi ʻa e ʻEikí ʻi he Tokāteline mo e Ngaahi Fuakava 25:10, ʻe ala tokoni ke hiki ha lisi ʻo e “ngaahi meʻa ʻo e māmaní” ʻokú Ne finangalo ke ke “liʻaki.” Hili iá, ʻe lava ke ke faʻu ha lisi ʻo e “ngaahi meʻa ʻo ha [māmani] lelei ange” ʻokú Ne finangalo ke ke fekumi ki aí. Mahalo te ke fili ha meʻa ʻe taha pe lahi ange mei he lisi ʻuluakí te ke liʻaki pea mo ha meʻa ʻe taha mei he lisi hono uá te ke fekumi ki ai.

Kuo fai ʻe Palesiteni Lāsolo M. Nalesoni ha faleʻi mo ha ngaahi talaʻofa fekauʻaki mo hono “[siʻaki] ʻa e ngaahi meʻa lahi ʻo e māmani ko ʻení.” Kumi ia ʻi he peesi 77 ʻo ʻene pōpoaki “Ngaahi Koloa Fakalaumālie” (Liahona, Nōvema 2019). Te ke muimui fēfē ki heʻene faleʻí?

ʻI hoʻo lau ʻa e veesi 13, fakakaukau ki he ngaahi fuakava kuó ke fai mo e Tamai Hēvaní mo Sīsū Kalaisí. ʻOku ʻuhinga ki he hā ke “pīkitai” ki he ngaahi fuakava ko ʻení? ʻOku tokoni fēfē hoʻo ngaahi fuakavá ke “liʻaki ʻa e ngaahi meʻa ʻo e māmaní, pea fekumi ki he ngaahi meʻa ʻo ha maama lelei angé”?

Ko ha ngaahi potufolofola kehe ʻeni ʻe lava ʻo tokoni ke ke fakafaikehekeheʻi ʻa e “ngaahi meʻa ʻo e māmaní” mo e “ngaahi meʻa ʻo ha maama lelei angé”: Mātiu 6:19, 21, 25–34; Luke 10:39–42; 2 Nīfai 9:51.

Vakai foki, Ngaahi Tefito ʻo e Ongoongoleleí, “Feilaulaú,” Gospel Library.

Ko e hā ha niʻihi ʻo hoʻo “[ngaahi] hiva ʻo e lotó”—ngaahi hiva ʻokú ne fakahaaʻi hoʻo ngaahi ongo fekauʻaki mo e Tamai Hēvaní pe ko Sīsū Kalaisí? Fakakaukau ke hivaʻi pe fanongo ki ha niʻihi ʻo kinautolu. Ko e hā ʻa e meʻa fekauʻaki mo e ngaahi hiva ko ʻení ʻokú ne ʻai ke nau makehe kiate koé?

Te ke lava foki ʻo fakalaulauloto ki he founga ʻoku hangē ai ʻa e ngaahi himi ko ʻení ko ha lotú. Ko e hā ʻa e meʻa ʻoku faitatau ai ʻa e mūsika mo e lotu toputapú? Kuo tali fēfē hoʻo ngaahi hiva toputapú “ʻaki [ha] tāpuaki”?

Vakai foki, “Ko e Hiva ʻo e Lotó,” Ngaahi Himí, fika 179.

ʻOku ʻuhinga ʻa e kupuʻi lea “felototahaʻaki” ʻi he veesi ko ʻení ki hono hiki hotau nimá ke fakahaaʻi ʻoku tau poupouʻi ha taha ʻokú ne maʻu ha uiuiʻi pe fakanofo ki he lakanga fakataulaʻeikí. Te ke fakamatalaʻi fēfē ki ha tokotaha ʻaʻahi ki ha fakatahaʻanga ʻa e Siasí hono ʻuhinga ʻo e taimi ʻoku tau poupouʻi ai ha tahá? Ko e hā ha ngaahi tali ʻokú ke maʻu ʻi he pōpoaki ʻa Palesiteni Henelī B. ʻAealingi “Ko e Mālohi ʻo e Poupou ʻi he Tuí”? (Liahona, Mē 2019, 58–60).

• Ke ako fekauʻaki mo ha niʻihi ʻo e ngaahi faingataʻa pe ngaahi pole naʻe fehangahangai mo Siosefa Sāmita mo e fuofua Kāingalotú, te ke lava ʻo toe vakaiʻi ʻa e “Vahe 11: Tokolahi Ange ʻa e Kau ʻa e Kakaí ki he Siasí,” ʻi he Ngaahi Talanoa ʻo e Tokāteline mo e Ngaahi Fuakavá, 46–47. Hili iá, ʻe lava ke ke fekumi mo hoʻo fānaú ki he meʻa naʻe folofola ʻaki ʻe he ʻEikí kia Siosefa fekauʻaki mo hono ngaahi faingataʻaʻiá ʻi he Tokāteline mo e Ngaahi Fuakava 24:1, 8. Te mou lava foki ʻo fevahevaheʻaki ʻa e founga ʻoku tokoniʻi ai koe ʻe he ʻEikí lolotonga ʻa e ngaahi taimi faingataʻá.

  

  1:52

• Ko e hā ʻoku akoʻi mai ʻe he Tokāteline mo e Ngaahi Fuakava 24:8 fekauʻaki mo e faʻa kātakí? ʻOku fakahaaʻi fēfē mai nai ʻe he Fakamoʻuí kiate kitautolu ʻokú Ne “ʻiate [kitautolu]” lolotonga hotau ngaahi faingataʻá?

  

  2:46

• Hili hoʻomou lau ʻa e Tokāteline mo e Ngaahi Fuakava 25:12, te mou lava ʻo fevahevaheʻaki homou himi pe hiva ʻa e Siasí ʻoku mou saiʻia taha aí—ʻa hoʻomou “hiva ʻo e lotó”—pea hivaʻi fakataha ia. Fevahevaheʻaki ʻa e ʻuhinga ʻoku mou saiʻia ai ʻi he ngaahi hiva ko ʻení. Ko e hā ʻoku fiefia ai ʻa e ʻEikí ʻi he taimi ʻoku tau hivaʻi ai ʻa e ngaahi hiva ko ʻení? ʻOku hoko fēfē ʻetau hivá ko ha “lotu ia kiate [Ia]”?

• Ke mahino ʻa e ʻuhinga ʻo e “pīkitai ki he ngaahi fuakavá” (Tokāteline mo e Ngaahi Fuakava 25:13), ʻe lava ke taufetongi hoʻo fānaú ʻi he piki ki ha meʻa ʻi he maʻu taha te nau lavá. Hili iá, te ke lava mo hoʻo fānaú ʻo talanoa fekauʻaki mo e founga ʻokú ke “pīkitai” ai pe tauhi pau ki hoʻo ngaahi fuakavá. Kapau ʻe fiemaʻu, fakamanatu mo hoʻo fānaú ʻa e ngaahi fuakava ʻoku tau faí (vakai, Mōsaia 18:8–10; Tokāteline mo e Ngaahi Fuakava 20:37; mo e peesi ʻekitivitī ʻo e uike ní).

• Ke ʻoange ki hoʻo fānaú ʻa e puipuituʻa ʻo e Tokāteline mo e Ngaahi Fuakava 25:13, te ke lava ʻo fakamahinoʻi ange ko ha meʻa ʻeni naʻe fakahā ʻe he ʻEikí kia ʻEma Sāmita hili pē hono papitaisó. Ko e hā ka hoko ai ʻeni ko ha faleʻi lelei ki ha taha naʻe toki papitaiso kimuí ni mai?

  

  2:46