Tzol’leb’ ut Sumwank 12–17; Jose Smith—Resilal 1:66–75

Laj Joseph Knight ut laj David Whitmer ke’raj xnawb’al chan ru taaruuq te’tenq’anq sa’ xk’anjel li Qaawa’. Naq yooqat chirilb’al lix sumehom li Qaawa’ choq’ reheb’ a’an (Tzol’leb’ ut Sumwank 12; 14), k’oxla k’a’ru naraj naxye “xk’eeb’al chi k’utmank ut xxaqab’ankil li k’anjel re Sion” (12:6; chi’ilmanq ajwi’ 14:6). K’a’ru li na’leb’ malaj xchaab’ilaleb’ laj Kristiano nakataw sa’eb’ li tasal a’in li naru nakate’xtenq’a chixb’aanunkil a’an?

Chi’ilmanq ajwi’ “Las familias Knight y Whitmer,” sa’ Revelaciones en contexto, 22–26.

Laj Jwan aj Kub’sihom Ha’ kixb’oq laj Jose Smith ut laj Oliver Cowdery choq’ “rech moosil.” K’a’ru nakak’oxla naq naraj naxye wank choq’ rech moosil laj Jwan aj Kub’sihom Ha’? (chi’ilmanq Mateo 3:13–17; Lukas 1:13–17; 3:2–20).

Naq taawil li kixye laj Jwan aj Kub’sihom Ha’ chirix li Tijonelil re Aaron sa’ li tasal 13, k’oxla chan ru naq lix laawil li tijonelil a’in natenq’an sa’ xk’eeb’al chi uxmank lix k’anjel laj Jwan re xkawresinkil li b’e choq’ re li Qaawa’. Jo’ jun eetalil:

• K’a’ru naraj naxye “lix k’anjeleb’ li anjel”? (chi’ilmanq 2 Nefi 32:2–3; Moroni 7:29–32; K’utul Raqal reheb’ li Loq’laj Hu, “Anjel,” Biblioteca del Evangelio).

• K’a’ru naraj naxye “li evangelio re jalb’a-k’a’uxlej”? (chi’ilmanq Tzol’leb’ ut Sumwank 84:26–27; Dale G. Renlund, “Li tijonelil ut lix wankil aj tojol-ix li Kolonel,” Jolomil ch’utub’aj-ib’ re octubre 2017).

Chan ru nakate’xtenq’a li k’ojob’anb’il k’anjel re li Tijonelil re Aaron (jo’ li kub’iha’ ut li loq’laj wa’ak) chixkawresinkil li b’e re naq taak’ul li Kolonel sa’ laa yu’am?

Li Elder Dale G. Renlund ut li rixaqil, xRuth, ke’xch’olob’ a’in chirixeb’ lix laawil li tijonelil:

“Li aatin xlaawil li tijonelil na’oksiman chi wiib’ ru. Li xb’een a’an li k’ulub’ejil malaj li osob’tesihom k’eeb’il reheb’ chixjunileb’ li neke’k’uluk re li Tijonelil re Aaron malaj re Melkisedek. … Qayehaq, eb’ li neke’k’amok re li Tijonelil re Aaron neke’xk’ul xlaawil lix k’anjeleb’ li anjel, jo’ ajwi’ xlaawil li evangelio re kawresink-ib’ re li jalb’a-k’a’uxlej ut li kub’iha’ chi sub’b’il re risinkil li maak (chi’ilmanq Tzol’leb’ ut Sumwank 13:1; 84:26–27). Eb’ li neke’k’amok re li Tijonelil re Melkisedek neke’xk’ul xlaawileb’ li muqmuukil na’leb’ re li awa’b’ejihom, li laaw re li nawom chirix li Dios, ut eb’ li laaw reheb’ chixjunil li musiq’ejil osob’tesihom sa’ li Iglees (chi’ilmanq Tzol’leb’ ut Sumwank 84:19; 107:18). …

“Li xkab’ chan ru na’oksiman li aatin xlaawil li tijonelila’an re aatinak chirix li jolomink. Eb’ laj jolominel sa’ li tijonelil neke’xk’ul xkomoneb’ chik li laaw re li tijonelil, ut a’an li k’ulub’ejil re xb’eresinkil junaq xcha’al li Iglees malaj junaq ch’uut. Chi jo’ka’in, lix laawil li tijonelil a’an li wankilal re b’eresink, jolomink, ut awa’b’ejink sa’ li Iglees” (The Melchizedek Priesthood: Understanding the Doctrine, Living the Principles, [2018], 26).

Ma aapatz’om jun sutaq chan raj ru wank rik’in laj Jose Smith ut laj Oliver Cowdery sa’ tz’aqal xhoonalil chixjunil li k’a’ru kik’ulman sa’ li k’ojob’ank wi’chik? Naq taawil Jose Smith—Resilal 1:66–75, jo’ ajwi’ li na’leb’ wan sa’ xraqik li raqal 71, naru nakataw ru k’a’ru tz’aqal li ke’reek’a a’an. K’a’ru naxtoch’ aach’ool sa’ li raatineb’? K’e reetal li osob’tesiik ke’xk’ul xb’aan naq ke’xk’ul li tijonelil ut ke’kub’siik xha’. K’a’ru li osob’tesiik naxk’e aawe li Kolonel rik’ineb’ li k’ojob’anb’il k’anjel re li tijonelil?

Re xtawb’al xkomon li na’leb’, naru nakayiib’ jun kaaxukuut rik’ineb’ li aatin K’ojob’anb’il k’anjel ut Osob’tesihom. Chirix a’an naru nakasik’eb’ raqal sa’eb’ li loq’laj hu jo’eb’ a’in re xtz’iib’ankileb’ li k’ojob’anb’il k’anjel ut li osob’tesihom neke’chal rik’in a’an: Jwan 14:26; Hechos 2:38; Tzol’leb’ ut Sumwank 84:19–22; 131:1–4; Jose Smith—Resilal 1:73–74. K’a’ chik chi osob’tesiik naru nakatz’iib’a? Chan ru naq eb’ li k’ojob’anb’il k’anjel ak xak’ul naxk’am chaq xwankil li Kolonel sa’ laa yu’am?

Chi’ilmanq ajwi’ David A. Bednar, “Rik’in lix wankil li Dios sa’ nimla loq’alil,” Jolomil ch’utub’aj-ib’ re octubre 2021; Santos, 1:65–68; “Kawil Dios re tiikilal,” Eb’ li B’ich, 13; Temas y preguntas, “Convenios y ordenanzas,” Biblioteca del Evangelio.

Ma aapatz’om jun sutaq, jo’ laj John ut laj Peter Whitmer, k’a’ru “li q’axalaq nim xloq’al choq’ aawe” sa’ laa yu’am? Tzol’leb’ ut Sumwank 15:4; 16:4). Naq yooqat chirilb’al ru Tzol’leb’ ut Sumwank 15–16, k’oxla k’a’ut naq q’axal nim xloq’al xk’amb’aleb’ aamej rik’in li Kristo. K’a’ru yookat chixb’aanunkil re “xk’amb’aleb’ chaq li aamej” rik’in li Kristo?

Chi’ilmanq ajwi’ Santos, 1:68–71.

K’a’ru jun aj yehol nawom? K’a’ut naq li Qaawa’ naroksiheb’ aj yehol nawom sa’ xk’anjel? (chi’ilmanq 2 Korintios 13:1). K’oxlaheb’ li patz’om a’in naq yookat chirilb’al ru li raatin li Dios reheb’ li oxib’ chi aj yehol nawom sa’ Tzol’leb’ ut Sumwank 17. (Chi’ilmanq ajwi’ “Lix Ch’olob’ahomeb’ li Oxib’ chi aj Yehol Nawom” sa’ lix Hu laj Mormon.) K’a’ru neke’xb’aanu laj yehol nawom li naxtenq’a chixk’eeb’al chi uxmank “lix tiikil ajom” li Dios? (raqal 4).

K’a’ru naru nakach’olob’ xyaalal?

Chi’ilmanq ajwi’ Santos, 1:73–75; “Un día para las eternidades” (video), Biblioteca del Evangelio.

23:10

• Eb’ li jalam-uuch sa’ li tusleb’ aatin a’in naru naxtenq’aheb’ laa kok’al chirilb’al lix k’ojob’ankil wi’chik li Tijonelil re Aaron (chi’ilmanq ajwi’ “Ch’ol 6: K’eeb’il li tijonelil re laj Jose ut laj Oliver,” sa’ Eb’ li Esilal sa’ li Tzol’leb’ ut Sumwank, 26–27, malaj li video sa’ li Biblioteca del Evangelio). Ma taawulaq raj chiruheb’ xyiib’ankil xjalam-uuch li hoonal a’an, a’ yaal li xeril sa’ Jose Smith—Resilal 1:68–74?

  

  2:12

• Naru ajwi’ nakak’ut jun xjalam-uuch laj Jwan aj Kub’sihom Ha’ naq teeril Mateo 3:13–17; Jose Smith—Resilal 1:68–70. K’a’ut naq aajel ru naq li Qaawa’ kixtaqla chaq laj Jwan aj Kub’sihom Ha’ re xk’eeb’al re laj Jose Smith li wankilal sa’ li tijonelil re kub’sink ha’?

• Re xtikib’ankil aatinak chirixeb’ li na’leb’ neke’yeeman sa’ Tzol’leb’ ut Sumwank 13, laa’at ut eb’ laa kok’al naru nekeril junjunq li laaw, ut teeye chan ru naq li laaw neke’tenq’an. Maare naru nakatenq’aheb’ chixtawb’aleb’ li laawil aatin sa’ li tasal 13. K’a’ chik chi aatinul malaj ch’ol aatin sa’ Tzol’leb’ ut Sumwank 13 neke’aatinak chirix li rosob’tesihom li Tijonelil re Aaron? Eb’ laa kok’al naru ajwi’ neke’xk’e reetal chan ru naq li qaChoxahil Yuwa’ nokorosob’tesi rik’ineb’ lix laawil li tijonelil sa’ li video “Las bendiciones del Sacerdocio” (Biblioteca del Evangelio).

• Laj John ut laj Peter Whitmer ke’raj xnawb’al k’a’ru li “q’axalaq nim xloq’al” sa’ xyu’ameb’ (chi’ilmanq Tzol’leb’ ut Sumwank 15:4; 16:4). Maare laa’at ut laa kok’al texruuq chi aatinak chirixeb’ k’a’aq re ru nim xloq’aleb’ choq’ eere. Naq taawil Tzolʼlebʼ ut Sumwank 15:6 malaj 16:6, patz’ reheb’ laa kok’al naq te’xtaqsi li ruq’ naq te’rab’i li k’a’ru naxye li Qaawa’ naq “q’axal nim xloq’al.”

• K’a’ru naraj naxye “xk’amb’aleb’ chaq li aamej rik’in [li Jesukristo]”? Tenq’aheb’ laa kok’al chixtz’iib’ankil chan ru naru neke’wan choq’ ramiiweb’ jalaneb’ chik kristiaan, xwotzb’aleb’ li loq’laj hu rik’in junaq ramiiweb’, malaj tijok chirix anihaq wan jun rajom ru. Laa kok’al naru neke’xsik’ xjalam-uucheb’ li k’a’aq re ru a’in sa’eb’ li hu re li Iglees malaj sa’ li Hu reheb’ li Jalam-uuch re li Evangelio. Malaj naru neke’xyiib’ xjalam-uucheb’. Patz’ reheb’ naq te’xsik’ ru junaq reheb’ li na’leb’ xe’xtz’iib’a li te’xb’aanu. Naru ajwi’ nekeb’icha xkaa raqal li b’ich “Ninnaw naq raabʼilin” (B’ichleb’aal choq’ reheb’ li Kok’al, 42–43).

• Li “Ch’ol 7: Eb’ aj yehol nawom neke’rileb’ li perel ch’iich’ oor” (sa’ Eb’ li Esilal sa’ li Tzol’leb’ ut Sumwank, 31–33, malaj li video sa’ li Bilbioteca del Evangelio) naru naxtenq’aheb’ laa kok’al chi tzolok chirixeb’ li oxib’ chi aj yehol nawom. Chirix rilb’al Tzol’leb’ ut Sumwank 17:5–6, ye reheb’ laa kok’al chan ru nakanaw naq lix Hu laj Mormon tz’aqal yaal. Chan ru naq tooruuq chi wank choq’ aj yehol nawom chirix lix Hu laj Mormon?

  

  4:58