Kenning og sáttmálar 6–9

Vorið 1829 bauð Oliver Cowdery sig fram sem ritara Josephs Smith við áframhaldandi þýðingu Mormónsbókar. Hann heillaðist af þeirri upplifun og velti fyrir sér hvort hann gæti líka hlotið opinberun og gjöf þýðingar. Fyrsta tilraun hans gekk þó ekki vel.

Ef þið hafið einhvern tíma átt í erfiðleikum með að taka á móti eða skilja opinberun, gætuð þið ef til vill tengt við upplifun Olivers – og lært af henni. Þegar þið lesið Kenningu og sáttmála 6, 8 og 9, gætið þá að því sem Drottinn kenndi Oliver um persónulega opinberun. Dæmi:

• Hvað er lagt til í Kenningu og sáttmálum 6:5–7; 8:1; 9:7–8 varðandi það sem Drottinn krefst af ykkur áður en hann opinberar vilja sinn?

• Hvað lærið þið af Kenningu og sáttmálum 6:14–17, 22–24; 8:2–3; 9:7–9 um hvernig opinberun getur borist á ólíka vegu? Hvernig getið þið borið kennsl á hana?

• Hvað annað lærið þið um opinberun af þessum hlutum?

Upplifun Olivers gæti hvatt ykkur til þess að „hugleiða“ þær stundir þegar ykkur hefur fundist Drottinn vera að tala til ykkar (Kenning og sáttmálar 6:22). Hafið þið einhvern tíma skráð hugsanir ykkar eða tilfinningar varðandi slíkar upplifanir? Ef svo er, íhugið þá að lesa það sem þið skrifuðuð. Ef svo er ekki, gefið ykkur þá tíma til að skrifa það sem þið munið eftir. Íhugið hvernig þessar upplifanir geta áfram veitt ykkur styrk. Til að fá hugmyndir, sjá þá boðskap öldungs Neil L. Andersen „Andlega auðkennandi minningar“ (aðalráðstefna, apríl 2020.)

Nokkrir kirkjuleiðtogar hafa miðlað reynslu sinni af opinberun í myndbandaröðinni „Hlýð þú á hann.“ Eftir að hafa horft á eitt eða fleiri þessara myndbanda, gætuð þið fundið fyrir innblæstri til að skrá ykkar eigin reynslu og miðlað því hvernig Drottinn hefur talað til ykkar.

Sjá einnig Topics and Questions, „Personal Revelation,“ Gospel Library; „Oliver Cowdery’s Gift,“ í Revelations in Context, 15–19.

Drottinn vissi að Joseph Smith myndi verða fyrir „erfiðleikum“ á komandi árum (Kenning og sáttmálar 6:18). Hann veit líka hvaða erfiðleika þið upplifið í framtíðinni. Hvað finnið þið í leiðsögn hans til Josephs og Olivers í Kenningu og sáttmálum 6:18–21, 29–37 sem hjálpar ykkur að treysta honum?

Hver finnst ykkur merking þess vera að „[Beina] öllum hugsunum yðar til [Krists]“? (vers 36). Hvernig getið þið gert þetta af stöðugleika – á góðum tímum og í „erfiðleikum“? Hugleiðið þessa leiðsögn frá Russell M. Nelson forseta: „Það er erfitt fyrir hugann að reyna að einblína á hann í sérhverri hugsun. Þegar við þó gerum það, munu efasemdir og ótti hverfa“ („Að færa kraft Jesú Krists inn í líf okkar,“ aðalráðstefna, apríl 2017).

Sjá einnig Neil L. Andersen, „Hugur minn náði tökum á þessari hugsun um Jesú Krist,“ aðalráðstefna, apríl 2023.

Af hverju „[óttumst við stundum] að gjöra gott“? (vers 33). Hvað finnið þið í Kenningu og sáttmálum 6:29–37 sem veitir ykkur hugrekki til að gjöra gott? Íhugið að syngja eða hlusta á sálm sem innblæs hugrekki í Kristi, t.d. „Fylkjum liði“ (Sálmar, nr. 93).

Gætið að því hversu oft orð eins og „þrá“ eða „þrár“ koma fyrir í kafla 6 og 7. Hvað lærið þið af þessum köflum um þá áherslu sem Guð leggur á þrár ykkar? Spyrjið ykkur spurningar Drottins í Kenningu og sáttmálum 7:1: „Hvað þráir þú?“

Ein af réttlátum þrám Olivers Cowdery – að þýða eins og Joseph Smith gerði – uppfylltist ekki. Hvaða hughrif hljótið þið við lestur Kenningar og sáttmála 9:3, 7–14, sem gæti hjálpað ykkur þegar réttlátar þrár ykkar uppfyllast ekki að sinni?

Sjá einnig Kenning og sáttmálar 11:8; Dallin H. Oaks, „Þrá,“ aðalráðstefna, apríl 2011.

• Sannleikurinn sem Oliver Cowdery lærði um persónulega opinberun getur hjálpað börnum ykkar þegar þau þróa hæfni til að bera kennsl á heilagan anda. Þið gætuð notað „5. kafla: Joseph Smith og Oliver Cowdery“ (í Sögur úr Kenningu og sáttmálum, 22–25, eða samsvarandi myndband í Gospel Library) til að kenna þeim um Oliver og það sem hann lærði. Miðlið hvert öðru ykkar eftirlætis hlutum frásagnarinnar. Þegar þið gerið það, skuluð þið leggja áherslu á það sem Drottinn kenndi Oliver um hvernig heyra á rödd Guðs og lesið viðeigandi vers, eins og Kenningu og sáttmála 6:23 eða 9:7–9.

  

  3:11

  

• Þið gætuð líka boðið börnum ykkar að snerta höfuð sitt og brjóst þegar þið lesið orðin „hugur“ og „hjarta“ í Kenningu og sáttmálum 8:2. Segið börnum ykkar af eigin reynslu hvernig það er þegar heilagur andi talar í huga ykkar og hjarta. Hjálpið þeim að finna svör við spurningunni: „Hvernig talar heilagur andi til okkar?“ í þessum versum: Kenning og sáttmálar 6:15–16, 22–23; 8:2; 9:7–9.

• Drottinn sagði við Joseph og Oliver: „Óttast … ekki, litla hjörð“ (Kenning og sáttmálar 6:34). Þið gætuð boðið börnum ykkar að endurtaka þetta orðtak með ykkur nokkrum sinnum. Þau gætu líka haft gaman af því að þykjast vera hjörð hræddra sauða. Hvað gæti sauður óttast? Þið og börn ykkar gætuð síðan horft á mynd af frelsaranum sem hirði (það er ein slík aftast í þessum lexíudrögum) og rætt hvernig hann vakir yfir okkur eins og hirðir vakir yfir sauðum sínum.

• Íhugið að leika eða syngja söng um að finna hugrekki í Kristi, t.d. „Gjör allt þitt rétt“ (Barnasöngbókin, 80) eða „Fylkjum liði“ (Sálmar, nr. 93). Hvað kennir söngurinn okkur um það hvernig frelsarinn hjálpar okkur að óttast ekki?

• Eftir að hafa lesið saman Kenningu og sáttmála 6:36, gætuð þið og börnin ykkar teiknað myndir til að hjálpa ykkur að muna að „[beina] öllum hugsunum … til [Jesú Krists].“ Miðlið hvert öðru teikningum ykkar og hjálpið börnum ykkar að hugsa hvar þau gætu sett þær svo þau sjái þær oft.