“Mêyi a Dipinguluja: Dîku dia Joseph Smith,” Luaku, Undonde—Bua mu Dîku ne mu Ekelezia: Dilongesha ne Bipungidi 2025 (2025)
“Dîku dia Joseph Smith,” Luaku, Undonde—Bua mu Dîku ne mu Ekelezia: Dilongesha ne Bipungidi 2025
Mêyi a Dipinguluja
Dîku dia Joseph Smith
Tudi bonsu balengibua mu ndondu pa nsombelu wa dîku dietu, ne Joseph Smith kavua mushilangana to. Dituishibua ne bienzedi bia ntendelelu ya baledi benda biakakuna mamînu a ditabuija akenza bua Dipinguluja dikumbana. Tshibejibeji tshia Joseph tshidi tshiandika bujadiki ebu: “Miaku ne muakulu [kabiena] bikumbana bua kumvuija dianyisha dindi nadi bua Nzambi bua dimpesha baledi ba kunemeka.”
Mambulula adi alonda a kudi mamuenda, Lucy Mack Smith; ne kudi muanabu muluma William Smith; ne Muambi nkayenda adi atupesha ngumvuilu wa ntendelelu wa nzubu wa Bena Smith.
Dîku dia Joseph Smith, kudi Dan Baxter
Lucy Mack Smith
“[Pabuipi ne 1802], ngakabanga kusama. … Ngakadiambila ne, ntshiena mudilongolola bua kufua bualu ntshiena mumanya njila ya Kilisto, ne mbimuenekela ne kuvua lupongu lua mîdima ne lua nkaya pankatshi panyi ne Kilisto lundi tshiyi mua kuidikija bua kusambuka. …
“Mema kutangila kudi Mukalenga ne kumulomba ne kusengelela Mukalenga bua kukuba moyo wanyi bua ne nkolesha bana ne asamba mutshima wa bayanyi; ne ngakashala mudiolola butuku bujima. … Ngakapunga ne Nzambi [ne] yeya mundekela ne moyo nendienzeja bua kupeta ntendelelu ewu wangangishila bua kumusadila bimpa, nansha mu Bibiliya anyi muaba mukuabu udiye mua kusanganyibua, nansha bu yeya mua kupetshibua mu diûlu ku disambila ne ku ditabuija. Ku ndekelu dîyi diakakula kundi ne diamba, ‘Nukeba ne nenupeta, nukokola ne nebanunzuluila. Mutshima weba wikala musambibua. Udi witabuija Nzambi; udi ungitabuija kabidi.’ …
“kufumina ku diba adi, ngakapeta dikankamana ditungunuka. Kadi mvua ngakula bintu bikesa pa ntendelelu nansha muvuabi biangata meji anyi onsu majima, ne mvua ngela meji ne nengenza ne didienzeja dionsu pa lukasa bua nkeba muntu muakana udi mumanya njila ya Nzambi bua andongesha bintu bia mu diûlu.”
William Smith
“Mamu wanyi, uvua mukaji muakana kupita ne mudifila bikola mu diakalenga dia bana benda, panuapa ne diamomua, wakenzela mishindu yenda yonsu idi dinanga dia buledi imuleja, bua tudiambika mu dikeba dia lupandu luetu lua anyima yetu’, anyi (bu muvua muaku muikala) ‘mu dipeta dia ntendelelu.’ Wakatusuisha bua kubuela mu bisangilu, ne dîku pabuipi ne dionsu diakangisha bualu ebu ne kukeba bulelela.”
“Misangu mivula tuvua ne masambila a mu dîku kukadi mutantshi pandi mua kuvuluka. Ndi mvuluka bimpa ne tatu uvua ne tshibidilu tshia kuvuadika maneta enda ku mpaya wa nkotshi wenda, … ne patuvua tuetu ba baluma tumumona ulenga maneta enda, tuvua tumanya ne tshivua tshimanyishilu tshia disambila dikadi pabuipi, ne tuetu katuyi batshimona, mamu uvua wamba, ‘William,’ anyi mukuabu uvua muena lulengu, ‘ikala pabuipi bua disambila.’ Panyima pa disambila tuvua ne musambu utuvua tuimba.”
Joseph Mukulumpa ne Lucy Smith bakalongesha bana babu bua kulonga mifundu.
Joseph Smith
“Ndi ngamba mpindiewu, ne [tatu wanyi] kavua muenza tshienzedi tshituvua mua kuamba ne katshiena tshiakanangana, mu nsombelu wenda, bua tshindi mumanya. Mvua munanga tatu wanyi, ne divuluka dienda, ne divuluka dia bienzedi bia bunema, ndishala ne bujitu bua bungi mu meji anyi; ne miaku ya bungi yenda ya kalolu ne ya buledi, mmifundibua pa mesa a mutshima wanyi. Bia tshijila kundi, bidi ngenyi yenda indi munanga ya muyuki wa nsombelu wenda, idi mishala mu meji anyi ne mikunyibua momu, ku muenenu wanyi wa katshia ngaledibua. … Mamu wanyi kabidi udi wa ku bakunemeka, ne mulenga wa ku bamamu.”