IMbali—kaJoseph Smith 1:1–26

Injongo yembali kaJoseph Smith yayikukusibeka “ekuqondeni okuyinene” kuba inyaniso ngoJoseph yayisoloko iguqu-guqulwa (IMbali—kaJoseph Smith 1:1). Njengoko ufunda IMbali— kaJoseph Smith 1:1–26, yintoni eyomeleza ubungqina bakho ngobizo lwakhe lobuthixo?

Bona kananjalo Saints, 1:3–19.

Ingaba wawukhe “waswela ubulumko” okanye waziva ubhidekile malunga nesigqibo owawudinga ukusenza? (IMbali—kaJoseph Smith 1:13). Amava uJoseph Smith awaba nawo ngo-1820 angasebenza njengomfuziselo olungileyo kwisityhilelo sakho sobuqu. Ngokomzekelo, njengoko ukhangela IMbali—kaJoseph Smith 1:5–25, funa amava ononxumana kuwo. Yintoni oyifundayo malunga:

• Indlela uJoseph wawalungiselela ngayo amava angcwele emthandazweni? (bona imiqolo 8, 11, 14–15).

• Indima yokufunda izibhalo ekufuneni isityhilelo? (bona imiqolo 11–12).

• Wenza ntoni xa ujamelene nenkcaso? (bona imiqolo 15–16, 21–26).

• Ukwamkela nokwenza ngokweempendulo ozifumanayo? (bona imiqolo 18–25).

Zeziphi iingqiqo ezongezelelweyo onokuzizuza kwinqaku likaMongameli Henry. B.Eyring “The First Vision: A Pattern for Personal Revelation”? (Liyahona,, EyoMdumba 2020, 12–17).

Ungakhangela kananjalo neminye imizekelo kwizibhalo zabantu abanxibelelana noThixo. Imifanekiso ekuyo Incwadi yoMsebenzi woBugcisa beVangeli okanye enye yeencwadi zika Yizani, Nindilandele zinokukunika izimvo. Zama ukuphendula imibuzo edweliswe ngaphambili yomzekelo ngamnye owufumanayo. Ngawaphi amava oke wanawo ufumana iimpendulo kumthandazo? Yintoni onokuyenza ukuze uncede abanye babe namava alungileyo kananjalo?

Bona kananjalo Russel M. Nelson, “Mveni Yena, Liyahona, UCanzibe 2020, 88–92.

UJoseph Smith wayethemba ukuba uThixo wayeya kuwuphendula umthandazo wakhe, kodwa wayengalindelanga ukuba loo mpendulo yayiya kubuguqula njani ubomi bakhe—nehlabathi. Njengoko ufunda ngamava kaJoseph, cingisisa ukuba iziphumo zoMbono wokuQala zibuguqule njani ubomi bakho.

Ngokomzekelo, uMbono Wokuqala watyhila iinyaniso eziliqela malunga uThixo uYise noNyana waKhe, uYesu Krestu, ezazahlukileyo kwezo zazikholelwa ngabantu abaninzi bomhla kaJoseph. Njengoko ufunda IMbali—kaJoseph Smith 1:15–20, cinga ngokubhala phantsi iindlela ezahlukeneyo zokugqibezela ingxelo efana nale: “Ngenxa yokuba uMbono wokuQala wenzeka, ndiyayazi ukuba…”

Ziziphi iimvakalelo onazo njengoko ucingisisa amava kaJoseph nayo yonke into eyavela ngawo?

6:35

Ngelixa lobomi bakhe, uJoseph Smith waye wabhala amava akhe kwiHlathi eliNgcwele kangangamatyeli amane ebuncinaneni, ixesha elininzi esebenzisa umbhali. Ukongezelela, iingxelo ezininzi zabhalwa ngabanye abantu abamva uJoseph ethetha ngombono wakhe. Nangona ezi ngxelo zisahluka kwezinye iinkcukacha, ngokuxhomekeke kumbhali, kubaphulaphuli, nemeko, zona ziyavumelana ngenye indlela. Kwaye ingxelo nganye yongeza iinkcukacha ezisinceda siqonde ngcono amava kaJoseph Smith, kanye njengoko nganye yeeVangeli ezine zeTestamente eNtsha isinceda siqonde ngcono ubulungiseleli boMsindisi.

Emva koMbono wakhe wokuQala ophawulekayo, uJoseph Smith ngokwemvelo wayefuna ukwabelana ngamava akhe nabanye. Inkcaso awajamelana nayo yamothusa. Njengoko ufunda ingxelo yakhe, ingaba yintoni ekuphembelela ekubeni uhlale unyanisekile kubungqina bakho? Yeyiphi eminye imizekelo—evela kwizibhalo, isinyanya, okanye abantu obaziyo—ekunika inkalipho yokuba uhlale unyanisekile kumava omoya othe wabanawo?

• Ukufunda ngobutsha bukaJoseph Smith kunokunceda abantwana bakho banxulumane naye njengoko befunda kumava akhe. Mhlawumbi banokubamba umfanekiso kaJoseph Smith kwaye babelane ngento abayaziyo ngaye. Ukuba kuyimfuneko, unokongeza iinyani ezithile ngaye ezivela kuyo IMbali— kaJoseph Smith 1:3–14. Ngawaphi amava uJoseph amncedayo akawazi ukuzilungiselela ukuba ngumprofeti? Yintoni ekusenokwenzeka ukuba uThixo usilungiselela ukuba siyenze?

  

  3:22

• Cingisisa ngokubonisa abantwana bakho iintlobo ngeentlobo zeencwadi, kuquka nezibhalo. Bancede bona bacinge ngemibuzo enokuphendulwa zezi ncwadi. Emva koko ningafunda kunye IMbali—kaJoseph Smith 1:10–11 ukufumanisa ukuba yeyiphi imibuzo uJoseph Smith awayenayo kwaye zeziphi iimpendulo awazifumanayo kwizibhalo.

• Abantwana bakho banokufumana amagama kumqolo 12 achaza indlela ukufunda uYakobi 1:5 amchaphazela ngayo uJoseph. Emva koko ninokwabelana ngamava omnye komnye apho isicatshulwa sesibhalo saba nempembelelo enamandla kuwe.

• Ukuqala ingxoxo malunga nendlela esinxibelelana ngayo noBawo waseZulwini, mhlawumbi wena nabantwana bakho ningabuzana imibuzo nisebenzisa iindlela ezahlukeneyo zonxibelelwano, njengomyalezo obhaliweyo, umnxeba, okanye inqaku elibhalwe ngesandla. Siyibuza njani imibuzo kuBawo waseZulwini? Simbonisa njani Yena ukuba siyamthanda kwaye siyamzukisa Yena kwimithandazo yethu? Fundani kunye IMbali—kaJoseph Smith 1:16–19 kwaye nixoxe ngendlela uBawo waseZulwini awawuphendula ngayo umthandazo kaJoseph Smith. Wena nabantwana bakho ninokwabelana ngamava xa nicela uncedo kuThixo kwaye nafumana impendulo.

• Abantwana abancinane banokukonwabela ukuma besolule iingalo besenza ingathi yimithi kwiHlathi eliNgcwele ngelixa ubaxelela ngoMbono wokuQala. Cela abantwana baxengaxenge ngathi babethwa ngumoya ngelixa uthetha ngoJoseph ethandaza. Emva koko ke bacele ukuba beme ngxi kwaye bazole xa wena ubaxelela uBawo waseZulwini noYesu babonakala kuJoseph.

• Abantwana abadala bangakonwabela ukusebenzisa umfanekiso omnye okanye ngaphezulu kolu lwandlalo ukuze bakuxelele into abayaziyo ngoMbono wokuQala. Bakhuthaze ukuba babhekiselele kuyo IMbali— kaJoseph Smith 1:14–17 kwaye babelane ngeengcinga zabo neemvakalelo malunga namava kaJoseph.

  

  3:23