Izimvo zokuPhucula ukuFunda eKhaya naseBandleni

Izibhalo zililizwi likaThixo, ngoko ke mcele Yena akuncede ukuba uziqonde.

Zonke izinto zingqina ngoKrestu (bona 2 Nifayi 11:4; Moses 6:63), ngoko ke cinga ngokuqaphela okanye uphawule imiqolo engqina ngoMsindisi, eyenza uthando lwakho lube nzulu kuYe, kwaye efundisa indlela yokumlandela Yena. Ngamanye amaxesha iinyaniso ngoMsindisi nevangeli yaKhe zichazwa ngokuthe ngqo, kwaye ngamanye amaxesha zichazwa ngomzekelo okanye ibali. Zibuze, “Zeziphi iinyaniso zanaphakade ezifundiswayo kule miqolo? Ezi nyaniso zindifundisa ntoni ngoMsindisi?”

Nika ingqalelo kwiingcinga neemvakalelo zakho, nokuba azinxulumelenanga noko ukufundayo. Ezi mvakalelo zingazizinto kanye uBawo waseZulwini afuna ukuba uzifunde.

Zininzi iindlela zokubhala uchukumiso oluzayo njengoko ufunda. Ngokomzekelo, usenokufumanisa ukuba amagama namabinzana athile ezibhalo ayakuchukumisa; ungawaphawula kwaye ubhale iingcinga zakho njengenqaku kwizibhalo zakho. Ungagcina kananjalo ijenali yemihla ngemihla yeengqiqo, yokuva, neemvakalelo ozifumanayo.

Ukuxoxa iingqiqo ezisuka kufundo lwakho lobuqu yindlela elungileyo yokufundisa abanye, kwaye inceda ukomeleza ukuqonda kwakho ngako oko ukufundileyo. Yabelana ngoko ukufundayo namalungu osapho nabahlobo (ngobukho bomntu okanye ngokwedijithali), kwaye ubameme ukuba benze okufanayo.

Cinga ukuba amabali neemfundiso ozifundayo asebenza njani ebomini bakho. Ngokomzekelo, usenokuzibuza, “Ngawaphi amava endiye ndawafumana afana nalento ndiyifundayo?”

Njengoko ufunda izibhalo, imibuzo isenokufika engqondweni. Le mibuzo inganxulumelana noko ukufundayo okanye nobomi bakho jikelele. Cingisisa le mibuzo kwaye ukhangele iimpendulo njengoko uqhubekeka ukufunda izibhalo.

Ukuze uzuze iingqiqo ezongezelelweyo kwimiqolo oyifundayo, sebenzisa imibhalo esemazantsi, IsiKhokelo kwiZibhalo, nolunye uncedo lwezifundo.

Ungafumana iingqiqo ezinentsingiselo ngomhlathi wesibhalo njengoko ucinga ngokwemeko yawo, kuquka neemeko okanye imo osuka kuyo. Ngokomzekelo, ukwazi imvelaphi neenkolelo zabantu uThixo awathetha nabo kunganceda wena uqonde ngcono injongo yamazwi aKhe. Unokufunda malunga nabo ku Saints, Revelations in Context, izihloko zecandelo kwiMfundiso neMinqophiso, nezinye izixhobo.

Funda oko abaprofeti nabapostile bemihla yokugqibela abayifundisileyo ngemigaqo oyifumana kwizibhalo.

Ufundo lwezibhalo akumelanga ukuba lusiphembelele kuphela kodwa kumele kananjalo lusikhokele kutshintsho lwendlela esiphila ngayo. Mamela oko uMoya ukushukumisela ukuba ukwenze njengoko ufunda, kwaye emveni koko wenze ngokwezi mpembelelo.

Iingoma ezicetyiswayo neengoma zabantwana zifumaneka kuyo yonke indawo Yizani, Nindilandele. Sebenzisa umculo ongcwalisekileyo ukumema uMoya kwaye wenze nzulu ukholo lwakho nobungqina beenyaniso zevangeli.

Khetha isiqendu sesibhalo esinentsingiselo kuwe, kusapho lwakho, okanye iklasi yakho, kwaye usinkqaye ngokusiphinda yonke imihla okanye ngokudlala umdlalo wokunkqaya.

Fumana izinto ezinxulumene nezahluko nemiqolo oyifundayo. Cinga indlela into nganye enxulumana ngayo neemfundiso kwizibhalo.

Funda imiqolo ezimbalwa, uze uzobe into ehambelana noko ukufundayo. Okanye unokukhangela umfanekiso kwiNcwadi Yomsebenzi woBugcisa beVangeli okanye kwindawo ethile kwiThala leVangeli. Usenokuthatha umfanekiso obonisa oko ukufundileyo.

Emveni kokufunda ibali, mema usapho okanye amalungu eklasi ukuba alilinganise. Emva koko, thetha ngendlela ibali elidibana ngayo nezinto ohlangabezana nazo.

Ukuba unamalungu osapho angafuni ukuthatha inxaxheba kufundo lwezibhalo zosapho, khangela ezinye iindlela zoku qhagamshelana nabo. Ngokomzekelo, ngaba unokwabelana ngenyaniso engunaphakade ngokwemvelo kwiincoko zakho okanye wabelane ngesibhalo esinentsingiselo ngendlela engabonakali ishumayela okanye igqithisela? Ufundo lwezibhalo aludingi ukuba kukhangeleke ngokufanayo kuzo zonke iintsapho. Abanye abantwana banokuphendula ngcono kufundo lwezibhalo lomnye ngamnye. Thandaza kwaye ulandele uchukumiso loMoya.