Ide pou Amelyore Aprantisaj nan Fwaye ak nan Legliz

Ekriti yo se pawòl Bondye, se pou w mande L pou l ede w konprann yo.

Ekriti yo anseye nou ke tout bagay temwanye konsènan Kris la (gade nan 2 Nefi 11:4; Moyiz 6:63), konsa, konsidere pou w note oubyen make vèsè ki temwaye konsènan Sovè a, ki apwofondi amou ou pou li, epi ki anseye kijan pou w suiv Li yo. Pafwa yo deklare verite levanjil yo (ke yo souvan rele doktrin oswa prensip) klèman, epi pafwa yo anseye yo atravè yon egzanp oubyen yon istwa. Mande tèt ou: “Ki verite etènèl ki anseye nan vèsè sa yo?” Kisa vèsè sa yo anseye nou konsènan Senyè a?

Pote atansyon a panse ak santiman w yo, menm si yo pa gen rapò avèk sa w ap li a. Enpresyon sa yo se kapab sa Pè Selès la vle pou w aprann.

Gen anpil fason pou w ekri enpresyon ou resevwa pandan w ap etidye yo. Paregzanp, ou ka reyalize kèk pawòl ak fraz nan ekriti yo ki enpresyone ou; ou ta ka make yo epi ekri panse ou kòm yon nòt nan ekriti yo. Ou ta kapab fè yon jounal kote w ap ekri ide, panse, ak enpresyon w resevwa yo.

Diskite ide ou jwenn nan etid pèsonèl ou yo se yon bon fason pou w anseye lòt moun ak ede ranfòse konpreyansyon w sou sa w li yo tou. Pataje sa w ap aprann avèk manm fanmi ak zanmi yo (an pèsòn oubyen dijitalman), epi envite yo pou yo fè menm jan an.

Reflechi sou kijan istwa ak ansèyman w ap li yo aplike nan lavi w. Paregzanp, ou ta ka mande tèt ou, “Ki eksperyans mwen fè ki sanble avèk sa m ap li a?”

Pandan w ap etidye ekriti yo, kesyon ka vin nan lespri w. Kesyon sa yo gen dwa gen rapò avèk sa w ap li a oubyen avèk lavi w an jeneral. Medite sou kesyon sa yo epi chèche repons pou yo pandan w ap kontinye etidye ekriti yo.

Pou w ka gen ide adisyonèl sou vèsè w ap li yo, itilize nòt ki anba paj yo, Gid pa Sijè a, Diksyonè Bib la, Gid Ekriti yo, ak lòt èd pou etid yo.

Ou ka jwenn ide siyifikatif sou yon pasaj ekriti lè w konsidere kontèks li, ansanm avèk sikonstans oubyen pozisyon kote l sòti a. Paregzanp, paske w konn antesedan ak kwayans yon pèp yon pwofèt ap pale, sa ka ede w konprann ki objektif pawòl li yo vize. Ou ka aprann konsènan yo nan Les Saints, Révélation dans leur contexte, antèt seksyon nan Doktrin ak Alyans yo, ak lòt resous.

Li sa pwofèt ak apot dènye jou yo anseye sou prensip w jwenn nan ekriti yo.

Etid ekriti yo dwe non sèlman enspire nou men tou sa dwe fè nou chanje fason n ap viv. Koute sa Lespri a enspire w pou w fè pandan w ap li a, epi apre sa, aji daprè enspirasyon sa yo.

Nou jwenn kantik ak chante pou timoun yo toupatou Vini, Suiv Mwen. Itilize mizik ki sakre

Seleksyone yon pasaj ekriti ki enpòtan pou fanmi w epi mande yo pou yo memorize li kote y ap repete l chak jou oubyen y ap jwe yon jwèt memwa.

Chèche objè ki anrapò avèk chapit ak vèsè n ap li yo. Konsidere fason chak objè gen relasyon avèk ansèyman ki nan ekriti yo.

Li kèk vèsè, epi apre, desine yon bagay ki gen relasyon avèk sa ou li a. Oubyen ou ta ka chèche yon foto nan Liv Ilistrasyon Levanjil la oubyen yon lòt kote nan Biblyotèk Levanjil la. Ou ta ka pran yon foto tou ki ilistre sa w te aprann nan.

Lè w fin li yon istwa, envite manm fanmi yo pou yo jwe wòl istwa a. Apre sa, pale sou fason istwa a anrapò avèk sa w ap eksperimante a.

Si ou gen manm fanmi ki pa vle patisipe nan etid ekriti familyal la, chèche lòt fason pou w konekte avèk yo. Paregzanp, èske w ta ka pale de levanjil la tou natirèlman nan konvèsasyon ou oubyen pataje yon ekriti siyifikatif nan yon fason ki pa sanble w ap preche oubyen depase limit? Etid ekriti a pa oblije sanble menm bagay nan chak fanmi. Kèk timoun ka pi byen reyaji nan etid ekriti w fè avèk yo pèsonèlman. Priye epi suiv enspirasyon Lespri a.