“Yusim Kam , Bihainim Mi—Bilong Haus na Sios,” Kam, Bihainim Mi—Bilong Haus na Sios: Doktrin na ol Kavanen 2025 (2025)
“Yusim Kam, Bihainim Mi—Bilong Haus na Sios,” Kam, Bihainim Mi—Bilong Haus na Sios: 2025
Yusim Kam, Bihainim Mi—Bilong Haus na Sios
Dispela Risos Em bilong Husat?
Dispela risos em bilong husat i laik lainim long Doktrin na ol Kavanen—em yet, olsem famili, na insait long klas long Sios. Sapos yu ino bin save stadim ol skripsa bipo, dispela risos ken helpim yu long stat. Sapos yu gat gutpela pasin long stadim skripsa pinis, dispela risos bai helpim yu long gat moa ekspiriens na moa mining.
Ol Wanwan Manmeri na Ol Famili long Haus
Gutpela ples long lainim gospel em insait long haus. Ol tisa bilong yu long sios i ken sapotim yu, na yu ken kisim helpim long ol narapela wod memba. Tasol long stap strong long spirit, yu na famili i nidim gutpela kaikai bilong wanwan de i kam long “dispela gutpela tok bilong God” (Moronai 6:4; lukim tu Russell M. Nelson, “Opening Remarks,” Liahona, Nov. 2018, 6–8).
Yusim dispela risos long wei bai helpim yu. Dispela autlain i soim sampela toktru bilong oltaim i stap insait long Doktrin na ol Kavanen. Ol i givim tu ol tingting na ektiviti long helpim yu stadim ol skripsa yu yet o wantaim famili o ol prens bilong yu. Taim yu stadi, bihainim gaidens bilong Spirit long painim ol toktru bilong oltaim i gat mining long yu. Lukluk na painim ol toksave i kam long God bilong yu, na bihainim ol promting yu kisim.
Ol Tisa na ol lain i Lainim long Sios.
Sapos yu tisim praimeri klas, wanpela yut o adalt Sande Skul klas, wanpela Aronik Prishud kwarum, o wanpela Yang Woman klas, yu mas yusim ol dispela autlain long ol dispela risoses taim yu redim yu yet long tis. Kam, Bihainim Mi—Bilong Haus na Sios em i samting bilong lainim long Sande klas. Ol tingting bilong lainim insait long dispela risos em bilong lainim long haus na long sios. Taim yu redi long tis, stat wantaim ol ekspiriens bilong yu yet long ol skripsa. Bikpela hap bilong yu long redi em bai kamap taim yu lukluk long ol skripsa na painim gutpela tingting long Holi Gos. Yu ken stadim tu ol nids bilong ol lain pipol yu tisim i stap long tingting. Painim ol toktru bilong oltaim. Kam, Bihainim Mi i ken helpim yu luksave long ol sampela toktru na lainim hau yu ken aplaim ol skripsa long laip bilong yu.
Tingim olsem lainim gospel, i moa beta, stap insait long haus na i gat sapot bilong Sios. Em olsem, bikpela wok bilong yu em long sapotim ol pipol yu tisim long hat wok bilong ol long lainim gospel insait long haus bilong ol yet. Noken wari sapos yu gat samting i narakain long givim ol long klas. Givim ol dispela opotuniti long serim ol ekpiriens, tingting na askim ol i gat long ol skripsa ol i ritim long haus. Invaitim ol long serim ol toktru ol i painim. Dispela em i moa impoten na long lukim olgeta samting i stap insait.
Ol Yut na Adalt Sande Skul Klas
Wanpela bikpela as long yumi save bung long Sande Skul klas em long sapotim wanpela narapela taim yumi traim long bihainim Jisas Krais. Wanpela isi wei long mekim dispela em long askim kwesten olsem “Wanem samting Holi Gos i tisim yu dispela wik taim yu stadim ol skripsa wantaim Kam , Bihainim Mi?” Ol ansa long dispela kwesten bai lidim yupela igo long ol diskasen i gat mining long bildim feit bilong yupela long Jisas Krais na gospel bilong Em.
Bihain bai yu ken invaitim ol diskasen long ol tingting bilong mekim stadi insait long Kam, Bihainim Mi. Kain olsem, wanpela stadi aidia bai givim tingting long lukluk long Doktrin na ol Kavanen 19: 15–20, painim hau Seivia i bin toktok long hevi Em i karim. Yu ken askim ol klas memba long se hau ol i pilim taim ol i ritim long bikpela sekripais Seivia i bin karim na toktok long hau dispela mekim yumi tingting long Em. O yu ken givim sampela taim long ol long stadim ol dispela ves olsem klas.
Ol Aronik Prishud Kwarum na Yang Women Klas
Taim Aronik Prishud Kwarum na Yang Women klas i bung long ol Sande, as bilong bung i narapela kain liklik long Sande Skul klas. Wantaim long helpim wanpela narapela lainim gospel bilong Jisas Krais, ol dispela grup tu bai bung long kaunsel wantaim long mekim wok bilong salvesen na eksaltesen (lukim Jeneral Henbuk: Sevis insait long Sios bilong Jisas Krais bilong ol Seint long Las de, 1.2), bihainim daireksen i kam long klas o kwarum presidensi.
Long dispela as, wanwan kwarum o klas miting i mas statim wantaim wanpela memba bilong kwarum o klas presidensi i lidim diskasen long ol wok bilong ol. Olsem eksampel, stap insait long gospel, minista long ol pipol i gat nid, serim gospel, o tek pat long temple na famili histori wok.
Bihain long dispela taim bilong kaunseling wantaim, wanpela instrakta bai lidim klas o kwarum long lainim gospel wantaim. Ol Adalt lida o memba bilong klas o kwarum ken kisim asainmen long tis. Klas o kwarum presidensi, bai toktok wantaim ol adalt lida, na mekim ol dispela asainmen.
Ol lain i kisim asainmen long tis imas redi wantaim ol tingting bilong lainim istap long wikli autlain bilong Kam, Bihainim Mi. Long wanwan autlain, dispela sain i soim ektiviti we i gutpela moa long ol yut na i go wantaim ol samting ol i lainim long seminari. Tasol, ol narapela tingting istap long autlain bai yu ken yusim olsem ektiviti bilong lainim ol yut.
Long sempel ajenda bilong ol kwarum na ol klas miting, lukim appendix D.
Praimeri
Redi bilong yu long tisim Praimeri i stat taim yu stadim ol skripsa yu yet na wantaim famili bilong yu. Taim yu mekim, openim tingting bilong yu long kisim gutpela tingting long Holi Gos long helpim ol pikinini insait long Praimeri klas bilong yu. Yu mas pre. Pre, na Spirit ken kirapim tingting bilong yu wantaim ol wei long helpim ol long lainim gospel bilong Jisas Krais.
Taim yu redi long tis, yu bai kisim planti gutpela tingting taim yu painim ol aidia long tis insait long dispela risos. Wanwan autlain long Kam, Bihainim Mi—Bilong Haus na Sios i gat seksen wantaim taitel “Ol Aidia bilong Tisim ol Pikinini.” Tingting long ol dispela aidia olsem ol wei long kirapim tingting bilong yu. Yu save long ol pikinini insait long praimeri klas bilong yu—na yu bai save gut moa long ol taim yu toktok wantaim ol long klas. God i save long ol tu, na Em bai kirapim bel bilong yu wantaim ol gutpela rot long tisim na blesim ol.
Ol pikinini long klas bilong yu i mas mekim pinis ol ektiviti insait long Kam, Bihainim Mi wantaim ol famili bilong ol. Em i Orait. Ripitim i gutpela. Yu ken invaitim ol pikinini long serim wanem ol lainim long haus. Yu mas plenim ol wei bilong ol pikinini long tek pat maski sapos ol ino lainim long haus. Ol pikinini i lainim ol gospel toktru moa gut taim ol i lainim klostu klostu na thru long ol sampela kain ektiviti. Sapos yu painim olsem wanpela ektiviti i moa gut long lainim bilong ol pikinini, tingim long mekim klostu klostu, moa yet taim yu tisim ol pikinini i yangpela tru.
Long ol mun i gat faipela Sande, ol Praimeri tisa i ken riplesim plen bilong tis Kam, Bihainim Mi autlain bilong namba faip Sande wantaim wanpela o moa ektiviti bilong lainim i stap long “Apendix B: Bilong Praimeri—Redim ol Pikinini bilong laiptaim long Kavanen Rot bilong God.”