გამოყენება: მოდი და გამომყევი — სახლისთვის და ეკლესიისთვის

ერთ-ერთი მთავარი მიზეზი, რის გამოც საკვირაო სკოლის გაკვეთილებზე ვიკრიბებით, არის ერთმანეთის მხარდაჭერა და გამხნევება იესო ქრისტეს შეცნობისა და მისი მიყოლის სწრაფვაში. ამის გაკეთების მარტივი გზაა ისეთი კითხვის დასმა, როგორიცაა: „რა გასწავლათ სულიწმინდამ ამ კვირაში, როდესაც წმინდა წერილებს მოდი და გამომყევი-ს მასალასთან ერთად სწავლობდით“? ამ კითხვაზე პასუხებმა შეიძლება გამოიწვიოს მნიშვნელოვანი დისკუსიები, რომლებიც ამყარებს რწმენას იესო ქრისტესა და მისი სახარების მიმართ.

შემდეგ კი, მოდი და გამომყევი-ში შეთავაზებულ სასწავლო იდეებზე დაყრდნობით, შეგიძლია შესთავაზო დისკუსია. მაგალითად, სწავლის იდეამ შესაძლოა შემოგთავაზოს მოძღვრება და აღთქმები 19:15–20-ს შესწავლა, რათა მოიძიო, როგორ აღწერა ჩვენმა მხსნელმა საკუთარი ტანჯვა. შეგიძლია მოსწავლეებს სთხოვოთ გააზიარონ, რას გრძნობდნენ, როცა მის აღწერას კითხულობდნენ და ისაუბრონ იმაზე, თუ რა გავლენა იქონია ამან მის მიმართ მათ წარმოდგენაზე. ან შეგიძლია გარკვეული დრო დაუთმო ამ მუხლების გაკვეთილზე შესწავლას.

აარონის მღვდლობის ქვორუმებისა და ახალგაზრდა ქალების კლასების საკვირაო გაკვეთილების მიზანი გარკვეულწილად განსხვავდება საკვირაო სკოლის გაკვეთილებისგან. გარდა იმისა, რომ ეს ჯგუფები ერთმანეთს ეხმარებიან იესო ქრისტეს სახარების შესწავლაში, ისინი ასევე იკრიბებიან, რათა ერთად მიიღონ რჩევები ხსნისა და ამაღლების საქმის შესრულების შესახებ (იხ. ზოგადი მითითებების სახელმძღვანელო: უკანასკნელ დღეთა წმინდანთა იესო ქრისტეს ეკლესიაში მსახურება, 1.2), მათი კლასის ან ქვორუმის პრეზიდენტობის მითითებით.

ამ მიზეზით, ქვორუმის ან კლასის ყოველი შეხვედრა უნდა დაიწყოს იმით, რომ ქვორუმის ან კლასის პრეზიდენტობის წევრი წარმართავს დისკუსიას მათი ძალისხმევის შესახებ. მაგალითად, შეუძლიათ იმსჯელონ სახარების მიხედვით ცხოვრებისთვის გაწეულ ძალისხმევაზე, საჭიროების მქონე ადამიანებისთვის მსახურებაზე, სახარების გაზიარებაზე ან სატაძრო და ოჯახური ისტორიის საქმეში მონაწილეობის შესახებ.

ერთობლივი მსჯელობის შემდეგ, ინსტრუქტორი ქვორუმთან ან კლასთან ერთად იწყებს სახარების შესწავლას. სწავლებისათვის შეიძლება დაინიშნონ ზრდასრული ხელმძღვანელები ან კლასისა ან ქვორუმის წევრები. ამ დანიშვნებს ახორციელებს კლასისა ან ქვორუმის პრეზიდენტობა, ზრდასრულ ხელმძღვანელებთან თათბირის შემდეგ.

სწავლებისთვის დანიშნული პირები უნდა მოემზადონ გაკვეთილისთვის. ამისთვის კი უნდა გამოიყენონ მოდი და გამომყევი-ში მოცემული სასწავლო შემოთავაზებები, რომლებიც მოცემულია მის ყოველკვირეულ მონახაზში. თითოეულ მონახაზში ეს ხატულა მიუთითებს ღონისძიებაზე, რომელიც განსაკუთრებით ეხება ახალგაზრდებს და შეესაბამება იმას, რასაც ისინი სემინარიაში სწავლობენ. თუმცა, მონახაზში მოცემული ყველა შეთავაზება შეგიძლია გამოიყენო, როგორც სასწავლო ღონისძიება ახალგაზრდებისთვის.

ქვორუმისა და კლასის შეხვედრების დღის წესრიგის ნიმუში იხილეთ „დ“ დანართში.

დაწყებითი საზოგადოების სწავლებისთვის შენი მომზადება იწყება ინდივიდუალურად და ოჯახთან ერთად წმინდა წერილების შესწავლისას. ამ პროცესში იყავი ღია სულიერი შთაბეჭდილებებისა და სულიწმინდისგან კარნახისთვის შენი დაწყებითი საზოგადოების კლასის ბავშვების შესახებ. მუდამ ილოცე. სულიწმინდას შეუძლია შთაგაგონოს იდეები, რომლებიც დაეხმარება მათ, ისწავლონ იესო ქრისტეს სახარება.

როდესაც სწავლებისთვის ემზადები, შესაძლოა მიიღო დამატებითი შთაგონება წინამდებარე რესურსში მოცემული სწავლების იდეების შესწავლით. რესურსში მოდი და გამომყევი — სახლისთვის და ეკლესიისთვის მოცემულ თითოეულ მონახაზს აქვს განყოფილება სახელწოდებით „იდეები ბავშვების სწავლებისთვის“. მიიღე ეს იდეები როგორც შენი შთაგონების გაღვივების შეთავაზებები. შენ იცნობ დაწყებითი საზოგადოების კლასის ბავშვებს და კიდევ უფრო უკეთ გაიცნობ მათ გაკვეთილზე ინტერაქციის საშუალებით. მათ ღმერთიც იცნობს და ის შთაგაგონებს მათი სწავლებისა და დალოცვის საუკეთესო ხერხით.

შენი კლასის მოსწავლეებს შეიძლება ოჯახთან ერთად შესრულებული ჰქონდეთ მოდი და გამომყევი -ში მოცემული ზოგიერთი ღონისძიება. არა უშავს. გამეორება კარგია. წაახალისე ბავშვები, ერთმანეთს გაუზიარონ სახლში ნასწავლი. შენ ასევე უნდა დაგეგმო ბავშვების მონაწილეობის გზები, მაშინაც კი, თუ ისინი სახლში არ სწავლობენ. ბავშვები უფრო ეფექტურად სწავლობენ სახარების ჭეშმარიტებებს, როდესაც ეს ჭეშმარიტებები მრავალჯერ ისწავლება სხვადასხვა აქტივობების მეშვეობით. როცა ამჩნევ, რომ სასწავლო აქტივობა ეფექტურია ბავშვებისთვის, იფიქრე ამ აქტივობის გამეორებაზე, განსაკუთრებით მაშინ, როცა შედარებით პატარებს ასწავლით.

თვეებში, რომლებიც ხუთი კვირადღისგან შედგება, მასწავლებლებს ურჩევენ, შეცვალონ მეხუთე კვირას მოდი და გამომყევი -ში მოცემული მონახაზი ერთი ან მეტი სასწავლო ღონისძიებით, რომელიც მოცემულია აქ: „„ბ“ დანართი: დაწყებითი საზოგადოებისთვის — მოვამზადოთ ბავშვები, მთელი ცხოვრების მანძილზე ღვთის აღთქმის გზაზე სასიარულოდ“.