1 Nifais 16–22

Nifais tsev neeg tau raug tej teeb meem nyuaj heev—ib yam li peb txhua tus. Koj kawm dab tsi los ntawm Nifais txog kev ntseeg Yexus Khetos thaum raug xwm txheej nyuaj heev? Nyeem txog tej yam nws tau ua nyob hauv 1 Nifais 16:17–32; 16:34–39; 17:7–16; 18:1–4; thiab 18:9–22. Xav seb koj puas sau ntawv txog tej yam uas koj kawm hauv qab tej lus saum toj li no: “Teeb Meem,” “Nifais Ua Li Cas,” thiab “Tus Tswv Pab Li Cas.” Koj kawm dab tsi txog tej yam koj ua tau thaum koj raug teeb meem?

Tom qab koj kawm txog Nifais thiab nws tsev neeg, tej zaum koj yuav xav sau ntawv ntxiv rau daim uas koj sau tej lus no saum toj: “Kuv tej Teeb Meem,” “Kuv Yuav Ua Li Cas,” thiab “Tus Tswv Yuav Pab Kuv Li Cas.” Thaum koj ua li ntawd, koj qhia tej nqe vaj lug kub li no los tau: Mathais 11:28–30; Yauhas 14:26–27; Mauxiyas 24:13–15. Ib zaj nkauj xws li “Kev Kaj Siab Nyob Qhov Twg?” (Cov Nkauj Qhuas Vajtswv, zaj 47), pab tau kom txhawb koj txoj kev ntseeg tus Cawm Seej thiab Nws txoj kev pab thaum raug kev sim siab.

Kuj saib Anthony D. Perkins, “Nco Ntsoov Koj Haiv Neeg Ntseeg uas Raug Txom Nyem, Auj Peb tus Vajtswv,” Liahona, Kaum Ib Hlis Ntuj 2021, 103–5; “He Will Give You Help,” “The Lord Guides Lehi’s Journey,” “The Lord Commands Nephi to Build a Ship,” thiab “Lehi’s Family Sails to the Promised Land” (cov vidi-aus), Txoj Moo Zoo cov Ntawv; “Life Help,” Txoj Moo Zoo cov Ntawv.

Thaum Vajtswv coj Lihais tsev neeg mus rau hauv roob moj sab qhua, Nws tsis tau muab ib daim qhia kev rau lawv kom paub mus txhua qhov chaw. Tiam sis, Nws twb muab lub Liyahaunas rau lawv kom coj lawv kev txhua hnub. Thaum koj nyeem 1 Nifais 16:10–16, 23–31 thiab 18:11–22, xav seb puas sau tej yam tseeb uas qhia tias Vajtswv ua li cas kom coj Nws cov me nyuam (piv txwv hais tias, 1 Nifais 16:10 qhia tias tej lub sij hawm siv tej yam kom coj peb uas tsis yog raws li peb xav). Koj pom tias lub Liyahaunas thiab tus Vaj Ntsuj Plig Dawb Huv zoo sib thooj li cas? Nws tau ua “tej yam me me” twg thiaj li ua rau koj txais tau “tej yam tseem ceeb” hauv koj lub neej?

Kuj saib Amas 37:7, 38–47; Lus Qhuab Qhia thiab Kev Khi Lus 64:33–34.

Txawm yog Nifais thiab nws cov tij laug tau raug teeb meem ib yam hauv roob moj sab qhua, lawv nyias muaj nyias tej kev xav. Tej zaum koj yuav xav muab Nifais zaj uas hais txog kev taug mus hauv roob moj sab qhua (saib 1 Nifais 17:1–6) piv rau nws ob tug tij laug zaj (saib 1 Nifais 17:17–22). Nifais paub los sis ua dab tsi nws thiaj li rau siab ntseeg? Xav seb koj puas sau ntawv txog ib lub sij hawm thaum koj txoj kev ntseeg thiab kev ris txiaj tau pab koj nyiaj dhau kev sim siab. Koj tau xav los sis kawm dab tsi los ntawm qhov no?

Kuj saib Amy A. Wright, “Khetos Kho Yam Twg uas Puas Lawm,” Liahona, Tsib Hlis Ntuj 2022, 81–84; “No Strength without Struggle” (vidi-aus), Txoj Moo Zoo cov Ntawv.

Vim twb sau cov vaj lug kub ntev tas los lawm, ntshe ua rau peb xav tias cov vaj lug kub tsis muaj nqis rau peb niaj hnub no. Tiam sis Nifais paub zoo. Nws hais tias, “Kuv tau muab tag nrho tej vaj lug kub coj los piv rau peb, kom thiaj muaj nqis rau peb thiab kom peb kawm tau” (1 Nifais 19:23). Nov yog vim li as Nifais nrhiav tau lub hwj chim rau nws sab ntsuj plig heev nyob hauv cov vaj lug kub.

Xav txog tej lus nug zoo li hais nram qab no thaum koj nyeem 1 Nifais 20–22:

1 Nifais 20:1–9.Tej nqe no qhia dab tsi rau peb txog cov neeg nyob hauv Yaxayas lub caij nyoog? Koj kawm dab tsi uas koj siv tau?

1 Nifais 20:17–22.Tej nqe no qhia dab tsi rau koj txog qhov uas Leej Txiv Saum Ntuj Ceeb Tsheej tau coj cov neeg hauv Yaxayas lub caij? Nws ua li cas kom caw koj coj raws li Nws?

Koj kawm dab ntsis ntxiv nyob hauv 1 Nifais 20–22 uas koj yuav “piv rau” koj tus kheej?

• Yog tias koj muaj ib lub twj qhia kev, ib daim qhia kev, los sis lwm yam uas pab peb nrhiav txoj kev, tej zaum koj yuav xav muab rau koj cov me nyuam saib. Tej zaum ua li no yuav pab nej xav sib tham txog lub Liyahaunas, uas hais txog nyob hauv 1 Nifais 16:10, 28–29. Muaj tej yam twg uas ua rau ib lub twj qhia kev los sis ib daim qhia kev khiav tsis zoo? Vim il cas lub Liyahaunas tsis tau khiav zoo rau Lihais tsev neeg? (saib 1 Nifais 18:9–12, 20–22). Leej Txiv Saum Ntuj Ceeb Tsheej tau muab dab tsi rau peb kom coj peb rov qab mus cuag Nws?

• Kom pab koj cov me nyuam siv tej yam uas lawv kawm txog lub Liyahaunas nyob hauv 1 Nifais 16:10, 26–31; 18:8–22, tej zaum koj yuav xav caw lawv xav txog ib txoj kev txiav txim uas tseem ceeb los sis nyuaj. Vajtswv tau muab dab tsi rau peb niaj hnub no uas zoo li lub Liyahaunas? (Saib, ua piv txwv, Amas 37:38–44.) Xav seb koj puas qhia txog ib lub sij hawm thaum Leej Txiv Saum Ntuj Ceeb Tsheej tau coj koj kev.

• Thaum koj nyeem 1 Nifais 16:21–32 ua ke, pab koj cov me nyuam kawm tias Nifais tus yam ntxwv tau ua rau nws tsev neeg tau koob hmoov (kuj saib qhov vidi-aus “The Lord Guides Lehi’s Journey” [Txoj Moo Zoo cov Ntawv]). Tej zaum yog koj ua li no ces yuav pab nej sib tham txog qhov uas peb yuav tsum ua li cas kom ua neeg zoo li Nifais. Caw koj cov me nyuam npaj ib yam dab tsi uas lawv ua taus kom coj yam ntxwv zoo rau lawv tsev neeg pom.

• Cov me nyuam nyiam hais dab neeg. Tej zaum koj yuav xav caw lawv pab koj hais dab neeg txog qhov uas Vajtswv tau txib Nifais ua ib lub nkoj (saib 1 Nifais 17:7–19; 18:1–4; kuj saib “Chapter 7: Txua lub Nkoj,” nyob hauv Cov Dab Neeg hauv Phau Ntawv Maumoos, 21–22; los sis qhov vidi-aus “The Lord Instructs Nephi to Build a Ship” [Txoj Moo Zoo cov Ntawv]). Tej zaum lawv yuav xav hu nqe ob ntawm zaj nkauj “Nephi’s Courage” (Children’s Songbook, 120–21). Muaj dab tsi uas pab Nifais ua siab loj thaum nws ob tug tij laug thuam nws vim nws yuav ua ib lub nkoj?

• Nifais tsis tau paub ua ib lub nkoj, nws thiaj li tso siab rau tus Tswv tej lus qhia. Tom qab nrog koj nyeem 1 Nifais 18:1, tej zaum koj cov me nyuam yuav xav ua phab ntawv ntxim ua rau lub lim tiam no. Thaum lawv ua li ntawd, nrog lawv sib tham txog qhov uas Leej Txiv Saum Ntuj Ceeb Tsheej pab peb ua tej yam nyuaj, ib yam li Nws tau pab Nifais.