Ewi Wāween Aō Bōk Koņaaō ilo Aiintok eo an Israel?

Ro ilo doulul eo ak kūlaaj eo am̧ remaron̄ jeļā juon men kōn eddo ko aer kōn kōm̧m̧ane jerbal in mijenede im jerbal in tampeļ im menmenbwij an baam̧le. Bōtaab eļan̄n̄e kwoj kōnono n̄an er kōn aintok Israel, remaron̄ jab jeļā ta eo kwoj kōnono kake. Ekōjkan am̧ maron̄ jipan̄ er meļeļe bwe kwaļo̧k gospel eo, kappukōt bwebwenato eo an baam̧le eo aer, im kōm̧m̧ani kain̄i ko ilo tampeļ rej m̧ōttan juon jerbal eļapļo̧k an aintok Israel ilo m̧aanjabpopo n̄an Itok Eo Kein Karuo an Rilo̧mo̧o̧r eo.

Ro kwoj katakin emaron̄ kar m̧ōj aer ekkatak būrabōļ eo kōn wiit eo im tare ko ilo Katak im Bujen Ko 86, eo ej katakin kōn aiintok doon an Israel ilo raan ko āliktata. Ilo am̧ riiti jekjōn in, kajjieon̄ pijaikļo̧k armej ro ilo doulul eo ak kūlaaj eo am̧ āinwōt rijerbal ko ilo meļaaj eo an Irooj. Ekōjkan am̧ naaj jipan̄ er en̄jake lan̄lōn̄ eo me ej itok jān bōk koņaan ilo jerbal in eļap? N̄an ekkatak eļapļo̧k kōn unin kōnono in, ekkatak ennaan eo an Russell M. Nelson im Sister Wendy W. Nelson “Hope of Israel” ([worldwide youth devotional, June 3, 2018], juon dam̧oļo̧k in kein jipan̄ n̄an New Era im Ensign, ChurchofJesusChrist.org).

Komaron̄ jino kōn kajjitōk ippān ro uwaan kūlaaj eo kajjitōk ko āinwōt kein: Ta eo eaorōk n̄an kwe ilo am̧ riiti Katak im Bujen Ko 86 ilo m̧weo? Ta eo kwar ekkatak kōn jerbal eo an ajri ro nejin Anij ilo raan ko āliktata? Ta eo jej kōm̧m̧ane n̄an bōk koņaad ilo jerbal in? Itulaļ rej dam̧oļo̧k in ļōmņak ko n̄an im̧we doulul eo ak kūlaaj eo am̧ n̄an bōk koņaan ilo aiintok doon an Israel.

• Kajjitōk ippān ro uwaan doulul eo ak kūlaaj eo am̧ ta eo rej ļōmņak kake n̄e rej ron̄ naan eo “aintok Israel.” Eļan̄n̄e rej aikuj jipan̄, kwaļo̧k bwe ren riiti meļeļe in jān Būreejtōn Russell M. Nelson: “Aintok Israel ej meļeļe in leļo̧k gospel eo an Jisōs Kraist n̄an ajri ro nejin Anij jim̧or ilo rejet ko jim̧or an rōn̄ōl nuknuk eo me raar jab kōm̧m̧ani bujen ko rekanooj aorōk ippān Anij ak kar kab bōk kain̄i ko aer remenin aikuj. Aolep ajri nejin Jemādwōj Ilan̄ rej aikuj bōk iien eo em̧m̧an n̄an kāālet n̄an ļoor Jisōs Kraist, n̄an bōke im bōk gospel eo An kōn aolepān kōjeraam̧m̧an ko an” (“Hope of Israel,” 11–12). Ekōjkan an meļeļe in jelet wāween an ļōmņak kōn aorōk in jerbal in aer?

• N̄an jipan̄ ro uwaan doulul eo ak kūlaaj eo am̧ lo ekōjkan an būrabōļ eo kōn wiit im tare ko jerbal n̄an er, komaron̄ je naan ko jān Katak im Bujen Ko 86 ioon boot eo. Naan kein remaron̄ in kōmeļeļeik kakōļļe ko ilo būrabōļ eo—ko āinwōt “rikalbwin ine eo,” “tā ko rej bauti im m̧anļo̧k wūt,” “juļ eo ej jebar,” im “ainitok eo an wiit ko” (eoon 2–4, 7). Naan ko remaron̄ barāinwōt kōmeļeļe ko an kakōļļe kein—ko āinwōt “Rijilōk ro,” “Būj Jān Tōmak eo,” “Jepļaaktok eo,” im “jerbal in mijenede.” Innām ro uwaan doulul eo ak kūlaaj eo remaron̄ jerbal ippān doon n̄an etale jekjōn 86 im māāji kakōļļe ko ippān meļeļe ko aer. (Remaron̄ barāinwōt riiti Matu 13:36–43.) Ta eo jaar ekkatak jān būrabōļ in kōn jerbal eo an aiintok doon an Israel? Ta eo jemaron̄ kōm̧m̧ane n̄an ļoor n̄an erom “juon meram” im “juon rilo̧mo̧o̧r” n̄an ajri ro nejin Anij?(Katak im Bujen Ko 86:11).

• Ro uwaan doulul eo ak kūlaaj eo remaron̄ keememej bwe ilo ennaan eo an “Hope of Israel”, Būreejtōn Russell M. Nelson ekar kajjitōk ippāer n̄an kōm̧m̧ani men ko rejenolo̧k n̄an m̧aanjabpopo n̄an jipan̄ aiintok doon an Israel (lale peij 14–17). Kajjitōk ippāer ta kajjitōk ko rej keememej, im etale kajjitōk ko ippān doon n̄e aikuj. Ekōjkan an kōm̧m̧ane men kein maron̄ kōwejepedikļo̧k kōj ilo aiintok doon an Israel? Ta eo jemaron̄ kōm̧m̧ane n̄an kakeememej kōj make kōn kajjitōk ko im jipan̄ doon kakūrm̧ooli? Kōketak ro uwaan doulul eo ak kūlaaj eo n̄an ļōmņak ilo elōn̄ jekjek im kwaļo̧k ļōmņak ko aer.

• Ro uwaan doulul eo ak kūlaaj eo remaron̄ riiti kadkad eo im jekjōn ko ruo im̧aan an ennaan eo an Elder Quentin L. Cook “Iakwe Eļap n̄an Ajri ro Nejin Jemedwōj” (Liaona, Māe 2019, 76–79), kappukōt etke iakwe ekanooj in aorōk ilo kijejeto in mijenede im tampeļ menmenbwij ko ad. Kajjitōk ippāer n̄an kwaļo̧k ta eo rekar ekkatak kōn ekōjkan an iakwe maron̄ kōm̧m̧ane juon oktak ilo ad kajjieon̄ n̄an kwaļo̧k gospel eo ippān ro ilo rejet ko jim̧or an rōn̄ōl nuknuk eo. Leļo̧k n̄an ro uwaan doulul eo ak kūlaaj eo iien n̄an je juon men eo renaaj kar kōņaan kōm̧m̧ane kōnke kōn ekōnono eo rainin. N̄an jipan̄ er ļōmņak kōn ļōmņak ko, komaron̄ kwaļo̧k bwe rej ļōmņak kōn armej ro rejeļā kajjier. Ekōjkan an Anij tōparļo̧k armej rein? Ekōjkan ad maron̄ jipan̄?

• Russell M. Nelson, “The Gathering of Scattered Israel,” Liaona, Nob. 2006, 79–82

• Church History Topics, “The Gathering of Israel,” ChurchofJesusChrist.org/study/history/topics