Kaaben Moronaai ao Bwaoraan

Nibwaite ao Reimwanaite a boo n buaka. Moronaai bon te kaaben n aia taanga ni buaka Nibwaite. Aia taan kairiiri Nibwaite aaki karokoi kanaia ae tau tautia. E un Moronaai ao e korea ana reta nakon Bwaoraan, aia tia kairiri Nibwaite.

Aramwa59:3–13; 60:1, 3–5

Inanon ana reta, ao titiraki Moronaai nakon Bwaoraan bukin tera eaki karokoa te buoka. E taku Moronaai bwa eaki tabe Bwaoraan ma te bota n aomata ma e tii tangira te mwaaka. Moronaai e tangiriia ana bota n aomata bwa ana inaomata.

Aramwa 60

E nanokawaki Bwaoraan kai aki karekea te buoka te taanga n buaka. E tangiria ni buoka Moronaai, ma bon aki konaa. Tabeman ibuakoia Nibwaite a kakaitara.

Aramwa 61:1–4

Nibwaite aikanne a aranaki bwa te koraki are a tangira temanna bwa ena uea. A tangiria n karekea te mwaaka ibukiia ao n tautaeka iaoia aomata. A taua te tautaeka mai iroun Bwaoraan.

Aramwa 51:5; 61:3–5, 8

Bwaoraan e tangiria n kateimatoa ana kairiri nakoia Nibwaite e aonga n konaa n buokiia. N aron Moronaai, E tangiriia Nibwaite bwa ana iriira te Atua ao n kawakina inaomataia. E tangiria ae ana aki boo buaka ma tabeman. Ma e tauraoi ni boo n buaka ngkana e na buoka kamanoaia ana bota n aomata.

Aramwa 61:9–14, 19-20

Bwaoraan e butiia Nibwaite bwa ana buokia n buaka n kamanoia aia utu, inaomataia, ao riai n taromauria te Atua. E ataia ae tamnein te Atua ena mena irouia ngkana a rineia bwa ana buaka ibukin te bwai ae koaua. A mwaiti Nibwaite aika a roko n buoka Bwaoraan n kamanoa abaia.

Aramwa 61:5–7, 14-15

Bwaoraan e korea te reta nakon Moronaai. E bon aki un iroun Moronaai. E tuanga Moronaai bwaai n kabane aika a riki. E butiia Moronaai bwa ena roko n buokia n buakania koraki ake a tangira temanna bwa ena uea. E ataia Bwaoraan bwa ngkana a iriira te Atua, ana bon aki tangiria bwa ana maaku. Te Atua ena Kamanoia ao n buokiia.

Aramwa 61:9, 14–21

Moronaai e kaonaki nte kantaninga ibukin ana onimaki Bwaoraan. Ma e nanokawaki kai iai ibuakoia Nibwaite aika a manga buaka imarenaia ao aki ongo nakon te Atua. Moronaai e anaiia ana taanga n buaka ao e nako n buoka Bwaoraan. E tabekarake te buraeki n inaomata n taabo nako are e nako iai. Ngaa ma ngaa Nibwaite aika a baireia bwa ana buaka ibukin kamanoan inaomataia.

Aramwa 62:1–5

Moronaai ao Bwaoraan a konaia koraki ake a tangira temanna bwa ena Uea ma aia taanga n buaka. Bwaoraan e manga riki naba bwa aia tia kairiri Nibwaite. Moronaai e kanakoia mwane bwa ana buoka te taanga n buaka n Nibwaite. E kanakoa nakon te taanga buaka te amwarake. Ngkai a manga katiteuanaaki Nibwaite, a tokanikai iaon booia aika a mwaiti. A mwaiti aia kaawa Nibwaite aika a kaoki mai irouia Reimwanaite.

Aramwa 62; 6–32