मेरो परिवारले मलाई खुसी दिन्छ

एक दिन घर फर्कँदै गर्दा, मैले अङ्ग्रेजी भाषामा लेखिएको एक बोर्ड देखेँ जसले मेरो ध्यान आकर्षित गर्यो । त्यसमा लेखिएको थियो, “परिवारको अर्थ हो, बुबा र आमामतपाईंहरूलाईप्रेमगर्छु ।" यो सङ्केतले मलाई केही प्रेरणा दियो । यसले “परिवार” शब्दको संरचनालाई वर्णन गरेको जस्तो देखिन्थ्यो । एक परिवारले आमाबाबु र छोराछोरीहरू समावेश गर्छ र त्यो भन्दा पनि महत्त्वपूर्ण विषय, यसले – “प्रेम” भनिने अत्यावश्यक कार्यलाई समावेश गर्छ । यसले यो सरलशब्दलाई धेरै भिन्न देखाउँछ र परिवारलाई आवश्यक पर्ने प्रेरणा र आशाले यसलाई भरिपूर्ण पार्छ ।

अनन्त जीवन प्रेमले भरिपूर्ण हाम्रा स्वर्गका पिताले उहाँका सन्ततिहरूलाई दिनुभएका सबै उपहारहरूमध्येको सबैभन्दा महान् उपहार हो । त्यो उपहार भनेको परमेश्वर पिता र उहाँका प्रिय पुत्रको उपस्थितिमा परिवारहरूसँगै सदाका लागि जिउनु हो । परमेश्वरको सर्वोच्च अधिराज्य, सेलेस्टियल अधिराज्यमा मात्र पारिवारिक जीवनको प्रेमपूर्ण बन्धन निरन्तर रहने छ । हामी सबैले प्रेमले भरिपूर्ण परिवारमा रहने प्रसन्नताको आशा गर्छौँ । हामी सबैले आशा गरेका छौँ कि कुनै दिन हामीले पुनः त्यो परिवारको सदस्यको न्यानो स्नेह महसुस गर्ने छौँ जसलाई हामीले धेरै प्रेम गर्यौँ र पुनः आत्मसात गर्न उत्सुकतापूर्वक प्रतिक्षा गरिरहेका छौँ ।

हाम्रा प्रेमपूर्ण स्वर्गका पिताले हाम्रो हृदयलाई चिन्नुहुन्छ । उहाँको उद्देश्य हामीलाई खुसी दिनु हो । उहाँले उहाँका पुत्रको उपहार दिनुभयो ताकि पारिवारिक बन्धनको सुख सम्भव होस् जुन सदाका लागि रहने छ । मुक्तिदाताले मृत्युको बन्धन तोड्नुभएकाले, हाम्रो पुनरुत्थान हुने छ । उहाँले हाम्रा पापहरूको प्रायश्चित्त गर्नुभएकाले, हामी हाम्रो आस्था र पश्चात्तापद्वारा सेलेस्टियल अधिराज्यको योग्य बन्न सक्छौँ, जहाँ परिवारहरू सदाका लागि प्रेममा बाँधिएका हुन्छन् ।

एल्डर हेनरी बी. आइरिङले भन्नुभयो, "तपाईंहरूलाई मेरो प्रतिज्ञा त्यो हो जुन बाह्र प्रेरितहरूको गणका एक सदस्यले एक पटक मसँग गर्नुभएको थियो । हाम्रा विस्तारित परिवारका सदस्यहरूले गर्नुभएका छनोटहरूका कारण आगामी संसारमा हामीसँगै हुन सक्छौँ कि सक्दैनौँ भन्ने मलाई शङ्का थियो भनेर मैले उहाँलाई भनेको थिएँ । मलाई स्मरण भएअनुसार, उहाँले भन्नुभयो, "तपाईं गलत समस्याका लागि चिन्ता गर्दै हुनुहुन्छ । तपाईं सेलेस्टियल अधिराज्यको योग्य हुन मात्रै जिउनुहोस् र पारिवारिक व्यवस्था तपाईंले कल्पना गर्न सक्ने भन्दा धेरै अद्भुत हुने छ ।

ह्यारोल्ड बी. लीले हामी सबैलाई हाम्रो घरमा अझ बढी प्रेम, शक्ति र खुसी प्राप्त गर्नका प्रोत्साहन गर्नुभयो । उहाँले भन्नुभयो, "आफ्नो पारिवारिक सम्बन्धलाई बलियो बनाउनुहोस् र आफ्ना छोराछोरीहरूका सम्बन्धमा सचेत हुनुहोस् . . . यो समस्या र अशान्तिको समयमा छोराछोरीहरूलाई आवश्यक पर्ने सहाराका लागि घरलाई एक मजबुत स्थान बनाउन सुनिश्चित हुनुहोस् । तब प्रेम प्रशस्त हुने छ र तपाईंहरूको प्रसन्नता बढ्ने छ ।" हामीले पारिवारिक प्रार्थनाहरू गर्नु पर्छ र हाम्रा चर्चका बोलावटमा सेवा गर्नु पर्छ भनेर उहाँले सुझाव दिनुभयो । परिवारका सदस्यहरूले एकअर्कालाई सम्मान गर्नु पर्छ । आमाबाबुहरूले झगडा गर्नु हुँदैन र मिथ्याबोधहरूलाई समझदारीपूर्वक सँगै छलफल गर्नु आवश्यक छ । परिवारका अरूलाई सहयोग गर्नका लागि प्रत्येक व्यक्तिले दिनहुँ त्यागहरू गर्ने प्रयास गर्नु पर्छ ।

ह्यारोल्ड बी. लीले भन्नुभयो, “परमेश्वरको प्रेम भनेको याचना गरेर मात्रै प्राप्त हुने विषय होइन । यूहन्नाले भनेका थिए, “यदि कसैले भन्छ, म परमेश्वरलाई प्रेम गर्छु र आफ्नो भाइलाई घृणा गर्छु भने, त्यो व्यक्ति झूटो हो: किनकि जसले आफ्नो भाइलाईप्रेम गर्दैन जसलाई उसले देखेको छ भने उसले नदेखेका परमेश्वरलाई कसरी प्रेम गर्न सक्छ ?” तपाईंले परमेश्वरलाई प्रेम गरेर आफ्नो भाइलाई घृणा गर्न सक्नुहुन्न जससँग तपाईं सम्बन्धित हुनुहुन्छ । कुनै पनि पुरुष जसले आफूलाई आध्यात्मिक रूपमा महाशक्तिशाली महसुस गर्छ र उपेक्षाका कारण उसको घर अव्यवस्थित छ र आफ्नी श्रीमती र आफ्ना छोराछोरीहरूको हेरचाह गर्न असफल भएको छ, त्यो मानिस परमेश्वरप्रति प्रेम विकास गर्ने मार्गमा अग्रसर छैन ।"

“परिवार: संसारका लागि एक घोषणा” ले तपाईंको परिवारलाई मजबुत बनाउन र एकताबद्ध गर्नका लागि सहयोग गर्न सक्छ । प्राथमिकका बालबालिकाहरूलाई निम्न सुझावहरू दिइएको थियो ।

• तपाईं एक अनन्त परिवारको अंश हुनुहुन्छ जसलाई तपाईंको सहयोगको आवश्यकता छ ।

• तपाईंले आफ्नो परिवारमा खुसी, दया र प्रेम ल्याउन सक्नुहुन्छ ।

• तपाईं एकअर्कालाई सुन्न सक्नुहुन्छ, सँगै काम गर्न र खेल्न सक्नुहुन्छ, क्षमा गर्न सक्नुहुन्छ र एकअर्कालाई सहयोग गर्न सक्नुहुन्छ ।

• तपाईं आफ्नो परिवारसँग धर्मशास्त्र पढ्न सक्नुहुन्छ ।

• प्रार्थनागरेर र आज्ञाहरू पालना गरेर तपाईं आफ्नो परिवारका लागि एक असल उदाहरण बन्न सक्नुहुन्छ ।

जब तपाईं सेलेस्टियल अधिराज्यको योग्य हुन जिउनुहुन्छ, “पारिवारिक व्यवस्थापन तपाईंले कल्पना गर्न सक्ने भन्दा अद्भुत हुने छ” भन्ने अगमवाणीयुक्त प्रतिज्ञा तपाईंको हुने छ भनेर म गवाही दिन्छु । ■