පොළොවේ සියලු පවුල්වලට ආශිර්වාද කිරීම

හැත්තෑවරුන්ගේ සම්මානනීය සාමාජිකයෙකු වූ වැඩිහිටි බෲස් සී. හාෆෙන් හට දිනක් ජාතික ප්‍රවෘත්ති සඟරාවක කතුවරයෙකුගෙන් දුරකථන ඇමතුමක් ලැබුණි. විවිධ ආගම් හරහා ස්වර්ගය පිළිබඳ විශ්වාසයන්ගේ ඉතිහාසය ගවේෂණය කළ මෑත කාලීන පොතක් ගැන කතා කිරීමට කතුවරයාට අවශ්‍ය විය.

වැටිහිටි හාෆෙන් මෙසේ ලිවීය,“ස්වර්ගය සඳහා—සහ ස්වර්ගයේ පවුල් සඳහා සෑම කෙනෙකුටම පුළුල් කුසගින්නක් දැනෙන බව කතුවරුන් සොයා ගත්හ.” බොහෝ අය තවමත් මරණයෙන් පසු ජීවිතය, සදාකාලික ප්‍රේමය සහ ස්වර්ගික පවුල් නැවත එක්වීම් විශ්වාස කළ ද, “බොහෝ ක්‍රිස්තියානි සභා මෙම අභ්‍යන්තර කුසගින්න සඳහා ප්‍රතිචාර දක්වන්නේ නැත”—නමුත් එක් සභාවක් මෙම ආශාවට පැහැදිලිව ප්‍රතිචාර දක්වයි: ඒ යේසුස් ක්‍රිස්තුස්වහන්සේගේ පසුදවස්වල ශුද්ධවන්තයන්ගෙන් යුත් සභාවයි.

ගැලවුම්කරුවාණන්ගේ නැවත පිහිටුවන ලද සභාවේ, අපට පූජනීය දේවමාළිගා තිබේ. අපට සදාකාලික විවාහයක් ඇති අතර, ශාරීරික මරණයෙන් ඔබ්බට ආශිර්වාද කරන මුද්‍රා තැබීමේ අධිකාරියක් තිබේ. පියාණන්වහන්සේ සහ පුත්‍රයාණන් ඉදිරියෙ හි ප්‍රේමණීයයන් සමඟ සදාකාලික අනාගතයක් පිළිබඳ පොරොන්දුව අපට තිබේ. මේ සියල්ල සැලකිල්ලට ගත් විට, කතුවරුන් නිගමනය කළේ ස්වර්ගය පිළිබඳ පසුදවස්වල ශුද්ධවන්තයන්ගේ සංකල්පය වඩාත්ම සම්පූර්ණ බවයි—මම එයට වඩාත් ප්‍රීතිමත්ම ලෙස එකතු කරමි.

“මොනතරම් හොඳ සොයාගැනීමක් ද!” වැඩිහිටි හෆෙන් මෙසේ නිරීක්ෂණය කළේය. “අද බොහෝ අය සදාකාලික පවුල් සඳහා ආශා කරන අතර, [යේසුස් ක්‍රිස්තුස්වහන්සේගේ නැවත පිහිටුවන ලද ශුභාරංචිය] වෙනත් ඕනෑම දන්නා අදහස් මාලාවකට [හෝ ආගමික ඇදහීම්වලට] වඩා එම ආශාව ඉටු කරයි. ‘පවුල් වලට සදහටම එකට එක්ව සිටිය හැකි ය’” කියමින් අපේ දරුවන් ගායනා කරන මෙම සුභ ආරංචිය මුළු ලෝකයටම ඇසෙනවානම් කියා මම මම ප්‍රාර්ථනා කරමි.

පවුල් යනු හුදෙක් පහසු සමාජ සැකැස්මක් නොවේ. ඒවා ස්වර්ගයේ සදාකාලික රටාවයි. ඒවා “මැවුම්කරුවාණන්ගේ දරුවන්ගේ සදාකාලික ඉරණම පිළිබඳ සැලැස්මේ කේන්ද්‍රයයි.” සභාපති රසල් එම්. නෙල්සන් (1924–2025) අපට ඉගැන්වූ පරිදි: “[ස්වාමින්වහන්සේ] පොළොව මැව්වේ [එවිට] අපට භෞතික ශරීර ලබාගෙන පවුල් ඇති කර ගත හැකි වන පිණිස ය. පවුල් උත්කර්ෂවත් කිරීම සඳහා උන්වහන්සේ තම සභාව ස්ථාපිත කළ සේක. පවුල්වලට සදහටම එකට එක්ව සිටීමට හැකි වන පරිදි උන්වහන්සේ දේවමාළිගා සපයයි.”

නමුත් ශක්තිමත් පවුල් කෙරෙහි අපගේ උනන්දුව සදාකාලික ඉරණම ගැන පමණක් නොවේ. අපගේ ලෞකික සතුට සඳහා ද පවුල අත්‍යවශ්‍ය කාර්යභාරයක් ඉටු කරයි. දැන් සහ සදාකාලිකව සතුට ගෙන එන්නේ කුමක්දැයි පරිපූර්ණ ලෙස දන්නා අපගේ ස්වර්ගික පියාණන්වහන්සේ, තම දරුවන් පවුල් වෙත යවයි—එම පවුල් කොතරම් අසම්පූර්ණ වුවත්—ශක්තිමත් පවුල් ගොඩනඟා පෝෂණය කිරීමට උන්වහන්සේ අපට ආරාධනා කරයි. ඇත්ත වශයෙන්ම, “ආබාධිතභාවය, මරණය හෝ වෙනත් තත්වයන් නිසා තනි තනිව ඒ සඳහා අනුවර්තනය වීමට අවශ්‍ය විය හැකිය.” නමුත් ස්වාමිපුරුෂයා සහ භාර්යාව, පියා සහ මව යන අයගේ අත්‍යවශ්‍ය, දිව්‍යමය වශයෙන් පත් කරන ලද වගකීම් වෙනත් කිසිවකට ප්‍රතිස්ථාපනය කළ නොහැක.

“ජීව විද්‍යාත්මක, බැඳුණු, දෙමාපිය දෙදෙනාගෙන් යුත් පවුල්” පිළිබඳ පර්යේෂණවලින් දිගටම පෙනී යන්නේ “ගැඹුරු ප්‍රේමය හා සෙනෙහස” ආරක්ෂා කර ගැනීම සඳහා පවුල අත්‍යවශ්‍ය බවයි. එය “ස්ථාවර, හොඳින් හැඩගැසුණු සහ සමාජීය වශයෙන් සවිඥානක පුද්ගලයන් සඳහා වන ප්‍රාථමික ඉන්කියුබේටරයයි.”

ඇත්ත වශයෙන්ම, දෙවියන්වහන්සේගේ සැලැස්මට එතරම් වැදගත් දෙයකට, මේ විරුද්ධවාදීකම් වලට මුහුණ දීමට සිදු වීම ගැන අප පුදුම විය යුතු නැත. සාතන් කිසිදා පවුල් හිතකාමී වී නැත, ඔහු “තමාට ඇත්තේ ස්වල්ප කාලයක් බව දන්න බැවින්”, ඔහුගේ උත්සාහයන් වඩ වඩාත් හදිසි කරමින් සිටියි (එළිදරව්ව 12:12). ප්‍රේරිතවරුන් දොළොස්දෙනාගේ ගණපූරණයේ වැඩබලන සභාපතිවරයා වන සභාපති එම්. රසල් බැලර්ඩ් (1928–2023) පැවසූ පරිදි, “ස්වාමින්වහන්සේගේ කාර්යය කඩාකප්පල් කිරීමට ස්ථිරම හා වඩාත්ම ඵලදායී ක්‍රමය පවුලේ කාර්යක්ෂමතාව සහ නිවසේ පරිශුද්ධභාවය අඩු කිරීම බව සාතන් දනී.”

දෙවියන්වහන්සේගේ සදාකාලික පවුල, උන්වහන්සේගේ දරුවන් සඳහා උන්වහන්සේගේ සැලැස්ම සහ පවුල් සබඳතාවල සදාකාලික වැදගත්කම පිළිබඳව අප දන්නා දේ දැනගෙන, අපි ලෝකයේ වඩාත්ම කඩිසර පවුලේ ආරක්ෂකයින් අතර සිටිය යුතුය.

අපි මෙය කරන්නේ කෙසේ ද?

සභාපති ඩැලන් එච්. ඕක්ස් මෙම උපදෙස ලබා දුන්නේය: “පවුල් ප්‍රකාශනය … පවුලට ඇති වත්මන් අභියෝග හරහා අපව පවත්වා ගැනීමට අපට අවශ්‍ය ශුභාරංචි සත්‍යයන් පිළිබඳ ස්වාමින්වහන්සේගේ නැවත අවධාරණයයි.”

අපගේ පෞද්ගලික ජීවිත තුළ, පවුල් සබඳතා ශක්තිමත් කරන “කුඩා සහ සරල දේවල්” (ඇල්මා 37:6) අපට කළ හැකිය. පවුල් ප්‍රකාශනයේ දක්වා ඇති සාර්ථක පවුල් සහ විවාහවල මූලධර්ම අනුගමනය කිරීම මෙයට ඇතුළත් වේ: “ඇදහිල්ල, යාච්ඤාව, පසුතැවීම, සමාව දීම, ගෞරවය, ආදරය, දයාව, වැඩ කිරීම සහ යහපත් විනෝදාත්මක ක්‍රියාකාරකම්.” අපගේ වර්තමාන පවුල් තත්ත්වය කුමක් වුවත්, පවුල් සබඳතා අපට සදාකාලිකව වැදගත් බව අපට අපගේ ක්‍රියාවන් තුළින් පෙන්විය හැකිය.

අපගේ ප්‍රජාවන් තුළ “වගකිවයුතු පුරවැසියන්” ලෙස, අපට “පවුල නඩත්තු කිරීමට සහ ශක්තිමත් කිරීමට නිර්මාණය කර ඇති එම පියවර ප්‍රවර්ධනය කළ හැකිය.”

අපි ස්වාමින්වහන්සේගේ පසුදවස්වල ගිවිසුම් ජනතාවයි. අපි පවුල් සමඟ සම්බන්ධ සෑම දෙයක්ම ඇති පොරොන්දු වන—ආබ්‍රහම්, ඊසාක් සහ යාකොබ්ට දුන් පොරොන්දුවල උරුමක්කාරයෝ වන්නෙමු. එම පොරොන්දු පැමිණෙන්නේ “පොළොවේ සියලු පවුල්වලට” ආශිර්වාද කිරීමේ පූජනීය කැඳවීම සමඟයි. අපි එය කරන එක් වැදගත් ක්‍රමයක් නම්, “පවුල දෙවියන්වහන්සේ විසින් නියම කරන ලද්දක්” යන සදාකාලික සත්‍යය අනුව ජීවත්වීම, ආරක්ෂා කිරීම සහ බෙදා ගැනීමයි එමගින් “ශුද්ධ වූ දේවමාළිගාවල ඇති නියෝග සහ ගිවිසුම් මඟින් පුද්ගලයන්ට දෙවියන්වහන්සේගේ නැවත අභිමුඛයට පැමිණීමට සහ පවුල්වලට සදාකාලිකව එක්සත් වීමට හැකි වේ.”

අපේ පවුලේ සාමාජිකයන් අපගේ ආදරණීය, සදාකාලික ස්වර්ගික පියාණන්වහන්සේ සමඟ පූජනීය ගිවිසුම් ඇති කර ගන්නා ආකාරය දකින විට, උක්ඩ්‍රොෆ් සහෝදරියගේ සහ මගේ හදවත් ප්‍රීතියෙන් හා කෘතඥතාවයෙන් පිරී යයි. අපි අපේ දරුවන් සහ ඔවුන්ගේ දරුවන් ගැන පමණක් නොව, අපගේ දෙමාපියන් සහ ඔවුන්ගේ දෙමාපියන් ගැන ද සතුටු වන්නෙමු. ශුභාරංචි ගිවිසුම් පරම්පරා ගණනාවක් පුරා අපව එක්සත් කරන ආකාරය අපි ගැඹුරු ප්‍රේමයකින් මෙනෙහි කරන්නෙමු. එය “පොළොව මත පිහිටුවා ඇති ඉණිමඟක් දැකීමට සමාන අත්දැකීමක් නොවේ, … එහි මුදුන අහස [දක්වා] විය: දෙවියන්වහන්සේගේ දූතයෝ එහි නගිමින්ද බසිමින්ද යන ආකාරය බලන්න” (උප්පත්ති 28:12).

ස්වාමින්වහන්සේ යාකොබ්ට සිහිනයෙන් පොරොන්දු වූ ආශීර්වාද, ඔබ සහ මා ඇතුළු උන්වහන්සේගේ සියලු ගිවිසුම් දරුවන්ට ද ව්‍යාප්ත වේ. ස්වාමින්වහන්සේ යාකොබ්ට කළාක් මෙන්, අපි උන්වහන්සේව තෝරා ගන්නේ නම්, උන්වහන්සේ “[අපගේ] විපත්තියේ දවසෙ හි” (උත්පත්ති 35:3) අපට පිළිතුරු දෙනු ඇත.

“බලන්න,” ස්වාමින්වහන්සේ මෙසේ වදාළ සේක, “මම නුඹ සමග සිටිමි, නුඹ යන සියලු තැන්හි දී නුඹ ආරක්ෂා කරන්නෙමි, … මක්නිසාද මා නුඹ අත් නොහරින්නෙමියි” (උත්පත්ති 28:15).

යාකොබ් මෙන්, අපි සැමට තරණය කිරීමට කාන්තාරයක් තිබේ. සමහර විට පොරොන්දු වූ ආශිර්වාද බොහෝ දුර බව පෙනේ. බරපතළ ගැටලු හෝ අභියෝග පැමිණෙන විට, අපට ස්වාමින්වහන්සේගේ ප්‍රේමය ගැන ප්‍රශ්න කළ හැකිය. දෙවියන්වහන්සේ අපව අත්හැර දමා ඇති බව අපට හැඟෙන්නට පවා පුළුවන. ගෝලයෙකු වීමට අපගේ උපරිම උත්සාහය තිබියදීත්, අප බලාපොරොත්තු වූ ආශීර්වාද අපට නොලැබෙන බව අපට හැඟෙන්නට පුළුවන.

සහෝදර සහෝදරියනි, ආදරණීය මිත්‍රවරුනි, ගිවිසුම් මාර්ගය ප්‍රීතිමත් මාර්ගයකි, නමුත් සමහර විට එය කඳුළු වලින් පැල්ලම් විය හැකිය. ඔබේ ජීවිතයේ සතුට පිළිබඳ සැලැස්මේ කොටස් දැන් ඉටු නොවන බව ඔබට හැඟේ නම්, කරුණාකර, ස්වාමින්වහන්සේ ඔබ ගැන සැලකිලිමත් වන බවත්, උන්වහන්සේගේ ප්‍රඥාව අනුව, උන්වහන්සේගේ නියමිත කාලයේ දී ඔබට ආශීර්වාද කරන බවත් විශ්වාස කරන්න.

යේසුස් ක්‍රිස්තුස්වහන්සේ සහ උන්වහන්සේගේ පොරොන්දු කෙරෙහි ඇදහිල්ල අපව පසුපසට නොව ඉදිරිය දෙස බැලීමට පොළඹවයි. උන්වහන්සේ නිසා, අතීතයේ සිදු වූ හෝ වර්තමානයේ අපගේ දෘෂ්ටිය අවහිර කරන කුමන දෙයකින්වත් අපගේ අනාගතය වහල්භාවයේ තබා ගත යුතු නැත. ඔව්, අපි හැමෝම එක් ආකාරයකින් හෝ වෙනත් ආකාරයකින් තුවාල වී සිටින්නෙමු, නැතහොත් තුවාල ලබන්නෙමු. නමුත් අපි ශ්‍රේෂ්ඨ සුව කරන්නා කෙරෙහි විශ්වාස කරන්නෙමු. අපි උන්වහන්සේව කොතරම් විශ්වාස කරනවා ද—කියනවා නම්, ඒවා තවමත් “දුර දී” පවා, ඒවා ගැන සම්පූර්ණයෙන්ම “ප්‍රසන්න වී” අපි උන්වහන්සේගේ පොරොන්දු වැළඳ ගනු ලබන්නෙමු (හෙබ්‍රෙව් 11:13).

“ස්වාමින්වහන්සේගේම ආකාරයෙන් සහ කාලය තුළ, උන්වහන්සේගේ ඇදහිලිවන්ත ශුද්ධවන්තයන්ගෙන් කිසිඳු ආශිර්වාදයක් වළක්වා නොගන්නා බව අප සැමට මතක් කර දෙන්න,” යැයි සභාපති නෙල්සන් පැවසීය. “ස්වාමින්වහන්සේ එක් එක් පුද්ගලයාට ඔවුන්ගේ හෘදයාංගම ආශාව හා ක්‍රියාවන් අනුව විනිශ්චය කර විපාක ලබාදෙනු ඇත.”

අපි අපගේ ස්වර්ගික පියාණන්වහන්සේගේ පවුල් සඳහා වූ සැලැස්ම අනුගමනය කර බෙදා ගන්නා විට, උන්වහන්සේ අප සමඟ සිටින බවත්, අපව දරා සිටින බවත්, අපගේ ගමනට අප හා එක්වන බවත් මම පොරොන්දු වෙමි. විශේෂයෙන්ම අපට හෝ අපගේ ආදරණීයයන්ට පීඩා පැමිණෙන විට, උන්වහන්සේ කිසිදා අපව තනි කරන්නේ නැත. උන්වහන්සේ අපව උසුලාගෙන, ඔසවා, පොරොන්දු වූ දේශයට උන්වහන්සේ සමඟත්, උන්වහන්සේගේ පුත්‍රයාණන් වන යේසුස් ක්‍රිස්තුස්වහන්සේ සමඟත්, අපගේ පවුල් සමඟත්—සදාකාලිකවම ගෙන එනු ඇත.