පළමු නත්තලේ දී සිටි එඬේරුන් ගැන අප දන්නේ කුමක් ද?

බ්‍රයන් කෝල් විසින්, Shepherds [එඬේරුන්]

පළමු නත්තලේ දී සිටි එඬේරුන් ගැන අපි කරුණු කිහිපයක් දන්නවා.

ඔවුන් සිටියේ බෙත්ලෙහෙමට ආසන්නවයි. එඬේරුන් සිටියේ ක්‍රිස්තුස්වහන්සේගේ උපත සිදු වූ “එකම රට” තුළයි (ලූක් 2:8). එමෙන්ම උන්වහන්සේ එහි සිටිය දී ඔවුන්ට පයින්ම බෙත්ලෙහෙමට ළඟා වීමට හැකි වුණා (බලන්න ලූක් 2:15–16).

ඔවුන් තම යුතුකම ඉටු කරමින් සිටියා. මෙම එඬේරුන් “රාත්‍රියේ තම රැළ රැකබලා ගනිමින් කෙතේ රැඳී සිටියා” (ලූක් 2:8). ඔවුන් යහපත් එඬේරාණන් වන ගැලවුම්කරුවාණන් මෙන් යහපත් හා ඇදහිලිවන්ත එඬේරුන් වුණා (බලන්න යොහන් 10:11, 14).

ඔවුන් මෙසියස්වහන්සේ පිළිබඳ අනාවැකි දැන සිටියා. පුරාණ කාලයේ අනාවැකි පළ කළ මෙසියස්වහන්සේ එනම් “ස්වාමින් වන ක්‍රිස්තුස්වහන්සේගේ” උපත (ලූක් 2:11) ප්‍රකාශ කළ විට දේවදූතයා කතා කළේ කුමක් ගැනදැයි ඔවුන් පැහැදිලිවම දැන සිටියා.

ඔවුන්ට මහත් උද්‍යෝගයක් තිබුණා. දේවදූතයා ඔවුන්ට “ගවයන් කන ඔරුවක බාවා ඉන්න ළදරුවා” (ලූක් 2:12) ගැන පැවසූ විට, ඔවුන් උන්වහන්සේව දැකීමට “වහාම” ගියා (ලූක් 2:16).

ඔවුන් එම සුභ පණිවිඩය බෙදාගත්තා. ක්‍රිස්තුස්වහන්සේගේ උපත පිළිබඳ දේවදූතයාගේ පණිවිඩය පිළිබඳව ඔවුන් ඇසූ දුටු දේ ඔවුන් “සියලු ජාතීන්ට ප්‍රකාශ” කළා (ලූක් 2:17).

ඔවුන් දෙවියන්වහන්සේට ස්තුති කොට ප්‍රශංසා කළා. මේ සියල්ලෙන් පසු, ඔවුන් “තමුන්ට කී ලෙසම ඇසූ දුටු සියල්ල ගැන දෙවියන්වහන්සේට ගෞරව කරමින්ද ප්‍රශංසා කරමින්ද හැරී ගියා” (ලූක් 2:20).