Ang Ebanghelyo ni Jesucristo nga Nasentro sa Pamilya

Ang doktrina sang Ang Simbahan ni Jesucristo sang mga Santos sa Ulihing mga Adlaw nasentro sa pamilya. Importante sa aton doktrina parte sa pamilya ang templo. Ang mga ordinansa nga mabaton naton didto nagatugot sa aton nga makabalik bilang wala katapusan nga mga pamilya sa presensya sang aton Amay nga Langitnon.

Sang Abril 2025 nga pangkabilogan nga komperensya, gin-anunsyo ni Pangulong Russell M. Nelson ang pagpatukod sang 200 ka bag-o nga mga templo. Nanamian sia mag-anunsyo sang bag-o nga mga templo sa katapusan sang tagsa ka pangkabilogan nga komperensya, kag nagakalipay kita tanan upod sa Iya. Pero, sa kadamuon sang templo subong nga ginasugdan pa lang sa pagplano kag pagpatukod, bagay lang nga maghinay-hinay kita sa pag-anunsyo sang bag-o nga mga templo. Gani, upod ang pahanugot sang Korum sang Dose ka Apostoles, indi kita mag-anunsyo sang bag-o nga mga templo sa sining komperensya. Magapadayon kita subong sa paghatag sang mga ordinansa sa templo sa mga miyembro sang Simbahan sa bilog nga kalibutan, pati na kon san-o kag kon diin ianunsyo ang pagpatukod sang bag-o nga mga templo.

Kabahin sang mensahe nga ginhambal ko bag-o lang ginsulat ko pagkatapos sang kamatayon sang pinalangga naton nga Pangulong Russell M. Nelson. Ang magasunod karon ginsulat ko kag gin-aprubahan mga semana na antes, pero ginarepresentar sini gihapon ang akon mga pinanudlo, nga inspirado sang Ginuo.

Ang proklamasyon sa pamilya, nga gin-anunsyo 30 ka tuig na ang nagligad, nagapahayag nga “ang panimalay ginmando sang Dios” kag “labing importante sa plano sang Tagtuga para sa wala’y katapusan nga kapalaran sang Iya mga kabataan.” Ginapahayag man sini “nga ang kasugoan sang Dios para sa Iya mga kabataan sa pagmuad kag pagpuno sa duta nagapabilin gihapon nga may puwersa.” Kag “dugang namon nga ginapahayag nga ang Dios nagsugo nga ang sagrado nga mga gahum sang pagtuga sang anak pagagamiton lamang sa tunga sang lalaki kag babayi, nga legal nga ginkasal bilang bana kag asawa.” Ang sadto anay nga si Elder Russell M. Nelson nagtudlo sa mga tumalambong sa Brigham Young University, nga ang pamilya “importante sa plano sang Dios. … Sa pagkamatuod, ang katuyoan sang plano amo nga ipahitaas ang pamilya.”

Ang Simbahan ni Jesucristo kon kaisa kilala bilang simbahan nga nasentro sa pamilya. Amo man gid ini! Ang aton relasyon sa Dios kag ang katuyoan sang aton mortal nga kabuhi ginapaathag tuhoy sa pamilya. Ang ebanghelyo ni Jesucristo amo ang plano sang aton Amay nga Langitnon para sa benepisyo sang Iya mga anak nga espiritu. Makahambal gid kita nga ang plano sang ebanghelyo una nga gintudlo sa aton sa konseho sang wala katapusan nga pamilya, ginpatuman ini paagi sa aton mortal nga mga pamilya, kag ang iya sini dapat nga padulongan amo nga ipahitaas ang mga anak sang Dios sa wala katapusan nga mga pamilya.

Sa pihak sinang konteksto sang doktrina, may mga pagpamalabag. Sa Estados Unidos nagaantos kita sa pag-usmod sang pag-asawahay kag pagpamata. Sa halos isa ka gatos ka tuig ang proporsion sang mga panimalay nga ginapangunahan sang mga mag-asawa nagnubo, kag amo man ang pagpamata. Ang mga pag-asawahay kag pagpamata sang mga miyembro sang aton Simbahan mas positibo, pero dako man ang ila pagnubo. Importante gid nga ang mga Santos sa Ulihing mga Adlaw may maathag nga paghangop sang katuyoan sang pag-asawahay kag sang kaimportante sang mga anak. Amo ina ang palaabuton nga aton ginatinguhaan. “Ang pangkahitaasan isa ka pangpamilya nga hilikuton,” gintudlo sa aton ni Pangulong Nelson. “Paagi lamang sa nagaluwas nga mga ordinansa sang ebanghelyo ni Jesucristo nga ang mga pamilya mahimo nga mapahitaas.”

Ang pungsudnon nga pagnubo sang mga pag-asawahay kag pagpamata maintiendihan para sa makasaysayan nga mga rason, pero ang mga prinsipyo kag mga buhat sang mga Santos sa Ulihing mga Adlaw dapat mas mangin maayo—indi nga magsunod—sa ina nga mga uso.

Sang bata pa ako 80 ka tuig na ang nagligad, nag-istar ako sa uma sang akon lolo kag lola kon sa diin halos ang tanan nga nagakatabo sa sulod sang isa ka adlaw mando sang pamilya. Wala sang telebisyon ukon iban pa nga electronics nga makatublag sang aktibidades sang pamilya. Kabaliskaran sini, sa mga siyudad sa karon nga panahon, pila lang ka miyembro ang sige-sige nga nagahimo sang mga aktibidades nga nasentro sa pamilya. Ang kabuhi sa siyudad kag moderno nga transportasyon, organisado nga mga kalingawan, kag high-speed nga mga komunikasyon nagapahapos sa mga pamatan-on nga himuon ang ila mga puluy-an nga daw mga boardinghouse, kon sa diin sila nagatulog kag nagakaon kon kaisa pero halos wala gid sing pagtuytuy sang mga ginikanan sa ila mga aktibidades.

Ang impluwensiya sang mga ginikanan nagluya man tungod sa klase sang palangabuhian sang kalabanan nga mga miyembro sang Simbahan sa karon. Sang una, isa sang dako nga mga impluwensiya nga nagahiusa sang mga pamilya amo ang eksperiyensya sang pagpangabudlay sing ulolupod sa paglab-ot sa isa ka tulumuron—pareho sang paghimo sang kamingawan nga mangin duta nga ulumahon ukon pagpangita sang palangabuhian. Ang pamilya sadto organisado kag ang nagadumala nga yunit sa produksyon sang kalan-on sang panimalay kag negosyo sa komunidad. Sa karon, kalabanan sang mga pamilya mga yunit sa pagbakal sang mga produkto kag serbisyo, nga ginadula na ang sistema sang pag-organisar kag pagbinuligay sang pamilya.

Samtang nagaamat kadula ang impluwensiya sang mga ginikanan, ang mga Santos sa Ulihing mga Adlaw may responsibilidad gihapon halin sa Dios nga tudloan ang ila mga anak nga maghanda para sa padulongan sang aton pamilya sa wala katapusan (tan-awa sa Doktrina kag mga Kasugtanan 68:25). Madamo sa aton ang kinahanglan maghimo sini bisan pa indi tanan naton nga mga pamilya tradisyunal. Ang pagdiborsyo, kamatayon, kag pagbulagay mga realidad sang kabuhi. Naagyan ko ina sa pamilya nga akon gindak-an.

Napatay ang akon amay sang pito ako ka tuig, gani kami sang akon manghod nga lalaki kag manghod nga babayi ginpadako sang balo nga iloy. Nagpadayon sia sa pihak sang mabudlay kaayo nga mga sitwasyon. Nagaisahanon sia kag masinulub-on, pero upod ang bulig sang Ginuo, ang iya gamhanan nga panudlo sang doktrina sang ginpanumbalik nga Simbahan ang naggiya sa amon. Pirme gid sia nagapangamuyo para sa langitnon nga bulig sa pagpadako sang iya mga anak, kag ginbugayan sia! Ginpadako kami sa malipayon nga puluy-an nga sa diin ang amon napatay nga amay pirme gid nga ginapadumdum sa amon. Gintudloan niya kami nga may amay kami kag may bana sia kag pamilya kami sa gihapon tungod sang ila kasal sa templo. Ang amon amay nagpalayo sing temporaryo lang tungod gintawag sia sang Ginuo para sa lain nga hilikuton.

Nakahibalo ako nga madamo nga iban pa nga mga pamilya indi kaayo malipayon, pero ang tagsa ka solo nga iloy sarang makatudlo sang gugma sang Amay nga Langitnon kag sang maabot nga mga bugay sang kasal sa templo. Mahimo man ninyo ini! Ang plano sang Amay nga Langitnon nagapasalig sining posibilidad para sa tanan. Nagapasalamat kita tanan para sa kasal sa templo kag para sa ginapaabot nga mga bugay sang paghugpong bilang wala katapusan nga pamilya. Pareho sa akon iloy, nanamian kami magsambit sang promisa ni Lehi sa iya anak nga si Jacob nga “ikonsagrar [sang Dios] ang imo mga pag-antos para sa imo kaayohan” (2 Nefi 2:2). Nagaaplikar ini sa tagsa ka pamilya nga Santos sa Ulihing mga Adlaw, kompleto man ukon indi kompleto sa karon. Kita pamilya nga simbahan.

Ang aton doktrina kag aton pagpati sa wala katapusan nga mga pamilya nagapabakod kag nagaisa sa aton. Indi ko gid malipatan ang promisa sang akon lolo sa iloy nga si Lolo Harris, sang kami nga kabataan nagaistar sa iya uma malapit sa Payson, Utah. Ginbalitaan niya ako sang masubo nga balita nga napatay ang akon amay sa malayo nga Denver, Colorado. Nagdalagan ako sa kuwarto kag nagluhod sa tupad sang katre, nga nagahilibion. Ginkadtoan ako ni lolo kag nagluhod sa tupad ko kag nagsiling, “Ako ang mangin amay mo.” Ang inang mapinalanggaon nga promisa isa ka gamhanan nga halimbawa sang mahimo sang mga lolo kag lola agud pun-an ang mga kakulangan kon ang mga pamilya madulaan sang isa ka miyembro.

Ang mga ginikanan, solo ukon kasado—kag iban pa, pareho sang mga lolo kag lola, nga nagapuno sang sina nga papel para sa mga anak—mga batid nga mga manunudlo. Ang ila pinakaepektibo nga pagpanudlo amo ang paagi sa ehemplo. Ang pamilya ang nagakaigo nga lugar sa pagpakita kag pagtuon sang wala katapusan nga mga prinsipyo, pareho sang importansiya sang pag-asawahay kag mga anak, sang katuyoan sang kabuhi, kag sang matuod nga ginahalinan sang kalipay. Ini man ang pinakamaayo nga lugar sa pagtuon sing iban pa nga importante nga mga leksyon sa kabuhi, pareho sang kaayo, pagpatawad, pagkontrol sa kaugalingon, kag sang kaimportante sang edukasyon kag tampad nga trabaho.

Siyempre, madamo nga miyembro sang Simbahan may pinalangga nga mga miyembro sang pamilya nga wala nagabaton sang mga panindugan kag mga prinsipyo sang ebanghelyo. Ini nga mga miyembro nagakinahanglan sang aton gugma kag pasensya. Sa pagpakig-angot sa isa kag isa, dapat naton dumdumon nga ang perpekto nga aton ginapangita indi limitado lamang sa mabudlay nga mga sirkumstansya sang kabuhi diri sa duta. Ang dakong panudlo sa Doktrina kag mga Kasugtanan 138:57–59 nagapasalig sa aton nga ang paghinulsol kag espirituhanon nga pagtubo sarang magpadayon sa kalibutan sang mga espiritu pagkatapos sang kabuhi sa duta. Mas importante, nga sa pag-isa sang mga pamilya agud pabakuron ang isa kag isa, dapat naton tanan dumdumon nga ang mga sala kag di-malikawan nga mga kakulangan nga ginaeksperiyensya naton tanan sa duta sarang mapatawad paagi sa paghinulsol tungod sang mahimayaon kag nagaluwas nga Pagbayad-Sala ni Jesucristo.

Ang aton Manluluwas nga si Jesucristo, ang aton labing perpekto nga ehemplo. Mabugayan kita kon sundon naton ang Iya mga panudlo kag pagsakripisyo sang kaugalingon. Ang pagsunod kay Cristo kag paghatag sang aton mga kaugalingon sa pag-alagad sa isa kag isa ang pinakamaayo nga solusyon sa pagkamaiyaiyahon kag indibidwalismo nga daw nangin kinaandan na gid sa karon.

Ang mga ginikanan may katungdanan man sa pagtudlo sang ila mga anak sing praktikal nga ihibalo magluwas sa mga prinsipyo sang ebanghelyo. Ang mga pamilya nagaisa kon ulolupod sila nga nagahimo sang makahulugan nga mga butang. Ang mga hardin sang pamilya nagapasad sang kaangtanan sang pamilya. Ang malipayon nga mga eksperiyensya sang pamilya nagapabakod sang kaangtanan sini. Ang camping, mga hampang sa isport, kag iban pa nga mga kalingawan importante gid sa pag-isa sang mga pamilya. Ang mga pamilya dapat mag-organisar sang mga pagtipon-tipon agud dumdumon ang mga katigulangan, nga magaresulta sa pagkadto sa templo.

Ang mga ginikanan dapat magtudlo sa ila mga anak sang tig-una nga mga ikasarang sa pagpangabuhi, lakip na ang pag-ubra sa ugsaran kag sa sulod sang puluy-an. Ang pagtuon sang mga lengguahe isa ka mapuslanon nga pagpanghanda para sa pag-alagad sa misyon kag moderno nga pagpangabuhi. Ang mga manunudlo sining mga topiko pwede nga mga ginikanan ukon mga lolo kag lola ukon mga paryente. Ang mga pamilya nagauswag kon magtuon sila bilang grupo kag nagakonsultahanay sa tanan nga butang nga angot sa pamilya kag sa mga miyembro sini.

Ang iban mahimo magsiling, “Pero wala kami tiempo para dira.” Agud makatigayon sing tiempo sa paghimo sang kon ano ang importante, nagakarealisar sang madamo nga ginikanan nga mapapagsik nila ang ila pamilya kon patyon nila ang ila mga device ukon mga gadyet. Kag mga ginikanan, dumduma, nga ang gusto gid sang inyo kabataan sa panihapon amo ang tion nga nagainupdanay kamo.

Dalagko nga mga bugay ang nagaabot sa mga pamilya kon magpangamuyo sila sing ulolupod, nga nagaluhod gab-i kag aga agud magpasalamat sa mga bugay kag magpangamuyo para sa kinaandan nga mga ginakabalak-an. Ang mga pamilya ginabugayan man kon magsimba sila sing ulolupod sa Simbahan kag sa iban pa nga relihiyoso nga mga kahigayunan. Ang pag-isa sang pamilya ginapabakod man sang mga istorya sa pamilya, pagpasad sang mga tradisyon sang pamilya, kag pagpakigbahin sang sagrado nga mga eksperiyensya. Si Pangulong Spencer W. Kimball nagpahanumdum sa aton nga “ang mga istorya sang inspirasyon nga halin sa aton mismo mga kabuhi kag halin sa aton mga katigulangan … gamhanan nga mga paagi sa pagtudlo.” Masami ini ang pinakamaayo nga mga ginahalinan sang inspirasyon para sa aton kag sa aton kaliwatan.

Nagapamatuod ako parte sa Ginuong Jesucristo nga amo ang Bugtong nga Anak sang Dios, nga aton Wala Katapusan nga Amay. Ginaagda Niya kita nga sundon ang banas sang kasugtanan nga nagapadulong sa langitnon nga pag-inupdanay sang pamilya. Ang nagaselyo nga mga gahum sang priesthood, nga ginadumalahan sang mga yabi nga ginpanumbalik sa Templo sang Kirtland, nagadala sang mga pamilya sing ulolupod tubtob sa wala katapusan (tan-awa sa Doktrina kag mga Kasugtanan 110:13–16). Ginagamit ini sa karon sa nagadamo nga mga templo sang Ginuo sa bilog nga kalibutan. Matuodtuod ini. Ginapangamuyo ko nga mangin bahin kita sini, sa ngalan ni Jesucristo, amen.