Magtulok Ka sa Dios kag Mabuhi

Sang nagligad nga Hunyo, may natabo nga masubo nga aksidente sa pungsod sang Lesotho sa sur sang Aprika. Isa ka bus nga ginasakyan sang 20 ka lamharon nga mga babayi sang Maputsoe Branch sang Simbahan kag pito sa ila mga lider ang nagapakadto sa puno nga siyudad, sa Maseru, para sa pagtililipon sang mga young women halin sa ila district. Samtang nagabiyahe sila sa kalsada sang aga pa kaayo, ang awto nga nagasugata sa ila, nga gusto nga unahan ang isa pa ka salakyan, nagkaon sang alagyan sang bus. Wala na sang lugar ukon tiyempo para makalikaw, kag sa pila lang ka segundo nagbunggoanay ang duha ka salakyan, nagbulid-bulid sa kilid sang dalan, kag nagkalayo.

Sa kabilogan, 15 ka tawo ang napatay sa aksidente, upod ang anom ka dalagita, duha ka lider sang Young Women, kag ang branch president kag ang iya asawa. Ang mga nakaluwas, mga miyembro sang pamilya, kag mga abyan nagpautwas sang lainlain nga mga emosyon, pati na sang kaakig, depresyon, kag pagkakonsensya. Wala sapayan sining mga balatyayon kag indi masabat nga mga pamangkot, ginpaumpawan nila ang kada isa kag nagdangop sa Dios paagi sa sagrado nga musika, sa balaan nga kasulatan, kag pangamuyo, kon diin sila nakakita sang kaumpawan. Ang nakasalbar nga disisiete anyos nga si Setso’ana Selebeli nagpamatuod, “Palangga kita ni Jesucristo kag upod naton Sia, bisan pa nga nagasakit ang aton mga tagipusuon.”

Litrato nga kuha ni Jeffrey D. Allred, Deseret News

Ang dalagita kag ang lider nga naospital bangod sang pagkasunog nagtuon sang Libro ni Mormon sing ululupod. Siling sang isa, “Sining karon lang ginabasa namon ang Moroni, kag ginhambal gid ni Moroni ang akon nabatyagan. … Sang maghambal sia, daw pareho nga nagasiling sia, ‘Kinahanglan nga tun-an ninyo ining mga pulong tungod ginsulat ini para sa inyo para mabuligan kamo nga malampuwasan ini.’”

Sa gintingob nga serbisyo sa lubong para sa nagtaliwan, ginlaygay ni Area Seventy Elder Siyabonga Mkhize, “Dapat magdangop kita tanan sa Ginuo sa sining tiyempo kag magpangayo sa Iya nga paumpawan ang aton mga tagipusuon kag … pahagan-haganon ang kasakit nga aton nabatyagan.” Ang Young Women president halin sa Leribe Branch, Mampho Makura, nagpaisog: “Magliso sa Ginuo, kag mag-angkon sang kusog sa pagbaton sang Iya pagbuot. Si Jesucristo ang ‘pangulo kag manughimpit sang aton pagtuo’ [Mga Hebreo 12:2]. Indi magtulok sa malayo, kundi magtulok sa Iya.”

Magtulok sa Iya. Ang iya nga tinaga nagasulit sang laygay ni Alma sa iya bata nga si Helaman: “Pat-ura nga nagatulok ka sa Dios kag mabuhi.” Ginsambit ni Alma ang eksperiyensya ni Lehi kag sang iya katawhan sa Liahona bilang isa ka tipo: “Pareho lang kahapos ang maghatag sing igtalupangod sa pulong ni Cristo, nga magatudlo sa imo sang tadlong nga alagyan padulong sa wala’y katapusan nga kalipayan, sa paghatag sang aton mga amay sang igtalupangod sa sini nga kompas, nga magatudlo sa ila sang tadlong nga alagyan padulong sa duta nga ginpanaad.” Siling ni Alma: “Kon magtulok sila mabuhi sila. … Kag kon magtulok kita … mabuhi kita tubtob sa wala’y katapusan.”

Sa isa pa ka kahigayunan, ginsambit ni Alma ang halimbawa sang man-og nga saway nga gin-alsa ni Moises sang ginkagat ang dumaan nga mga taga-Israel sang dalitan nga mga man-og. Ginhambalan sang Ginuo si Moises nga maghimo sang daw man-og kag ibutang ini sa tukon, upod ang promisa nga “ang tagsatagsa nga ginkagat, kon makakita sini, magakabuhi.” Ginpaathag ni Alma nga ang man-og nga saway isa ka tipo ukon simbolo ni Cristo, nga alsahon sa krus. Madamo ang nagtulok kag nabuhi, pero ang iban, sa pulong ni Alma, “nangin tuman katig-a” nga indi sila magtulok kag nagkalamatay.

Namangkot si Alma:

“Kon mapaayo kamo paagi lamang sa pagtulok agud mag-ayo kamo, indi bala kamo magtulok sing gilayon, ukon mas luyag pa bala ninyo nga magpatig-a kamo sang inyo mga tagipusuon sa pagkawala’y pagtuo, kag mangin matamad, nga indi kamo magtulok, agud magkalamatay kamo?

“… Dayon magtulok kag magsugod sa pagpati sa Anak sang Dios, nga magakari sia agud tuboson ang iya katawhan, kag magaantos sia kag mapatay agud magbayad para sa ila mga sala; kag magabangon sia liwat halin sa mga minatay, nga magapahanabo sang pagkabanhaw, agud ang tanan nga mga tawo magatindog sa iya atubang, agud hukman sa katapusan nga adlaw kag adlaw sang paghukom, suno sa ila mga binuhatan.”

Siyempre, ang laygay nga “magtulok ka sa Dios kag mabuhi” indi lang para sa aton sa wala katapusan kundi nagahatag man sang kinalain sa karakter kag kalidad sang aton mortal nga mga kabuhi. Tandai ang mga pulong sang lamharon nga si Sister Selebeli sa Lesotho nga namitlang kagina—“Palangga kita ni Jesucristo kag upod naton Sia, bisan pa nga nagasakit ang aton mga tagipusuon.”

Kinaiya sang kalibutan nga nahulog sa sala—kon diin nagapangisog ang yawa kag kon diin indi perpekto ang tanan—ang mga kapaslawan kag pagkasaklaw, pag-antos kag kalisod, kapiyerdihan kag kawad-on, pagpamigos kag inhustisya. Paagi lang sa pagtulok sa Dios nga ang mga indibidwal, mga pamilya, kag bisan mga nasyon magauswag. Gintudlo ni Pangulong Russell M. Nelson, “Bangod ang Manluluwas, paagi sa Iya wala dulonan nga Pagbayad-Sala, nagluwas sang tagsa sa aton halin sa aton kahuyang, mga kasaypanan, kag sala, kag tungod naeksperiyensyahan Niya ang tagsa ka kasakit, kabalaka, kag kabug-at nga naagyan ninyo [tan-awa sa Alma 7:11–13], kon matuodtuod kamo nga maghinulsol kag magpangayo sang Iya bulig, mahimo kamo nga magpangibabaw sa sining delikado nga kalibutan sa karon.”

Wala sang iban nga promisa nga kasami ginasulit sa balaan nga kasulatan nga Libro ni Mormon sangsa sini: “Kon magtuman kamo sang akon mga kasugoan magauswag kamo sa duta; apang kon indi kamo magtuman sang akon mga kasugoan pagasikwayon kamo sa akon presensya.” Ang ginpangabuhi nga eksperiyensya sang katawhan sa Libro ni Mormon sa sulod sang mga siglo nagapakita sang kamatuoran sining mga pulong. Ang “pag-uswag” nagakahulugan sang pagbaton sang giya kag mga bugay sang langit sa ila mga kabuhi. Ang “pag-uswag” nagakahulugan sang paglab-ot sang lebel sa ekonomiya nga nagatugot sa ila nga magpangasawa, magpadako sang mga pamilya, kag mag-atipan sa mga kinahanglan sang iban. Ang “pag-uswag” nagaupod sang kapasidad nga magpangibabaw sa kabudlayan kag pagtilaw. Paagi sa grasya ni Cristo, “ang tanan [na]himo para sa [ila] kaayuhan,” nagpanami sa ila, kag nagpasangkad sang ila relasyon upod sa Iya.

Ginpaathag ni Alma nga ang pagtulok sa Dios amo ang pagtuman sang Iya mga kasugoan, padayon nga pagtawag sa Iya para sa Iya suporta, pagkonsulta sa Iya sa tanan ninyo nga ginahimo, kag pagpuno sang inyo mga tagipusuon sang pagpasalamat sa Iya sa adlaw kag gab-i. Ang mga kasugoan kag laygay sang Dios makita sa balaan nga kasulatan kag sa mga pulong sang Iya mga alagad. Ang mga prinsipyo kag sulundan nga ginplastar sa “Ang Panimalay: Isa ka Proklamasyon sa Kalibutan” ang pinakamaayo nga halimbawa. Isa pa gid amo ang giya nga makita sa libro nga Para sa Kusog sang mga Lamharon. Ang tema sang Young Men kag Young Women sini nga tuig amo ang “Magtulok kay Cristo,” nga naghalin sa nagapaumpaw nga direksyon sang Ginuo kay Joseph Smith kag Oliver Cowdery: “Magtulok sa akon sa tagsa ka panghunahuna; indi magduhaduha, indi magkahadlok.” Ang Para sa Kusog sang mga Lamharon nagahambal sang pila ka pinakaimportante nga mga kasugoan kag sulundan sang Dios kag nagatudlo kon paano magtulok sa Ginuo sa paghimo sang maayo nga mga desisyon. Isa ini ka giya indi lamang para sa mga lamharon kundi para sa tanan sa aton.

Isa sa pinakaimportante nga halimbawa, ang Para sa Kusog sang mga Lamharon may importante nga giya sa kapitulo nga ginatig-ulohan “Ang Imo Lawas Sagrado.” Ginatudlo sini: “Tratuha ang imo lawas—kag ang lawas sang iban—nga may respeto. Sa imo paghimo sang mga desisyon parte sa imo pamayo, estilo sang buhok, kag hitsura, pamangkuta ang imo kaugalingon, ‘Ginatahod ko bala ang akon lawas bilang sagrado nga regalo halin sa Dios?’”

Padayon nga ginahambal sa Para sa Kusog sang mga Lamharon: “Halungi ang pagpakighilawas kag ang sekswal nga mga balatyagon nga sagrado. Indi ini dapat mangin topiko sa lahug-lahog ukon kalingawan. Kon wala pa makasal ang lalaki kag babayi, sala ang pagtandog sang pribado, sagrado nga mga parte sang lawas sang lain nga tawo bisan pa nga may bayo. Sa imo pagpili kon ano ang imo himuon, tulukon, basahon, pamatian, pamensaron, i-post, ukon i-text, likawi ang bisan ano nga hungod nga nagapukaw sang lawasnon nga kaibog sa iban ukon sa imo kaugalingon.”

Ginapadumdom sini sa aton ang laygay ni Pangulong Nelson sining nagligad lang:

“Diutay lang gid nga butang ang magakomplikar sang inyo kabuhi sing mas madasig sangsa pagsupak sining diosnon nga layi [sang kaputli]. Sa mga naghimo sang kasugtanan upod sa Dios, ang pagkaimoral isa sa pinakamadasig nga paagi para madula ang inyo testimonya.

“… Ang gahum sa pagtuga sang kabuhi amo ang solo nga pribelihiyo sang pagkadios nga gintugot sang Amay nga Langitnon nga gamiton sang Iya mortal nga mga anak. Gani, nagbutang ang Dios sang klaro nga mga pagsulundan sa paggamit sining buhi kag diosnon nga gahum. Ang pisikal nga intimasiya para lang sa lalaki kag babayi nga ginkasal sa isa kag isa.

“Kalabanan sang ara sa kalibutan wala nagapati sini, pero ang opinyon sang publiko indi ang hukom sang kamatuoran. Gindeklarar sang Ginuo nga wala sang indi putli nga tawo nga makabaton sang selestiyal nga ginharian. … Kon wala kamo nangin putli, ginapangabay ko sa inyo nga maghinulsol. Magpalapit kay Cristo kag magbaton sang Iya promisa sang lubos nga kapatawaran kon maghinulsol kamo sang inyo mga sala [tan-awa sa Isaias 1:16–18; Doktrina kag mga Kasugtanan 58:42–43].”

Tandai nga sa promisa sang Libro ni Mormon, ang kabaliskaran sang kahamungaya indi kapigaduhon—kundi ang mahilayo sa presensya sang Ginuo. Ang Iya presensya nagatumod sa impluwensya sang Iya Espiritu sa kabuhi sang isa ka tawo. Ang tanan ginhatagan sang Kasanag ni Cristo sa pagkadto nila sa kalibutan. Dugang pa, ang iban nag-akto para mabunyagan kag makabaton sang dulot kag dugang nga kasanag sang Balaan nga Espiritu. Nagadala Sia sang inspirasyon kag giya, nagapadako kag nagapanami pa gid sang duna nga mga talento kag abilidad, kag nagabulig sa paglikaw sa malain nga mga impluwensya, pigaw nga mga desisyon, kag indi maayo nga mga kaladtuan.

Pareho sa inyo, may mga kilala ako nga sang una nagasagamsan sang dulot sang Balaan nga Espiritu pero tungod wala sila nakapadayon sa pagtuman sang mga kasugoan sang Dios, nawad-an sina nga bugay. May isa gid ako nga madumduman nga ang iya pagkamiyembro sa Simbahan ginbawi tungod sa pagpakasala. Siling niya nga ang iya primero nga reaksyon amo ang masaklaw. Pamatyag niya ginhusgaran sia sang indi perpekto nga mga lider. Kabalo sia nga ang iya pangginawi sala, pero ginrason niya ang mga kasaypayan kag kapaltahan sang iban. Pagligad sang panahon, nangin komportable na sia sa pangginawi sa gwa sang Simbahan nga wala sang obligasyon sa mga calling kag mga ginapaabot nga pagkadto sa simbahan kag pagminister sa iban.

Nagpadayon ini sa isa ka kalawigon, pero amat-amat niya nga nabatyagan ang kakulang sang Balaan nga Espiritu—sang presensya sang Dios—sa iya kabuhi. Sa iya eksperiyensya, nabal-an niya kon daw ano ang pag-angkon, adlaw-adlaw, sang kaumpawan, giya, kag kompiyansa tungod sa Espiritu, kag ginapangita niya ini. Sang ulihi, ginhimo niya ang kinahanglan niya himuon para maghinulsol kag makwalipikar liwat sa bunyag paagi sa tubig kag paagi sa Espiritu.

Daw wala katapusan ang kadamuon sang mga ginadangpan sang tawo para makakita sang kahulugan, kalipay, kag bulig. Kalabanan “nagatulok nga lapaw sa tanda.” Pero indi naton kinahanglan nga “mangin kaangay sang mga kabataan, nga ginaanod-anod sang mga balod, kag ginapalidpalid sang tagsa ka hangin sang pagtulon-an [ukon uso].” Sa pagtulok sa Dios, makakita kita sang kalinong sa tunga sang kabudlayan, kag ang aton pagtuon magapadayon sa pagtubo bisan pa sa tinion sang pagduhaduha kag espirituhanon nga hangkat. Makabaton kita sang kusog sa atubang sang oposisyon kag pag-isahanon. Maangot naton ang dapat sundon sa realidad sa karon. Matuod gid, wala sang iban nga paagi sangsa ginpili sang Dios Mismo: “Magdangop kamo sa akon karon agud maluwas kamo, tanan nga mga katawhan sa bug-os nga kalibutan! Ako lamang amo ang Dios kag wala na sing iban.”

Ang pagtulok sa Dios nagakahulugan nga indi lang Sia isa sa aton mga prayoridad; kundi, nagakahulugan ini, nga Sia ang isahanon naton nga pinakamataas nga prayoridad. Nadumduman ko liwat atong masubo nga aksidente sa Lesotho sang nagligad nga Hunyo. Sa iya hiligdaan sa ospital, isa sa mga lider sang Young Women nga nakaluwas, nga wala sadto nagapati sa Dios antes magpamiyembro sa Simbahan, nagsiling nga ang iya katuyuan amo karon ang diskubrehon kon ngaa ginluwas ang iya kabuhi. “Ang pagserbisyo sa Ginuo amo ang paagi para makita ko ang sabat, kon makita ko gid man ang sabat,” siling niya. “Abi ko sadto nga palangga ko ang Dios, pero karon, palangga, palangga, palangga, palangga, palangga ko gid Sia. Sia karon ang [numero-uno] ko nga prayoridad sa akon kabuhi.”

Nagapamatuod ako sa Amay, Anak, kag Balaan nga Espiritu, nga sa Ila perpekto nga paghiusa sa pulong, sa panghunahuna, katuyuan, kag aksyon amo ang isa nga Dios, nga aton ginatulok sa tanan nga maayo nga butang. Nagapamatuod ako sa Pagbayad-Sala ni Jesucristo, nga ginhalinan sang gahum para matuman ining matahum nga promisa: “Magtulok sa akon, kag magpadayon tubtob sa katapusan, kag magakabuhi kamo; kay sa iya nga nagapadayon tubtob sa katapusan akon ihatag ang kabuhi nga wala’y katapusan.” Sa ngalan ni Jesucristo, amen.