Gintilawan kag Ginpabakod kay Cristo

Pinalangga ko nga mga utod, nabatyagan ko ang pagpalangga sang Ginuo samtang nagatililipon kita. Ginapasalamatan ko ang kahigayunan nga makahambal sa inyo. Ginapangamuyo ko nga dalhon sang Espiritu sa inyo mga tagipusuon ang gusto sang Ginuo nga mabatian ninyo, labaw pa sa mga pulong nga akon ihambal.

Sang madugay na kaayo, gusto ko nga magtuon sang physics kag mathematics sa kolehiyo. Daw nahalawhaw ako. Pamatyag ko ginatinguhaan ko nga tun-an ang butang nga indi ko masarangan. Samtang nagadugang ang pagkahalawhaw ko, daw nagakadulaan ako sang kusog nga magpadayon sa pagtinguha. Ang akon pagkadismaya naghatag sa akon sang pamatyagan nga daw wala sang bunga ang akon mga pagpangabudlay. Nagsugod ako nga magpamensar nga mag-untat na lang, nga himuon ang mas mahapos.

Pamatyag ko kaluya sa akon. Samtang nagapangamuyo ako, nakabatyag ako sang malinong nga pasalig halin sa Ginuo. Nabatyagan ko Sia nga nagahambal sa akon kaisipan, “Ginatilawan ta ka, pero upod mo man Ako.”

Wala ko kabalo sadto kon ano ang buot silingon sadtong mga tinaga. Pero nahibal-an ko na kon ano ang himuon ko—nag-obra ako.

Paagi sa pagbinagbinag kag pagpangabudlay sa nagsunod nga tinuig, naintiendihan ko ining mensahe sang pagpaisog sa balaan nga kasulatan: “Makasarang ako sa pag-atubang sang tanan nga kahimtangan paagi sa gahum nga ginahatag sa akon ni Cristo.”

Narealisar ko nga ang akon kabudlayan sa physics regalo gali halin sa Ginuo. Ginatudloan Niya ako nga upod ang Iya bulig, mahimo ko ang mga butang nga daw imposible kon may pagtuo ako nga ara Sia para buligan ako. Paagi sining regalo, nagahikot ang Ginuo para tilawan kag pabakuron ako.

Ang tinaga nga pagtilaw may pila ka kahulugan. Ang pagtilaw sa isa ka butang indi lamang nga testingan ini. Para ini magdako ang kusog. Ang pagtilaw sang salsalon amo ang pagpaidalom sini sa puwersa. Ang init, bug-at, kag puwersa ginadugang hasta ang matuod sini nga kinaiya nagdako kag makita. Ang salsalon wala nagaluya sa pagtilaw. Ang matuod, nangin bagay ini nga masaligan, butang nga may nagakaigo nga kusog para magpas-an sang mga mas mabug-at.

Ginatilawan kita sang Ginuo sa amo man nga paagi para pabakuron kita. Ang ina nga pagtilaw wala nagaabot sa tinion sang kahapos ukon kasulhay. Nagaabot ini sa tinion nga pamatyag naton ginainat kita nga labaw pa sa abi naton masarangan naton. Ginatudloan kita sang Ginuo nga dapat kita magpadayon sa pagtubo kag indi pagkapuyon sa aton mga pagpaninguha, nga indi kita mag-ampo, nga magsige-sige kita.

Kon magpadayon kita nga magtuo kay Jesucristo—bisan pa nga daw imposible sa aton sa subong—mangin mabakod kita sa espirituhanon. Ang sagrado nga mga rekord sa balaan nga kasulatan nagapamatuod sining kamatuoran.

Si propetang Moroni, halimbawa, gintilawan kag ginpabakod sa amo sina nga paagi. Nangabuhi sia sa katapusan nga mga tinuig sang iya kabuhi nga nagaisahanon. Ginsulat niya nga wala sia sang mga abyan, nga ginpatay ang iya tatay, nga ang iya katawhan ginpapas. Gin-ayam sia sang mga tawo nga gusto magpatay sa iya.

Pero wala magpangasubo si Moroni. Sa baylo, ginkurit niya ang iya testimonya parte kay Jesucristo sa mga lamina para sa katawhan nga indi na niya maabtan, upod ang mga kaliwat sang katawhan nga gusto magpatay sa iya. Nagsulat sia para sa aton. Kabalo sia nga may mga magayaguta sa iya mga pulong. Kabalo sia nga may magasikway sa iya. Pero nagpadayon sia sa pagsulat.

Sa iya pagtilaw, nag-uswag kag nagbakod ang pagtuo ni Moroni. Nangin mas puro. Ang iya mga tinaga nagadala sang gahum sang tawo nga nagpadayon nga matinuohon hasta sa katapusan. Mabatyagan naton ina nga gahum samtang ginabasa naton ang iya testimonya:

“Karon ako, si Moroni, nagasulat sang pila ka mga bagay nga sa akon pagbanta daw maayo; kag nagasulat ako sa akon mga kauturan, ang mga Lamanhon; kag luyag ko nga ila mahibal-an nga kapin na sa apat ka gatos kag beynte ka tuig ang nagligad halin sang ginhatag ang tanda parte sa pagkari ni Cristo.

“Kag ginaselyohan ko ining mga kasulatan pagkatapos nga mahambal ko ang pila ka mga pulong paagi sa paglaygay sa inyo.

“Tan-awa, ginalaygayan ko kamo nga kon mabasa ninyo ining mga butang, kon ini mangin kinaalam sa Dios nga mabasa ninyo ang mga ini, nga inyo dumdumon kon nangin daw ano kamaluluy-on ang Ginuo sa mga anak sang katawhan, halin pa sa pagtuga kay Adan bisan tubtob sa tion nga mabaton ninyo ining mga butang, kag binag-binagon ini sa inyo mga tagipusuon.

“Kag kon mabaton ninyo ining mga butang, ginalaygayan ko kamo nga mamangkot kamo sa Dios, ang Wala’y Katapusan nga Amay, sa ngalan ni Cristo, kon ining mga butang indi matuod; kag kon kamo mamangkot sa sinsero nga tagipusuon, sa matuod-tuod nga tinutuyo, nga may pagtuo kay Cristo, ipakita niya ang kamatuoran sini sa inyo, paagi sa gahum sang Balaan nga Espiritu.

“Kag paagi sa gahum sang Balaan nga Espiritu mahimo ninyo nga mahibal-an ang kamatuoran sang tanan nga butang.”

Ang testimonya ni Moroni ginpabakod sa iya pag-isahanon, pero nagahatag ini sang kasanag para giyahan ang tanan nga henerasyon nga pangitaon ang aton Amay sa Langit kag ang Manluluwas nga si Jesucristo.

Isa pa ka propeta sa Libro ni Mormon, si Jacob, gintilawan kag ginpabakod samtang bata nga nakaeksperiyensya sang mga pagtilaw kag grabe nga kasubo. Pero ang iya tatay, si Lehi, gintudloan sia nga bugayan sia sang Dios paagi sa iya mga pagtilaw.

“Kag tan-awa, sa imo pagkabata naagyan mo ang mga pag-antos kag tuman nga kasubo tungod sang kapintas sang imo mga kauturan.

“Apang, Jacob, panganay ko sa kamingawan, nakilala mo ang pagkagamhanan sang Dios; kag ikonsagrar niya ang imo mga pag-antos para sa imo kaayohan.

“Gani, ang imo kalag pakamaayohon, kag magapuyo ka nga wala peligro kaupod ang imo utod nga si Nefi; kag ang imo mga inadlaw igahinguyang sa pag-alagad sa imo Dios. Gani, nahibal-an ko nga natubos ka na tungod sang pagkamatarong sang imo Manunubos; kay nakit-an mo nga sa kabug-osan sang panahon magakari sia sa pagdala sang kaluwasan sa mga tawo.”

Naeksperiyensyahan ni Propeta Joseph Smith ang amo sini nga pagtilaw kag pagpabakod sang ara sia sa Bilanggoan sang Liberty. Sa kaidadalman sang iya kalisod, nagsambit si Propeta Joseph:

“O Dios, diin bala ikaw? …

“Tubtob san-o bala nga punggan mo ang imo kamot?”

Nakita sang Ginuo sa pag-antos ni Joseph ang nagapakabalaan nga epekto sang pagbatas niya sini sing maayo sang nagsabat Sia:

“Anak ko, paghidaet sa imo kalag; ang imo kabudlayan kag imo mga pag-antos mangin sa malip-ot lamang nga tion;

“Kag dayon, kon mabatas mo ini sing maayo, pagapataason ka sang Dios sa langit; magamadinalag-on ka sa tanan mo nga kaaway.”

Ang pinakadako nga halimbawa sang pagtilaw kag pagpabakod natabo sa Pagbayad-Sala sang Manluluwas. Gindala Niya sa Iya Kaugalingon ang mga sala sang kalibutan. Ginkarga Niya ang aton mga kasakit kag ang aton mga kasubo. Nag-inom Sia sa mapait nga kopa. Ginpamatud-an Niya nga tampad Sia sa tagsa ka tinion.

Tungod sa Iya mahimayaon nga Pagbayad-Sala, mapabakod kita ni Jesucristo sa tinion sang aton mga pagtilaw. Kabalo Sia kon paano kita buligan tungod nabatyagan Niya ang tanan nga mga hangkat nga aton mabatyagan diri sa duta. “Dal-on niya sa iya kaugalingon ang mga kasakit kag mga balatian sang iya katawhan … agud mahibal-an niya suno sa unod kon paano buligan ang iya katawhan suno sa ila mga kahuyangan.”

Matun-an naton nga sang ara sa Hardin sang Getsemani, ginpangabay sang Manluluwas ang Amay kon pwede nga paligaron sa Iya ang pagtilaw—pero ginhambal man Niya nga kon pagbuot ini sang Amay, himuon ini sang Manluluwas. Buot silingon, nagduhaduha kag nagpang-alang-alang man ang Manluluwas, pero may pagtuo Sia sa Iya Amay nga Langitnon.

Mga kauturan, ang pagtilaw kag pagpabakod sa inyo posible nga indi pareho sang iya ni Moroni ukon Jacob ukon sa iya ni Propeta Joseph. Pero maabot ini. Mahimo nga maabot ini nga malinong, paagi sa mga pagtilaw sa kabuhi sang pamilya. Mahimo nga maabot ini paagi sa balatian ukon kapaslawan, ukon kalisod ukon pag-isahanon.

Nagapamatuod ako nga ining mga tinion indi ebidensya nga gintalikdan kamo sang Ginuo. Kundi, ebidensya ini nga palangga Niya kamo para pauswagon kag pabakuron kamo. Ginapabaskog Niya kamo para madala ang kabug-aton sang kabuhi nga wala katapusan.

Kon magpadayon kita nga matinuohon sa aton pagserbisyo, pauswagon kita sang Ginuo. Pabakuron Niya kita. Kag pila ka adlaw makabalikid kita kag makita naton nga atong mga pagtilaw ebidensya sang Iya pagpalangga. Makita naton nga ginaporma Niya kita para makatindog kita upod sa Iya sa himaya. Sa ginhambal sang Apostoles sang Ginuo nga si Pablo sa katapusan sang iya kabuhi, “Nakapakig-away ako sang maayong pag-away, natapos ko ang dalaganon, natipigan ko ang pagtuo.”

Nagasaksi ako nga kilala kamo sang Dios. Kabalo Sia sang mga pagtilaw nga inyo ginaatubang. Kaupod ninyo Sia. Indi Niya kamo pagsikwayon. Nagapamatuod ako nga si Jesucristo Anak sang Dios. Sia ang aton kusog, ang aton Manunubos, ang aton paglaum. Kon magsalig kita sa Iya, tupungon Niya ang espirituhanon naton nga gahum sa tagsa ka pagtilaw nga ginapapas-an sa aton. Ginasaksi ko ini sa sagrado nga ngalan ni Jesucristo, amen.