Khangela kuThixo uze uPhile

NgeSilimela esigqithileyo, ingozi embi yenzeka kwilizwe laseLesotho eMzantsi Afrika. Ibhasi encinane oyayikhwelise amantombazana aselula amashumi amabini aseMaputsoe yeSebe leBandla neenkokheli zabo ezisixhenxe yayisiya kwisixeko esikhulu, Maseru, kwindibano yamantombazana aselula yesasithili. Njengoko babehamba uhola wendlela onendlela ezimbini eziya kumacala ohlukeneyo ngentseni, imoto eyayisiza kwelinye icala, izama ukudlula enye inqwelo-mafutha, yeza kwindlela ehamba ibhasi. Kwakungekho xesha nasithuba sokuphepha ukungqubana kwentloko zenqwelo-mafutha yaye ngemizuzwana iinqwelo-mafutha zangquzulana, zaqengqeleka zaphuma endleleni kwaye kwadwanguza amalangatye.

Bebonke, abantu abayi-15 basweleka kulengozi, kuquka amantombazana aselula asithandathu, iinkokeli ezimbini zamaNtombazana Aselula, nomongameli wesebe nonkosikazi wakhe. Abasindileyo, amalungu entsapho, kunye nabahlobo babonakalisa iimvakalelo ezahlukeneyo, kuquka amaxesha omsindo, ukudakumba, nesazela. Nangona ezi mvakalelo nemibuzo engaphendulwanga, baye bathuthuzelana baza baguqukela kuThixo ngomculo ongcwele, izibhalo, nomthandazo, apho baye bafumana intuthuzelo. USetso’ana Selebeli oneminyaka eyi-17 ubudala owasindayo wangqina wathi, “UYesu Krestu uyasithanda kwaye unathi, nangona iintliziyo zethu zibuhlungu.”

Ifoto nguJeffrey D. Allred, Deseret New

Intombazana encinane nenkokeli ababelaliswe esibhedlele ngenxa yonyango lokutsha bafunda iNcwadi kaMormoni kunye. Omnye wathi, “Kutsha nje besifunda kuMoronayi, kwaye uMoronayi uthetha kanye into bendiyiva. … Xa ethetha, kuba ngathi uthi, ‘Kufuneka uwafunde la mazwi kuba abhalelwe wena ukuze akuncede udlule koku.’”

Kwinkonzo yomngcwabo edibeneyo yabo babhubhileyo, uMdala woMmandla waMashumi asiXhenxe uSiyabonga Mkhize wacebisa, “Sonke kufuneka siphendukele eNkosini ngeli xesha kwaye simcele ukuba athuthuzele iintliziyo zethu kwaye … athomalalise iintlungu esizivayo.” Umongameli wamaNtombazana Aselula osuka kwiSebe laseLeribe elisebumelwaneni, uMampho Makura, wakhuthaza wathi: “Phendukela eNkosini, kwaye ufumane amandla okwamkela intando yaKhe. UYesu Krestu ‘ungumbangi nomgqibelelisi wokholo lwethu’ [Hebhere 12:2]. Musa ukujonga kude, kodwa jonga kuYe.”

Jonga kuYe. Amazwi akhe aphinda ingcebiso ka-Alma kunyana wakhe uHilamani: “Bona okokuba ukhangela kuThixo uze uphile.” U-Alma wacaphula amava kaLihayi nabantu bakhe ngeLiyahona njengomzekelo: “Kukwanjalo ukubalula ukunikela inyameko kulo ilizwi likaKrestu, eliya kukwalathisa indlela ethe tye eya kulonwabo lwanaphakade, njengokuba kwakunjalo koobawo bethu ekunikeleni inyameko kuso esi salatha-mbombo, esasiya kubalathisa indlela ethe tye eya kulo ilizwe lesithembiso.” U-Alma wathi: “Okokuba bangajongabanokuphila. … Kwaye ukuba thina … siyajonga si ngaphila ngonaphakade.”

Ngesinye isihlandlo, u-Alma wacaphula umzekelo wenyoka yobhedu eyavuswa nguMoses xa amaSirayeli amandulo ayecinezelwe ziinyoka ezinomlilo. INkosi yaxelela uMoses ukuba enze umfanekiso wenyoka aze ayixhome esibondeni, ngesithembiso sokuba “bonke abalunyiweyo bakukhangela kuyo, baya kuphila.” U-Alma wacacisa ukuba umfanekiso wobhedu yayinguchwethezo okanye umfuziselo kaKrestu, owayeya kuphakanyiswa emnqamlezweni. Abaninzi baye bajonga kwaye baphila, kodwa abanye, ngokwamazwi ka-Alma, “baqaqadekile kakhulu” kangangokuba abakhange bajonge kwaye batshabalale.

U-Alma wabuza:

“Ukuba ningaphiliswa nje kuphela ngokuphosa amehlo enu ukuze nibe nokuphiliswa, aningekhe nikhangele ngokukhawuleza, okanye ningaxolela ukuziqaqadekisa iintliziyo zenu ngokungakholwa, nize nivilaphe, ukuba ningawaphosi amehlo enu, ukuze nibe nokutshabalala?

“… Waphoseni ngapha nangapha ke amehlo enu nize niqalise ukukholelwa kuNyana kaThixo, okokuba uya kuza abakhulule abantu bakhe, nokokuba uya kuva iintlungu aze afe ukuze ahlawulele izono zabo; nokokuba uya kuvuka kwabafileyo, okuya kubangela kwenzeke uvuko, lokuba bonke abantu baze beme phambi kwakhe, ukuze bagwetywe ngowokugqibela nowomgwebo umhla, ngokwemisebenzi yabo.”

Kakade ke, ingcebiso “khangela kuThixo uze uphile” asikho nje intsingiselo kuthi ngonaphakade, kodwa senza wonke umahluko kwisimilo nomgangatho wobomi bethu basemhlabeni. Khumbula amazwi kaDade oselula uSelebeli waseLesotho asele ekhankanyiwe—“UYesu Krestu uyasithanda kwaye unathi, nangona iintliziyo zethu zibuhlungu.”

Kukwimo yelizwe eliwileyo—apho umtyholi egqushalaza khona nalapho wonke umntu engafezekanga—apho kuya kubakho ukuphoxeka nezikhubekiso, ukubandezeleka nosizi, ukusilela nelahleko, intshutshiso nentswela-bulungisa. Kungokujonga kuThixo kuphela apho abantu, iintsapho, kwanezizwe zinokuphumelela. UMongameli uRussell M. Nelson wafundisa, “Ngenxa yokuba uMsindisi, ngeNtlawulelo yaKhe engapheliyo, wakhulula ngamnye wethu kubuthathaka, iimpazamo, nesono, kwaye ngenxa yokuba Wava zonke iintlungu, ixhala, kunye nomthwalo owakhe wanawo [bona Alma 7:11–13], ngoko njengokuba uguquka ngenene kwaye ufuna uncedo lwaKhe, ungaphakama ngaphezu kweli hlabathi linzima langoku.”

Akukho sithembiso siphindwa kaninzi kwizibhalo ezingcwele zeNcwadi kaMormoni kunesi: “Kangangokuba niya kuyigcina imiyalelo yam niya kuphumelela elizweni; kodwa kangangokuba ningasayi kuyigcina imiyalelo yam niya kusikelwa ngaphandle ebusweni bam.” Amava aphilwayo ngabantu beNcwadi kaMormoni kwiinkulungwane ezininzi abonisa ubunyani bala mazwi. “Ukuphumelela” kwakuthetha ukunambitha ukhokelo neentsikelelo zasezulwini ebomini babo. “Ukuphumelela” kwakuthetha ukufikelela kwimilinganiselo yentlalo-ntle yezoqoqosho eyayibenza bakwazi ukutshata, ukukhulisa iintsapho, nokulungiselela iimfuno zabanye. “Ukuphumelela” kuquka amandla okumelana nobunzima kunye nezilingo. Ngobabalo lukaKrestu, “zonke izinto [ziye zasebenzelana] nokulungelwa [kwabo],” zabasulungekisa, zade zalwenza nzulu ulwalamano lwabo kunye naYe.

U-Alma wacacisa ukuba ukujonga kuThixo kukugcina imiyalelo yaKhe, ukhale kuYe rhoqo ukuze ufumane inkxaso yaKhe, cebisana kunye naYe kuzo zonke izenzo zakho, kwaye intliziyo yakho mayizaliswe ngumbulelo kuYe imini nobusuku. Imithetho nengcebiso zikaThixo zifumaneka kwizibhalo nakumazwi ezicaka zaKhe. Imigaqo neenjongo ezibekiweyo kuso “USapho: iSibhengezo kwiHlabathi” ngumzekelo obalaseleyo. Olunye lukhokelo olufumaneka kwincwadana ethi Okwenzelwe Ukomeleza uLutsha. Umxholo waBafana abaSelula namaNtombazana Aselula walo nyaka uthi “Jonga kuKrestu,” utsalwe kulwalathiso lweNkosi oluthuthuzelayo oluya kuJoseph Smith no-Oliver Cowdery: “Khangela kum kuyo yonke ingcinga; ningathandabuzi, ningoyiki.” Okwenzelwe Ukomeleza uLutsha ithetha ngemithetho emininzi engxamisekileyo kaThixo nemigangatho kwaye ifundisa indlela yokujonga eNkosini ekwenzeni izigqibo ezilungileyo. Isisikhokelo kungekuphela nje kulutsha kodwa kuthi sonke.

Njengomzekelo obaluleke kakhulu, Okwenzelwe Ukomeleza uLutsha inesikhokelo esibalulekileyo kwisahluko esinomxholo othi “Umzimba Wakho UNgcwele.” Iyayalela: “Wuphathe umzimba wakho—kunye nemizimba yabanye ngentlonipho. Njengoko usenza izigqibo malunga nesinxibo sakho, iinwele zakho nendlela okhangeleka ngayo, zibuze, ‘Ngaba ndiwunika imbeko umzimba wam njengesipho esingcwele esivela kuThixo?’”

Okwenzelwe Ukomeleza uLutsha ngokubhekele phaya ithi: “Gcina isini neemvakalelo yezesondo ngcwele. Ayifanele ibe ngumxholo wokuqhula okanye wokuzonwabisa. Ngaphandle komtshato phakathi kwendoda nomfazi, akulunganga ukubamba amalungu angasese, angcwele omzimba womnye umntu nokuba wembathisiwe. Kukhetho lwakho malunga nento oyenzayo, jonga, ufunde, umamele, ucinge, uthumele, okanye umbhalo, phepha nantoni na evuselela inkanuko kwabanye okanye kuwe.”

Oku kusikhumbuza isiluleko samva nje sikaMongameli Nelson:

“Zimbalwa izinto eziya kubenza nzima ubomi bakho ngokukhawuleza kunokwaphula lo mthetho wobuthixo [wobunyulu]. Kwabo abenze iminqophiso noThixo, ukuziphatha kakubi yenye yeendlela ezikhawulezayo zokuphulukana nobungqina bakho.

“… Amandla okudala ubomi lilungelo elilodwa lobuthixo uBawo oseZulwini avumela abantwana baKhe basemhlabeni ukuba balisebenzise. Ngalo hlobo, uThixo wamisela ulwalathiso olucacileyo lokusetyenziswa kwala mandla aphilayo, obuthixo. Ukusondelelana ngokwasenyameni kokwendoda nomfazi abatshatileyo kuphela.

“Uninzi lwehlabathi aluyikholelwa le nto, kodwa uluvo loluntu ayingomlali wenyaniso. INkosi ibhengeze ukuba akukho mntu ungamsulwanga uya kuzuza ubukumkani beselestiyali. … Ukuba uye awabimsulwa, ndiyakubongoza ukuba uguquke. Yiza kuKrestu ufumane isithembiso saKhe esigqibeleleyo soxolelo njengoko uguquka ngokupheleleyo ezonweni zakho [bona uIsaya 1:16–18; IMfundiso neMinqophiso 58:42–43].”

Khumbula ukuba kwisithembiso seNcwadi kaMormoni, isichasi sempumelelo yayingeyiyo intlupheko—yayikusikwa ebusweni beNkosi. Ubukho bakhe bubhekisa kwimpembelelo yoMoya waKhe ebomini bomntu. Bonke bazaliswa kukuKhanya kukaKrestu njengoko besiza ehlabathini. Ukongeza, abanye benza okuthile ukuze babhaptizwe kwaye bamkele isipho nokukhanya okongeziweyo koMoya oyiNgcwele. Uzisa impembelelo nesikhokelo, wongeza kwaye usulungekise izipho zemveli nobuchule, kwaye unceda ukuphepha iimpembelelo ezimbi, izigqibo ezingezizo, kunye neenjongo ezifileyo.

Njengawe, Ndiyabazi abanye ababekhe basonwabela isipho soMoya oyiNgcwele kodwa abathi ngokusilela ukuyigcina imiyalelo kaThixo baphulukene naloo ntsikelelo. Omnye ofika engqondweni obulungu bakhe eBandleni buthe barhoxiswa ngenxa yokreqo. Uthe impendulo yakhe yokuqala yayikukuziva ecaphukile. Waziva egwetywa ziinkokeli ezingafezekanga. Wayesazi ukuba ihambo yakhe yayingalunganga, kodwa wayithethelela ngokwalatha kwiimpazamo nakwiintsilelo zabanye. Emva kwexesha, waqala ukuziva ekhululekile kwindlela yokuphila ngaphandle kweBandla ngaphandle kwesibophelelo sobizo nokulindela ukuya kwiinkonzo zonqulo kunye nokulungiselela abanye.

Oku kwaqhubeka kangangexesha elithile, kodwa waqalisa ukuva ngokunzulu ngakumbi ukungabikho koMoya oyiNgcwele—ubukho bukaThixo—ebomini bakhe. Ngamava, wayesazi ukuba yayinjani, imihla ngemihla, ukubanentuthuzelo, inkokelo, nokuzithemba okuzelwe nguMoya, kwaye wayeyikhumbula. Ekugqibeleni, wenza okwakufuneka ukuze aguquke aze afanelekele kwakhona ubhaptizo lwamanzi noMoya.

Kubonakala ngathi ayinasiphelo kumaxwebhu eyahlukeneyo abantu abakhangele kuyo intsingiselo, ulonwabo, kunye noncedo. Uninzi “lujonge ngaphaya kophawu.” Kodwa akuyomfuneko ukuba sibe “ngabantwana, sikhukuliswe, siphetshethwa nguwo wonke umoya wemfundiso [okanye yefashoni].” Ekujongeni kuThixo, sinokufumana uxolo ebunzimeni, kwaye ukholo lwethu lungaqhubeka lukhula nangamaxesha entandabuzo kunye nomceli-mngeni womoya. Sinokufumana ukumelezwa xa sijamelene nenkcaso nokwahlukaniswa. Siyakwazi ukulungelelanisa okufanelekileyo nobukho bangoku. Ngokwenene, ayikho enye indlela ngaphandle kwaleyo uThixo ngokwaKhe ayimiseleyo: “Jonga kum, nisindiswe, nonke ziphelo zehlabathi; ngokuba ndinguThixo, akukho wumbi.”

Ukujonga kuThixo kuthetha ukuba Yena akayonto nje enye yezinto ezibalulekileyo kuthi; kuthetha, kunoko, ukuba ungoYena ubalulekileyo kuthi. Ndikhumbula kwakhona laa ngozi imbi kakhulu eLesotho kwi nyanga edlulileyo yeSilimela. Ekwibhedi yakhe yasesibhedlele, enye yeenkokheli zamaNtombazana Aselula asindileyo, ababengakholelwa kuThixo phambi kokuba azibandakanye neBandla, wathi injongo yakhe ngoku kukufumanisa ukuba kwakutheni ukuze ubomi bakhe busindiswe. Wathi: “Ukukhonza uThixo rhoqo yindlela eyokhokela ekufumaneni impendulo, ukuba uyakufikelela kwimpendulo. “Ndandikade ndicinga ukuba ndiyamthanda uThixo, kodwa ngoku ngokwenene, ngokwenene, ngokwenene, ngokwenene, ngokwenene, ndimthanda Yena. Ngoku Yena [ungowokuqala] ukubaluleka ebomini bam.”

Ndinikela ubungqina ngoYise, uNyana, noMoya oyiNgcwele, abathi ngokumanyana okugqibeleleyo kwelizwi, ingcinga, injongo, nesenzo banguThixo omnye, esinokukhangela zonke izinto ezilungileyo. Ndinikela ubungqina beNtlawulo kaYesu Krestu, apho avela khona amandla okuzalisekisa esi sithembiso simangalisayo: “Khangelani kum, ninyamezele kude kube sesiphelweni, kwaye niya kuphila; kuba kulowo unyamezelayo kude kube sesiphelweni ndiya kumnika ubomi obungunaphakade.” Egameni likaYesu Krestu, amen.