عہُود، قُدرت، اور وعدے

جلالی روشنی—کرٹ لینڈ ہَیکل، اَز گلین ایس ہوپ کنسن، نقل نہیں کی جا سکتی

کلِیسیا اِتنی ہَیکلیں کیوں تعمیر کر رہی ہے؟

”ہمارے پیش روؤں نے پیشین گوئی کی ہے کہ شُمالی اور جنُوبی امریکہ، بحرالکاہل کے جزائر، یورپ، اور دیگر مقامات کے مناظِر پر ہَیکلیں نُقطوں کی مانِند دَھرتی معمُور کریں گی،“ صدر عزرا ٹافٹ بینسن (1899−1994) نے کئی دہائیاں قبل یہ فرمایا۔ ”اگر یہ نجات بخش کام اُس پیمانے پر ہونا ہے جس پر اِسے ہونا چاہیے، تو سینکڑوں ہَیکلوں کی ضرُورت ہو گی۔“

صدر رسل ایم نیلسن نے فرمایا کہ ہم آج بے مِثال رفتار سے ہَیکلیں تعمیر کر رہے ہیں ”کیوں کہ خُداوند نے ہمیں اَیسا کرنے کی ہدایت دی ہے۔ ہَیکل کی برکات پردے کے دونوں اَطراف اِسرائیل کو اِکٹھا کرنے میں مدد دیتی ہیں۔ یہ برکات اَیسی اُمّت تیار کرنے میں بھی مددگار ثابت ہوں گی جو دُنیا کو خُداوند کی آمدِ ثانی کے لیے تیار کرنے میں مُعاونت کرے گی!“

کرٹ لینڈ ہَیکل کی تقدِیسی دُعا میں جوزف سمِتھ نے یہ دُعا کی ”کہ تمام لوگ جو خُداوند کے گھر کی دہلیز میں داخِل ہوں تیری قُدرت کو محسُوس کر سکیں۔ …

”اور ہم تُجھ سے مانگتے ہیں، مُقدّس باپ، کہ اِس گھر سے تیرے خادِم تیری قُدرت سے ملبُوس ہو کر جائیں، اور کہ تیرا نام اُن پر ہو، اور تیرا جلال اُن کے چوگِرد ہو، اور تیرے فرِشتوں کی نِگہبانی اُن پر ہو“ (عقائد اور عہُود 13:109، 22؛ تاکید شامِل ہے؛ مزید دیکھیں آیت 23)۔

جب مَیں یہ آیات پڑھتا ہُوں، تو مَیں نِیفی کی آخِری ایّام کی رویا کی بابت سوچتا ہُوں۔ مِلتے جُلتے الفاظ پر غور کریں: ”اور ایسا ہُوا کہ مُجھ نِیفی نے خُدا کے برّہ کی قُدرت دیکھی، جو کہ خُدا کے برّہ کی کلِیسیا کے مُقدّسین، اور رُویِ زمِین پر پھیلے ہُوئے خُداوند کے موعُودہ لوگوں پر نازِل ہُوئی، جو تمام رُویِ زمِین پر پھیلے تھے؛ اور وہ راست بازی اور خُدا کی قُدرت کے بڑے جلال سے لیس تھے۔“(1 نِیفی 14:14؛ تاکید شامِل ہے)۔

میرا اِیمان ہے کہ آخِری ایّام کی ہَیکلیں نِیفی کی نبُوت کی تکمیل میں اَہم کِردار اَدا کرتی ہیں اور آمدِ ثانی سے قبل اِیمان داروں سے کِیے گئے وعدے کے مُوافق قُدرت اور مُحافظت کا مرکز ہیں۔

کئی برس پہلے، جب مَیں یُونیورسٹی کی ایک وارڈ میں بِشپ کی حیثیت سے خِدمت کر رہا تھا، تو مَیں اپنی وارڈ میں ایک نوجوان خاتُون سے خاصا مُتاثر ہُوا۔ وہ آج بھی مُجھے مُتاثر کرتی ہے۔ آپ اُنھیں صدر ایمیلی بیل فری مین، ینگ وومن کی عمُومی صدر کے طور پر جانتے ہیں۔ حال ہی میں مجلسِ عامہ کے خطاب میں، اُنھوں نے سِکھایا کہ ہَیکلوں کے وسیلے، یِسُوع مسِیح ہمیں ایک بُلند ترین رُوحانی سطح پر لے جاتا ہے۔

”ہر بار جب مَیں اُس کے گھر کی دہلیز میں داخِل ہوتی ہُوں، تو مَیں اُس کے ساتھ عہد کے زیادہ گہرے تعلق کا تجربہ کرتی ہُوں،“ صدر فری مین نے کہا۔ ”مَیں اُس کے رُوح کے ساتھ پاک صاف کی گئی ہُوں، اُس کی قُدرت سے ودیعت یافتہ ہُوں، اور اُس کی بادشاہی کی تعمیر کے لیے الگ کی گئی ہُوں۔“

صدر نیلسن نے ہَیکل کے عہُود کے وسیلے دَستیاب یِسُوع مسِیح کی قُدرت کے مُتعلق اکثر بات کی ہے۔ ”بلکہ مسِیح کے جُوئے میں جوتے جانے کا یہ مطلب ہے کہ آپ کو اُس کی قُوت اور نجات بخش قُدرت تک رسائی مُیسر ہے،“ اُنھوں نے فرمایا۔ صدر نیلسن نے مزید سِکھایا ہے:

”جب ہم اپنے ہَیکل کے عہُود پر قائم رہتے ہیں، تو ہمیں خُداوند کی تقویت بخش قُدرت تک زیادہ رسائی مُیسر ہوتی ہے۔ ہَیکل میں، ہم دُنیا کے تھپیڑوں سے تحفُظ پاتے ہیں۔“

”[نجات دہندہ کی] لازمی رَسُومات ہمیں مُقدّس کہانتی عہُود کے ذریعے اُس کے ساتھ باندھتی ہیں۔ پھر، جب ہم اپنے عہُود پر قائم رہتے ہیں، تو وہ ہمیں اپنی شِفا، اور مضبُوط کرنے والی قُوت عطا کرتا ہے۔ اور ہاں، ہمیں آنے والے دِنوں میں کیسے اُس کی قُوت دَرکار ہو گی۔“

”ہماری اُمّت کو اِس وقت اور آنے والے دِنوں میں جس اِخلاقی اور رُوحانی قُوت کی ضرُورت ہے وہ خُدا باپ اور اُس کے بیٹے، یِسُوع مسِیح کی قُوت ہے۔ ہم اُن کے ساتھ عہُود باندھنے اور اُن کی پاس داری کرنے سے اُن کی قُوت تک رسائی حاصِل کرتے ہیں۔“

اِلہٰی قُدرت اَہم ہے، بھائیو اور بہنو، چُوں کہ ہم ایک نہایت بدکار دُنیا میں رہتے ہیں۔ اِس قُدرت کے بغیر، ہم ”اُس کے آنے کے دِن کی تاب نہ لا سکیں گے“ یا ”جب اُس کا ظہُور ہو گا تو کھڑے نہ رہ سکیں گے“ (ملاکی 2:3)۔ ہم نہیں جانتے کہ وہ دِن کب آئے گا، مگر اُس کے رَسُول کو پہلے ہی اُس کے آنے کے لیے راہ دُرست کرنے کے لیے بھیجا چا چُکا ہے (ملاکی 3:‏1) اِس عَرصے میں، دُنیا اُس دِن کی طرف اَمن و سُکُون سے آگے نہیں بڑھ رہی۔

ہمیں اِیمان داروں سے وعدہ کی گئی قُوت کی ضرُورت ہے تاکہ یہ ہماری مدد کرے کہ:

• خُدا ہماری زِندگیوں پر غالِب آئے۔

• توبہ کریں اور خُداوند کے قریب آئیں۔

• برکت دیں، تسلّی دیں، راہ نُمائی، اور خِدمت کریں۔

• ”اپنے اِمتحانوں، آزمایشوں، اور دُکھوں کا بہتر مُقابلہ کریں“ (دیکھیں مُضایاہ 3:‏19)۔

• عہد کی راہ پر چلتے ہُوئے اِطمینان اور شادمانی تلاش کریں۔

• ”بدکاروں کی آفت“ اور ”بھسم کرنے والے دِن کے خِلاف“ تیار ہوں (عقائد اور عہُود 109:‏46)۔

• خُداوند کی آمدِ ثانی سے پہلے اُس کے کام کی تکمیل کریں۔

ٹٗوسن ایری زونا ہَیکل کے گُنبد کی تصویر اَز جیمز وِٹنی ینگ

نجات کے مُحافظ

آسمانی باپ کا اَمر اور جلال یہ ہے کہ ”اِنسان کی لافانی اور اَبَدی زِندگی کا سبب پَیدا کرے“ (مُوسیٰ 1:‏39)۔ ہر ہَیکل خُدا کے نجات کے منصُوبے کی مُحافظ کی حیثیت سے کھڑی ہے، جو اُس اَمر اور جلال میں مُنّجی کے مرکزی کِردار کی طرف اِشارہ کرتی ہے۔

اُس کی قُوت سے مُلبس ہو کر، عہد کی پاس داری کرنے والا ہر مَرد اور عورت−شادی شُدہ یا غیر شادی شُدہ−جو وفاداری سے ہَیکل کے عہُود کو نِبھاتا ہے اِس زِندگی میں اور آنے والی زِندگی میں برکت پائے گا۔

صدر نیلسن نے وعدہ کِیا ہے: ”وہ آخرت جس کے لیے ہم میں سے ہر ایک کوشِش کرتا ہے وہ خُداوند کے گھر میں قُدرت کے ساتھ ودیعت پانا، خاندانوں کے طور پر مُہربند ہونا، ہَیکل میں باندھے جانے والے عہُود کے ساتھ وفادار رہنا ہمیں خُدا کی سب سے بڑی نعمت کے قابل بناتا ہے—جو کہ اَبَدی زِِندگی ہے۔ ہَیکل کی رُسُوم اور وہ عہُود جو آپ وہاں باندھتے ہیں وہ آپ کی زِِندگی، آپ کی شادی اور خاندان، اور مُخالف کے حملوں کے خِلاف مزاحمت کرنے کی آپ کی صلاحیت کو مضبُوط کرنے کی کُنجی ہے۔ ہَیکل میں آپ کی پرستِش اور اپنے آباؤ اَجداد کے لیے آپ کی خِدمت آپ کو ذاتی مُکاشفہ اور اِطمینان میں اِضافے کی برکت دے گی اور عہد کی راہ پر گامزن رہنے کے لیے آپ کے عزّم کو مضبُوطی عطا کرے گی۔“

خُداوند یِسُوع مسِیح کا رَسُول ہونے کے ناطے، مَیں گواہی دیتا ہُوں کہ یہ باتیں سچ ہیں۔