నిబంధనలు, శక్తి మరియు వాగ్దానాలు

గ్లెన్ ఎస్. హాప్కిన్‌సన్ చేత ఒక మహిమకరమైన వెలుగు—కర్ట్‌లాండ్ దేవాలయము అనుకరించబడదు.

ఇన్ని దేవాలయాలు ఎందుకు?

“ఉత్తర మరియు దక్షిణ అమెరికా, పసిఫిక్ ద్వీపాలు, ఐరోపా మరియు ఇతర ప్రాంతాలలో దేవాలయాలు కనిపిస్తాయని మా పూర్వీకులు ప్రవచించారు,” అని అధ్యక్షుడు ఎజ్రా టాఫ్ట్ బెన్సన్ (1899–1994) అనేక దశాబ్దాల క్రితం చెప్పారు. “ఈ విమోచన కార్యం ఇలాంటి స్థాయిలో జరగాలంటే వందలాది దేవాలయాలు అవసరమవుతాయి.”

అధ్యక్షులు రస్సెల్ ఎమ్. నెల్సన్ ఇలా చెప్పారు, నేడు మనం అపూర్వమైన వేగంతో దేవాలయాలు నిర్మిస్తున్నాము “ఎందుకనగా ప్రభువు ఆవిధంగా చేయమని మనకు సూచించారు. దేవాలయ దీవెనలు ఇశ్రాయేలీయుల‌ను తెరకు రెండు వైపులా సమకూర్చడానికి సహాయపడతాయి. ఈ దీవెనలు ప్రభువు యొక్క రెండవ రాకడ కోసం ప్రపంచాన్ని సిద్ధం చేయడంలో సహాయపడే జనులను సిద్ధం చేయడానికి కూడా సహాయపడతాయి!”

కర్ట్‌లాండ్ దేవాలయ ప్రతిష్ఠాపన ప్రార్థనలో, జోసెఫ్ స్మిత్ ఇలా ప్రార్థించాడు, “ప్రభువు యొక్క మందిరపు గుమ్మమున ప్రవేశించే జనులందరూ మీ శక్తిని అనుభూతి చెందుదురు గాక. …

“పరిశుద్ధ తండ్రీ, నీ నామము వారిపైన ఉండి నీ మహిమ వారిచుట్టూ ఉండి, వారి యెడల నీ దూతలు ఆజ్ఞను కలిగియుండుటకు, నీ శక్తిని ఆయుధములుగా ధరించుకొని నీ సేవకులు ఈ మందిరము నుండి వెళ్ళగలుగుటకు మేము నిన్నడుగుచున్నాము” (సిద్ధాంతము మరియు నిబంధనలు 109:13, 22; వివరణ చేర్చబడింది; 23 వచనము కూడ చూడండి).

ఆ వచనాలను నేను చదివినప్పుడు, కడవరి దినాలను గూర్చి నీఫై యొక్క దర్శనం గురించి నేను ఆలోచిస్తున్నాను. ఇదేవిధమైన పదాలను గమనించండి: “భూముఖమంతటిపై చెదిరియున్న గొఱ్ఱెపిల్ల సంఘము యొక్క పరిశుద్ధులపైన, ప్రభువు నిబంధన జనులపైన దేవుని గొఱ్ఱెపిల్ల యొక్క శక్తి దిగివచ్చుట నీఫైయను నేను చూచితిని; వారు గొప్ప మహిమయందు పరిశుద్ధతను, దేవుని శక్తిని ఆయుధములుగా ధరించుకొనియుండిరి” (1 నీఫై 14:14; వివరణ చేర్చబడింది).

కడవరి-దిన దేవాలయాలు నీఫై ప్రవచనం నెరవేర్పులో ముఖ్యమైన పాత్ర వహిస్తాయని, రెండవ రాకడకు ముందు విశ్వాసులకు వాగ్దానము చేయబడిన భద్రత మరియు శక్తికి చాలా ముఖ్యమైనవని నేను నమ్ముతున్నాను.

కొన్ని సంవత్సరాల క్రితం, నేను విశ్వవిద్యాలయ వార్డుకు బిషప్పుగా సేవ చేస్తున్నప్పుడు, మా వార్డులో ఒక యువతి నన్ను ప్రత్యేకంగా ఆకట్టుకుంది. ఆమె ఇప్పటికీ నన్ను ఆకట్టుకుంటుంది. ఆమె యువతుల ప్రధాన అధ్యక్షురాలైన, అధ్యక్షురాలు ఎమిలీ బెల్లె ఫ్రీమాన్‌గా మీకు తెలుసు. ఇటీవల సర్వసభ్య సమావేశ ప్రసంగంలో, ఆమె దేవాలయం ద్వారా యేసు క్రీస్తు మనల్ని మహోన్నతమైన ఆత్మీయ స్థాయికి పైకి ఎత్తుతారని బోధించింది.

“ఆయన మందిరపు గుమ్మములో ప్రవేశించిన ప్రతిసారి, నేను ఆయనతో లోతైన నిబంధన సంబంధాన్ని అనుభవిస్తున్నాను,” అని అధ్యక్షురాలు ఫ్రీమాన్ చెప్పింది. “ఆయన ఆత్మతో నేను శుద్ధి చేయబడ్డాను, ఆయన శక్తితో వరమివ్వబడ్డాను, మరియు ఆయన రాజ్యమును నిర్మించడానికి నియమించబడ్డాను.”

దేవాలయ నిబంధనల ద్వారా లభ్యమయ్యే యేసు క్రీస్తు యొక్క శక్తి గురించి అధ్యక్షులు నెల్సన్ తరుచుగా చెప్పారు. “మీరు రక్షకుని యొక్క కాడిని యెత్తుకోవడమంటే అర్థము, ఆయన బలానికి, విమోచనా శక్తికి మీరు ప్రవేశం కలిగియుండడం” అని ఆయన అన్నారు. అధ్యక్షులు నెల్సన్ ఇలా కూడా బోధించారు:

“మనం మన దేవాలయ నిబంధనలను పాటించినప్పుడు, ప్రభువు యొక్క బలపరిచే శక్తిని మనం ఎక్కువగా పొందుతాము. దేవాలయంలో, లోకము యొక్క దెబ్బల నుండి మనం రక్షణ పొందుతాము.”

“పవిత్రమైన యాజకత్వ నిబంధనల ద్వారా ఆయన ఆవశ్యకమైన విధులు మనల్ని “[రక్షకునితో] బంధించి ఉంచుతాయి. తరువాత, మనం మన నిబంధనలను పాటించినప్పుడు, ఆయన స్వస్థపరిచే, బలపరిచే శక్తిని ఆయన మనకు వరముగా ఇస్తారు. మరియు ఓహ్, రాబోయే రోజుల్లో ఆయన శక్తి మనకు ఎంతో అవసరం.”

“మన జనులకు ప్రస్తుతం మరియు రాబోయే రోజులకు అవసరమైన నైతిక మరియు ఆత్మీయ శక్తి, తండ్రియైన దేవుడు మరియు ఆయన కుమారుడైన యేసు క్రీస్తు యొక్క శక్తి. వారితో నిబంధనలను చేసి, పాటించడం ద్వారా వారి శక్తిని మనం పొందుతాము.”

సహోదర, సహోదరిలారా, పరలోక శక్తి ముఖ్యమైనది, ఎందుకనగా మనము చాలా దుష్టలోకంలో జీవిస్తున్నాము. ఆ శక్తి లేకుండా, మనం “ఆయన రాకడను సహింపలేము” లేదా “ఆయన అగుపడగా ఓర్వలేము” (మలాకీ 3:2). ఆ రోజు ఎప్పుడో మనకు తెలియదు, కానీ ఆయన రాకడ కొరకు “మార్గము సిద్ధపరచుటకు” (మలాకీ 3:1) ఆయన దూత ఇదివరకే పంపబడ్డాడు. ఈలోగా, ప్రపంచం ఆ రోజు వైపు ప్రశాంతంగా జారిపోవడం లేదు.

మనకు సహాయపడటానికి విశ్వాసులకు వాగ్దానము చేయబడిన శక్తి మనకవసరం:

• మన జీవితాలలో దేవునికి ప్రాధాన్యతను ఇవ్వాలి.

• పశ్చాత్తాపపడి, ప్రభువుకు దగ్గర కావాలి.

• దీవించాలి, ఓదార్చాలి, నడిపించాలి, మరియు పరిచర్య చేయాలి.

• “మన శ్రమలు, శోధనలు మరియు హృదయ వేదనలను సరిగా భరించాలి” (మోషైయ 3:19 చూడాలి).

• మనం నిబంధన బాటను నడుస్తున్నప్పుడు క్రీస్తునందు శాంతిని మరియు ఆనందాన్ని కనుగొనాలి.

• “దహించివేయబడు దినము” మరియు “దుష్టులకు కలుగబోవు ఉపద్రవముకు” (సిద్ధాంతము మరియు నిబంధనలు 109:46) వ్యతిరేకంగా సిద్ధపడాలి.

• ప్రభువు రాకడకు ముందు ఆయన కార్యమును నెరవేర్చాలి.

జేమ్స్ విట్నీ యంగ్ చేత టక్సన్ ఆరిజోనా దేవాలయపు గోపురం యొక్క ఛాయాచిత్రం

రక్షణ సైనికులు

“నరునికి అమర్త్యత్వమును, నిత్యజీవమును ఇచ్చుటయే” పరలోక తండ్రి యొక్క కార్యమును మహిమయైయున్నది (మోషైయ 1:39). ఆ కార్యము మరియు మహిమలో రక్షకుని ప్రధాన పాత్రను సూచిస్తూ, ప్రతి దేవాలయము దేవుని యొక్క రక్షణ ప్రణాళికకు భూసంబంధమైన కాపలాదారునిగా నిలుచును.

ఆయన శక్తితో ధరించబడి, నిబంధన-పాటించే ప్రతి పురుషుడు మరియు స్త్రీ—వివాహితులైన లేదా కానప్పటికినీ—దేవాలయ నిబంధనలను విశ్వాసంగా పాటించే వారు ఈ జీవితంలో, రాబోయే మరియు జీవితంలో దీవించబడతారు.

అధ్యక్షులు నెల్సన్ వాగ్దానమిచ్చారు: “మనలో ప్రతీఒక్కరు ప్రయాసపడే లక్ష్యము ప్రభువు యొక్క మందిరములో శక్తితో దీవించబడుట, కుటుంబాలుగా బంధింపబడుట, దేవుని యొక్క మిక్కిలి గొప్ప వరమైన—నిత్యజీవము కొరకు మనల్ని అర్హులుగా చేయునట్లు దేవాలయములో చేయబడిన నిబంధనలకు విశ్వాసముగా ఉండుట. దేవాలయము యొక్క విధులు మరియు అక్కడ మీరు చేయు నిబంధనలు మీ జీవితము, మీ వివాహము, కుటుంబమును మరియు అపవాది యొక్క ముట్టడులను ఎదురించుటకు మీ సామర్ధ్యమును బలపరచుటకు ముఖ్యమైనవి. దేవాలయములో మీ ఆరాధన, మీ పూర్వీకుల కొరకు అక్కడ మీ సేవ మిమ్మల్ని హెచ్చించబడిన వ్యక్తిగత బయల్పాటుతో దీవించును, నిబంధన బాటపై నిలిచియుండుటకు మీ నిబద్ధతను పటిష్టపరచును.”

ప్రభువైన యేసు క్రీస్తు యొక్క అపొస్తులునిగా, ఈ విషయాలు సత్యమని నేను సాక్ష్యమిస్తున్నాను.