మీ సువార్త ప్రయాణంలో ఆనందాన్ని కనుగొనుట

యేసు క్రీస్తు తన సువార్తను ప్రవక్త జోసెఫ్ స్మిత్ ద్వారా పునఃస్థాపించారు కనుక, “మనమెవరము అనే జీవితపు ఉద్దేశ్యమును గూర్చి జ్ఞానాన్ని మనం కలిగియున్నాము,” అని అధ్యక్షులు ఎమ్. రస్సెల్ బల్లార్డ్ ప్రకటించారు (1928-2023). సంఘానికి తన చివరి సాక్ష్యములో, అప్పుడు-పన్నెండుమంది అపొస్తలుల సమూహము యొక్క తాత్కాలిక అధ్యక్షులుగా ఉన్న అధ్యక్షులు బల్లార్డ్, ఇలా చెప్పారు:

“దేవుడు ఎవరో మనకు తెలుసు; రక్షకుడెవరో మనకు తెలుసు, ఎందుకంటే తన పాప క్షమాపణ కోరుతూ బాలుడిగా చెట్ల పొదలలోకి వెళ్ళిన జోసెఫ్ మనతో ఉన్నాడు. …

“జీవితంలో మన ఉద్దేశ్యం గురించి మనకు ఏమి తెలుసు, మనం ఎందుకు ఇక్కడ ఉన్నాము, మన దైనందిన జీవితంలో మనం ఏమి చేయడానికి ప్రయత్నించాలి మరియు ఏమి సాధించాలి అనే దాని గురించి మనం తెలుసుకోవడం ఎంత ఆశీర్వాదకరమో నేను ఆశ్చర్యపోతున్నాను, మరియు మీలో చాలా మంది కూడా ఖచ్చితంగా చేస్తారని నేను అనుకుంటున్నాను.”

యేసు క్రీస్తు యొక్క కడవరి-దిన పరిశుద్ధుల సంఘ సభ్యులకు, ఆ జ్ఞానము దేవుని రక్షణ యొక్క “పరిపూర్ణమైన ప్రణాళికను” కలిపియున్నది. “సంతోషము యొక్క గొప్ప ప్రణాళిక”, “విమోచన యొక్క ప్రణాళిక” మరియు “కనికరము యొక్క ప్రణాళిక” (అల్మా 42:8, 11, 15) అని కూడా పిలవబడే ఇది జీవితం యొక్క రహస్యాన్ని మరియు మన భవిష్యత్తు యొక్క అనిశ్చితిని తొలగిస్తుంది. ఆ ప్రణాళికకు ముఖ్యమైనది, “క్రీస్తు యొక్క సిద్ధాంతము,” ఇది జీవితం యొక్క ఉద్దేశానికి ప్రధానమైనది.

మనం సువార్తను కలిగియున్నాము కనుక, మనము దేవుని పిల్లలమని, పరీక్షించబడటానికి, మెరుగుపరచబడటానికి, మరియు “వధించబడిన గొఱ్ఱెపిల్ల యొక్క విజయము, మహిమ ద్వారా, మృతుల పునరుత్థానమువలన ముందుకు తేబడటానికి” (సిద్ధాంతము మరియు నిబంధనలు 76:39) సిద్ధపరచబడటానికి భూమి మీదకు పంపబడ్డామని మనం ఎరుగుదుము. మనకు ఆజ్ఞలు తెలుసు మరియు “మంచి చెడులను [మనం] తెలుసుకొనుటకు తగినంత సమృద్ధిగా” (2 నీఫై 2:5) బోధింపబడియున్నాము. ప్రేమించడానికి మరియు సేవ చేయడానికి మనం భూమి మీద ఉన్నామని ఎరుగుదుము. ఆయన రెండవ రాకడ కొరకు సిద్ధపాటులో లోకాన్ని జయించడానికి మరియు ఇతరులు అదేవిధంగా చేయడానికి సహాయపడుటకు రక్షకుడు మనల్ని పిలిచారని మనమెరుగుదుము (యోహాను 16:33; సిద్ధాంతము మరియు నిబంధనలు 64:2 చూడండి)

మనము ఆయనపై దృష్టిసారించినప్పుడు, “మన ప్రభువైన యేసు క్రీస్తు యొక్క సువార్త యొక్క ఉల్లాస ధ్వని” అని జోసెఫ్ స్మిత్ పిలిచినది కష్టతరమైన రోజులలో మనల్ని బలపరుస్తుంది మరియు మన జీవితాలలో, ఇతరుల జీవితాలకు అర్థాన్ని మరియు ఉద్దేశాన్ని తెస్తుంది.

డేన్ విల్సన్ చేత, ప్రతి మోకాలు వంగును, అనుకరించబడదు

విధేయత, దీవెనలు, ఆనందము

మన ఎంపికల కొరకు జవాబుదారులుగా ఉండునట్లు దేవుడు మనకు నైతిక కర్తృత్వమును ఇచ్చారు (సిద్ధాంతము మరియు నిబంధనలు 101:78; 2 నీఫై 2:16 చూడండి). “అన్ని విషయములలో వ్యతిరేకత ఉండుట” (2 నీఫై 2:11) లో భాగంగా, మన కర్తృత్వమును దుర్వినియోగం చేయడానికి మనల్ని శోధించడానికి సాతాను అనుమతించబడ్డాడు.

కానీ ప్రభువైన యేసు క్రీస్తు, మన కాలములో, “భూలోక నివాసులందరిపైకి రాబోవు విపత్తునెరిగి,” ప్రవక్త జోసెఫ్ స్మిత్‌ను పిలిచి, “పరలోకము నుండి మాట్లాడి, మరియు అతనికి ఆజ్ఞలనిచ్చెను” (సిద్ధాంతము మరియు నిబంధనలు 1:17). ప్రభువు తన ఆజ్ఞలను మరియు చిత్తమును తన ప్రవక్తలకు బయల్పరచే మాదిరి మన కాలంలో అధ్యక్షులు రస్సెల్ ఎమ్. నెల్సన్‌తో కూడా కొనసాగుతున్నది—మరియు అదే కారణము కొరకు. ఈ జీవితంలో సంతోషానికి మరియు తరువాత జీవితంలో సిలెస్టియల్ మహిమకు మనల్ని నడిపించడానికి దేవుడు కోరుతున్నారు.

దేవుని ఆజ్ఞలకు విధేయత అనేది ఆయన పట్ల మనకున్న భక్తి మరియు మన ప్రేమ నుండి రావాలి. దేవునిని ప్రేమించుట “ముఖ్యమైనదియు మొదటిదియునైన ఆజ్ఞ” (మత్తయి 22:37–38 చూడండి) అని ప్రభువైన యేసు క్రీస్తు తానే ప్రకటించారు. తరువాత “మీరు నన్ను ప్రేమించిన యెడల నా ఆజ్ఞలను గైకొందురు” (యోహాను 14:15) అని ఆయన ప్రకటించినప్పుడు, ఆయన మరింత అంతర్దృష్టిని ఇచ్చారు.

ప్రభువును ప్రేమించి మరియు ఆయన ఆజ్ఞలను పాటించినందుకు బహుమానమున్నది. ఈ యుగములో ఆయన ఇలా ప్రకటించారు, “అన్ని దీవెనలు ఆధారపడియున్న ఒక ధర్మశాస్త్రము మార్పు చేయజాలని విధముగా పరలోకములో ప్రకటించబడెను—

“మనము దేవుని నుండి ఏదైనా దీవెనను పొందిన యెడల, అది ఏ ధర్మశాస్త్రముపై ఆధారపడియున్నదో దానికి విధేయత చూపుట ద్వారా అది జరుగును” (సిద్ధాంతము మరియు నిబంధనలు 130:20–21).

కాబట్టి, ఆయన ఆజ్ఞలను పాటించుట ద్వారా ప్రభువు పట్ల మన ప్రేమను చూపించుట వలన కలిగే అంతిమ ఫలితం సంతోషాన్ని, ఆనందాన్ని తెచ్చే ఆశీర్వాదాలు.

పునఃస్థాపించబడిన సువార్త మరియు ఆధునిక బయల్పాటు యొక్క దృష్టికోణము ద్వారా జీవితాన్ని చూడటం మనకు స్పష్టతను ఇస్తుంది. మన దైవిక పుట్టుక మరియు గమ్యము గురించి స్పష్టమైన దృష్టికోణముతో, మనము “[మన] మర్త్య జీవితాన్ని ఉత్తమంగా మార్చే విషయాలు, ఖచ్చితంగా అవే విషయాలు నిత్యత్వము అంతటా మీ జీవితాన్ని ఉత్తమంగా మార్చగలవని ఎరుగుదుము!”

జపానులో ఇటీవల మార్పు చెందిన వ్యక్తితో ఒక సంవత్సరం క్రితం నా అనుభవాన్ని గుర్తు చేస్తూ, నేను ప్రారంభించిన చోటే ముగిస్తాను. అతడి శ్రద్ధ మరియు సువార్తికులు, సభ్యుల యొక్క శ్రద్ధ ద్వారా, అతడు యేసు క్రీస్తు యొక్క పునఃస్థాపించబడిన సువార్తను కనుగొన్నాడు. సువార్తను కనుగొనుటలో, అతడు తన ఉద్దేశాన్ని కూడా కనుగొన్నాడు, అది అతడి దృష్టిని విశదపరచింది. అతడు సంతోషము యొక్క గొప్ప ప్రణాళికను కూడా కనుగొన్నాడు. ప్రణాళిక యొక్క సువార్త నిబంధనలకు విధేయత అతడిని భౌతికంగా, ఆత్మీయంగా పైకెత్తుతూ, అతడికి దీవెనలు మరియు ఆనందాన్ని తెచ్చింది.

యేసు క్రీస్తు యొక్క సంఘానికి నడిపించిన అతడి ప్రయాణము అతడు యేసు క్రీస్తు యొక్క సాక్షిగా మారడానికి అనుమతించింది. తరువాత కలిగే ఆనందాన్ని పన్నెండు మంది అపొస్తలుల సమూహము యొక్క ఎల్డర్ ప్యాట్రిక్ కీరన్ క్రింది విధంగా వర్ణించారు:

“ఆయన పిల్లలలో ప్రతీ ఒక్కరి కోసం మన పరలోక తండ్రి యొక్క ప్రేమ పూర్వకమైన ప్రణాళిక కారణంగా, మరియు మన రక్షకుడైన యేసు క్రీస్తు యొక్క విమోచించు జీవితము, నియమితకార్యము కారణంగా, మనం భూమిపై—అత్యంత ఆనందకరమైన వ్యక్తులుగా ఉండగలము—మరియు ఉండాలి! తరచుగా సమస్యాత్మకమైన ప్రపంచంలో జీవితపు తుఫానులు మనపైకి వచ్చినప్పటికీ, క్రీస్తునందు మనకున్న నిరీక్షణ మరియు అందమైన సంతోష ప్రణాళికలో మన స్వంత స్థానం గురించి మనకున్న అవగాహన కారణంగా మనం పెరుగుతున్న మరియు స్థిరమైన ఆనందాన్ని, అంతర్గత శాంతిని పెంపొందించుకోవచ్చు.”

యేసు క్రీస్తు యొక్క పునఃస్థాపించబడిన సువార్తలో అంతర్భాగంగా ఉన్న సంతోషము యొక్క గొప్ప ప్రణాళిక గురించి సాక్ష్యమును, నా కృతజ్ఞతను తెలుపుతున్నాను. నిత్యజీవము వైపు మీ ప్రయాణములో సువార్త ఫలాలను పాలుపంచుకోమని మరియు ఈ జీవితంలో ఆనందాన్ని అనుభవించమని నేను మిమ్మల్ని ఆహ్వానిస్తున్నాను.