तपाईंको सुसमाचारको यात्रामा प्रसन्नता प्राप्त गर्नुहोस्

किनभने येशू ख्रीष्टले अगमवक्ता जोसेफ स्मिथका माध्यमद्वारा आफ्नो सुसमाचारको पुनर्स्थापना गर्नुभयो, “हामीसँग जीवनको उद्देश्य, हामी को हौँ भन्ने विषयको बुझाइ छ” भनेर अध्यक्ष एम. रसल ब्यालर्ड (१९२८-२०२३) ले घोषणा गर्नुभयो । चर्चलाई दिइएको आफ्नो अन्तिम गवाहीमा, बाह्र प्रेरितहरूको गणका तत्कालीन कार्यवाहक अध्यक्ष, अध्यक्ष ब्यालर्डले भन्नुभयो:

“हामीलाई परमेश्वर को हुनुहुन्छ भनेर जानकारी छ; हामीलाई मुक्तिदाता को हुनुहुन्छ भनेर जानकारी छ किनभने हामीसँग जोसेफ हुनुहुन्छ, जो एक बालकका रूपमा वास्तवमा नै आफ्ना पापहरूको क्षमापन खोज्दै रूखहरूको बगैँचामा जानुभयो । …

“म आश्चर्यचकित हुन्छु र तपाईंहरू मध्ये अधिकांश पनि आश्चर्यचकित हुनुहुन्छ भनेर म निश्चित छु, जीवनमा हाम्रो उद्देश्यका सम्बन्धमा हामीलाई के जानकारी छ, हामी किन यहाँ छौँ, हामीले हाम्रो दैनिक जीवनमा के गर्न र पूरा गर्न कोशिस गर्नु पर्छ भनेर जान्न पाउँदा हामी कत्ति धन्य छौँ ।”

पछिल्ला दिनका सन्तहरूको येशू ख्रीष्टको चर्चका सदस्यहरूका लागि त्यो ज्ञानमा मुक्तिका सम्बन्धमा परमेश्वरको “परिपूर्ण योजना”को बुझाइ समावेश छ । “खुसीको महान योजना,” “मुक्तिको योजना” र “दयाको योजना” (अल्मा ४२:८, ११, १५) का रूपमा पनि चिनिने, यसले “जीवनको रहस्य र हाम्रो भविष्यको अनिश्चिततालाई बाहिर ल्याउँछ ।” “ख्रीष्टको सिद्धान्त” त्यो योजनाका लागि आवश्यक छ, जुन जीवनको उद्देश्यको केन्द्रबिन्दु हो ।

हामीसँग सुसमाचार भएको हुनाले हामी परमेश्वरका सन्तति हौँ, पृथ्वीमा परीक्षण गर्न, परिष्कृत बन्न र “मृत्यु भएकाहरूको पुनरुत्थान, थुमाको विजय र महिमाका माध्यमद्वारा जन्माइन” तयार हुन पठाइएका छौँ भनेर हामी बुझ्छौँ (सिद्धान्त र करार ७६:३९) । हामीलाई आज्ञाहरूका सम्बन्धमा ज्ञान छ र “[हामीलाई] असल र खराबका सम्बन्धमा ज्ञान छ भनेर पर्याप्त रूपमा” निर्देशन दिइएको छ (२ नफी २:५) । हामी पृथ्वीमा प्रेम गर्न र सेवा गर्नका लागि छौँ भनेर हामीलाई जानकारी छ । अनि उहाँको दोस्रो आगमनको तयारीमा मुक्तिदाताले हामीलाई संसारलाई जित्न र अरूहरूलाई पनि त्यसै गर्नका लागि सहयोग गर्न बोलावट गर्नुभएको छ (हेर्नुहोस् यूहन्ना १६:३३; सिद्धान्त र करार ६४:२) भनेर हामीलाई जानकारी छ ।

जब हामी उहाँमा ध्यान केन्द्रित गर्छौँ, जोसेफ स्मिथले “हाम्रा परमप्रभु येशू ख्रीष्टको सुसमाचारको जयजयकारको आवाज” भनेर सम्बोधन गरेका विषयले हामीलाई कठिन दिनहरूमा मजबुत बनाउने छन् र हाम्रो जीवन र अरूहरूको जीवनमा अर्थ र उद्देश्य ल्याउने छ ।

ड्यान विल्सनद्वारा Every Knee Shall Bow(हरेक घुँडा टेकिने छन्), यसको प्रतिलिपि बनाउन सकिँदैन

आज्ञा पालन, आशीर्वादहरू, प्रसन्नता

परमेश्वरले हामीलाई नैतिक अधिकार दिनुभएको छ ताकि हामी हाम्रा छनोटहरूका लागि जवाफदेही हुन सक्छौँ (हेर्नुहोस् सिद्धान्त र करार १०१:७८; २ नफी २:१६) । “सबै विषयमा विपक्ष” (२ नफी २:११) को अंशका रूपमा, हाम्रो अधिकारको दुरुपयोग गर्न हामीलाई प्रलोभनमा पार्न शैतानलाई अनुमति छ ।

परन्तु परमप्रभु येशू ख्रीष्टले, हाम्रो समयमा “पृथ्वीका बासिन्दाहरूमाथि आउनुपर्ने विपत्तिलाई बुझ्नुहुँदै, अगमवक्ता जोसेफ स्मिथलाई बोलाउनुभयो “स्वर्गबाट उहाँसँग बोल्नुभयो र उहाँलाई आज्ञाहरू दिनुभयो” (सिद्धान्त र करार १:१७) । परमप्रभुले आफ्ना अगमवक्ताहरूलाई आफ्ना आज्ञाहरू र चाहना प्रकट गर्ने त्यो ढाँचा—अनि त्यही कारणले गर्दा हाम्रो समयमा पनि अध्यक्ष रसल एम्. नेल्सनसँग निरन्तर छ । परमेश्वरले हामीलाई यस जीवनमा खुसीमा र अर्को जीवनमा स्वर्गको महिमामा अगुवाइ गर्न चाहनुहुन्छ ।

परमेश्वरका आज्ञाहरूको पालना उहाँप्रतिको हाम्रो भक्ति र प्रेमबाट आउनु पर्छ । परमेश्वरलाई प्रेम गर्नु “पहिलो र महान् आज्ञा हो” भनेर परमप्रभु येशू ख्रीष्टस्वयम् ले घोषणा गर्नुभयो । (हेर्नुहोस्मत्ती २२:३७-३८) । “यदि तिमीहरूले मलाई प्रेम गर्छौ भने, मेरा आज्ञाहरूको पालना गर” (यूहन्ना १४:१५) भनेर घोषणा गर्दा उहाँले थप अन्तर्दृष्टि दिनुभयो ।

परमप्रभुलाई प्रेम गर्नु र उहाँका आज्ञाहरू पालना गर्नुको प्रतिफल छ । यस समयावधिमा उहाँले वर्णन गर्नुभयो “स्वर्गमा अपरिवर्तनीय रूपमा निर्धारित नियम छ …, जसमा सबै आशीर्वादहरू पूर्वनिर्धारित छन्—

“अनि जब हामी परमेश्वरबाट कुनै पनि आशीर्वाद प्राप्त गर्छौँ, त्यो त्यस नियमको पालना गरेर हो जसमा यो पूर्वनिर्धारित छ” (सिद्धान्त र करार १३०:२०-२१) ।

यसकारण, उहाँका आज्ञाहरू पालना गरेर परमप्रभुप्रतिको हाम्रो प्रेम देखाउने अन्तिम परिणाम भनेको खुसी र प्रसन्नता ल्याउने आशीर्वादहरू हुन् ।

जीवनलाई पुनर्स्थापित सुसमाचार र आधुनिक प्रकाशको दृष्टिबाट हेर्दा हामीलाई स्पष्टता मिल्छ । हाम्रो दैवी उत्पत्ति र गन्तव्यको स्पष्ट दृष्टिकोण सहित हामीलाई जानकारी हुन्छ कि “जुन विषयहरूले [हाम्रो] मरणशील जीवनलाई यो हुन सक्नेसम्म सबैभन्दा उत्तम बनाउन सक्छन्, हर दृष्टिले उही विषयहरू हुन् जसले यसलाई [हाम्रो] जीवनलाई अनन्तकालसम्म उत्कृष्ट बनाउन सक्छन्!”

जापानमा भर्खरै परिवर्तन भएका एक व्यक्तिसँगको वर्षौंपूर्वको मेरो अनुभव स्मरण गर्दै मैले प्रारम्भ गरेको स्थानबाट नै म अन्त्य गर्छु । आफ्नो लगनशीलता र सुसमाचार प्रचारकहरू र सदस्यहरूको लगनशीलताद्वारा उहाँले येशू ख्रीष्टको पुनर्स्थापित सुसमाचार पत्ता लगाउनुभयो । सुसमाचार पत्ता लगाउँदा उहाँले आफ्नो उद्देश्य पनि पत्ता लगाउनुभयो जसले उहाँको दृष्टिकोणलाई विस्तार गर्‍यो । उहाँले खुसीको महान् योजना पनि पत्ता लगाउनुभयो । योजनाको सुसमाचारका करारहरूको पालनाले उहाँमा आशीर्वादहरू र प्रसन्नता ल्यायो जसले उहाँलाई सांसारिक र आध्यात्मिक रूपमा उन्नति प्रदान गर्यो ।

येशू ख्रीष्टको चर्चमा सदस्यता लिने उहाँको यात्राले उहाँलाई येशू ख्रीष्टको साक्षी बन्न अनुमति दियो । बाह्र प्रेरितहरूको गणका एल्डर प्याट्रिक किरनले निम्न प्रसन्नताको वर्णन गर्नुभएको छ:

“उहाँका प्रत्येक सन्ततिका लागि हाम्रा स्वर्गका पिताको प्रिय योजनाका कारण अनि हाम्रा मुक्तिदाता, येशू ख्रीष्टको उद्धार गर्ने जीवन र उद्देश्यका कारण हामी पृथ्वीमा सबैभन्दा आनन्दित मानिसहरू हुन सक्छौँ—र—हुनु पर्छ! समस्याग्रस्त संसारमा जीवनका आँधीबेहरीहरू प्रायश: हामीमाथि आइपर्दा पनि ख्रीष्टमा हाम्रो आशा र खुसीको सुन्दर योजनामा आफ्नो अस्तित्वका सम्बन्धमा हाम्रो बुझाइका कारण हामी प्रसन्नता र आन्तरिक शान्तिको बढ्दो र स्थायी भावना वृद्धि गर्न सक्छौँ ।”

म येशू ख्रीष्टको पुनर्स्थापित सुसमाचारका लागि कृतज्ञता व्यक्त गर्छु र गवाही दिन्छु जसमा गहन रूपमा समाहित खुसीको महान् योजना पनि समावेश छ । म तपाईंलाई सुसमाचारका फलहरू खान र अनन्त जीवनतर्फको तपाईंको यात्रामा यस जीवनमा थप प्रसन्नता महसुस गर्न आमन्त्रण गर्छु ।