Nou Suiv Jezikri nan Rejwenn Li nan Travay Li a

Nou patisipe nan travay Sovè a lè nou ede pitit Bondye yo vin disip fidèl tou. Sa enkli pataje levanjil Li a, epi konsa rasanble Izrayèl ki dispèse a, nan akonpli responsablite yo nan Legliz Sovè a ak nan fè efò pou nou vin tankou Li. “Siksè nou [nan travay Li a] pa depann de kijan lòt moun chwazi reponn [nou], envitasyon [nou] yo, oswa aksyon jantiyès sensè [nou] yo.” Prezidan Russell M. Nelson te afime: “Chak fwa nou fè nenpòt bagay ki ede nenpòt moun—sou nenpòt bò vwal la—fè yon pa nan direksyon pou l fè alyans avèk Bondye epi resevwa òdonans batèm ak tanp ki esansyèl pou yo, n ap ede rasanble Izrayèl.

Pou fè travay Sovè a vin travay pa nou, nou konsantre sou objektif Li yo, kenbe kòmandman Li yo, epi renmen youn lòt. Pandan n ap fè travay Li nan fason pa Li (gade Doktrin ak Alyans 51:2), gen kèk bagay ki rete pou nou detèmine poukont nou. Sovè a te di Sen yo ki te rasanble nan Konte Jackson, Missouri a:

“Paske gade, li pa nesesè pou m kòmande nan tout bagay; paske yon moun yo fòse fè tout bagay, moun sa a se yon sèvitè parese epi li pa saj; se poutèt sa li pa resevwa okenn rekonpans.

“An verite, m di konsa, lèzòm ta dwe gen bon dezi pou angaje nan bon kòz, pou yo fè anpil bagay avèk pwòp volonte pa yo, epi pou yo reyalize anpil lajistis;

“Paske pouvwa a nan yo, epi yo se mèt tèt pa yo. Epi toutotan lèzòm fè byen, yo p ap pèdi rekonpans yo nan okenn fason.” (Doktrin ak Alyans 58:27–28).

Si nou suiv Sovè a, rejwenn Li nan travay Li a, epi ede lòt moun vin disip fidèl Li, nou anseye sa Li ta anseye yo. Paske nou pa otorize anseye okenn lòt bagay (gade Doktrin ak Alyans 52:9, 36), nou konsantre san devye sou doktrin Li an (gade Doktrin ak Alyans 68:25). Anplis de sa, nou pote atansyon patikilye a moun ki pòv, ki nan bezwen, ak vilnerab yo (gade Doktrin ak Alyans 52:40). Aksan sa yo te demontre klèman lè Sovè a te site Ezayi nan yon sinagòg nan Nazarèt la:

“Lespri Senyè a sou mwen, paske li chwazi m pou m anonse bòn nouvèl la bay pòv yo; Li voye m pou m geri tout kè ki blese yo, Li voye m pou m fè tout prizonye yo konnen yo lage, pou m fè tout avèg yo konnen yo kapab wè ankò, pou m delivre moun y ap maltrete yo,

“Pou preche ane akseptab Senyè a” (Lik 4:18–19; gade tou Ezayi 61:1–2).

Ane akseptab Senyè a fè referans ak moman kote tout benediksyon alyans Bondye a pral devèse sou pèp Li a. Nou suiv Jezikri lè nou envite lòt moun pou yo resevwa benediksyon ki genyen nan fè ak kenbe alyans yo avèk Bondye epi nan pran swen moun ki pòv oswa ki nan bezwen.

Rejwenn Jezikri nan travay Li a egzaltan paske zèv, konsepsyon, ak objektif Li yo “pa kapab kontraye, ni yo pa kapab pase pou anyen” (Doktrin ak Alyans 3:1). Pou sila yo ki santi yo dekouraje, Senyè a te konseye: “Se poutèt sa, pa sispann fè byen, paske n ap poze fondasyon yon gwo travay. Epi se nan ti bagay, sa ki gran soti” (Doktrin ak Alyans 64:33). Nou kite Senyè a enkyete osijè rekòt la, epi nou tou senpleman fè pati pa nou an.

Fè pati pa nou an pi senp pase nou ka imajine paske nou pa bezwen pote talan oswa abilite ekstraòdinè nan travay Senyè a. Egzijans Li se tou senpleman angajman ak volonte. Senyè a te di Sen yo nan Kirtland, Ohio, “Gade, Senyè a vle yon kè ak yon panse ki gen bon volonte” ((Doktrin ak Alyans 64:34). Senyè a ka fè moun ki gen volonte yo kapab, men Li pa kapab oswa p ap fè moun ki kapab yo gen volonte. Otreman di, si nou angaje nou epi nou dispoze, Li kapab itilize nou. Men, kèlkeswa nivo talan nou, Li p ap itilize nou amwenske nou angaje nan travay Li epi nou gen volonte ede Li.

Samuel ak Anna-Maria Koivisto te montre alafwa angajman ak volonte. Tousuit apre maryaj yo, Koivisto yo te demenaje soti Jyväskylä, Fenlann, ale Göteborg, Syèd, pou pouswiv opòtinite karyè. Apre yo te rive, frè Koivisto te resevwa yon envitasyon pou l rankontre Prezidan Leif G. Mattson, yon konseye nan prezidans pieu Göteborg Syèd. Paske Samuel pa t pale Syedwa, entèvyou a te fèt an Anglè.

Apre yon echanj tou kout, Prezidan Mattson te mande Samuel pou l te sèvi kòm dirijan misyon pawas nan Pawas Utby a. Samuel te souliye yon bagay ki te evidan: “Men, mwen pa pale Syedwa.”

Prezidan Mattson te panche sou biwo li epi l te mande l avèk ensistans: “Èske m te mande si ou te kapab pale Syedwa, oubyen èske w gen volonte pou w sèvi Senyè a?”

Samuel te reponn: “Ou mande m si m gen volonte pou m sèvi Senyè a. E wi m genyen l.”

Samuel te aksepte apèl la. Anna-Maria te aksepte apèl yo tou. Toulède te sèvi fidèlman epi yo te aprann pale Syedwa byen sou wout la.

Vontonte ak angajman pou nou sèvi Senyè a te karakterize lavi Samuel ak Anna-Maria. Yo se ewo òdinè nan Legliz la. Yo te sèvi fidèlman chak fwa yo te mande yo. Yo te anseye m ke lè nou sèvi, nou itilize talan nou genyen yo (gade Doktrin ak Alyans 60:13), epi lèsa a, Senyè a ede nou akonpli objektif Li yo.

Lè nou angaje pou nou sèvi, nou fè efò pou nou pa plenyen ni mimire, paske nou pa vle devalorize sèvis nou nan okenn fason. Plenyen kapab yon siy angajman nan endesizyon, oswa ke lanmou nou pou Sovè a pa jan li ta dwe ye. Si l pa kontwole, plenyen ka pwogrese pou l tounen yon rebelyon ouvèt kont Senyè a. Pwogresyon sa a evidan nan lavi Ezra Booth, youn nan premye konvèti nan Legliz la nan Ohio ki te aple kòm yon misyonè nan Missouri.

Pandan li t ap kite Ohio an Jen 1831, Ezra te fache paske kèk misyonè te kapab vwayaje nan charyo pandan li te oblije mache nan chalè ete a, ap preche sou wout la. Li te plenyen. Lè l te rive Missouri, li te santi l dekouraje. Misouri pa t sa l te atann nan. Okontrè, li te gade alantou epi l te note ke “posiblite yo te yon jan tris.”

Ezra te vin gradyèlman pi sinik, sakastik ak kritik. Apre l te kite Missouri, olye l te preche pandan l te sou wout la, jan yo te mande l pou l te fè a, li te retounen Ohio osi vit ke li te kapab. Plenyen inisyal li a te evolye al nan endesizyon e finalman nan pèdi konfyans nan premye eksperyans espirityèl li yo. Apresa Ezra te kite Legliz la epi “finalman li ‘te abandone kwayans kretyen li epi li te vin yon agnostik.’”

Menm bagay la ka rive nou si nou pa fè atansyon. Si nou pa kenbe yon pèspektiv etènèl, raple tèt nou pou kimoun travay sa a ye reyèlman, nou ka plenyen, ezite, e finalman pèdi lafwa nou genyen an.

Mwen priye pou nou ka chwazi suiv Jezikri nan rejwenn Li nan travay Li a. Lè nou fè sa, nou resevwa “pwomès ki gwo anpil, ki gen anpil valè” (2 Pyè 1:4). Benediksyon sa yo enkli padon pou peche (gade Doktrin ak Alyans 60:7; 61:2, 34; 62:3; 64:3), sali (gade Doktrin ak Alyans 6:13; 56:2), epi egzaltasyon (gade Doktrin ak Alyans 58:3–11; 59:23). Anfèt, nou gen pwomès pi gwo kado Bondye ka bay la—lavi etènèl.