Ruvimbo Pamberi paMwari

Mabhuratha namasisita angu anodiwa, ndinovonga nokutaura kwamuri nhasi mumusangano mukuru unokosha uno. Kuona kwangu kuri kuramba kuchinyanya kunetsa apo pandirikukura. Ndinokutendai nenzwisiso yenyu apo pandinopa shoko rangu.

Tirikurarama munguva yekufambira mberi kukuru kwezvinhu muChechi yaJesu Kristu yaVatendi vaMazuva Ekupedzisira. Ndinozadzwa nemufaro apo pandinoona kufambira mberi kwezvinhu munzvimbo zhinji.

Ndinonyanya kukurudzirwa nevechidiki vedu. Varikupa mushando muhuwandu hukuru. Varikutsvaka madziteteguru avo uye vachivaitira zvisungo mutemberi. Vakomana nevasikana vedu vechidiki varikutumira zvikumbiro zvavo zvokushandira hushumiri muhuwandu hukurusa kupfuura hwatati tamboona. Chizvarwa chiri kukura ichi chiri kusimuka sevateveri vakasimba vaJesu Kristu.

Munguva pfupi yapfuura iyo ndakagamuchira muzukurusikana chibvi mutsva. Apo pandinofunga pamusoro pematambudziko aanozosangana nawo muupenyu hwake, ndinonzwa chido chikuru chekumubatsira kuvaka rutendo muna Jesu Kristu. Kurarama vhangeri Rake kwakakosha zvikurusa kumufaro wake mune ramangwana.

Iye, semumwe nemumwe wedu, anozosangana nezvinetso. Tose tinozosangana neurwere, kuora mwoyo, muedzo, uye nokushaikirwa. Matambudziko aya anokwanisa kuderedza kuzvivimba kwedu. Zvisinei, vadzidzi vaJesu Kristu vanekwaniso yekuwana rudzi rwakasiyana rweruvimbo.

Apo patinoita nekuchengeta zvibvumirano naMwari, tinokwanisa kuva neruvimbo rwunozvarwa neMweya. Ishe vakaudza Muporofita Joseph Smith kuti ruvimbo rwedu rwunokwanisa “kuva rwakasimba pamberi paMwari.” Fungai nezve rudekaro rwekuva neruvimbo pamberi paMwari!

Apo pandinotaura nezve kuva neruvimbo pamberi paMwari, ndiri kutaura nezve kuva neruvimbo rwekuenda pamberi paMwari iyezvino! Ndiri kutaura nezve kunamata neruvimbo kuti Baba Vokudenga vanotinzwa, rwokuti Vanonzwisisa zvidikanwi zvedu kupfuura zvatinozviita isu. Ndiri kutaura nezve kuva neruvimbo rwokuti Vanotida kupfuura zvatinokwanisa kunzwisisa, kuti Vanotumira ngirozi kuti dzive nesu uye neavo vatinoda. Ndiri kutaura nezve kuva neruvimbo rwokuti Vanoshuvira kubatsira mumwe nemumwe wedu kuti tisvike pakwaniso yedu yapamusoro-soro.

Zvino, tinowana sei ruvimbo rwakadai? Ishe vanopindura mubvunzo uyu namashoko aya: “Hana dzenyu … ngadzizare nerudo rwakadzama kuvanhu vose, … uye hunhu hwakanaka ngahushongedze pfungwa dzenyu zvisina mugumo; zvino ruvimbo rwenyu rwuchava rwakasimba pamberi paMwari.”

Ndizvo zvinofanira kuitwa izvi! Mumashoko aIshe pachavo, rudo rwakadzama uye hunhu hwakanaka zvinopa kwaniso yokuva neruvimbo pamberi paMwari! Mabhuratha namasisita, tinokwanisa kuita izvi! Ruvimbo rwedu rwunokwanisa zvechokwadi kuva rwakasimba pamberi paMwari, iyezvino!

Ngatifungei pamusoro pezvose rudo rwakadzama uye hunhu hwakanaka.

Chokutanga, rudo rwakadzama. Makore maviri akapfura ayo, ndakakumbira kwatiri tose, sevateveri vechibvumirano vaJesu Kristu, kuti teve vayananisi. Ndinodzokorora zvandakataura ipapo: “Hasha hadzimbofi dzakanyengetedza. Ruvengo harwuna warwunovaka. Gakava harimbofi rakatungamirira kumhinduro dzakafemerwa.”

Rudo rwakadzama kuvanhu vose ndiwo mucherechedzo wavayananisi! Zvakakosha kuti tive nerudo rwakadzama muhurukuro dzedu, zvose paruzhinji uye pakavanzika. Ndinovonga avo venyu vakatora rairo yangu iyoyo nemwoyo wose. Asi tinokwanisa kuita zvirinani.

Ruvengo rwuripo iyezvino muhurukuro dzeruzhinji uye paindaneti rwunotyisa. Mashoko eruvengo ndiwo zvombo zvinouraya. Gakava rinodzivirira Mweya Mutsvene kubva mukuva mufambidzani wedu wenguva dzose.

Savateveri vaJesu Kristu, tinofanira kutungamira savayananisi. Apo rudo rwakadzama parwunova chikamu chehunhu hwedu hwamazuva ose, tinozorashikirwa nechido chekudzikisira vamwe. Tinozorega kutonga vamwe. Tinozova nerudo rwakadzama kuna avo vanobva kumamiriro ose eupenyu. Rudo rwakadzama kuvanhu vose rwakakosha pakufambira mberi kwedu. Rudo rwakadzama ndihwo hwaro hwehunhu hwohumwari.

Ngatikumbirei kuna Baba vedu Vokudenga kuti tizadze mwoyo yedu nerudo rwakadzama rwukuru—kunyanya kune avo vanonetsa kuda—nokuti rudo rwakadzama chipo chinobva kuna Baba vedu Vokudenga chevateveri vechokwadi vaJesu Kristu. Muponesi ndiye Jinda reRunyararo. Tinofanira kuva midziyo Yake yerunyararo.

Zvino, ngatichitaurai nezve hunhu hwakanaka. Ishe vanotiudza kuti tishongedze pfunga dzedu zvisina mugumo nehunhu hwakanaka. Funga kusimudzirwa kwaunozogamuchira kupfungwa ipi zvayo yakanaka apo paunonyanya kuinatsurudza nehunhu hwakanaka. Hunhu hwakanaka hwunoita kuti zvinhu zvose zvive nani uye zvinyanye kufara! Kune rimwe divi, funga zvinozoitika apo paunoisa hunhu hwakanaka kupfungwa isina kururama, pfungwa ine utsinye, kana kuti pfungwa inosuwisa zvikuru. Hunhu hwakanaka hwunozodzinga pfungwa idzodzo. Hunhu hwakanaka hwunozokusunungura kubva kupfungwa dzekufunganya, dzinonetsa.

Mabhuratha namasisita, apo nyika painonyanya kuwedzera mukuipa, tinofanira kuramba tichiwedzera mukururama. Pfungwa dzedu, mashoko edu, nezviito zvedu zvinofanira kuva zvine hunhu hwakanaka hwusingakundikani uye zvakazadzwa nerudo rwakarurama rwaJesu Kristu kuvanhu vose. Mukana mukuru uri pamberi pedu ndewokuva vanhu Mwari vavanoda kuti tive.

Kunamata nguva dzose muimba yaIshe kunowedzera kwaniso yedu yezvose hunhu hwakanaka nerudo rwakadzama. Nokudaro, nguva mutemberi inowedzera ruvimbo rwedu pamberi paIshe. Nguva yakawanda mutemberi inozotibatsira kugadzirira Kuuya kweChipiri kweMuponesi wedu, Jesu Kristu. Hatizivi zuva kana awa yokuuya Kwake. Asi ndinoziva kuti Ishe vari kundikurudzira kuti ndikurudzire isu tose kugadzirira “zuva guru uye rinotyisa” iroro.

Apo patinotsvaka noushingairi kuti rudo rwakadzama uye hunhu hwakanaka zvizadze upenyu hwedu, ruvimbo rwedu mukuenda pamberi paMwari rwunozowedzera. Ndinokukokai kuti mutore nhanho dzine vavariro dzokukura muruvimbo rwenyu pamberi paIshe. Zvino, apo patinoenda kuna Baba vedu Vokudenga neruvimbo rwakawedzera, tinozozadzwa nemufaro mukuru, uye rutendo rwenyu muna Jesu Kristu rwunozowedzera. Tinozotanga kunzwa simba rezvepamweya rinopfuura tariro dzedu hurusa.

Tinovonga kuna Ishe nekukurumidziswa kwekuvakwa kwematemberi mumakore achangopfuura. Tiri pasi penhungamiro Yavo, nhasi tinozivisa zvirongwa zvekuvaka temberi mune imwe neimwe yenzvimbo gumi neshanu idzi:

• Reynosa, Mexico

• Chorrillos, Peru

• Rivera, Uruguay

• Campo Grande, Brazil

• Porto, Portugal

• Uyo, Nigeria

• San Jose del Monte, Philippines

• Nouméa, New Caledonia

• Liverpool, Australia

• Caldwell, Idaho

• Flagstaff, Arizona

• Rapid City, South Dakota

• Greenville, South Carolina

• Norfolk, Virginia

• Spanish Fork, Utah

Ndinopupura kuti Jesu Kristu, Mununuri weIsraeri, anotungamirira ino, Chechi Yake. Arikugadzirira kuuya zvakare. Ngatigadzirireiwo kuMugamuchira. Pamusoro peizvi ndinonamata nemuzita raJesu Kristu, ameni.