Peresitene Jeffrey R. Holland: Faiaoga, So’o, Molimau

O Se Tamaitiiti Usiusitai

Na soifua mai Jeffrey Roy Holland i le aso 3 o Tesema, 1940, i St. George, Iuta, ISA—o se nuu maotua, ma e le iloa tele i le tulimanu i sautesisifo o le setete.

“Sa toafimalie le taimi o o’u tamaitiiti,” sa ia saunoa ai. “Sa ou ola a’e i se puipuiga sili atu ma se alofa lefaatuaoia e sili atu i lo le mea sa mafai ona ou mafaufauina e maua e se tamaitiiti.”

O lona tina o Alice, e tupuga mai paionia malolosi ma totoa na nofoia ma faato’a le eria o St. George. O lona tamā, o Frank, sa o se ituaiga o paionia na ta’ua e nisi o se tagata na manuia i ana lava taumafaiga e aunoa ma se faatosinaga mai fafo atu. Na oo ina malosi o ia ma avea ma faatosinaga i mataupu o le aai.

Mai lo latou tamā, sa fai mai ai Deborah Holland Millet, sa maua mai ai e ona tuagane e toalua, o Jeff ma Dennis, uiga malie ma fiafia FaaAialani. Mai lo latou tina, sa ia faaopoopo mai, sa aoao mai ai e Jeff ona “foai atu pea lava pea ma le lē manatu faapito, e aunoa ma se mafaufau po o se faamoemoe mo se taui.”

Sa faamatalaina e lona tina ia Jeff o se tamaitiiti usiusitai. “Sa i ai o ia e le aunoa i le lotu, ma e na te faatinoina lava e le aunoa ona tiute faaleperisitua,” sa ia saunoa ai.

A o talavou o ia, sa ia tuu i ai le faatagaga e auai ai i se patī i le tuutuuga ia toefoi atu i le fale i le 10:00 i le po. I lena po i le taimi o le patī, sa ia tepa i le uati e siaki le taimi. Ina ua ia iloa ua toe 15 minute o loo totoe e ao ai ona i ai i le fale, sa ia tamo’e atu i le auala atoa ina ia mafai ai ona ia taunuu i le taimi e tatau ai. O lena tautinoga ina ia tausia lana upu na avea ma se vaega taua tele o ona uiga faaalia.

Mo Jeff, na avea taaloga ma “olioliga autu o lo’u olaga a o ou tuputupu a’e.” Sa avea o ia ma se tasi o le au lakapi faaAmerika ma le au paseketipolo o le Aoga Mauluga a Dixie na siamupini i le setete atoa i le 1958. Sa taalo foi o ia i le peisipolo ma tamo’e i le malae. Mulimuli ane, sa avea ma sui kapeteni o le au pasiketipolo o le Kolisi o Dixie (ua avea nei ma Iunivesite o Matata o le Setete o Iuta), lea na manumalo i se suegā siamupini o se konafesi.

Ina ua mae’a le a’oga maualuga, sa valaauina o ia e auauna atu i le Misiona a Peretania. Sa toe tepa o ia i tua i lena auaunaga o se “liliuga tele faaleagaga o lo’u olaga—o le amataga o a’u amataga” i le tuputupu a’e faatagata matua i le talalelei. O lona peresitene lona lua o le misiona, Elder Marion D. Hanks o le Au Fitugafulu, “sa aoaoina a’u ia fiafia i tusitusiga paia, aemaise lava le Tusi a Mamona,” sa toe faamatala ai e Elder Holland. “Sa i ai sana faatosinaga loloto i lo’u olaga.”

A o le’i alu i lana misiona, sa faamoemoe Peresitene Holland ia avea ma se foma’i faalesoifua maloloina. Ae, sa ia saunoa, “Sa ou sau i le fale mai la’u misiona ma le talitonuga ua finagalo le Atua ia te a’u e avea ma se faiaoga.”

I le tele o tausaga mulimuli ane, ina ua mavae lona valaauina i le Korama a Aposetolo e Toasefululua, sa saunoa ai lona uso, o Dennis, o le valaauga sa le o se mea na faate’ia ai. “Na pau le mea na manao ai Jeff e fai o le aoao atu lea o le talalelei i tamaiti aoga i se potuaoga,” sa ia saunoa ai. “Sa ou mautinoa lava i taimi uma sa i ai i le Alii le sini lava e tasi i le mafaufau mo ia, ae o le telē o le potuaoga ma le numera o tamaiti aoga sa iai i se fuataga sili atu i lo le mea sa ia vaai faalemafaufau i ai.”

“O Se Soa Atoatoa”

E ala i le taalo ai i taaloga, sa oo ai ina masani Jeff ia Patricia Terry, o se taitai failape (cheerleader) i le latou a’oga maualuga. Sa la tafafao faamasani i tausaga mulimuli e lua i le a’oga maualuga ma, i le mae’a ai o lana misiona, sa toefaafou ai le la faigauo.

Na faaipoipo Jeffrey ma Patricia Holland i le malumalu o St. George i le aso 7 o Iuni, 1963. Sa ia faitaulia lava le faatuatua o Patricia, tulaga faaleagaga, ma le alofa mama sili o nisi o faatosinga faamalosiau ia i lona olaga. “O lona faatuatua sa mamā ma mamana ma malosi i taimi uma e pei o soo se tagata ua ou iloaina,” sa ia saunoa ai.

Sa matauina e isi lo la malosiaga uiga ese faaleagaga o se ulugalii.

O Peresitene James E. Faust (1920–2007), Fesoasoani Lua i le Au Peresitene Sili, sa avea ma se uo mamae ma patino. Sa ia saunoa i se tasi o taimi e faapea, sa i ai ia Elder Holland “se tulaga faaleagaga loloto na vaavaalua ma se nofouta tulaga ese” na ia mafai ai ona vaaia ma lagona mea atonu e lē o mafai ona iloa e isi. Sa “atia’e e [Peresitene Holland] ia tagata i taimi uma ma siitia tagata ma tosina atu tagata ia te ia. Sa ia te ia le gafatia ofoofogia na te faia ai tagata ia lagonaina o i latou o ana uo mamae lava.”

Sa faaopoopo mai Peresitene Faust: “E sau Elder Holland ma se paga tutusa. O Sister Holland o se soa atoatoa mo ia. O i la’ua o se ulugalii o faataitaiga.”

A o latalata i le faauuga o Jeff mai le Iunivesite o Polika Iaga i le 1965, sa ia maua se avanoa e faiaoga lē tumau ai i le iunivesite i le tausaga na sosoo ai a o ia galue mo se faailoga tikeri o le matuaofaiva. Ina ua mavae lena tausaga o faiaoga, na ia taliaina se tofiga i le Ofisa o A’oga a le Ekalesia e faiaoga i inisitituti o mataupu faalelotu i le eria o Hayward, Kalefonia, ISA. O le tausaga na sosoo ai, sa tofia ai o ia o le faatonu o le inisitituti i Seattle, Uosigitone, ISA, lea sa faamanuiaina ai o ia i le faatosinaina mai o tagata talavou.

A o faiaoga ai, sa vave ona ia iloaina o se matata tumau i mea tau aoaoga, o le a manaomia ai se faailoga faapolofesa. O lea mea na taitai atu ai i le masii atu o lona aiga i New Haven, Connecticut, ina ia mafai ona auai o ia i le Iunivesite o Yale. E masani lava i tausaga mulimuli ane na te toe ta’ua lesona na aoaoina mai lona taimi i Yale—ma o le tele o na lesona sa le o ni lesona faalepotosalalau. I le avea ai ma se a’oa’o faamatuaofaiva ma se faiaoga musuia, na te faaaogaina na lesona o le olaga e aoao atu ai mataupu faavae o le talalelei.

I se lauga i le konafesi aoao ia Oketopa 1999, sa toe ta’ua ai e Peresitene Holland le amataga tiga o lena malaga i Connecticut i le 30 tausaga na muamua ai. Na amata le aiga o le au Holland mai St. George i se taavale tuai, ma le toetoe lava a leai se tupe, fanau laiti e toalua (o le tasi e tolu masina le matua), ma sa teuina mea uma na la umia i totonu o se taavale toso laitiiti. Na faalua ona pe le taavale i le nofoaga lava e tasi, na o le 34 maila i fafo atu o St. George. Sa faalua ona ia savali i se aai lata ane mo se fesoasoani a o le’i iloaina ua le gafatia e le taavale le malaga.

O le toe tepa i tua, sa mafaufau Elder Holland i mea sa ono ia ta’u atu i lona lava tagata talavou lotovaivai, faanoanoa o tatoso atu ona vae i luga o le alatanu: “Aua e te faavaivai. … Ia e taumafai pea. O loo i ai le fesoasoani ma le fiafia i luma atu. … O le a lelei mea uma i le iuga. Ia talitonu i le Atua ma talitonu i mea lelei o le a oo mai.”

Ona ia faamautinoa atu lea ia i latou o loo tauivi ma faigata, o loo sailia le fesoasoani po o faamanuiaga a le Alii ma tuufesili pe latou te mauaina ea: “O nisi faamanuiaga e vave oo mai, o nisi e tuai mai, ae o isi e le oo mai seia oo atu i le lagi; ae mo i latou o ē taliaina le talalelei a Iesu Keriso, e oo mai lava. Ou te tautino atu ai e a’u lava ia lena mea.”

Sa vaai Peresitene Holland i le taimi sa faaaluina e ia ma Sister Holland i Yale o se vaitau o le aoaoina tele—i le potosalalau ma faale-ekalesia. Sa le’i pine ona taunuu i Egelani Fou, ae valaauina o ia e auauna atu i se au peresitene o se siteki. O Pat, sa auauna atu o se peresitene o le Aualofa i le latou uarota a tamaiti aoga, sa valaauina foi o le peresitene o le Aualofa i la laua uarota fou. O le mea sa aoaoina e Jeffrey i lenei vaitau o le a i ai se aoga tele mulimuli ane a o ia auauna ai i isi au peresitene o siteki e lua ona sosoo ai lea ma se sui o le itulagi.

O le mea moni na ou mauaina, o se a’otauina i le pulega faaleEkalesia,” sa ia saunoa ai.

Ina ua toefoi atu le au Holland i Iuta i le 1972, sa valaauina o ia e avea ma faaao o le Faalapotopotoga Mutuale a le Perisitua Mekisateko, o se faalapotopotoga fou a le Ekalesia, lea sa galulue vavalalata ai o ia ma Elder James E. Faust ma Elder L. Tom Perry o le Korama a Aposetolo e Toasefululua faatasi ai ma Elder Hanks. I le 1974, sa tofia ai Uso Holland e avea ma faaao o aoaoga faalelotu i le Iunivesite o Polika Iaga. E lua tausaga mulimuli ane, sa tofia ai o ia o le Komesina o A’oga. I lea matafaioi sa talosagaina ai o ia i le 1980 e faauluulu i ai se komiti suesue e filifli se tagata e suitulaga ia Dallin H. Oaks, o le peresitene o le BYU i le taimi lena.

Ina ua valaauina Uso Holland e auai atu i se fonotaga ma le Au Peresitene Sili i ni nai aso mulimuli ane, sa ia manatu o lena fonotaga sa faatatau i lona tofiga i le komiti suesue. Sa faateia o ia ina ua talosagaina o ia e suitulaga ia Peresitene Oaks o le peresitene e sosoo ai o le BYU.

O le iunivesite o “se nofoaga faapelepleina mo a’u,” sa saunoa ai Peresitene Holland i se taimi mulimuli ane, ona o le agaga na te lagonaina i taimi uma iina ma le auala na pa’i atu ai le BYU i lona olaga.

Sa vave ona taliaina e le au ofisa, aufaigaluega, ma tagata aoga le au Holland. O le aafiaga o Sister Holland i le talalelei, faatasi ai ma lona agaga agaalofa, na faamaonia ai le avea ma fesoasoani i le gasologa o tausaga sa galulue ai le au Holland o se au i le BYU. I le mea na i’u ina lauiloa ma le faamama’i i luga o le lotoā o le “Siou a Jeff ma Pat,” sa la ofo atu i le amataga o tausaga a’oga taitasi ni fautuaga mafanafana ma lelei na pa’i atu i le tele o olaga. O nisi o na lauga i le BYU na avea ma faailoga lauiloa i le fola lautele o ana aoaoga faaletalalelei.

I se faatalanoaga i le mavae ai o lana tausaga muamua o le peresitene o le BYU, sa ia saunoa ai e uiga i le mauaina o le tele o vaega lelei o le a’oga na mafai ona polesi e pei o se maataua. Ae sa ia matauina o le polesiina e ao ona faia faatasi ma le mata’ituina o le tulaga silisili i se ta’imuaga lautele. O le tulaga silisili o amioga mama, sa ia saunoa ai, e tatau ona avea ma se vaega taua o le a’otauina. Masalo e leai se isi peresitene o le iunivesite e mafai ona faapea atu o lena vaega o le misiona a lana a’oga o le saofagā atu lea i “le faaeaga ma le ola e faavavau o alii ma tamaitai e o mai iinei.” I tausaga mulimuli ane, na ia saunoa ai o le tulaga sili ona maoae o le BYU sa le’i iai i ona laau faaletino po o ona tulaga maualuga faaakatemia po o taaloga faalekolisi ae i lo lena, sa i ai i ona tagata.

Sa feagai Peresitene Holland ma ni tofotofoga ma ni luitau a o taitaiina ai le BYU. Sa valaauina o ia e ta’imua i se faalauiloa suetupe e 100-miliona tala mo le iunivesite, ma sa avea ai o ia ma taulaiga faifai pea o faitioga ma tuuaiga pa’a’a e i latou na tetee mai i le Nofoaga Autu o le BYU i Ierusalema ina ua fausiaina i le afa mulimuli o le vaitau 1980. Ae o lea poloketi na aumaia ia te ia se “mafutaga matagofie” ma Peresitene Howard W. Hunter (1907-1995), a o avea i lena taimi ma Peresitene o le Korama a Aposetolo e Toasefululua, faapena foi ma Elder Faust. O le aoaoga faaleagaga na ia mauaina sa lemafaatauina.

Valaauina i le Toasefululua

Ina ua oo mai le taimi mo Jeffrey Holland e faamalolo ai o se peresitene o le BYU, sa valaauina o ia i le aso 1 o Aperila, 1989, i le Korama Muamua a Fitugafulu. Lima tausaga mulimuli ane, i le aso 23 o Iuni, 1994, sa valaauina ai o ia i le Korama a Aposetolo e Toasefululua. O lena valaauga na tuua ai o ia i se lagona loloto o le maofa ma le lotofaafetai.

“E mautinoa lava o lo’u fiafiaga sili ma le mitamitaga sili o manatu uma o le faapea, ua ou maua le avanoa, e pei ona faaupuina e Nifae, e ‘tautalatala e uiga ia Keriso, … olioli ia Keriso, … talai atu Keriso, [ma] vavalo e uiga ia Keriso’ (2 Ni. 25:26) po o fea lava ou te i ai, ma po o ai foi matou te i ai, seia oo ina mou atu le mānava mulimuli o lo’u ola,” sa ia saunoa ai i le konafesi aoao a le Ekalesia ia Oketopa 1994. “E mautinoa lava e leai se isi faamoemoega e maualuga atu po o se avanoa e sili atu nai lo o le avea ma se ‘[molimau] faapitoa o le suafa o Keriso i le lalolagi atoa’ (M&FF 107:23).”

O se tasi o aafiaga na aoao ai na oo mai ia Elder Holland i lona valaauga, o se tofiga tulaga ese na la tausoaina ma Peresitene Dallin H. Oaks.

Ia Aokuso 2002, i se tofiga faapitoa mai le Au Peresitene Sili, sa ave ai i lena taimi e Elder Holland lana molimau faaaposetolo i Chile, i le nofoaga sa ia tuuina atu ai le taitaiga ma aoaoga faamasani mo le lua tausaga. I lena foi taimi, sa tofia ai Elder Oaks i le Atu Filipaina.

“O le faamamafa autu a Elder Holland o le tuuina atu lea o se faataitaiga o le taitaiga i le ala a le Alii,” na tusia ai i se tasi o tala faasolopito. “Sa ia fesoasoani e aoao faamasani ni taitai fou ma vaavaaia le toe faatulagaina, faamutaina, ma le tuufaatasia o le faitau selau o uarota ma le tele o siteki. O lenei toefaatulagaga ma aoaoga faamasani sa manaomia ona o le televave o le faatupulaia o le Ekalesia i le atunuu. O lana taitaiga na fesoasoani e faamalosia ai iunite ma saunia le Ekalesia i Chile mo le lumanai.”

Sa ia faia foi ni fesootaiga taua mo le Ekalesia e ala i le faauo atu i taitai faalemalo o Chile, e aofia ai le peresitene o le malo ma lona faletua, ia na faatautaia ai e le Ekalesia poloketi o galuega alofa. Ina ua faamutaina lona tofiga i Chile, sa faigata ia te ia ona faatofa atu.

“O lenei taimi—i lenei konafesi—ua matua faigata mo a’u,” sa ia amata ai i se lauga faatofa i se konafesi faaleitulagi i le aso 11 o Iulai, 2004. I le faaaogaina o le FaaSipaniolo sa faigata ia te ia ona aoaoina i le lua tausaga, sa ia ta’u atu ai i le Au Paia i Chile: “Sa ou le’i iloaina o le a oo ina ou alofa tele ia te outou. … O le a i ai pea outou i lo’u loto.

Ona ia faasoa atu lea i le FaaPeretania, e ala i le fesoasoani a se faamatalaupu, lana vaaiga mamao mo le lumanai o le Ekalesia i lo latou atunuu, “e le avatua o se tagata asiasi,” sa ia saunoa ai, aua “o a’u o se Chile.” Sa ia saunoa e uiga i se “vavega” e ao ona maua “i totonu o aiga” o le lumanai o Chile—o se lumanai e faatumulia i le malosiaga faaleagaga o ni tagata Chile amiotonu e umia le perisitua, o tuafafine, ma le autalavou e milo faatasia le usiusitai ma mataupu faavae o le talalelei i uiga o o latou olaga.

“Tatou te le o i ai i le Ekalesia mo na o i tatou lava,” sa ia faaopoopo ai. “Ua tatou i ai mo i latou o loo mulimuli mai ia i tatou.”

Olaga Faaleaiga

O uiga tauagafau, fiafia, lelei ma fefaasoaai na faaalia lava i mea uma na ia faia, ae sa ia mafai foi ona tausisia le le faalialiavale o lona olaga faaleaiga. Peitai, o tala ma manatu faaalia mai lana fanau, ua faaalia ai e faapea i le faatulagaga i totonu o le aiga sa avea ai foi o ia ma se faiaoga faamanuiaina.

E toatolu le fanau a le au Holland: o Matthew, Mary Alice (McCann), ma David. Sa matutua uma i latou i le taimi sa valaauina ai lo latou tamā e avea ma se Aposetolo. Sa faamatalaina uma e Mary Alice ma David le naunautaiga o lo la’ua tamā, i tausaga o lo latou tuputupu a’e, e ositaulaga mo lana fanau. Fai mai Mary Alice sa fuafuaina i taimi uma ma le faaeteete e tamā tafaoga mo tamā-ma-le-afafine na ia iloa o le a olioli ai o ia (Mary Alice), e ui o gaoioiga sa le o ni mea e sili ona fiafia i ai lona tamā. Sa manatua e David le taimi sa faaalu ai e lona tamā ni aso e malolo ai mai ona taimi pisi mo se malaga na o ia ma lona atalii laitiiti.

O taimi uma lava, e avea lava lona iloa ma le molimau o le Tama Faalelagi ma Lana fuafuaga o se vaega o aoaoga i totonu o le aiga.

Sa faamatala e Matthew se tala e uiga i se aafiaga ma lona tamā na aoaoina ai o ia e uiga i faaaliga. I se tafaoga, sa oo ai ina sē i la’ua i se ala maotua a o agai atu i le fale. Sa faasolo pogisa ae la tau mai i se magāāla i le alatele, ma sa le mafai ona la manatuaina po o fea le ala sa’o e o ai. Sa fautuaina e Elder Holland lona atalii e tatalo. Ina ua mavae lena, sa ia fesili atu ia Matt po o le fea ala e manatu o ia e tatau ona la ui ai. Sa tali mai Matt e tatau ona la ui i le itu tauagavale, ma sa fai mai Peresitene Holland sa ia lagona foi lea mea e tasi.

I le mulimuli atu ai i lena itu sa la ioe i ai, sa la tau atu ai i se ala mutu i totonu o le 10 minute ma sa faamalosia i la’ua e toefoi atu i le magāāla, lea sa la o ai loa i le taumatau. I le mafaufau i ai, sa fesili atu ai Matt i lona tamā pe aisea na aumai ai e le Alii ia i la’ua se tali na taitai atu ai i la’ua i lalo i le ala sesē. Sa tali atu lona tamā e masalo o le ala sili lea ona vave na mafai e le Alii ona ta’u atu ai ia i la’ua po o le fea le ala sesē. Sa le’i masani i la’ua i le ala lona lua, ae sa la faaauau pea ma le talitonuga maumaututu, ma le iloaina o le ala sa’o lea.

Faatasi ma manatuaga e sili ona faamemelo i ai Matt o taimi sa faaalu e le aiga i le laulau ‘ai.

“O po uma sa o se ituaiga o afiafi faaleaiga na faatumulia i taliēēga, o upu faamālō, faamalosi’auga, talanoaga fiafia, molimau, aoaoga, ma le faailoaga o le alofa,” sa ia fai mai. “E te iloaina lava i taimi uma le matua fiafia tele o Tamā pe a i ai o ia i le fale faatasi ma lona aiga.”

Sa i ai mulimuli ane se mafuaaga na faanoanoa ai Peresitene Holland ma lona aiga ina ua maliu Sister Holland i le aso 20 o Iulai, 2023. I le taimi o lona falelauasiga, sa ta’ua ai o ia e Peresitene Holland “o le tamaitai silisili ua ou iloaina.” Sa ia faaopoopo mai, “O ia o mea uma lava e mafai ona avea ai se soa i lenei lalolagi, ma ou te faafetai i le Atua ona o le a ma toe maua le tasi ma le isi i le isi olaga.”

O Se Molimau Faaaposetolo

O lauga mafanafana a Peresitene Holland o se Pulega Aoao, ua lauiloa ma faamemelo i ai tagata o le Ekalesia. O lana molimau malosi o le Togiola a Iesu Keriso ma le alofa o le Faaola na te faamamafaina lava i ana lauga uma.

“O le faalagolago i le natura o le Atua o le alofa mutimutivale o loo i le totonugalemu o le talalelei na aoao mai e Keriso,” sa ia fai mai ai. “Ou te molimau atu o le Togiola a le Faaola e siieseina ai mai ia i tatou e le gata o avega o a tatou agasala, ae faapena foi i avega o o tatou mafatiaga ma faanoanoaga, o o tatou lototiga ma o tatou lē fiafia.”

I se isi taimi, sa ia fautua mai ai, “Tau ina ia tatou tautino atu i tatou lava ia avea atili ma ni soo atoatoa o le Alii o Iesu Keriso, ia le na o le upu, ma ia na o le mafanafana o taimi logolelei, ae i galuega ma le lototoa ma i le faatuatua, e aofia ai le taimi e tuua toatasi ai lo tatou ala ma pe a faigata ona onosaia lo tatou satauro.”

Sa ia molimau mai foi: “Pau le tatou faamoemoega mo le atoatoa moni o loo i ai lea i le taliaina o se meaalofa mai le lagi—e le mafai ona tatou ‘sailia ia maua’. O le mea lea, ua ofo mai ai ia i tatou e le alofa tunoa o Keriso e le gata o le faaolataga mai faanoanoaga ma le agasala ma le oti ae o le faaolataga foi mai i a tatou lava faitioga faifai pea.”

Sa i ai pea le taulaiga a Peresitene Holland i le fesoasoani atu i ē faafofoga ia te ia ia malamalama i le matafaioi tutotonu a le Faaola i le fuafuaga a lo tatou Tama: “Afai o Iesu—Lona suafa, Lana aoaoga faavae, Lana faataitaiga, Lona paia—e mafai ona i ai i le totonugalemu o a tatou tapuaiga, o le a tatou faamalosia le upumoni sili sa aoao mai e Alema: ‘E tele mea o le a oo mai; [ae] faauta, e i ai se mea e tasi ua sili atu ona taua nai lo ia mea uma— … o le [Togiola o loo] soifua ma afio mai … i totonu o ona tagata’ [Alema 7:7

O lana molimau ia Iesu Keriso sa lē māmotusiaina lona sootaga ma lana molimau e uiga i le Perofeta o Iosefa Samita ma le Tusi a Mamona. O le mana o lena tusi na fesoasoani e mamanuina ana aoaoga ma lona olaga:

“I [la’u] matafaioi o se molimau ou te fia tautino atu ai o aafiaga faaleagaga ma faamautinoaga paia ua ou mauaina e faatatau i le Faaola ma Lana ekalesia toefuataiina na muamua oo mai ia te a’u o se alii talavou ina ua ou faitauina le Tusi a Mamona. …

“… O le moni a’ia’i o le Tusi a Mamona—o lona tupuaga, ona aoaoga faavae, ma tulaga o lona oo mai—e totonugalemu i le moni a’ia’i O Le Ekalesia a Iesu Keriso o le Au Paia o Aso e Gata Ai. …

“… E faamautu mai e le Tusi a Mamona lo tatou talitonuga maualuga atu ma sili ona ofoofogia e faapea o Iesu o le Keriso, o le Alo o le Atua Soifua, o le Faaola ma le Togiola o le lalolagi.”

E ui ua le toe lagonaina lona siufofoga, ae o soo se tasi lava na faalogo pe faitau i le molimau a Elder Jeffrey R. Holland e uiga i le Alii ma le Faaola, o Iesu Keriso, o le a le galo lava—e pei lava ona latou le faagaloina lava ana lauga mamana.