O Se Sulu o le Faamoemoe

Manatuaina o Peresitene Jeffrey R. Holland

Sa galo ia Jeffrey R. Holland talavou le taimi ma sa toeitiiti a tuai ona alu i le fale mo le vavao. Ae sa i ai lava se avanoa e taunuu ai i le fale i le taimi sao!

Mo Jeffrey, e na o le tasi lava le mea e tatau ona fai: sa tamoe saosaoa mai le tasi pito o St. George, Iuta, i le isi pito ma taunuu ai i le fale i le taimi tonu lava.

Sa tamoe atu Peresitene Jeffrey R. Holland, o le Peresitene o le Korama a Aposetolo e Toasefululua, agai i mea sa’o i lona olaga atoa. Ma sa leai se mea na sili atu ona taua ia te ia nai lo le tamoe agai i le malamalama o le talalelei a Iesu Keriso.

I lana uluai lauga o le konafesi aoao o se tasi o le Korama a Aposetolo e Toasefululua, na saunoa ai Peresitene Holland: “E mautinoa lava o lo’u fiafiaga sili ma le mitamitaga sili o manatu uma o le, ua ou maua le avanoa, e pei ona faaupuina e Nifae, e ‘tautalatala e uiga ia Keriso, … olioli ia Keriso, … talai atu Keriso, [ma] vavalo e uiga ia Keriso’ (2 Nifae 25:26) po o fea lava ou te i ai, ma po o ai foi matou te i ai, seia oo ina iu lo’u ola. E mautinoa lava e leai se isi faamoemoega e sili atu po o se avanoa e sili atu.”

O Mea Lelei e Oo Mai

O se tasi o autu e fo’i pea lava i ai Peresitene Holland o le faasoa atu lea o le faamoemoe ma le faamalosiauga o loo ofoina mai e le talalelei i se lalolagi e masani ona manaomia.

“Mo soo se tasi o taumafai malosi e vaai i lena malamalama ma maua lena faamoemoe,” na ia aoao mai ai, “ou te fai atu: Taofi mau pea. Ia taumafai pea. E alofa le Atua ia te oe. O le a alualu pea i luma mea uma. E sau Keriso ia te oe i Lana ‘galuega silisili atu’ faatasi ma se lumanai o ‘folafolaga lelei atu.’ O Ia o lou ‘faitaulaga sili o mea lelei e oo mai.’”

Sa le’i fefe Peresitene Holland e faasoa mai ni tala o le lotovaivai patino, ae faatasi ai ma le faamoemoe ma le faatuatua, sa ia talitonu lava i taimi uma o le a oo mai le mea sili.

“E vave oo mai nisi faamanuiaga,” na ia aoao mai ai, “o nisi e tuai, o nisi e le oo mai vagana le lagi; ae mo i latou e taliaina le talalelei a Iesu Keriso, e oo mai lava. Ou te tautino atu ai a’u lava ia.”

E Lē Leiloa Lava le Faamoemoe

I le konafesi aoao ia Oketopa 2013, na faailoa mai ai e Peresitene Holland le tele o faigata na oo ia i latou o loo feagai ma tauiviga o le soifua maloloina faalemafaufau po o gasegase faalelagona. Sa ia faasoa mai se taimi i lona lava olaga na ia oo ai i le atuatuvale a o ofoina atu pea le faamoemoe.

“Talitonu i vavega,” na ia aoao mai ai. “Ua ou vaaia le tele o na vavega ua oo mai a o faapea mai isi faailoga uma ua leai se faamoemoe. E lē leiloa lava le faamoemoe.”

O Peresitene Holland ma nisi o tamaiti mai Kenya (i Edinburgh, Sikotilani, ia Iuni 2015).

Avanoa mo Tagata Uma

Sa fiafia tagata i le lalolagi atoa e aoao mai ia Peresitene Holland. O ia o se faiaoga sili o lē na faia tagata uma ia lagona le talileleia ma le faatauaina. Sa manao moni lava o ia ia iloa e tagata uma e i ai so latou nofoaga i le Ekalesia a Iesu Keriso.

“O loo i ai le avanoa [i le Ekalesia] mo i latou e tautatala i gagana eseese, faamanatuina aganuu eseese, ma nonofo i le anoa’i o nofoaga,” na ia aoao mai ai. “O loo i ai le avanoa mo e nofofua, mo e ua faaipoipo, mo aiga toatele, ma ē e leai ni fanau. O loo i ai le avanoa mo i latou na i ai ni fesili e faatatau i lo latou faatuatua ma le avanoa mo i latou o loo i ai pea ni fesili. O loo i ai se avanoa mo i latou e eseese tosinaga faalefeusuaiga. I se faapuupuuga, e i ai se nofoaga mo tagata uma o e alolofa i le Atua ma faamamaluina Ana poloaiga.”

I lona soifuaga atoa, sa tamoe atu ai Peresitene Holland i soo se tasi e manaomia se malosiaga po o se lima fesoasoani, ma e lei taofia lava lona tamoe agai i Lona Faaola, o Iesu Keriso.