Presidente Jeffrey R. Holland: Magtutudlo, Disipulo, Saksi

Usa ka Masulundon nga Bata

Si Jeffrey Roy Holland natawo niadtong Disyembre 3, 1940, sa St. George, Utah, USA—kaniadto usa ka hilit, wala mailhi nga lungsod sa habagatang kasadpan nga bahin sa estado.

“Ako adunay malinawon nga pagkabata,” miingon siya. “Ako nagdako nga adunay seguridad ug walay pagpugong nga gugma kay sa akong mahunahuna nga anaa sa usa ka bata.”

Ang iyang inahan, si Alice, kagikan sa lig-on nga mga pioneer kinsa nanimuyo sa dapit sa St. George. Ang iyang amahan, si Frank, mao ang matang sa pioneer nga giisip sa uban nga mapaningkamoton sa kaugalingon. Siya nahimong aktibo ug dunay impluwensiya sa mga kalihokan sa siyudad.

Gikan sa ilang amahan, miingon si Deborah Holland Millett, ang iyang duha ka igsoong lalaki, sila si Jeff ug Dennis, nakapanunod og Irish nga pagkaambongan ug pagkautokan. Gikan sa ilang inahan, siya midugang, si Jeff nakat-on nga “mohatag nga walay kapin kabubut-on sa kahangtoran, nga wala magpaabot og bisan unsa nga balos.”

Ang iyang inahan mihulagway ni Jeff isip usa ka masulundon nga bata. “Siya kanunay nga mosimba, ug siya kanunay nga moatiman sa iyang mga katungdanan sa pagkapari,” miingon siya.

Sa batan-on pa siya, dihay kausa ang iyang mama mitugot kaniya nga motambong og party sa kondisyon nga siya mopauli inig alas 10:00 sa gabii. Nianang gabhiona atol sa party, mitan-aw siya sa orasan aron sa pagsusi sa oras. Sa dihang siya nakaamgo nga 15 minutos na lang ang nahibilin aron maanaa na siya sa balay, midagan siya hangtod sa ilang balay aron makaabot siya sa saktong oras. Kana nga dedikasyon sa pagtuman sa iyang pulong nahimong importante nga bahin sa iyang kinaiya.

Alang ni Jeff, ang mga sport nahimo nga “sentro sa kalipay sa akong kinabuhi samtang ako nagdako.” Siya sakop sa mga team sa kampeyonato sa estado sa football ug basketball sa Dixie High School niadtong 1958. Siya modula usab og baseball ug lumba sa dagan. Dayon, siya nahimong co-captain sa Dixie College (karon Utah Tech University) sa team sa basketball, nga nakadaog og conference championship.

Human sa high school, siya gitawag nga moserbisyo sa British Mission. Nahinumdom siya niana nga pagserbisyo isip “ang dakong espirituhanong kausaban sa akong kinabuhi—ang sinugdanan sa akong mga sinugdanan” sa hingkod nga pagtubo sa ebanghelyo. Ang iyang ikaduha nga presidente sa misyon, si Elder Marion D. Hanks sa Seventy, “mitudlo kanako sa pagmahal sa mga kasulatan, ilabi na sa Basahon ni Mormon,” si Presidente Holland mihinumdom. “Siya adunay dakong impluwensya sa akong kinabuhi.”

Sa wala pa ang iyang misyon, si Presidente Holland gusto unta nga mahimong medikal nga doktor. Apan, siya miingon, “Miuli ko gikan sa akong misyon nagtuo nga ang Dios gusto nga ako mahimong usa ka magtutudlo.”

Paglabay sa daghang tuig, human sa iyang tawag ngadto sa Korum sa Napulog Duha, ang iyang igsoong lalaki, nga si Dennis, miingon nga ang tawag dili surprisa. “Ang gusto gyod ni Jeff nga buhaton mao ang pagtudlo sa ebanghelyo ngadto sa mga estudyante diha sa lawak klasehan,” miingon siya. “Ako nakasiguro kanunay nga ang Ginoo adunay sama nga tumong alang kaniya, apan ang gidak-on sa lawak klasehan ug ang gidaghanon sa mga estudyante mas dako kay sa iyang gipanglantaw.”

“Usa ka Perpekto nga Kompanyon”

Pinaagi sa pagdula og mga sport, nakaila ni Jeff si Patricia Terry, usa ka cheerleader sa ilang high school. Nag-date sila sa panahon sa ilang kataposang duha ka tuig sa high school ug, human sa iyang misyon, gipadayon ang ilang panaghigalaay.

Si Jeffrey ug si Patricia Holland naminyo sa St. George Temple niadtong Hunyo 7, 1963. Kanunay niyang giisip ang hugot nga pagtuo, pagka-espirituwal, ug dakong gugma nga putli ni Patricia nga lakip sa nagpalig-on nga mga impluwensiya sa iyang kinabuhi. “Ang iyang hugot nga pagtuo kanunay nga putli ug gamhanan ug lig-on sama ni bisan kinsa nga tawo nga akong nailhan,” miingon siya.

Ang uban nakamatikod sa ilang nagkahiusa nga espirituwal nga kalig-on isip magtiayon.

Si Presidente James E. Faust (1920–2007), Ikaduhang Magtatambag sa Unang Kapangulohan, usa ka suod nga personal nga higala. Siya sa makausa mikomentaryo nga si Presidente Holland “espirituwal kaayo inubanan sa talagsaong pagkasensitibo” nga nakapahimo niya nga makakita o makabati sa mga butang nga dili mamatikdan sa uban. Si Presidente Holland “kanunay nga naglig-on og mga tawo ug nagbayaw og mga tawo ug nagpaduol og mga tawo ngadto kaniya. Siya adunay talagsaong kapasidad sa paghimo sa mga tawo nga mobati nga sila mao ang iyang labing suod kaayo nga mga higala.”

Si Presidente Faust midugang: “Si Elder Holland moabot nga duna gyoy kauban. Si Sister Holland usa ka perpekto nga kompanyon alang kaniya. Sulundon sila nga magtiayon.”

Sa dihang hapit na mogradwar si Jeff gikan sa Brigham Young University niadtong 1965, nakadawat siya og oportunidad sa pagtudlo og part-time sa unibersidad sa misunod nga tuig samtang siya nag-eskwela og master’s degree. Human niana nga tuig sa pagtudlo, midawat siya og katungdanan sa Church Educational System nga motudlo sa institutes of religion sa Hayward, California, USA, nga dapit. Pagkasunod tuig, siya natudlo nga direktor sa institute sa Seattle, Washington, USA, diin siya nagmalamposon sa pagkabig sa mga batan-on.

Samtang nagtudlo, dali siyang nakaamgo nga ang malungtarong pagpanarbaho sa edukasyon magkinahanglan og doctoral degree. Kini misangpot sa pagbalhin sa iyang pamilya ngadto sa New Haven, Connecticut, aron siya makaeskwela sa Yale University. Sa ulahing mga katuigan kanunay niyang isulti ang mga leksiyon nga nakat-onan gikan sa iyang panahon didto sa Yale—ug kadaghanan niadto nga mga leksiyon dili bahin sa akademya. Isip hanas nga educator ug dinasig nga magtutudlo, siya mogamit niadtong mga leksiyon sa kinabuhi sa pagtudlo sa mga baroganan sa ebanghelyo.

Sa usa ka pakigpulong sa kinatibuk-ang komperensiya niadtong Oktubre 1999, gihinumdoman ni Presidente Holland ang masakit nga sinugdanan niana nga biyahe ngadto sa Connecticut 30 ka tuig na ang milabay. Ang mga Holland nagsugod gikan sa St. George sakay sa daan nga sakyanan, hapit wala nay kwarta, duha ka gagmay nga bata (ang usa tulo ka bulan ang edad), ug ang tanan nga ilang gipanag-iya nga gisulod sa gamay nga trailer. Kaduha naguba ang sakyanan sa samang lugar, mga 55 ka kilometro gikan sa St. George. Kaduha siya milakaw ngadto sa duol nga lungsod aron mangayo og tabang sa wala pa niya mahibaloi nga ang sakyanan dili na makadagan.

Sa paghinumdom, si Presidente Holland naghunahuna unsa kaha untay iyang ikasulti ngadto sa iyang mas batan-ong kaugalingon nga nawad-an og paglaom, naguol nga naglakaw sa highway: “Ayaw paghunong. … Padayon sa pagpaningkamot. Adunay tabang ug kalipay sa unahan. … Mamaayo ra ang tanan sa kataposan. Salig sa Dios ug tuohi nga moabot ra ang maayong mga butang.”

Dayon iyang gipasaligan kadtong nakigbisog, nangayo og tabang o mga panalangin sa Ginoo ug naghunahuna kon makadawat ba sila niini: “Ang ubang panalangin moabot dayon, ang uban dugay, ug ang uban dili moabot hangtod didto sa langit; apan para niadtong mohangop sa ebanghelyo ni Jesukristo, moabot kini. Niana ako personal nga mopamatuod.”

Si Presidente Holland naghunahuna sa panahon nga gigahin niya ug ni Sister Holland sa Yale isip usa ka panahon sa hilabihan nga pagtuon—sa akademya ug sa eklesyastikal. Wala madugay human sa ilang pag-abot sa New England, siya gitawag nga moserbisyo sa kapangulohan sa stake. Si Pat, kinsa nakaserbisyo isip presidente sa Relief Society sa ilang student ward, gitawag usab isip presidente sa Relief Society sa ilang bag-ong ward. Unsay nakat-onan ni Jeffrey atol niining panahona nahimong dako kaayo og kapuslanan sa iya unyang pagserbisyo sa duha pa ka kapangulohan sa stake ug dayon isip usa ka representante sa rehiyon.

“Unsa gayod ang akong nakat-onan mao ang edukasyon sa panggobyerno sa Simbahan,” miingon siya.

Human nga ang mga Holland nakabalik ngadto sa Utah niadtong 1972, siya gitawag nga moserbisyo isip pangulo sa bag-ong Church Melchizedek Priesthood Mutual Improvement Association, diin nakigtambayayong siya uban nila ni Elder James E. Faust ug Elder L. Tom Perry sa Korum sa Napulog Duha ka Apostoles, uban ni Elder Hanks. Niadtong 1974, si Brother Holland gitudlo nga dean sa Religious Education sa Brigham Young University. Paglabay sa duha ka tuig, siya gitudlo nga Church Commissioner of Education. Niini nga tahas siya gihangyo niadtong 1980 nga mangulo sa komitiba sa pagpangita aron sa pagpili og mopuli ni Dallin H. Oaks, nianang higayona mao ang presidente sa BYU.

Sa dihang si Brother Holland gitawag sa usa ka miting uban sa Unang Kapangulohan paglabay sa pipila ka adlaw, siya nagtuo nga ang miting may kalabotan sa iyang buluhaton sa komitiba sa pagpangita. Nasurprisa siya sa dihang siya gihangyo nga mopuli ni Presidente Oaks isip sunod nga presidente sa BYU.

Ang unibersidad “usa ka minahal nga dapit alang kanako,” si Presidente Holland miingon sa kaulahian, tungod sa espiritu nga gibati niya kanunay didto ug sa paagi nga ang BYU nakapatandog sa iyang kinabuhi.

Ang faculty, kawani, ug mga estudyante midawat dayon sa mga Holland. Ang kasinatian ni Sister Holland sa ebanghelyo, uban sa iyang manggihatagon nga espiritu, namatud-an nga nahimong dakong tabang panahon sa katuigan nga ang mga Holland nagtrabaho isip usa ka team diha sa BYU. Mabinationg nailhan diha sa campus nga “Pasundayag ni Jeff ug Pat,” sila mitanyag sa sinugdanan sa matag tuig ting-eskwela og mainiton ug sinsero nga espiritwal nga tambag nga nakapatandog sa daghang mga kinabuhi. Ang pipila niadtong mga pakigpulong sa BYU nahimong importanteng mga bahin sa iyang pagtudlo sa ebanghelyo.

Sa usa ka interbiyo human sa iyang unang tuig isip presidente sa BYU, siya naghisgot sa pagkadiskobre sa daghang maayong mga aspeto sa eskwelahan nga mapanindot pa sama sa bililhon nga alahas. Apan siya miingon nga ang pagpanindot kinahanglang himoon uban sa pag-establisar sa mga tumong ngadto sa kahamili. Ang moral nga kahamili, miingon siya, kinahanglang mahimong importante nga bahin sa edukasyon. Tingali walay laing presidente sa unibersidad ang makaingon nga ang kabahin sa iyang misyon sa eskwelahan mao ang pagtampo ngadto “sa kahimayaan ug kinabuhing dayon sa mga lalaki ug mga babaye nga moanhi dinhi.” Paglabay sa katuigan, siya miingon nga ang kabantog sa BYU dili ang kaanindot sa pisikal nga estraktura ug sa maayong dungog sa akademya o sa mga sport sa kolehiyo apan sa mga tawo niini.

Si Presidente Holland miatubang og mga pagsulay ug mga hagit samtang nangulo sa BYU. Siya gitawag sa pagpangulo sa 100-million ka dolyar nga kampanya sa fundraising alang sa unibersidad, ug siya mao ang kanunay nga puntariya sa dili maayong istorya ug pagpanaway sa mga kontra sa BYU Jerusalem Center sa dihang kini natukod sa ulahing tungang bahin sa mga 1980. Apan ang proyekto nakahimo niya og “espesyal nga asosasyon” uban ni Presidente Howard W. Hunter (1907–1995), kaniadto Presidente sa Korum sa Napulog Duha ka Apostoles, ug usab uban ni Elder Faust. Ang espirituwal nga pagtudlo nga iyang nadawat bililhon.

Gitawag ngadto sa Napulog Duha

Sa dihang panahon na nga ma-release si Jeffrey Holland isip presidente sa BYU, siya gitawag niadtong Abril 1, 1989, ngadto sa Unang Korum sa Seventy. Paglabay sa lima ka tuig, niadtong Hunyo 23, 1994, siya gitawag ngadto sa Korum sa Napulog Duha ka Apostoles. Kana nga tawag nakahatag niya og lawom nga pagbati sa pagdayeg ug pagpasalamat.

“Klaro nga ang akong labing dakong kaikag ug labing makalipay sa tanang pagkaamgo mao nga ako adunay oportunidad, sama sa gisulti ni Nephi, nga ‘[m]aghisgot kang Kristo, … [m]alipay diha kang Kristo, … [m]agsangyaw kang Kristo, [ug] [m]anagna kang Kristo’ (2 Ne. 25:26) bisan asa ako ug si bisan kinsa ang akong kauban hangtod mahurot ang kataposang gininhawa sa akong kinabuhi,” miingon siya atol sa kinatibuk-ang komperensiya niadtong Oktubre 1994. “Segurado nga wala nay mas labaw pa nga katuyoan o mas dakong pribilihiyo kaysa nianang ‘talagsaon nga [saksi] sa ngalan ni Kristo sa tibuok kalibotan’ (D&P 107:23).”

Usa sa mga kasinatian sa pagkat-on nga miabot ngadto ni Presidente Holland sa iyang calling mao ang talagsaong buluhaton nga iyang gipaambitan uban ni Presidente Dallin H. Oaks.

Niadtong Agosto 2002, sa espesyal nga buluhaton gikan sa Unang Kapangulohan, ang kanhi Elder Holland midala sa iyang apostolikanhong saksi sa Chile, diin, sulod sa duha ka tuig, siya nangulo ug mibansay sa mga lider. Ang kanhi Elder Oaks na-assign usab sa Pilipinas.

“Ang gihatagan og gibug-aton ni Elder Holland mao ang pagsangkap og ehemplo sa paggiya sa pamaagi sa Ginoo,” mitimaan ang usa ka makasaysayanong asoy. “Siya mitabang sa pagbansay og bag-ong mga lider ug midumala sa pag-organisar pag-usab, sa pagpahunong, ug sa pagtipon sa gatosan ka ward ug dinosena nga mga stake. Kining pag-organisar pag-usab ug pagbansay gikinahanglan tungod sa kakusog sa pagtubo sa Simbahan diha sa nasod. Ang iyang pagpangulo nakatabang sa paglig-on sa mga yunit ug pag-andam sa Simbahan sa Chile alang sa umaabut.”

Siya usab mihimo og importante nga mga koneksiyon alang sa Simbahan pinaagi sa pagpakighigala sa mga lider sa gobyerno sa Chile, lakip sa presidente sa nasod ug sa iyang asawa, diin ang Simbahan mipahigayon og makitawhanon nga mga proyekto. Sa dihang ang iyang buluhaton sa Chile nahuman, naglisod siya sa pagpanamilit.

“Kini nga higayon—kini nga komperensiya—lisod kaayo alang kanako,” siya misugod sa panamilit nga pakigpulong sa usa ka komperensiya sa rehiyon niadtong Hulyo 11, 2004. Gamit ang Kinatsila nga gipaninguha niya nga makat-onan sulod sa duha ka tuig, iyang gisultihan ang mga Santos sa Chile: “Wala ko makahibalo nga mahigugma diay ko kaninyo sa hilabihan. … Kamo maanaa kanunay sa akong kasingkasing.”

Dayon siya mipakigbahin sa Iningles, pinaagi sa tabang sa usa ka tighubad, sa iyang panan-awon alang sa umaabot sa Simbahan sa ilang nasod, “gihatag dili isip usa ka bisita,” miingon siya, tungod kay “ako taga-Chile.” Siya mihisgot sa usa ka “milagro” nga makita “sa mga panimalay” sa umaabot nga Chile—usa ka umaabot nga puno sa espirituwal nga kalig-on samtang ang matarong nga mga lider sa pagkapari sa Chile, mga sister, ug mga batan-on mogamit sa mga baroganan sa ebanghelyo sa ilang kinabuhi.

“Kita dili kabahin sa Simbahan alang sa atong kaugalingon,” siya midugang. “Kita anaa niini alang niadtong mosunod kanato.”

Kinabuhi sa Pamilya

Ang pagkamalaomon, positibo, dayag nga kinaiya ni Presidente Holland makita sa tanan niyang gibuhat, apan naningkamot siya nga mahimong pribado ang kinabuhi sa iyang pamilya. Hinuon, ang mga istorya ug mga komentaryo gikan sa iyang mga anak nagpakita nga sa sitwasyon sa pamilya siya usab usa ka malamposon nga magtutudlo.

Ang mga Holland adunay tulo ka anak: sila si Matthew, Mary Alice (McCann), ug David. Ang tanan dagko na sa dihang ang ilang amahan gitawag isip usa ka Apostol. Si Mary Alice ug David nakahinumdom sa pagkaandam sa ilang amahan, atol sa katuigan nga sila nagtubo, sa pagsakripisyo alang sa iyang mga anak. Si Mary Alice miingon nga ang iyang amahan kanunay magplano pag-ayo sa mga pag-date sa amahan ug anak nga babaye nga siya nasayod nga malingaw ang iyang anak nga babaye, bisan og ang mga kalihokan dili iyang mga paborito. Si David nahinumdom sa panahon nga ang iyang amahan migahin og pipila ka adlaw gikan sa iyang busy nga iskedyul alang sa binugtong nga biyahe uban sa iyang mas bata nga anak nga lalaki.

Kanunay, ang iyang kahibalo ug pagpamatuod sa Langitnong Amahan ug sa Iyang plano kabahin sa pagtulun-an sa pamilya.

Si Matthew miistorya og usa ka kasinatian uban sa iyang amahan nga nagtudlo kaniya mahitungod sa pagpadayag. Sa usa ka outing, nasaag sila sa hilit nga dalan sa ilang pagpauli. Mingitngit na sa dihang sila miabot sa nagsanga nga dalan, ug wala makahinumdom hain ang sakto nga dalan nga subayon. Si Presidente Holland misugyot nga ang iyang anak nga lalaki mag-ampo. Pagkahuman, iyang gipangutana si Matt unsa nga dalan sa iyang hunahuna nga ilang subayon. Si Matt mitubag nga sila mosubay sa wala, ug si Presidente Holland miingon nga mao usab ang iyang gibati.

Nagsubay nianang gikauyonan nga direksiyon, misangko sila sa tumoy sa dalan sulod sa 10 ka minutos ug napugos sa pagbalik ngadto sa nagsanga nga dalan, diin sila miliko sa tuo. Naghunahuna niini, si Matt nangutana sa iyang amahan ngano nga ang Ginoo mohatag nila sa usa ka tubag nga modala nila sa sayop nga dalan. Ang iyang amahan mitubag nga tingali mao kadto ang labing dali nga paagi nga sultihan sila sa Ginoo unsa nga dalan ang sayop. Dili sila sinati sa ikaduha nga dalan, apan sila masaligong makapadayon, nga nakahibalo nga mao kadto ang sakto.

Usa sa labing makalingaw nga mga handomanan ni Matt mao ang mga panahon nga ang pamilya manihapon.

“Matag gabii ingon og usa ka family home evening nga napuno sa katawa, mga pagdayeg, pag-awhag, makaikag nga panag-istoryahanay, pagpamatuod, pagtudlo, ug mga pagpadayag sa gugma,” miingon siya. “Mahibaloan ninyo kanunay nga si Papa malipayon kaayo kon siya anaa sa panimalay uban sa iyang pamilya.”

Si Presidente Holland ug ang iyang pamilya sa kaulahian nagbangotan sa dihang si Sister Holland namatay niadtong Hulyo 20, 2023. Atol sa iyang haya, si Presidente Holland mitawag niya nga “labing maanindot nga babaye nga akong nakaila.” Siya midugang, “Anaa niya ang tanan nga angayng mabatonan sa usa ka kompanyon dinhi sa kalibotan, ug nagpasalamat ko sa Dios nga magkauban kami sa sunod nga kinabuhi.”

Usa ka Apostolikanhon nga Saksi

Ang makapaikag nga mga pakigpulong ni Presidente Holland isip usa ka Kinatibuk-ang Awtoridad nahibaloan ug gimahal sa mga miyembro sa Simbahan. Ang iyang lig-on nga pagpamatuod sa Pag-ula ni Jesukristo ug sa gugma sa Manluluwas gibalik-balik kanunay sa matag pakigpulong.

“Ang pagsalig diha sa maluloy-ong kinaiya sa Dios mao gayod ang katuyoan sa ebanghelyo nga gitudlo ni Kristo,” miingon siya. “Ako mopamatuod nga ang Pag-ula sa Manluluwas mokuha kanato dili lang sa palas-anon sa atong mga sala apan usab sa palas-anon sa atong kapakyasan ug kagul-anan, sa atong kasubo ug ka walay paglaom.”

Sa lain nga okasyon, siya mitambag, “Unta kita makapamahayag nga kita mahimong mas maayo nga mga disipulo ni Ginoong Jesukristo, dili kay sa pulong lamang tungod kay komportable ka, apan sa buhat ug sa kaisog ug sa hugot nga pagtuo, lakip na sa panahon kon ang agianan masubo ug ang atong krus lisod nga pas-anon.”

Siya usab mipamatuod: “ Ang atong bugtong paglaom alang sa tinuod nga kahingpitan mao ang pagdawat niini isip gasa gikan sa langit—dili nato kini ‘mapaningkamotan’. Busa, ang grasya ni Kristo nagtanyag kanato dili lamang sa kaluwasan gikan sa kasubo ug sala ug kamatayon apan sa kaluwasan usab gikan sa atong kaugalingong makanunayon nga pagpanaway sa kaugalingon.”

Ang gitutukan ni Presidente Holland mao ang pagtabang kanunay sa iyang mga tigpaminaw nga makasabot sa importante nga tahas sa Manluluwas diha sa plano sa atong Amahan: “Kon si Jesus—Iyang ngalan, Iyang doktrina, Iyang ehemplo, Iyang kabalaan—mahimong sentro sa atong pagsimba, atong gipalig-on ang mahinungdanong kamatuoran nga gitudlo kaniadto ni Alma: ‘Adunay daghan nga mga butang nga moabot; [apan] tan-awa, adunay usa ka butang nga labaw ka mahinungdanon kay kanilang tanan— … ang Manunubos [kinsa] mabuhi ug moanhi taliwala sa iyang mga katawhan’ [Alma 7:7].”

Ang iyang pagpamatuod ni Jesukristo dili mabulag sa iyang pagpamatuod ni Propeta Joseph Smith ug sa Basahon ni Mormon. Ang gahom niana nga basahon nakatabang sa paghulma sa iyang mga pagtulun-an ug sa iyang kinabuhi:

“Sa [akong] tahas isip saksi ako gusto nga mopahayag nga ang espirituwal nga mga kasinatian ug balaan nga mga pagpamatuod nga akong nasinati kabahin sa Manluluwas ug sa iyang gipahiuli nga simbahan unang miabot ngari kanako isip usa ka batan-ong lalaki sa dihang nagbasa ko sa Basahon ni Mormon. …

“… Ang katinuod sa Basahon ni Mormon—sa mga gigikanan niini, sa mga doktrina niini, ug sa mga sirkumstansiya sa pagtungha niini—importante sa pagkatinuod sa Ang Simbahan ni Jesukristo sa mga Santos sa Ulahing mga Adlaw. …

“… Ang Basahon ni Mormon nagmatuod sa atong mas taas pa ug mas makadasig nga pagtuo nga si Jesus mao ang Kristo, ang Anak sa Buhing Dios, ang Manluluwas ug Manunubos sa kalibotan.”

Bisan og ang iyang tingog wala na, si bisan kinsa nga nakadungog o nakabasa sa pagsaksi ni Presidente Jeffrey R. Holland sa Ginoo ug Manluluwas, nga si Jesukristo, dili gayod makalimot niini—sama nga sila dili gayod makalimot sa iyang gamhanan nga mga pakigpulong.