“Usa ka Banwag sa Paglaom,” Liahona, Okt. 2024.
Alang sa Kalig-on sa mga Kabatan-onan Naghinumdom
Usa ka Banwag sa Paglaom
Paghinumdom kang Presidente Jeffrey R. Holland
Si Presidente Jeffrey R. Holland atol sa komperensiya sa Helsinki, Finland, niadtong Nobiyembre 13, 2022.
Ang ten-edyer nga si Jeffrey R. Holland nalimot sa oras ug hapit na maabti sa curfew. Apan aduna pay higayon nga mopauli sa saktong oras!
Alang ni Jeffrey, adunay usa lang ka butang nga angayng buhaton: midagan siya gikan sa tumoy sa St. George, Utah, paingon sa pikas tumoy ug nakaabot sa balay sa saktong oras.
Si Presidente Jeffrey R. Holland, Presidente sa Korum sa Napulog Duha ka Apostoles, midagan paingon sa saktong mga butang sa iyang tibuok kinabuhi. Ug wala nay mas importante pa kaniya kaysa pagdagan paingon sa kahayag sa ebanghelyo ni Jesukristo.
Sa iyang unang pakigpulong sa kinatibuk-ang komperensiya isip sakop sa Korum sa Napulog Duha ka Apostoles, si Presidente Holland miingon: “Ang akong labing dakong kaikag ug labing makalipay sa tanang pagkaamgo mao nga ako adunay oportunidad, sama sa gisulti ni Nephi, nga ‘[mag]hisgot kang Kristo, … [ma]lipay diha kang Kristo, … [mag]sangyaw kang Kristo, [ug] [ma]nagna kang Kristo’ (2 Nephi 25:26) bisan asa ako ug si bisan kinsa ang akong kauban hangtod mahurot ang kataposang gininhawa sa akong kinabuhi. Sa pagkatinuod wala nay lain pang mas mahinungdanon nga katuyoan o mas dakong kahigayonan.”
Maayong Butang nga Moabot
Usa ka tema ni Presidente Holland nga nagsige og balikbalik mao ang pagpakigbahin sa paglaom ug kadasig nga ikatanyag sa ebanghelyo ngadto sa kalibotan nga nagkinahanglan kaayo niini.
“Ngadto ni bisan kinsa nga nanlimbasog aron makakita niana nga kahayag ug makakaplag niana nga paglaom,” siya mitudlo, “ako moingon: Lahutay. Padayon sa pagpaningkamot. Ang Dios nahigugma kaninyo. Ang mga butang mamaayo ra. Si Kristo moanha kaninyo sa Iyang ‘pagpangalagad nga labaw pa ka maayo’ uban sa umaabot nga ‘labi pa ka maayong mga saad.’ Siya mao ang inyong ‘labawng sacerdote sa mga maayong butang nga moabot.’”
Si Presidente Holland wala mahadlok nga mopakigbahin sa mga istorya bahin sa kaugalingong kawalay kadasig, apan pinaagi sa paglaom ug hugot nga pagtuo, kanunay siya nga nagtuo nga ang labing maayo moabot pa.
“Ang ubang panalangin moabot diha dayon,” siya mitudlo, “ang uban dugay, ug ang uban dili moabot hangtod didto sa langit; apan para niadtong mohangop sa ebanghelyo ni Jesukristo, moabot kini. Niana ako personal nga mopamatuod.”
Ang Paglaom Dili Gayod Mawala
Sa Oktubre 2013 nga kinatibuk-ang komperensiya, si Presidente Holland nahibalo sa daghang kalisdanan nga nasinati niadtong nakigbisog sa kahimsog sa pangisip o emosyonal nga mga sakit. Mipakigbahin siya og usa ka higayon sa iyang kaugalingong kinabuhi sa dihang nakasinati siya og depresyon samtang nagtanyag gihapon og paglaom.
“Motuo sa mga milagro,” siya mitudlo. “Ako nakasaksi og daghan niini nga miabot dihang ang tanang indikasyon nag-ingon nga wala nay paglaom. Ang paglaom dili gayod mawala.”
Si Presidente Holland uban sa pipila ka bata gikan sa Kenya (sa Edinburgh, Scotland, niadtong Hunyo 2015).
Luna alang sa Tanan
Ang mga tawo sa tibuok kalibotan ganahan nga makakat-on gikan ni Presidente Holland. Usa siya ka banggiitan nga magtutudlo kinsa mipabati sa tanan nga giabiabi ug bililhon. Gusto gayod niya nga ang tanan mahibalo nga sila adunay luna diha sa Simbahan ni Jesukristo.
“Adunay luna [diha sa Simbahan] alang niadtong lahi og mga pinulongan, nagmaya sa nagkadaiyang kultura, ug nagpuyo sa nagkalainlaing dapit,” siya mitudlo. “Adunay luna alang sa mga single, minyo, sa dagkong pamilya, ug walay mga anak. Adunay luna alang niadtong sa una may pagduha-duha mahitungod sa ilang pagtuo ug niadtong hangtod karon nagduhaduha pa gihapon. Adunay luna alang niadtong may panaglahing sekswal nga atraksyon. Sa laktod, adunay luna ang tanang mohigugma sa Dios ug mopasidungog sa Iyang mga sugo.”
Sa tibuok niyang kinabuhi, si Presidente Holland modagan ngadto ni bisan kinsa nga nagkinahanglan og pagdasig o nagkinahanglan og usa ka matinabangon nga kamot, ug wala gayod siya mohunong sa pagdagan paingon sa Iyang Manluluwas, si Jesukristo.