“Oi Au Duadua Beka na iTabagone Qase Cake e Kunedredre Tiko Me Kunea na Kequ iNaki?,” Liaona, Sepi. 2022.
iTabagone Qase Cake
Oi Au Duadua Beka na iTabagone Qase Cake e Kunedredre Tiko Me Kunea na Kequ iNaki?
Au vakila ni vaka au sa vakacala na ituvatuva—na noqu ituvatuva baleti au, kei na ituvatuva ni Kalou me baleti au.
Ena ika25 ni noqu siganisucu, au a samaka tiko na noqu rumu ni moce. E sega ni tuvai vinaka na noqu tikina, kau vakananuma tikoga na noqu bula ena sala e sega ni tuvai matau kina. Au sega ni yaco ki na vanua au nanuma meu tu kina niu sa yabaki 25. Au a sega ni tu ena vanua e dodonu meu tu kina.
Au vakasamataka na veika au vakila niu yabaki tinivakacaca niu ciqoma na noqu veivakalougatataki vakapeteriaki. Niu dau wilika na noqu veisiga ni mataka, au raitayaloyalotaka e dua ka sa voleka sara ni vinaka sara. Ia au qai kila niu a sega ni tubu cake meu tamata oya au raitayalotaka. Kau qai vakataroga, Kevaka e rawa ni raici au ena gauna oqo koi au niu se gone, ena rarawa beka okoya?
Vakasauri ni sa tuturu na wai ni mataqu. Au vakila ni vaka meu sa vakacacana na noqu ituvatuva ni bula. Au a sega ni cakava e dua na cala vakavuleqabibi, ia au vakila talega ni vaka e sega ni dua na ka meu vakaraitaka ena noqu bula. E sega ni tu vei au na inaki. Era ituvatuva matata kece na tamata, kau mai tu e kea, au tagi tu ena vuloa ni noqu rumu ni moce, niu vakila ni vaka e tawayaga na noqu bula taucoko.
Au vakila niu galili ena noqu veilecayaki kei na yaluma. Ia ena gauna mada ga oya, au kila niu sega ni rawa ni dua ga na itabagone qase cake e kunedredre tiko me kunea na nodra sala. Niu dau veitalanoa kei ira tale eso, au raica ni vica wale sara na nodra bula na tamata era sa tini vinaka sara me vaka na nodra ituvatuva. Ka vukei au oya me ruru na noqu galili.
E vukea talega meu vakananuma vei au ni sega ni vinakata na Tamada Vakalomalagi meu vakila niu sa guce. E vinakata oKoya meu “toso ki liu ka tudei vei Karisito, ena taucoko ni nomudou vakanuinui” (2 Nifai 31:20). E vakabauta oKoya na noqu rawa ni veisau ka tubu ena kaukauwa ni Veisorovaki ni iVakabula. Na ka ga e vinakata o Setani meu tukuna niu sa vakayalia na noqu madigi meu yacova na tamata e kila tu na Tamada Vakalomalagi niu rawa ni vaka.
Kilaimatata na iTuvatuva ni Veivakabulai
E vuqa vei keda eda vakila ni sega na inuinui me baleta na veisiga ni mataka. Ka yaco oya baleta ni da sega ni kilamatata na ituvatuva ni marau ni Kalou. Eda nanuma beka ni sa vaka e dua na qito ni vidio na noda bula—e dua na laini ni italanoa tudei e dodonu me da muria me rawa ni da qaqa kina. Ia oya e sega ni kena icakacaka. Ena veisiga eda cakava tiko na digidigi, veisau, ka tubu. E sega ni dua na ka e mate se tu vakadua ena veika. Na noda digidigi ena sega vakadua ni ka ni kidacala vua na Tamada Vakalomalagi, ia era se noda digidigi tikoga . Eda sa vola tiko na keda italanoa, vata kei Koya, ni da lako tiko.
Ia kevaka me “sa vakatekivuna ka sauma talega na Karisito na [keda] italanoa,”1 sa rawa meda rai nuidei tiko ki na dua na icavacava ni marau tawamudu.
Eso na gauna eda dau cakacala se da butusese mai na idusi, ka vakalaivi keda meda lakosese tu ga ka sega ni mudu.
Ia oqo na kosipeli ni inuinui. Baleta na ka sa yali e sa kune. Oqo e kosipeli ni vuli. Baleta na veivosoti. Baleta na tovolei tale. Me vaka a vakatavulica o Elder Neil L. Andersen ena Kuoramu ni iApositolo Le Tinikarua, “Na veivutuni e sega ni ituvatuva ni veitokoni; sai koya na ituvatuva.”2
Sa uasivi sara na loloma i Tamada Vakalomalagi vei keda, ka sa uasivi sara talega na Nona ituvatuva vei keda. Sa dua na ituvatuva uasivi vei ira na tamata tawataucoko, ka tuvai ena veikauwaitaki kei na kilai vakamatata ni noda gagadre kei na igunirawa-ka. E tiko na rumu ena Nona ituvatuva me baleta na noda malumalumu—na noda cakacala yalodina kei na noda ivalavala ca cikecike kei na noda lako sese tu ena lekutu. Ka sa tiko na rumu ena Nona ituvatuva me baleta na noda qaqa, ka da sa vakadeitaka ena veigauna kece eda rai kina Vua ka tovolea tale.
Kunea na Kemu iNaki
Sa levu sara na gauna au vakayagataka me vakasama tiko kina mai na siganisucu oya me baleta na kequ inaki. Se bera tikoga niu kila na veika kece. Ia au sa sega tale ni lomaleqa kina. Au kila ni kilai au na Kalou ka kevaka au na vuki Vua, ena vukei au oKoya meu vakavurea na ibalebale ni vanua au tiko kina oqo.
Ena dua beka na siga ena kunea e dua na iwali ni kenisa se na itinitini ni viakana e vuravura se rawata na veisaututaki e vuravura. Ia e dua nikua ena vakaceguya e dua na itokani yalorarawa se vukea e dua na vulagi kunedredre se masu ena imatai ni gauna ena vica vata na yabaki. Kau nanuma ni ka kece oqori e kena ibalebale e dua na ka—na ka kece sara ga.
Na ka dina oya, e vuqa vei keda ena sega ni cakava na veika lagilagi, na veika rogovaki e vuravura ena bula oqo. Ia oya e sega ni kena ibalebale ni sega ni dua na keda inaki. Na itinitini ni keda inaki ni da luvena na Kalou sai koya meda vakataki Koya. Ka da sa tubu ki na inaki oqori ni da cakava na veika lalai e veisiga meda muri Jisu Karisito kina.
Au sa mai vakamareqeta na ivakavuvuli ni kosipeli ni “veika lalai ka beci sa tubu mai kina na ka levu” (Alama 37:6). Niu railesuva na noqu bula, au sega ni raica e dua na ka qoroi. Ia au raica e vuqa na “veika lalai ka rawarawa” ka sa vakavuna na veisau levu. Kau kila mai na loloma soliwale ni iVakabula, na noqu sasaga lalai, vakabauta vinaka sa taracake tiko na noqu sala meu yaco meu vakataki Koya.
E sega ni dua na sala e rawa ni vakataka sara na nomu. Ia kevaka o tovolea tiko na nomu vinaka duadua mo taura na ikalawa kivei Karisito, na nomu sala e sa dua na ka vinaka. Sa vakabauti iko na Dauveibuli Sa Cecere Sara, io mo duri dei sara ka vakabauti iko. E tu vua na Kalou na veika veivakurabuitaki me baleti iko, ka dina ga ni o vakila ni o lailai ka tawayaga, ena “vukei iko o Koya mo rawata e dua na ka e cecere cake sara mai na kena o rawa ni vakasamataka rawa.”3