“E Rawa nida Vukei Ira na Tani mera Vakila nira Lomani ka Ciqomi,” Liaona, Sepi. 2022.

iVakavuvuli ni Veiqaravi

E Rawa nida Vukei Ira na Tani mera Vakila nira Lomani ka Ciqomi

A sotava na iVakabula na veicati ka vakavulica vei keda na sala meda dau dolele yani kina.

O Sasha e dua na marama gone sega ni vakawati ena dua na tabanalevu vakamatavuvale, ka sega ni dau rawarawa. E vakila ni marau o koya ka vakacegui ia e vakavuqa dau duatani sara—ka laurai levu toka vakalailai—e maliwai ira na vo ni lewe ni tabanalevu. Me vaka e vuqa vei keda, e gadreva tu o koya me ciqomi ka vakataukeitaki.

O Thomas, e dua na turaga qase cake ena tabanalevu, a lesi vaka nona dauveiqaravi turaga ka mai veisiko kei watina ena dua na siga me kilai Sasha vinaka kina. A via sakasaka vakalailai na veisiko ni vuki na veivosaki kina nona ituvaki vaka goneyalewa. Ia niratou veitalanoa tiko, a siqema rawa o Sasha nirau tovolea tikoga o Tomasi kei watina merau kila vinaka nona ituvaki kei na sala rau na rawa ni veivuke kina.

Ena dua na gauna, a kaya o Tomasi, “Au raica ni nomu lomanibai ena gadreva beka me samaki vakalailai. Au na taleitaka meu vukei iko kina.”

Na cakacaka nei Sasha e dau osooso sara vakalevu ka sega so ni dau bibi vua na samaki ni nona lomanibai. Me kena ikuri, e sega nidau taleitaka o koya. E kila o koya na samaki ni lomanibai, ka kila ni rawa ni cakava o koya. Ia oya e sega ni veisautaka na dina ni dau cata o koya.

Ena dua na gauna e a rawa ni vakararawataki koya na nona taro oya. Ia a tukuna o Tomasi ni tu o koya ena mataivalu ka kila vinaka na ka e dau cakava vakaikoya e dua na marama ni sega ni tiko volekati koya na watina. A kila o koya ni saga o Tomasi na sala me vakatitobutaka na nodratou veitokani. A tovolea tiko o koya me semata vata na veika sotavi ena nona bula kei na nona ka kunea ena veika eratou tautauvata kina.

Na yasa ruarua ni veimaliwai ni veiqaravi oqo a vulici kina na veilomani kei na veiciqomi vakai ratou mai na vanua eratou a tu kina, ka tubu cake e dua na veitokani veivolekati ka dina.

Ka sega ni rairai vinaka cake kina na lomanibai nei Sasha.

Na iVakaraitaki Uasivi Sara ni Veiciqomi

Ena Veiyalayalati Makawa, a parofisaitaka o Aisea ni kila vakavinaka sara o Jisu Karisito na ituvaki mo duatani tu kina. A sotava o koya na cati kei na vakacacani. “Sa beci Koya ka biuta ko ira na tamata, sa tamata e daurarawa na lomana, ka sa daukila ka rarawa” (Aisea 53:3). Ena Nona loloma uasivi sara, sa kila kina na veika eda vakila ka kila na sala me vukei keda kina (raica na Alama 7:12). Sai Koya na ivakaraitaki uasivi ni noda rawa ni dolele yani ena loloma me da ciqomi ira na tani, se cava ga na kedra ituvaki se kedra irairai.

iVakavuvuli me Vakasamataki

Nio vaqara na sala eso mo vukei ira kina na tani mera vakila nira sa ciqomi tu, vakasamataka na ivakavuvuli eso a vakavulica ka bulataka na iVakabula:

Tuvakarau mo kilai ira na tamata e taudaku mai vei ira o sa kila tu (raica na Maciu 5:43–48).
Kakua ni rere mo veimaliwai vata kei ira era rairai bula tiko se vakabauta duidui kevaka e sega ni kena ibalebale na vakawaleni ni ivakavuvuli ni iVakabula (raica na Marika 2:14–17; Luke 7:38–50).
Na tamata kece e dodonu mera vakila nida vinakati ira e valenilotu (raica na 3 Nifai 18:22–32). Na nodra tiko ena vanua e rawa nira vulica kina na kosipeli ni iVakabula ka vakila Nona loloma e rawa ni veisautaka e dua ga.
Sa kila tu na iVakabula na veika eda gadreva, vakatikina baleta ni kila o Koya na veika eda vakila (raica na Alama 7:11–12). E rawa nida vakaraitaka na loloma ena noda segata meda kila na veika era sotava na tani ka biuti keda ena nodra ituvaki.
A taura na gauna na iVakabula me sotava na nodra gagadre o ira era tu wavoliti Koya. A tu vakadua me qaravi ira na tani ena gauna mada ga a tuvatuvaka tu kina o Koya me tiko ena dua tale na vanua (raica na Marika 5:22–43).

Na Cava E Rawa Nida Cakava?

Kakua ni laiva na duidui me tarova nomu kilai ira vinaka o ira o veiqaravi kina. Se cava ga na noda duidui eso, me dau kunei na vanua eda tautauvata kina.