“Laiva na Turaga me Dusimaka na Nomu Bula,” Liaona, Sepi. 2022.
iTabagone Qase Cake
Laiva na Turaga me Dusimaka na Nomu Bula
Au sega ni dau raica rawa na ivakarau ena yaco kina na veika eso, ia niu cakacaka ena vakabauta, e vakalougatataki au na Turaga.
A sega soti ni dau taleitaki ena noqu matavuvale na lotu ena gauna au tubu cake tiko kina—e dina ga ni rau a daulotu sara vakalevu na noqu itubutubu ena vuqa na nodrau bula, na itukutuku ni sa na rawati tamaqu na kena mate, ena maliwa ni veivakatovolei tale eso, a vakavuna me rau biuta na lotu erau a susugi kina. Au a yabaki va ena gauna a mate kina ena kenisa ka gone duadua vei iratou e 13 na gone, ka sega sara ga ni vakabauta o tinaqu yada ni Kalou ena vakatara e dua na ka vakaoqo ki na neitou matavuvale.
Ia niu sa qai yabaki 14, au vakila ni dua na ka e yali tiko mai na noqu bula. Au lomatarotaro de tiko e dua na noqu inaki cecere au sega tu ni kila. Au vakila niu vakai Josefa Simici, ni “sa dau kacivi na noqu vakasama ki na vakanananu kei na veilecayaki levu” (Joseph Smith—Ai Tukutuku 1:8). E dina ga niu se bera vakadua ni bau rogoci Josefa Simici ena gauna oya, au a tekivuna e dua na vakasaqaqara tautauvata kei na nona dau lakova e vuqa na lotu ena vakanuinui niu na kunea na dina.
Ia e a yaco, ena dua na siga, niu raica e rua na cauravou ni rau lako tiko ki na nodratou vale na itokani. Au a lomatarotaro ka kerei rau ke rawa niu lako mai ki na nodrau iloku. Ni sa vakadonui mai vei tinaqu, au a tekivuna na veivosaki ni daukaulotu ka qai lewena na Lotu.
Na noqu lewena Na Lotu i Jisu Karisito ni Yalododonu Edaidai e a vukei au meu kunea na kequ inaki, vakabibi ena noqu yabaki ni itabagone qase cake ena gauna meu vakatulewa kina vakalevu ni ra sega ni duavata na tamata era tu wavoliti au. Ia e dina ga ni tiko e dua na kequ inaki kei na veidusimaki, au sega ga ni dau kila na sala me na yaco kina na veika eso.
Ia, niu sotava na veika tawakilai kei na veilecayaki kei na vuqa na veisau, na veidusimaki nei Tamada Vakalomalagi e tudei tu ga niu vuki Vua. Au vulica eso na sala meu vakararavi kina Vua kei na noqu vakabauta ka vukei au meu toso ki liu ka tomana tiko na noqu kunea na kequ inaki.
Toso ki Liu ena Kaulotu
Ena yabaki ni nodra sa vakavakarau tiko e vuqa na noqu icaba mera gole ki na koliji, au vakananuma tiko na sala meu na laki kaulotu kina. E Chile, na tamata kece e dodonu me taura e dua na veitarogi ni bera ni ra gole ki na univesiti. E soli ga vakadua ena dua na yabaki, kevaka au lako ki kaulotu, au na sega walega ni lokuyarataka noqu vuli me rua na yabaki ia au na wawa tale ena dua na yabaki meu laki vuli ni oti oya.
Na noqu matavuvale, vakauasivi o tinaqu, a saqata na kaulotu. Sa ka bibi sara vua meu rawata e dua na vuli torocake. Ia au vakabauta ni na vukei au na Turaga meu cakava na ka e ganita, kau sa tekivu vakavakarau sara ena masumasu.
Ni lako mai noqu bisopi ki noqu vale vata kei na ivola vakacavari ni noqu kaulotu ka kerea na saini nei tinaqu, a kurabui o koya; au a sega ni tukuna vua niu sa toso tiko ki liu ena iwalewale oya. E taura e dua na veivakauqeti, ia a vakamalumalumutaka na yalona na Turaga ka vukei koya me kilamatata niu vinakata meu veiqaravi.
Sa vakadeitaka vei au na kosipeli niu sa cakava tiko na ka dodonu, ia na kena toso tiko ki liu, ena ikalawa yadua, ena vakabauta—ena noqu taro taucoko kei na veilecayaki—au sa toso tikoga ki liu.
Muria na iVakatakila ni Oti na iVakatakila
Na lesu i vale mai na noqu kaulotu e kena ibalebale talega na lesu ki na veilecayaki. Niu vakasaqara na veidusimaki mai vua na Tamada Vakalomalagi ena masu kei na lolo, au ciqoma na ivakatakila niu gadreva meu toki ki Amerika ka laki vuli ena Brigham Young Univesiti, ka vaka me sa dua na itavi dredre sara.
Au cakava na noqu vinaka taucoko au rawata ka taura na ikalawa vinaka duadua e tarava. Ena so na gauna au vakila ni vaka niu sega ni yaco ki na dua na vanua—au a cakacaka sara vakaukauwa me vaka au rawata, ia au sega ni kila deivaki ni noqu sasaga ena vukei au meu rawata na noqu lalawa. Ia, sa noqu inaki levu duadua meu muria na veika e vinakata na Turaga meu cakava, ka sa ka talei sara vei au na lalawa oya.
Niu vakayacora na sasaga oqori, au a vakauqeti ena dua na siga meu dolele yani vei noqu itokani vinaka e Amerika ka tiko ena noqu tauni. Au sega ni kila na cava ena yaco ena gauna oya—au a dolele yani baleta ga ni a dusimaki au na Yalotabu—ia a yaco na noqu itokani kei tamana me rau vakaitavi me vukei au meu kila na cava meu cakava meu vakayagataka ka rawata na ivolatara au gadreva meu vuli e BYU. Mai na nodratou veivuke kei na solibula vakaitamera a vakayacora o tinaqu meu sauma kina na noqu ilakolako, au a yaco ki kea. E a dua na cakacaka mana.
E toso tikoga na noqu bula ena sala vata ga oya. Au na cakava na noqu vinaka taucoko ka qai ciqoma na veivakauqeti, dua na ka ena dua na gauna, ena veika meu na cakava tarava. Ena ivakarau oya, au a rawata e dua na cakacaka ena koronivuli ni kaulotu, kunea na sala eso meu sauma kina na noqu icurucuru, tauriivola e gauna donu, ka vakamau sara.
Na isaunitaro au ciqoma e sega ni dau yaco mai vakatotolo kau sega ni ciqoma e dua na ituvatuva matailalai, ia au ciqoma na veivakadeitaki ni sa marautaka tiko na Turaga na mua au mua tiko kina.
Ni Sega ni Vakaibalebale na iVakatakila
Ni oti e vica na yabaki, au a vulica na bibi ni solibula ena bulataki ni kosipeli. Kevaka eda vinakata na Turaga me solia vei keda na inaki kei na idusidusi, sa dodonu me da tuvakarau me da taura na idusidusi oya.
Ni oti na vuli, a sega ni lako na veika eso me vaka na ituvatuva ni kabani au cakacaka tiko kina, ka mani rua kina na digidigi e tu vei au kei watiqu: tiko e Amerika se lesu tale ki Chile. Keirau a vakila vakamatata ni keirau gadreva me keirau lesu tale ki Chile. Ena rairai matau beka me da via lesu i vale, ia oqo e dua na gauna dredre sara. E sega ni levu na cakacaka e Chile. Au sotava tiko na leqa me volitaka neirau vale. Na veika vakailavo kei na iyau, e sega ni ka yalomatua me caka; na neirau matavuvale mada ga era nanuma ni keirau sega ni vuku.
Na cava o na cakava ni yaco mai na ivakatakila me veisaqasaqa kei na vakasama matau? E dina ga ni dredre, keirau kila kei watiqu na ka me keirau cakava. Keirau veivakananumi vakai keirau ni sa kauti keirau mai vakayawa kosipeli. Ke a sega na Turaga, au a sega ni rawata na veivakauqeti ka a vukei au meu kaulotu, vuli, ka sotava na watiqu. Keirau a nuitaka ga ni se cava ga na vuna, keirau gadrevi mai Chile.
Keirau biuta na neirau vale vei neirau bisopi me rawa ni redetaki me yacova ni sa volitaka rawa, ka keirau toki yani. A dredre sara, ia keirau sotava e vuqa na veivakalougatataki kei na cakamana ena neirau rogoca na kaci ni Turaga. E kila tu na Turaga na vanua eda gadrevi kina kei na vanua vinaka duadua meda qarava vinaka kina na Nona inaki, ka na vakalougatataki keda o Koya ena vuku ni noda talairawarawa.
Kunea na iWali vata kei na Turaga
Au nuitaka ni ra na muria nikua na itabagone qase cake na ivakaraitaki nei taci Jereti. E dina ga ni ra kila na Jeretaiti ni gadrevi me ra lako ki na vanua yalataki, era sega ni kila vakavinaka sara na sala me ra na yaco rawa kina e kea. Ni sa “masuta na yaca ni Turaga” ko tuakai Jereti (Ica 2:15), a solia vua oKoya e vica na iwali. A tukuna vua na Turaga me tara na waqa ka dusimaki koya ena sala me vakarautaka kina na cagi me baleti ira na tiko ena waqa.
A sa kaya na Turaga vua na tuakai Jereti: “A cava ko vinakata me’u kitaka me ra rarama kina na nomudou waqa?” (Ica 2:23) A sega ni tukuna vakadodonu sara ga vua na tuakai Jereti na ka me cakava, a kerei koya na Turaga me lako ka kunea ga na nona iwali.
Oya na sala sa cakacaka kina na noqu bula. Ena so na gauna e dau solia vei au na Turaga na ivakasala matata. Eso tale na gauna e waraki au oKoya meu lako yani Vua kei na ka au vakasamataka. Ia, se cava ga, sa ka bibi sara meu okati Koya ena kena cakacakataki. Na lolo, masumasu, kei na veivakasalataki vata kei na Turaga sa ikalawa gadrevi ki na tamata kecega e tovolea tiko me vakatulewa me baleta na nodra bula.
Vei ira na itabagone qasecake era vaqara tiko na inaki levu cake, au solia na ivakasala oqo: Vuki vua na Turaga me baleta na ivakatakila yadua. Raica vakawasoma na nomu veivakalougatataki vakapeteriaki. Ka yalorawarawa mo solia na veika e sega soti ni bibi ena nomu bula kevaka e tukuna vei iko na Turaga ni tu Vua e dua na inaki cecere cake me baleti iko.
\Au lomana na Turaga. E ka kecega vei au na kosipeli. Au kila ni Turaga e raica na kemu icavacava ka vinakata me vukei iko mo rawata na kemu inaki vakalou.