Tok bilong God long ol Pikinini bilong Em

Ol skripsa i tokim yumi olsem nambawan samting God i bin mekim bihain long Em i wokim kamap man na meri Em i bin toktok long ol.¹ Em i bin gat ol samting yumi nidim long laip na ol tok bilong samting i gat bikpela valu em i bin laik long givim yumi. As tingting bilong Em i no bin long givim ol hevi o wari tasol long soim ol long rot i go long hamamas na glori bilong oltaim oltaim.

Na dispela bin stat bilong en tasol. Long dispela de i kam inap nau, God bin go het yet long toktok wantaim ol pikinini bilong Em. Na ol i bin lukautim ol dispela tok gut, na hokim klostu long lewa bilong ol, na ol disaipol bilong wanwan taim bin lukluk gut long ol dispela tok. Ol lain husat wok long laik save long laik bilong God save rispektim ol dispela tok, na ol tokaut long witnes long dispela trut olsem “ Bikpela God bai i no wokim wanpela samting, tasol em bai autim long ples klia dispela tok hait bilong em i go long ol wokman bilong em, ol profet.”²

Dispela em bin wei bilong wokim ol samting long stat bilong taim i kam inap nau, na dispela wei i go het yet tede. Em i no wanpela naispela stori bilong Baibel tasol; em i wei God yet i bin putim long salim ol nambawan tok i go long ol pikinini bilong Em. Em i kirapim ol wanwan lain i kam long name long yumi, singautim ol long kamap olsem ol profet, na givim ol ol tok long tokaut long en, long we yumi kisim invitesen long “kisim, olsem tasol dispela i kam long maus bilong [Em] yet.”³ Em i bin tokaut, “Maski long maus bilong mi yet o long maus bilong ol wokman bilong mi, em i wankain.”⁴

Dispela em i wanpela long ol toktok bilong Ristoresen—we i pulap long glori, i strongim bel na i gat hop, God i no stap isi! Em i lavim ol pikinini bilong Em. Em i no lusim yumi long raun raun long tudak.

Tupela taim long wanwan yia, long Epril na long Oktoba, yumi i gat opotuniti long harim maus bilong Bikpela long ol wokman bilong Em long ol nambawn jenerol konferens.

Mi givim yupela witnes bilong mi yet olsem sampela bipo long wanpela mausman long jenerol konferens i mekim dispela longpela wokabaut i go long ples bilong sanap na toktok, dispela man o meri i putim pinis traipela tumas hatwok, preya, na stadi long bekim long wok bilong toktok long konferens. Olgeta konferens toktok i makim planti aua bilong redi na krai bilong bel long kisim gut wanem dispela em Bikpela i laikim ol Seint bilong Em long harim.

Wanem samting inap kamap sapos yumi long lain i harim ol dispela toktok putim wantaim wok bilong yumi yet long redi wantaim wok bilong ol lain husat i givim tok long redi? Hau bai lukluk bilong yumi long jenerol konferens i narakain sapos yumi lukim konferens olsem wanpela opotuniti long kisim tok i kam long Bikpela Em Yet? Long ol toktok na musik long jenerol konferens, yumi inap long tingim long kisim bekim bilong wanwan long ol wanem askim o problem yumi wok long bungim stap.

Sapos yu save laik save sapos Papa long Heven bai tru tru toktok long yu, mi bai tokim yu gen long dispela liklik tasol strongpela moa yet ol toktok olsem ol Praimeri pikinini bilong yumi i save singsing: “[Yu em] wanpela pikinini bilong God, na em i bin salim [yu] i kam long hia.” As tingting bilong Em, em long halivim yu long go bek long “stap wantaim em wanpela taim gen.”

Sapos yu kam klostu lonng Papa long Heven olsem pikinini bilong Em, yu inap askim Em wantaim trupela bel, “Lidim mi, soim rot long mi, wokabaut long sait bilong mi, halivim mi long painim rot. Tisim mi olgeta samting Mi mas wokim.” Em bai toktok long yu thru long Holi Spirit bilong Em, na bihain em i stap long han bilong yu “long wokim laik bilong em.” Mi promis olsem sapos yu wokim dispela, “ol planti moa blesing bai i stap.”⁵

Dispela soim rot bilong Bikpela yumi nidim tede olsem tasol yumi bin nidim olgeta taim long histori bilong wol. Taim yumi redi long harim tok bilong Bikpela, i olrait long yumi wok strong long painim Spirit bilong trut olsem taim Bikpela i toktok thru long ol wokman bilong Em, yumi inap kisim gut, kamap strong, na hamamas wantaim.⁶

Mi testifai olsem “taim mipela wokim ol dispela samting ol get bilong hel bai no inap long win agensim [mipela]; tru, na Bikpela bai salim aut ol pawa bilong tudak long ai bilong [mipela], na wokim ol heven long seksek long gutpela bilong [mipela], na nem bilong em, em glori.”⁷