Vajtswv txoj Lus rau Nws cov Me Nyuam

Cov vaj lug kub qhia peb tias yam thib ib uas Vajtswv ua tom qab Nws tsim txiv neej thiab poj niam yog hais lus rau nkawd.¹ Nws muaj tej lus xov xwm thiab tej lus qhia uas muaj nqis hais rau nkawd. Nws lub hom phiaj tsis yog muab lub nra rau nkawd los yog ua rau nkawd txhawj tiam sis yog kom coj nkawd mus rau kev zoo siab thiab yeeb koob nyob mus ib txhis.

Thiab qhov no yog qhov chiv keeb xwb. Txij hnub ntawd los txog niaj hnub no, Vajtswv tau txuas lus nrog Nws cov me nyuam. Nyob hauv txhua tiam neeg Nws cov thwj tim tau kawm Nws txoj lus thiab muab tshwj tseg cia. Cov uas xav paub Vajtswv lub siab nyiam hwm Nws txoj lus, thiab lawv ua tim khawv txog qhov tseeb hais tias, “Tus Tswv uas kav ib puas tsav yam yuav ua ib yam dab tsi, nws yeej xub qhia rau nws cov tub qhe uas yog cov yaj saub paub ua ntej nws mam ua.”²

Nov yog tus txheej txheem txij thaum chiv keeb los, thiab tseem ua raws li tus txheej txheem no niaj hnub no. Qhov no tsis yog ib zaj dab neeg hauv phau Vaj Lug Kub Npaiv Npaum xwb; yog Vajtswv txoj kev qhia tej zaj lus tseem ceeb rau Nws cov me nyuam. Nws tsa tib neeg uas nyob hauv peb, hu lawv los ua cov yaj saub, thiab muab tej lus rau lawv hais, uas siv kom caw peb “txais nws txoj lus, zoo ib yam li los kiag ntawm [Nws] lub qhov ncauj los.”³ Nws tau tshaj tawm hais tias, “Txawm yog los ntawm Nws lub suab los yog los ntawm Nws cov tub qhe lub suab, yeej zoo ib yam.”⁴

Nov yog ib zaj lus ntawm txoj Kev Muab Txoj Moo Zoo Txum Tim Rov Qab Los uas muaj yeeb koob, kev txhawb nqa, thiab kev cia siab zoo tshaj plaws—Vajtswv tsis nyob ntsiag to xwb! Nws hlub Nws cov me nyuam. Nws tsis tso peb nyob peb tus kheej ua loj leeb hauv kev tsaus ntuj.

Ob zaug txhua xyoo, thaum lub Plaub Hlis Ntuj thiab Kaum Hli Ntuj, peb muaj cib fim mloog tus Tswv lub suab dhau los ntawm Nws cov tub qhe nyob hauv peb lub tuam rooj sab laj.

Kuv ua tim khawv rau nej hais tias ua ntej ib tug neeg hais lus nyob hauv lub tuam rooj sab laj mus txog lub sam thiaj, nws twb tau siv zog, thov Vajtswv, thiab kawm ntawv kom ua raws li kev txib hais lus. Txhua zaj lus hauv lub tuam rooj sab laj yog hais vim cov neeg hais lus tau siv sij hawm ntev kom npaj thiab tau thov Vajtswv kom to taub tias tus Tswv xav kom Nws Tsoom Haiv Neeg Ntseeg hnov dab tsi.

Yuav muaj li cas yog tias peb cov uas mloog lus tau npaj ib yam li cov hais lus? Peb yuav ua txawv li cas thaum muaj lub tuam rooj sab laj yog tias peb saib lub rooj sab laj zoo li yog ib lub cib fim txais tej zaj lus los ntawm tus Tswv Nws tus kheej? Dhau los ntawm cov nkauj thiab cov lus hauv lub tuam rooj sab laj, peb txais tau tej lus teb peb tej teeb mem los yog tej lus nug uas peb muaj.

Thaum twg nej xav paub seb Leej Txiv Saum Ntuj Ceeb Tsheej puas yuav hais lus rau nej, kuv xav kom nej nco txog tej lus tseem ceeb nyob hauv zaj nkauj uas peb cov me nyuam hauv lub Koom Haum Me Nyuam Yaus hu nkauj: “[Nej] yog Vajtswv me nyuam. [Nej] nyob hauv ntiaj teb no.” Nws lub hom phiaj yog pab nej kom “[nej] tau nrog Nws nyob.”

Yog tias nej hais rau Leej Txiv Saum Ntuj Ceeb Tsheej zoo li nej yog Nws tus me nyuam, nej nug tau Nws nrog ib lub siab xav paub tiag tiag hais tias, “Qhia kuv, pab kuv, nrog kuv mus kev, pab kuv nrhiav qhov yog. Qhia kuv txhua yam kuv yuav ua.” Nws yuav hais lus rau nej dhau los ntawm Nws tus Vaj Ntsuj Plig Dawb Huv, ces nyob ntawm nej kom “ua raws li Nws lub siab nyiam.” Kuv cog lus rau nej hais tias yog nej ua li ntawd, “Nws yuav foom hmoov rau [nej].”⁵

Yeej tsis tau muaj ib lub sij hawm hauv lub ntiaj teb uas xav tau tus Tswv txoj kev coj npaum li xav tau niaj hnub no. Thaum peb npaj siab mloog tus Tswv txoj lus, thov kom peb yuav rau siab nrhiav tus Ntsuj Plig ntawm qhov tseeb ces thaum tus Tswv hais lus dhau los ntawm Nws cov tub qhe, peb thiaj yuav to taub, txais kev txhawb nqa, thiab zoo siab ua ke.⁶

Kuv ua tim khawv tias “los ntawm kev ua tej yam no ces tej qhov rooj ntawm ntuj txiag teb tsaus yuav kov tsis yeej [peb]; muaj tseeb tiag, thiab tus Tswv Vajtswv yuav ua kom tej hwj chim ntawm txoj kev tsaus ntuj yaj ploj ntawm [peb] mus, thiab ua kom lub ntuj co nto kom zoo rau [peb], thiab nws lub npe lub yeeb koob.”⁷