Tej Ntsiab Cai txog Kev Mus Saib Xyuas Tom Tsev, Peb Hlis Ntuj 2018
Thov Vajtswv Pab Txhua tus Viv Ncaus
Peb txoj kev hlub cov uas peb mus saib xyuas tom tsev thiab kev tshoov siab txog lawv yuav loj tuaj thaum peb txo hwj chim thov Vajtswv pab txhua tus viv ncaus.
Kev Ntseeg, Tsev Neeg, Kev Pab
Cov vaj lug kub qhia txog ntau tus txiv neej thiab poj niam tus yam ntxwv uas thov Vajtswv pab lwm tus. Ib zaj uas raug siab ntsws heev yog hais txog Amas tus Hluas leej txiv. Ib tug tim tswv hais lus rau Amas tus Hluas, qhia nws hais tias nws txiv “tau thov nrog kev ntseeg ntau heev ntsig txog koj … ; yog li ntawd, vim yog rau lub hom phiaj no kuv thiaj tau los ua kom koj paub txog Vajtswv lub hwj chim thiab txoj cai, xwv kom nws yuav teb tau nws cov tub qhe tej lus thov raws li lawv txoj kev ntseeg” (Mauxiyas 27:14).
Thaum peb ib leeg thov Vajtswv pab ib leeg ces ua rau peb lub siab qhib plho kom txais tau cov koob hmoov uas tus Tswv xav pub rau peb. “Lub hom phiaj ntawm kev thov Vajtswv tsis yog kom Vajtswv hloov Nws lub siab nyiam, tiam sis yog kom peb tus kheej thiab lwm tus txais tau cov koob hmoov uas Vajtswv txaus siab pub rau peb, tiam sis peb yuav tsum thov ua ntej kom peb txais tau.”1
Ib tug viv ncaus qhia hais tias thaum ib lub sij hawm nyuaj hauv nws lub neej, ib tug mus saib xyuas tom tsev hu xov tooj los yog ntaus ntawv rau nws thaum txog “tej hnub tsaus ntuj heev.” Zoo li nkawd paub thaum twg nws xav tau kev txhawb nqa. Nws paub tias nkawd ob leeg thov Vajtswv pab nws, thaum nkawd tuaj xyuas thiab thaum nkawd nyob nkawd xwb.
Julie B. Beck, Koom Haum Niam Tsev tus Tuam Thawj Tswj Hwm hais tias, “Cia li xav seb peb yuav muaj zog npaum li cas yog tias txhua tus viv ncaus yuav thov Vajtswv tiag tiag txhua tag kis thiab txhua hmo, los yog, zoo dua yog lawv thov Vajtswv tsis tu tsis tseg zoo li tus Tswv tau txib.”2 Kev thov Vajtswv pab cov uas peb mus saib xyuas tom tsev txhawb nqa peb tus kheej thiab txhawb nqa peb txoj kev ua poj niam uas yog Tsoom Haiv Neeg Ntseeg.
Thawj Tswm Hwm Henry B. Eyring, tus Pab Cuam thib Ib hauv Thawj Pawg Thawj Tswm Hwm hais tias: “[Cia li] thov Vajtswv kom paub lawv lub siab. … Nej yuav tsum paub tias Vajtswv xav kom nej ua li cas kom pab lawv thiab ua txhua yam nej ua tau, nrog rau Vajtswv txoj kev hlub rau lawv.”3
© 2018 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub txhais ua lus As Kiv: 6/17. Pub txhais ua lus Hmoob: 6/17. Kev txhais Visiting Teaching Principles, March 2018. Hmong 15049 295