Kev Npaj Hnov Vajtswv lub Suab

Thawj Tswj Hwm Uchtdorf piav hais tias thawj yam uas Vajtswv ua tom qab Nws tsim txiv neej thiab poj niam yog hais lus rau nkawd thiab muab tej lus xov xwm thiab tej lus qhia uas muaj nqis hais rau nkawd. Peb txais tau txoj koob hmoov zoo tib yam thaum lub Plaub Hlis Ntuj thiab Kaum Hli Ntuj hauv lub tuam rooj sab laj, thaum cov thawj coj ntawm lub Koom Txoos hais lus rau peb thiab ntuas peb uas tus Tswv xav kom peb hnov.

Koj puas tau hnov Vajtswv lub suab dhau los ntawm Nws cov tub qhe nyob hauv lub tuam rooj sab laj? Koj puas tau xav hais tias muaj ib zaj lus uas ua rau koj txais lus teb uas koj nrhiav? Nyob hauv ib phau ceev xwm txheej, tej zaum koj yuav xav sau txog lub sij hawm ntawd thiab tau pab koj li cas. Ces cia li npaj mloog tus Tswv lub suab hauv lub rooj sab laj tom ntej no los ntawm txoj kev sau tej lus nug uas koj muaj thiab kev kawm txog tej lus nug ntawd thaum koj kawm vaj lug kub. Thov Leej Txiv Saum Ntuj Ceeb Tsheej, thov kom txais lus teb thiab tswv yim hauv lub rooj sab laj. Thaum koj mloog tus Tswv cov tub qhe, cia li tsom ntsoov rau tej kev tshoov siab uas los rau koj tus kheej. Koj tau kawm dab tsi? Koj tau txais kev tshoov siab kom hloov siab li cas? Cia li sau tej kev tshoov siab no cia vim yog tus Ntsuj Plig txoj kev hais lus rau koj!

Nco ntsoov tias Leej Txiv Saum Ntuj Ceeb Tsheej hlub koj thiab yuav coj koj mus rau qhov yog. Thaum koj siv zog mloog Nws lub suab dhau los ntawm Nws cov tub qhe, koj yuav tau koob hmoov thiab txais tej lus qhia zoo.