Iren Mahsen en Presidensi Keieu, Oakos 2017
Mour en Tohnpadahk Men
Sounpar silihsek samwalahro nan Ghana, tohn sukuhl en college pwulopwul men adaneki Doe ehdin ah pidelong nan imwen kaudek en LDS. Kempoakepahn Doe me luke pwe en iang ih, oh Doe men esehla mehlel ia mwomwen Mwomwohdisoh wet.
Aramas me mihmi wasahu inenen mwahu oh serepeino ahpw medemedewe, “Soangen mwomwohdiso dahieu met?”
Doe inenen pwuriamweikihla oh koasonehdi me e pahn kalaudehla ah ese Mwomwohdisou oh towehkan, me inenen direkihla popohl. Ahpw ni en serepeino tepda wia mwo, ah peneinei oh kempoakepah kan tepda uhwong ih ansou koaros. Irail ndahki Mwomwohdisou soahng suwed kei oh wia uwen arail kak koaros en kauhdi serepeino.
Ahpw Doe alehdier ah kadehde.
Serepeino ahneki pwoson oh poakehng rongamwahuo, me audehkilahr ah mour popohl. Oh serepeino ahpw pepdaisla.
Mwuri mwo, serepeino kin onop ansou koaros oh kapakap. Serepeino kin kaisihsol oh rapahki kaweid en Ngehn Sarawi nan ah mour. Kahrehda en Doe ah kadehde oh pwoson wie kekehlailla oh loalla. Kedekede serepeino koasonehdi en wia ah misin pwehn papah Kauno.
Mwurin ah pwurasang ah misino, serepeino kin patehng oh pwoudkihla emen pwutak me kanekehlahr ah misin—mwahnakapw ohte me pepdaisi ih sounpar kei mwowe—oh ira eri katengtengpene nan Tehnpas Sarawi en Johannesburg South Africa.
Sounpar kei douehr powe sang ni en Doe Kaku eh tepin kehn popohl en rongamwahu en Sises Krais. Ni ansou pwuko, en serepeino mour sohte soanamwahu ansou koaros. Liho alehier ah pwais en mohngiong ohla oh ire kansensuwed, iangahki kapelsalehdalahn nah seri riemen—kapahtou loal sang mwekid pwukat wie katkatoutouwih ah mohngiong lel met.
Ahpw liho oh ah pwoud, Anthony, kin nannantiong ira en kin wie ehupene oh ehu ong kempoakepara Sahm Nanleng, me ira inenen poakehngk nan ara mohngiong unsek.
Rahn wet, sounpar 30 mwurin en liho ah pepdaisla, Sister Kaku apwtehn kanekehla pilehu ah misin—ahpw met e iangih ah pwoudo, me wia misin president nan Nigeria.
Irail me kin ese Sister Kaku kin nda me liho wia aramas kesempwal men. Lih kaperen men. Aramas sohte kak mihmi rehn liho ahpw sohte ahneki pepehm en peren.
Ah kadehdeo me mengei: “I ese me Sounkomouro kin wiahki me ngehi Sapwellime seri oh kempoakepah (tehk Mosiah 5:7; Ether 3:14),” liho kin nda. “Oh I kin kaskasukuhlki oh songosong wen ahi kak ien pil wia Kempoakepah—kaidehnte sang dahme I kin nda ahpw pil sang dahme I kin wia.”
Kitail Wia Tohnpadahk kei
Soai en Sister Kaku o pil duwehtesoai en mehteikan. Liho ahneki ineng en ese me mehlelo, liho ale pweinen ah men ale marain sang ngehno, liho kasalehda ah limpoak ong Koht oh aramas akan, oh ni ansouohte liho pil alehier kahpwal oh ire kansensuwed kan.
Ahpw mendahte kahpwal kan, mendahte ire kansensuwed kan, liho wenwenlahte mwowe nan pwoson. Oh me pil kesempwal, liho kolokol ah popohl. Liho diar elen eh kak kaidehnte en powehdi kahpwal en mour ahpw en pil kohkohwei sohte pweiek!
Soaiepen liho duwehte amwail oh ahi.
Kaidehn ansou koaros atail seilok pahn kin meleilei de sohte apwal.
Mie en emen emen kitail mohngiong ohla kan, sohpweida kan, oh kansensuwed kan.
Kitail kin kak mwarosala oh ekei ansou duhla nan kahpwal.
Ahpw irail kan me kin momourki mour—en tohnpadahk me pwoson oh kin wie mwekmwekid nan pwoson; me likih Koht oh kolokol Sapwellime kosonned akan;1 me kin momourki rongamwahuo rahn koaros oh awa koaros; me kin papah duwehte Krais ong mehn mperail kan, ehu wiewia mwahu ni ehu ansou—iei irail ko me arail wiewia tikitik kan kin kalap wiahda katep laud.
Irail kan me ahneki kadek laud, pil kin kalap mahkehng, oh pil ahneki sapan laud iei irail me pahn ale mahk.2 Irail kan me kin nsenohki ni limpoak, pak ehu ni ehu ansou, kin kamwkamwahuwi sampah, oh kin nannantiong momourki kapai, unsek, oh mour meleilei en tohnpadahk en Sises Krais iei irail kan me pahn diar peren ni imwio.
Irail pahn ese me “limpoak en Koht, me kipe wasa koaros nan mohngiong kan en aramas koaros … me wia mehkot me keieu kesempwal sang mehkoaros … oh me keieu kaperen ong atail mour.”3
© 2017 by Intellectual Reserve, Inc. Kolokol pwuhng koaros. Ntingdahr nan USA. Kamanaman ong lokaiahn wai: 6/17. Kamanaman ong kawehwe: 6/17. Kawehwehpen First Presidency Message, August 2017. Pohnpeian. 97928 885