Pweng sin Prestuhnsi Se Met, Ohkohs 2017
Moul luhn Mwet Tuhma Lutlut se
Yac tolngoul somlah fin acn Ghana, oasr tuhlihk fuhsr wi lutlut ke college pahngpahng Doe suc pacl se emet lal in utyak nuh ke lohm in tuhkweni se luhn LDS. Kawuck se lal Doe pa solwacl elacn weluhl, ac yohk kena lal Doe in ke etuh lah fuhkah atacn Alu uh.
Mwet we ah arulacna wo ac kuhlwacng suc el tiac kuh in te nuhnkuh kac lah, “Ma oyac kain in alu se inge?”
Doe el arulacna puhla lut kac lah el sulwaclah in lutlut yohk ke Alu uh ac mwet kac uh, suc sesseslah yohk ke engan. Tuhsruhk ke pacl se el muhtwacwacack in oruh, sucu ac mwet kawuck wo ac yohk srihpac nuh sel muhtwacwacack in ahkkolukyacl ke oacna sie ma el oruh. Eltahl fahk ma na koluk ke Alu uh ac oruh ma nuh kwewa elos kuh in oruh in ahkkolukyacl.
Tuhsruhk oasr luhlahlfongi yohk se Doe el eis.
Oasr luhlahlfongi lal, ac el luhngse wosasuc uh, suc nwacklah moul lal ke engan. Ac na, el tili nuh ke kof in pacptais.
Tohkohyang, el sifacna eisaclacng in eis etwacack ac pruhe. El lalo ac suk ke kolyuck luhn Nguhn Muhtahl ke moul lal. Oacna ke ma sikyak, luhlahlfongi ac testimoni lal Doe kapwack fokokoi ac koanongi. Sahflahiyac ah el sulwaclah tuh elacn wi kuhlwacnsap ke full-time misin nuh sin Leum.
Tukun el fohlohkoh liki misin lal, el ahkoyak ac pahyuckyak nuh sin misineri se—suc fohlohk pac tari ke misin lal suc tuh pacptaiseluhllah ke yac ekahsr met—ah ac tohkohyang eltahl oraclah sil laltahl ke Johannesburg South Africa Tempuhl.
Doe Kaku el tuhfah puhlakihn engan se ke wosasuc luhn Jisus Kraist ke yac puhkantwen somlah. Ke pacl se ingacn, moul uh tiac wo nuh sel pacl nuh kwewa. El muhtwacnglah ip lal ke inse ahsor ac kweok, weacng pac ke wacngihnlac luhn tuhlihk—luo nahtuhl mwe ahsor yohk nuh ke ma el puhlakihn inge srackna ahktoasrye insiyacl.
Tuhsruhk el ac mukul tuhmwacl, Anthony, kampare in fototo nuh sin sie ac nuh sel Pahpah sacohklacna Tuhmwaclos Inkuhsrao, suc elos luhngse ke insiyaclos nohfohn.
Mihsenge, yac 30 tukun el tili ke kof in pacptais ah, Tahmtahel Kaku el tuhfah ahksahfyelah sie pac full-time misin—lal ke pacl se inge el oasr sisken mukul tuhmwacl, suc pa misin prestuhn fin acn Nigeria.
Elos suc etwacl Tahmtahel Kaku fahk lah oasr ma wowo se kacl. El kahlwem. Upac kom in sislah pacl lom in weluhl liki na kom in puhla engan lom sifacna.
Testimoni lal arulacna kahlwem: “Nga etuh lah Mwet Lahngo el liye yuc oacna tuhlihk muhtwacn se Nahtuhl ac kawuck se Lal (liye Mosiah 5:7; Ether 3:14),” el fahk. “Ac nga lotwelah ac srihke na upac in ekihn kawuck Lal pac—tiac ke ma nga fahk muhkwena tuh ke ma nga oruh.”
Kuht pa Mwet Tuhma Lutlut
Sramsram se kacl Tahmtahel Kaku uh oacna sie nuh sin elos nuh kwewa sahyac. Oasr kena lal in etuh ke ma pwacye, el molwelah luhpah in eis kahlwem muhtahl, el ahkkahlwemye luhngse lal nuh sin God ac mwet lal, ac ke fuhfahsryucsr lal el puhtatyang nuh ke ma upac ac suhpwacr.
Tuhsruhk finne ke ma upac, finne suhpwacr, el srackna fahsr nuh met ke luhlahlfongi lal. Ac yohksripaciyac an, el srukyacna engan lal. El konwacack inkacnek se in tiac kuhtanglah ma upac ke moul lal muhkwena tuh oacyacpac kampare in lusrong kwewa!
Sramsram kacl uh tiac eklac nuh sum ac nga.
Sesaclah fuhfahsryucsr lasr uh in fwel ac wacngihn ma upac.
Oasr na inse ahsor lasr kais sie, suhpwacrlac lasr, kweok lasr.
Sahp kuht ac na nuh puhla muhnahslah pac ac ke pacl kuht toasrlah.
Tuh elos suc moulkihn moul luhn mwet tuhma lutlut se—suc tu kuh ke luhlahlfongi ac fahsr nuh met ke luhlahlfongi; suc luhlahlfongi God ac liyacacng masap Lal;1 suc moulkihn wosasuc lwen nuh ke lwen ac ao nuh ke ao; suc oruh kuhlwacnsap ke ohiyac luhn Kraist nuh sin mwet raunweloslac, elos suc oruh ohiyac wowo kais kuhtuh—na fahsr uh pa kwacna oraclah eklac na yohk ke moul lalos.
Elos suc kuhlwacng kuhtasrihk pac, nuhnakmuhnahs kuhtasrihk pac, ac puhlakihn pac pahkotwen uh pa elos ma ac fah eis pahkomuhta.2 Elos suc oruh in wo facluh se inge, kais kuhtuh na fahsr in karihngihn ac luhngse, ac suc kwacfweacng in moulkihn moul insewowo, engan, ac mihs luhn sie mwet tuhma lutlut luhn Jisus Kraist pa elos suc fah konwacack engan ke sahflahiyac uh.
Eltahl fah etuh lah “luhngse luhn God, ma sifacna maelihk nuh ke insiyacn tuhlihk nuhtin mwet … ma se inge pa luhngkihnyuck emet liki ma nuh kwewa … ac engankihnyuck yohk emet nuh ke moul uh.”3
© 2017 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/17. Ahkkweyeyucklac ke lweng: 6/17. Lwenglah luhn First Presidency Message, August 2017. Kosraean. 97928 868