Olwelah ac Olweacng luhn Pristut

Fin yohk luhpan kahlwem lasr ke orekma luhn olwelah ac olweacng luhn pristut ke moul lasr ke kuht ekihn tahmtahel uh, kuht ac eis yohk mwe insewowo ac olwelah ke pristut.

Elder M. Russel Ballard ke U luhn Mwet Sap Singucul Luo el fahk, “Elos kwewa ma olwelah nuh sin Leum ac suc liyacacng olwelah ingacn fah kuh in eis ma lukmac la sifacna, in fah ahkinsewowoyeyuck ke lutiyuck luhn lihpufacn uh, in sramsram yurin God, in ipeis ke fohnlah luhn wosasuc, ac, yohk liki nuh kwewa, in fah mwet usrui wi Jisus Kraist ke ma nuh kwewa luhn Pahpah tuhmasr.”¹

Mwe insewowo ac olwelah nuh ke olwelah ac olweacng luhn pristut ma nuh sin kwewana mukul ac muhtwacn uh. Tahmtahel Sheri L. Dew, mahn mwet kahsruh ke Rilif Sosaiti Prestuhnsi, el fahk, “Fohnlah luhn pristut ma nwacnwack akwuck fuhlwact emet ke lohm sin Leum kuh in eisyuck muhkwena sin mukul ac muhtwacn fin eltahl tuhkweni.”²

Tahmtahel Linda K. Burton, Prestuhn Luhlahp luhn Rilif Sosaiti, el tahfwelah pahng se inge, “Nga suli kowos in esamyac olwelah ac olweacng luhn pristut, suc ma kuh in konweyuckyak ke Doctrine and Covenants 84:33–44. Ke kom oruh uh, Nga olwelah nuh suwos lah Nguhn Muhtahl ac ahkyohkyelihk kahlwem lom ke pristut ac mokle ac sruhk kom ke inkacnek wowo pucspucs.”³

Kahs in kol lal Joseph Smith nuh sin Rilif Sosaiti ma oruh in ahkoelah muhtwacn uh in “tuhkuh in eis pacl wowo & mwe insewowo & mwe sang luhn pristut.” Ma se inge kuh in ahksahfyeyucklac ke akwuck luhn tempuhl uh.

“Akwuck luhn tempuhl [pa] akwuck luhn pristut, tuhsruhk elos [pa] tiac sang ohfohs fuhlwact muhtahl nuh sin mukul ac muhtwacn uh. [Akwuck inge ahkpwacyeye] olwelah luhn Leum lah mwet lal—muhtwacn ac mukul uh—ac fah eis mwe sang muhtahl ke kuh sin acn fuhlwactlacna’ [D&C 38:32].”⁴