Mwet Suwohs Fah Moul ke Luhlahlfongi

Oasr sramsram mahtuh se luhn Mwet Jew ke mwet orek sop se suc tiac luhlahlfongi ke God. Sie lwen ah ke el fahsr wi sie mwet luti, el fahk, “Oasr sie ma nga tiac kahlwem kac. Oasr alu ke tausin yac. Tuhsruhk acn nuh kwewa kom ngwet nuh we oasr ma koluk, fohkfohk, kuhtasrihk, sesuwohs, ngal, masrinsrwacl, ac ma upac. Ma kahlwem uh pa alu uh tiacna ahkwoyelah facluh. Na pa nga siyuck sum, mwe wo kac uh?”

Mwet luti sac tiac tohpohkohl tuhsruhk tahfwelah na in wi mwet orek sop sac fahsr. Tiac paht eltahl sun nien sritacl se suc ma tuhlihk srihsrihk, suc srwacsralah ke fohkfohk, elos sritacl ke fohkfohk ah.

“Oasr ma se nga tiac kahlwem kac,” mwet luti sac fahk. “Ngwetlah liye tuhlihk ngi. Oasr sop yohrohsr ke yac tausin, a tuhlihk ngi fohkfohk. Mwe meac sop uh?”

Mwet orek sop sac topuk, “Mwet luti, tiac fal in uliyac sop uh ke fohkfohk luhn tuhlihk inge. Sop uh enenuh in orekmakihnyuck in muh kuh in oraclah srihpac la an.”

Mwet luti sac isracsr ac fahk, “Ma na pwacye se.”

Mwet Sap Paul, el kalweni sie fahk luhn mwet pahluh ke Wuhlweacng Mahtuh, ahkfototoyelah lah meac kalmac in sie mwet luhlahlfongi ke el suhmuhslah, “El su aksuwosyeyuk ye mutun God ke lulalfongi fah moul.” (Rome 1:17).

Sahp ke sap fihsrwacsr se inge kuht kahlwem ke siena inmahsrlon sie alu ma muhnahs ac tiac kuh in ekuhllah ma uh ac sie alu ma oasr kuh la in ekuhllah moul uh.

Tuh in kahlwem ke kalmeyacn moulkihn luhlahlfongi, kuht enenuh in kahlwem kac lah meac luhlahlfongi.

Luhlahlfongi el yohk likina luhlahlfongi. El luhlahlfongi fas se in God suc ma weacng orekma.

El yohk likina kena uh.

Yohk likina kuht in muhta na, srihmsrihm, ac fahk muh kuht insese. Ke kuht fahk, “el su aksuwosyeyuk ye mutun God ke lulalfongi fa moul,” kalmac pa kuht kolyuck ac sapkihnyuck ke luhlahlfongi lasr. Kuhtorekma ke sie ohiyac ma ac fal nuh ke luhlahlfongi lasr—tiac mwe na ahkos tuhsruhk ke srihpen luhlahlfongi ac luhngse pwacye nuh sin God lasr ac ke lahlmwetmwet sacohk ma El ahkkahlwemye nuh sin tuhlihk Nahtuhl.

Luhlahlfongi ac orekma enenuh in tuhkweni fahsr; fin tiac luhlahlfongi sac misac (liye James 2:17). Tiac luhlahlfongi pa inge. Wacngihn kuh la in ekuhllah sie fanna mwet, a faskah facluh.

Mukul ac muhtwacn ma oasr ke luhlahlfongi uh luhlahlfongi ke Pahpah pahkotwen tuhmwaclos Inkuhsrao—finne ke pacl ahlohloh, finne ke pacl tahfuh luo ac pacl upac ke elos ac tiac arlac liye ma uh kuh tiac kahlwem kac uh.

Mukul ac muhtwacn ma luhlahlfongi uh insacnweacng in fahsr ke inkacnek luhn etahwi ac kwacfweacng in ukwe srihkasrak luhn Mwet Lahngo lalos, Jisus Kraist. Luhlahlfongi uh mokle ac, pwacyena, kol kuht in furok insiyacsr nuh inkuhsrao ac saplaklac, tahpuhk, ac ahkinsewowoye mwet wiyacsr.

Alu ma wacngihn orekma kac uh el oacna sop ma oanna ke pohk la an. Yohk ma el kuh in oraclah, tuh pwacyeiyac ah srihklac kuh la in oruh ma uh in eklac nekena el oraclah srihpac pwacye la an. Wosasuc fohlohkihnyuckyak luhn Jisus Kraist pa sie wosasuc ke mukwikwi. Alu luhn Jisus Kraist luti alu pwacye oacna sie pweng luhn finsrak, luhlahlfongi, ac luhngse, wi kahsruh mwet sahyac ke moul in nguhn ac mahno lalos.

Kuhtuh mahlwem somlah ah, muhtwacn kiyuck, Harriet, ac nga tuh oruh muhtwacta in sucu lasr wi kuhtuh sin tuhlihk nahtuhsr fin acn Mediterranean ac. Kuht muhtwacta nuh ke kuhtuh kacm sin mwet kahingkihn mweun ac ohsun nuh sin sucu ma tuhkuh ke acn kuhnanuclac ke mweun uh. Mwet inge tiac ma ke luhlahlfongi se lasr inge, tuhsruhk elos tamuhlwel ac tahmtahel wiyacsr ac elos enenuh kahsruh ke pacl na sa. Insiyacsr lihksreni na moklweyuckyak ke kuht puhlakihn luhlahlfongi fokoko luhn mempucr wiyacsr ke Alu uh ke elos use kahsruh, taptap, ac finsrak nuh sin mwet wiyacsr ma enenuh kahsruh uh, finne elos ma ke siena alu, muhtuhnfacl, kuh lutlut.

Luhlahlfongi ma kuhpahsryang nuh ke orekma uh el nwacklah insiyac uh ke kuhlwacng, nuhnak uh ke lahlmwetmwet ac kahlwem, ac nguhna uh ke mihslac ac luhngse.

Luhlahlfongi lasr uh kuh in ahkinsewowoye ac ahksuwohsyelah kwewana mwet raunikuhtlac ac kuht.

Luhlahlfongi lasr uh kuh in koanwelah facluh ke ma wo ac mihslac.

Luhlahlfongi lasr uh kuh in ekuhllah srahngwesroa nuh ke luhngse ac mwet lokoalok nuh ke kawuck.

Mwet suwohs, emet ah, ke moulkihn luhlahlfongi; elos moul ke luhlahlfongi ke God ac fahsr ke inkacnek Lal.

Ac pa ingacn kain in luhlahlfongi ma kuh in ekuhllah kais sie mwet, sucu, muhtuhnfacl, ac facluh uh.