Ol Stretpela Lain Bai Stap wantaim Feit

Igat wanpela olpela stori bilong ol Ju long wanpela man i save mekim sop husat i no bilip long God. Wanpela dei taim em i wok long wokabaut wantaim wanpela tisa bilong lotu, ol i save kolim rebai, em i tok, “Igat wanpela samting we mi save i no save long en. Yumi bin gat lotu long planti tausen yia pinis nau. Tasol long olgeta hap yumi lukluk i gat planti samting nogut, korapsen, pasin bilong giaman, pasin i no stret, pen, hangre, na pasin pait. Em i luk olsem lotu i no mekim gutpela tru insait long wol. Olsem na mi askim yu, wanem samting i gutplea long lotu?”

Rebai i no givim ansa long sampela liklik taim tasol wok long wokabaut yet wantaim dispela man. Sampela taim bihain ol i kamap long wanpela plei graun we ol pikinini, wok long pilai long graun, na karamapim ol yet long das.

“Igat wanpela samting we mi i no save long en,” dispela rebai i tok. “Lukim ol dispela pikinini. Yumi bin gat sop pinis long planti tausen yia, tasol ol dispela pikinini ol i doti yet. Sop em i gutpela olsem wanem?”

Man husat i save mekim sop i bekim tok na i tok, “Tasol rebai, em i no stret long putim dispela asua olsem ol dispela pikinini i doti long sop . Yumi i mas yusim sop bipo long em i ken mekim kamap as samting bilong en.”

Dispela Rebai i smail na tok, “Em stret.”

Aposol Paul, taim em i makim maus bilong wanpela profet bilong Olpela Testamen, i sotim tok long wanem samting em i minim long kamap manmeri bilong bilip taim em i rait olsem, “Ol stretpela lain bai stap wantaim feit” (Romans 1:17).

Ating long dispela simpol toktok yumi bai save long samting we i no wankain namel long lotu we i nogat strong bilong em na wanem samting i gat pawa long senisim ol laip.

Tasol long save long wanem samting em i min long stap wantaim feit, yumi mas save pastaim long wanem samting stret em feit.

Feit em i moa long bilip. Em i taim yumi pinisim olgeta tras bilong yumi long God na bungim wantaim mekim samting i kamap.

Em i moa long laik tasol.

Em i moa long yumi sindaun tasol, daunim het bilong yumi, na tok olsem yumi wanbel. Taim yumi tok olsem “ol stretpela lain bai stap wantaim feit,” yumi min olsem feit bilong yumi bai soim yumi long we long go. Yumi mekim long pasin we, em i no save senis na em i kamap wankain olgeta taim, wantaim feit bilong yumi—i no long pasin bilong harim tok nating tasol long pasin bilong yumi pilim olsem yumi save stret na yumi gat trupela lav long God bilong yumi na long gutpela save we i nogat prais bilong em we Em i soim i kam long ol pikinini bilong Em.

Feit i mas kam wantaim wok; sapos nogat em i bai nogat laip (lukim James 2:17). Em i no feit tru. Em i nogat pawa long senisim wanpela man or meri, na bai nogat pawa stret long senisim dispela wol.

Olgeta man na meri husat i gat feit ol i putim tras long Papa bilong ol long Heven husat i gat marimari—long taim tu we ol samting i no klia tumas, long taim tu we ol i tubel na kros pait i kamap na ol i no nap long lukluk klia o ol i no nap long save gut.

Ol man na meri husat i gat feit i save wokabaut wantaim wanbel dispela rot olsem ol disaipol na wok hat long bihainim eksampol bilong Sevia bilong ol we ol i lavim tumas, Jisas Krais. Feit i save strongim yumi, na, tru, em i litimapim tingting bilong yumi long tanim ol lewa na bel bilong yumi i go long heven na wok stret long putim han i go aut, na litimapim na blesim ol brata na susa bilong yumi.

Lotu wantaim nogat wok bilong em i olsem sop we i stap insait long boks. Em i ken naispela promis bilong en, tasol long trupela piksa bilong en, em i gat liklik pawa long mekim kamap wanpela senis inap em i mekim kamap as bilong dispela samting we em i stap long en long nambawan taim. Dispela gospel bilong Jisas Krais we i nau kambek em i gospel bilong wok. Dispela Sios bilong Jisas Krais i save tisim trupela lotu olsem wanpela tokaut bilong hop, feit, na siariti, wantaim pasin bilong halivim ol narapela long wei bilong spirit na wei bilong bodi.

Sampela mun i go pinis, meri bilong mi, Harriet, na mi bin go long wanpela femili trip wantaim ol sampela pikinini bilong mipela long wanpela eria o hap long Yurop ol i kolim Mediterania. Mipela i visitim sampela refugi kemp na mit wantaim ol femili i kam long ol kantri we ol wok long pait. Ol dispela pipol ol i no bilong feit bilong yumi, tasol ol tu ol brata na susa bilong yumi na ol i nidim halivim kwiktaim. Taim mipela bin lukim long ai bilong mipela yet hau dispela feit bilong ol sios memba bilong sios bilong yumi wok long wok, long bringim halivim, bel isi, na hop long ol brata na susa we i stap long hevi, maski long wanem lotu bilong ol, wanem kantri bilong ol, o wanem skul bilong ol; mipela bin kisim gutpela filing long lewa na bel bilong mipela we i sutim stret mipela.

Feit pasim wantaim wok we em i no save senis na em i kamap wankain olgeta taim, bai pulumapim lewa na bel wantaim pasin bilong mekim gut long wanpela narapela, tingting wantaim gutpela save na save bilong wanwan, na sol wantaim pis na lav.

Feit bilong yumi ken blesim yumi na ol narapela lain na ken tanim tingting bilong yumi yet na ol narapela lain long raitpela wei.

Feit bilong yumi ken pulumapim dispela wol wantaim samting bilong gutpela pasin na pis.

Feit bilong yumi ken senisim bel nogut tru i go long lav na ol birua kamap ol poroman.

Bihain nau, ol stretpela lain, stap wantaim wok insait long feit; ol stap wantaim tras long God na wokabaut long wei bilong Em.

Na dispela em dispela kain feit we ken senisim ol wanwan manmeri, femili, neisen, na dispela wol.