“Oana Ke Nga Lungse Kowos”

Kuhtuh yac somlah ah sie kawuck inel pa Louis el sruhmuhn nuh sihk sie sramsram ke ninac wowo, kuhlwacng se kiyacl ah. Ke el misac ah, wacngihn mwe kahsruhp luhn mani el fihliyac nuh sin tuhlihk mukul ac muhtwacn nahtuhl an sahyacn usru ke mwe kahsruhp ke srihkasrak, ke kihsackuhnlah, ke ahkostwen.

Tukun sramsram kacl ke mas ah sruhmuhnyuck tari ac fahsr loeloes suhpwacr nuh ke kuclyuck ah oreklac, sucu mahtuhyak sacn aforwacni nuh ke kihtin ma luhn ninac sacn fihliyac ah. Inmahsrlolos, Louis el sokwack pwepuh se ac ki se. Pwepuh sac fahk: “Ke insroasrihk ke infuckihl ac, ke kapuht se e ten ke pohk in nuknuk se luhk ah, pa sie pohk srihsrihk. Nein mwe kahsruhp ke insiyuck. Ki se inge fah ikucslah pohk sacn.”

Elos nohfohn nuhnkuh lah meac na yohk srihpac ninac kiyaclos ah fihliyac in lak ac ki uh.

Pohk sac itucklac liki acn oan we ah ac kahkahsrihk ikacklah ke kahsruh luhn ki sac. Ke Louis ac mwet sahyac ah liye koanon pohk sac, elos sokwack kais sie petsac ke kais sie tuhlihk, wi inen tuhlihk ac lwen elos isuslac ah. Na Louis el ollah sie valentine ma oreklac sifacna lohm ah. Ke muhtuhnpo, fihsrwacsr luhn tuhlihk, ma el akihlen muh ma lal sifacna, el riti kahs el tuh suhmuhslah yac 60 met ah: “Pain kom Ninac, Nga luhngse kom.”

Insiyac uh luhngse, puhsra uh kahkahsrihk, ac muhta uh luhluhyak. Mwe kahsruhp luhn ninac sac pa sucu ma pahtpaht lal uh. Kuh kac uh fihliyucki fin pwelucng fokoko ke “Nga luhngse kom.”

Ke facluh mihsenge, wacngihn acn sahyacn pwelucng fokoko ke luhngse sacn enenweyuck yohk likina lohm ah. Ac wacngihn acn sahyac facluh kuh in sukokyak srihkasrak wowo ke pwelucng sacn likina in lohm sin Mwet Luhlahlfongi ke Lwen-sahflah suc oraclah luhngse in yohk srihpac ke moul in sucu lalos.

Nuh sesr suc fahkwack in mwet tuhma lutlut luhn Mwet Lahngo Jisus Kraist, El sang kolyuck yohk inge:

“Inge nga sot nu suwos sie ma sap sasu: kowos in lungse sie sin sie. Oana ke nga lungse kowos, kowos in oayapa lungse sie sin sie.

“Kowos fin lungse sie sin sie, na mwet nu kewa ac fah etu lah kowos mwet tumuk lutlut.”¹

Kuht fin kena in liyacng masap in luhngse sie sin sie, kuht enenuh in ahksro sie sin sie ke luhngse ac ahkfuhlwact, ahkkahlwemye luhngse lasr nuh sin sie sin sie lwen nuh kwewa. Luhngse uh sang sie kahs kuhlwacng, sie top mongfihsrwacsr, sie mukwikwi wo, sie insroac kahlwem, sie inse nuhnak muhnahs. Ke mukwikwi nuh kwewa lasr, pa inge ohiyac ma kuh in kahsruh mwet sahyac in liye luhngse luhn insiyacsr.

Prestuhn Gordon B. Hinckley (1910–2008) el tuh akihlen: “Luhngse … pa tuhp in kol se ke sahflahiyacn lwelahkweng uh. Tuhsruhk el yohk likina sahflahiyacn lwelahkweng uh. Luhngse el oasr ke muhtwacwacyac ah pac, ac kac pa tuhkuh luhn kahto ma ananlah lucng ke sie lwen pahkah. Luhngse pa karihngihnyen ma tuhlihk uh tuhngi, kena luhn mwet fuhsr, ma ma oracni pahyuck uh, ac ma oruh in wacngihn fohs yohk in lohm uh; pa mihslac ke matwac mahtuh, kahlwem luhn finsrak tohlwack misac. Mwet ingacn arulacna kahsruhp ke wi lalos yurin sucu, kawuck, alu, ac mwet atuhlani uh.”²

Luhngse pa ma pwacye ke wosasuc uh, ohiyac fuhlwact ke nguhnin mwet uh. Luhngse pa ono nuh ke kweok luhn sucu, mura ma puhla koluk, ac muhtuhnfacl mas. Luhngse pa sie isrwacsr, sie pounset, sie fahk kuhlwacng, ac wo. Luhngse pa kihsac, kuhlwacnsap, ac etatwen.

Mukul tuhma, luhngse muhtwacn kiyowos an. Oruh nuh selos ahkfuhlwact ac ke srui. Tahmtahel, luhngse mukul tomowos. Oruh nuh selos suhnak ac ahkkweye.

Pahpah ninac, luhngse tuhlihk nuhtuwos. Pruhe kaclos, lotwelos, ac fahkwack luhlahlfongi nuh selos. Tuhlihk, luhngse pahpah ninac kiowos an. Ahkkahlwemye nuh selos suhnak, tarilacna, ac ahkostwen.

Sahyacn luhngse nwacsnwacs luhn Kraist, Mormon el fahk, “[kuht] tiac acwac.”³ Mwe pruhe luhk tuh kuht in ukwe kahs in kahsruh lal Mormon in “pruhe nuh sin Pahpah ke kuhiyacn insiyowos nohfohn, tuh [kuht] in kuh in sesseslah ke luhngse se inge, ma El sang nuh selos nuhkwewa suc fahsr na pwacye tukun Wen nahtuhl, Jisus Kraist; tuh [kuht] in kuh in wen nuhtin God; tuh ke Elac fah sikme kuht fah oacna El.”⁴