Kev Cia Siab rau Tsev Neeg txoj Kev Hlub Mus Ib Txhis

Los ntawm tag nrho cov txiaj ntsim uas peb Leej Txiv Saum Ntuj Ceeb Tsheej tau pub rau Nws cov me nyuam, lub txiaj ntsim zoo tshaj plaws yog txoj sia nyob mus ib txhis (saib Q&K 14:7). Lub txiaj ntsim ntawd yog qhov uas peb tsev neeg yuav nrog Vajtswv Leej Txiv thiab Nws Leej Tub nyob ua ke tas mus li. Tsuas yog nyob hauv Vajtswv lub nceeg vaj siab tshaj plaws, lub xilethi-aus, peb tsev neeg uas sib hlub thiaj yuav nyob ua ke mus ntxiv.

Peb txhua tus cia siab tias yuav muaj kev xyiv fab nyob nrog peb tsev neeg uas sib hlub. Rau peb ib txhia, yog ib qho uas peb tsis tau paub—ib qho uas peb paub tias peb muaj tau tiam sis tseem tsis tau muaj. Tej zaum peb twb pom qhov no nyob hauv lwm tus lub neej. Rau peb ib txhia, peb yeej muaj thiab saib tsev neeg txoj kev sib hlub rau nqi thaum kev tuag ua rau peb nyob nrug ib tug me nyuam, ib tug niam tsev, txiv tsev, kwv tij, muam, los yog ib tug pog yawg los sis niam tais yawm txiv uas peb hlub heev.

Peb txhua tus yeej muaj kev cia siab hais tias muaj ib hnub peb yuav rov qab hnov tau kev sov siab so los ntawm tus uas peb hlub heev hauv peb tsev neeg thiab tam sim no peb xav xav puag nws dua.

Peb Leej Txiv Saum Ntuj Ceeb Tsheej uas hlub peb paub peb lub siab. Nws lub hom phiaj yog kom peb muaj kev zoo siab (saib 2 Nifais 2:25). Nws thiaj li xa Nws Leej Tub los kom yuav muaj kev xyiv fab los ntawm tsev neeg uas nyob tau ua ke tas mus li. Vim tus Cawm Seej tu cov hlua ntawm kev tuag, peb yuav sawv rov los. Vim Nws theej peb lub txhoj, dhau los ntawm peb txoj kev ntseeg thiab kev hloov siab lees txim, peb muaj peev xwm rais los ua neeg tsim nyog txais lub nceeg vaj xilethi-aus, qhov chaw uas tsev neeg nyob ua ke sib hlub mus ib txhis.

Tus Cawm Seej xa tus Yaj Saub Eliyas rau Yauxej Xamiv kom muab cov yuam sij pov thawj hwj txum tim rov qab los (saib Q&K 110). Nrog rau cov yuam sij ntawd muaj lub hwj chim ua kev cai sib khi, qhov uas yog Vajtswv lub txiaj ntsim zoo tshaj plaws rau Nws cov me nyuam—txoj sia nyob mus ib txhis nrog tsev neeg uas sib khi ua ke tas mus li.

Yog ib qho uas Vajtswv txhua tus me nyuam uas los nyob rau hauv lub ntiaj teb no txais tau. Ib feem peb ntawm Nws cov me nyuam ntsuj plig xyeej Nws lub txiaj ntsim nyob hauv lub ntuj ntsuj plig. Vim lawv tsis muaj kev ntseeg txaus thiab lawv ntxeev siab hlo, lawv xaiv kom tsis txais kev xyiv fab uas los ntawm Leej Txiv Saum Ntuj Ceeb Tsheej lub txiaj ntsim kom muaj tsev neeg nyob mus ib txhis.

Hais txog peb cov uas ua raws li kev sim siab ntawd nyob hauv lub ntuj ntsuj plig ua ntej lub neej no peb thiaj tsim nyog txais tau lub txiaj ntsim cev nqaij daim tawv, peb tseem xaiv tau muaj txoj sia nyob mus ib txhis. Yog peb txais koob hmoov nrhiav tau txoj moo zoo uas tau muab txum tim rov qab los, peb muaj cai xaiv ua raws li tej kev khi lus nrog Vajtswv uas ua rau peb tsim nyog txais tau txoj sia nyob mus ib txhis. Thaum peb muaj siab ntseeg nyiaj mus tom ntej, tus Vaj Ntsuj Plig Dawb Huv yuav pom zoo rau peb txoj kev cia siab thiab kev tso siab hais tias peb taug txoj kev mus rau txoj sia nyob mus ib txhis, kom nyob ua ke nrog peb tsev neeg tas mus li nyob hauv lub nceeg vaj xilethi-aus.

Ib txhia yuav xav tias, kev xyiv fab nyob mus ib txhis yog kev cia siab me me los yog kev cia siab uas tab tom ploj mus. Tej zaum cov niam tsev txiv tsev, cov me nyuam, cov kwv tij nus muag tau xaiv tej yam uas ua rau lawv tsis tsim nyog txais tau txoj sia nyob mus ib txhis. Tej zaum nej xav paub seb nej puas tau rais los ua neeg tsim nyog dhau los ntawm Yexus Khetos txoj Kev Theej Txhoj.

Muaj ib zaug Vajtswv ib tug yaj saub hais lus qhuab qhia rau kuv uas ua rau kuv nyob kaj siab lug. Kuv txhawj hais tias tej yam uas lwm tus xaiv ua yuav ua rau peb tsev neeg nyob tsis tau ua ke tas mus li. Nws hais tias, “Koj txhawj txog qhov teeb meem tsis yog. Koj yuav tsum ua neej tsim nyog txais lub nceeg vaj xilethi-aus, koj thiaj yuav muaj ib tsev neeg uas zoo tshaj qhov koj xav.”

Hais rau tag nrho cov uas lawv txoj kev sib yuav los sis cov me nyuam—los yog qhov uas lawv tsis muaj—ua rau lawv tsis cia siab, kuv ua tim khawv hais tias: Leej Txiv Saum Ntuj Ceeb Tsheej paub thiab hlub nej vim nej yog Nws cov me nyuam ntsuj plig. Thaum nej nrog Nws thiab Nws Leej Tub nyob ua ntej lub neej no, Nkawd tau muab kev cia siab tias yuav muaj txoj sia nyob mus ib txhis tso rau hauv nej lub siab. Nrog rau lub hwj chim ntawm Yexus Khetos txoj Kev Theej Txhoj thiab tus Vaj Ntsuj Plig Dawb Huv txoj kev coj, tam sim no thiab nyob hauv lub neej tom ntej nej yuav muaj kev hlub hauv nej tsev neeg uas Leej Txiv thiab Nws Leej Tub xav kom nej txais tau.

Kuv ua tim khawv tias thaum nej ua neej tsim nyog txais lub nceeg vaj xilethi-aus, ces yuav muaj raws li qhov uas tus yaj saub cog lus tias “[nej] thiaj yuav muaj ib tsev neeg uas zoo tshaj qhov [nej] xav.”