Qhia txog Kev Zoo Siab Mus Ib Txhis

Ib qho zoo tshaj plaws hauv txoj moo zoo yog qhov uas peb paub txog txoj kev cawm seej. Peb muaj cib fim zoo nrog peb tsev neeg nyob ua ke mus ib txhis. Qhov uas peb paub li ntawd ua rau peb muaj kev cia siab thaum peb xav tias lub ntiaj teb kov yeej peb. Thawj Tswj Hwm Eyring qhia tias, “Peb Leej Txiv Saum Ntuj Ceeb Tsheej uas hlub peb paub peb lub siab. Nws lub hom phiaj yog kom peb muaj kev zoo siab (saib 2 Nifais 2:25). Nws thiaj li xa Nws Leej Tub los kom yuav muaj kev xyiv fab los ntawm tsev neeg uas nyob tau ua ke tas mus li. … Yog ib qho uas Vajtswv txhua tus me nyuam uas los nyob rau hauv lub ntiaj teb no txais tau.”

Peb cov uas muaj txoj sia nyob tam sim no muaj cov koob hmoov no thiab cov uas twb tas sim neej lawm kuj muaj—tsuas yog peb pab lawv xwb. Peb cov poj koob yawm txwv nyob hauv lub ntuj ntsuj plig tam sim no, tos peb npaj lawv tej npe mus sawv lawv cev ua cov kab ke hauv lub tuam tsev. Tiam sis tej lub sij hawm tseem nyuaj ua hauj lwm rau lawv. Tej zaum peb muaj num ntau dhau, los yog peb nyob deb ntawm ib lub tuam tsev thiaj mus tsis tau ntau zaus.

Tiam sis zoo siab uas muaj lwm yam peb pab tau peb cov poj koob yawm txwv, xws li kev ua tsev neeg zaj keeb kwm, txheeb xyuas lub npe, zov me nyuam pab peb niam peb txiv thaum lawv mus rau lub tuam tsev. Thaum peb pab li no, peb ua hauj lwm rau tus Tswv thiab ua rau cov uas tau tam sim neej no muaj kev cia siab tias lawv tsev neeg yuav nyob mus ib txhis.