Cov Mus Saib Xyuas Tom Tsev tsab Xov, Yim Hli Ntuj 2016
Kev Txhawb Nqa Tsev Neeg Ua Ke
Ua tib zoo thov Vajtswv kawm tej yam no thiab nug seb koj yuav tsum qhia dab tsi. Qhov uas koj to taub “Tsev Neeg: Ib zaj Lus Tshaj Tawm rau lub Ntiaj Teb” yuav ua li cas kom koj txoj kev ntseeg Vajtswv loj zuj zus thiab foom koob hmoov rau cov uas koj mus saib xyuas tom tsev? Kom tau ntaub ntawv xov xwm ntxiv, cia li txuas rau reliefsociety.lds.org.
Kev Ntseeg, Tsev Neeg, Kev Pab
“Ob niam txiv twg muaj ib txoj kev lav ris tseem ceeb kom ib tug hlub thiab saib xyuas ib tug thiab kom hlub thiab saib xyuas nkawd cov me nyuam.”1 Thawj Tswj Hwm Russell M. Nelson, Thawj Tswj Hwm ntawm Pawg Kaum Ob tug Thwj Tim hais tias, “Tsev neeg yog qhov chaw uas Vajtswv ua kom kev hlub thiab kev sib pab loj hlob tuaj.
Peb Leej Txiv Saum Ntuj Ceeb Tsheej xav kom cov txiv tsev thiab niam tsev ua zoo ib leeg rau ib leeg thiab saib pab lawv cov me nyuam zoo li tus Tswv tau pub lawv muaj caj ceg.”2
Nyob hauv Phau Ntawv Maumoos, Yakhauj hais tias kev hlub uas cov txiv tsev muaj rau lawv cov poj niam, kev hlub uas cov poj niam muaj rau lawv cov txiv tsev, thiab kev hlub uas lawv muaj rau lawv cov me nyuam yog ib qho uas qhia vim li cas cov Neeg Lamas ncaj ncees dua li cov Neeg Nifais (saib Yakhauj 3:7).
Ib qho zoo heev kom muaj kev hlub thiab kev sib haum xeeb nyob hauv peb tsev yog kev hais lus zoo rau peb tsev neeg. Kev hais lus zoo yuav coj tus Vaj Ntsuj Plig Dawb Huv los. Muam Linda K. Burton, Koom Haum Niam Tsev tus tuam thawj tswj hwm, hais kom peb xav txog qhov no hais tias: “Muaj pes tsawg zaus uas peb txhob txwm ‘hais lus zoo ib leeg rau ib leeg’?”3
Vaj Lug Kub Ntxiv
Loos 12:10; Mauxiyas 4:15; Lus Qhuab Qhia thiab Kev Khi Lus 25:5
Zaj Dab Neeg uas Muaj Sia
Txwj Laug D. Todd Christofferson ntawm Pawg Kaum Ob tug Thwj Tim qhia txog ib lub sij hawm thaum nws yog ib tug me nyuam uas tshoov nws lub siab qhia nws tias ib tsev neeg uas sib hlub tseem ceeb npaum li cas. Thaum nws thiab nws cov kwv tij yog me nyuam tub xwb, lawv niam raug phais mob cancer uas ua rau nws mob heev thaum nws siv nws sab tes xis. Vim muaj cov tub xwb, nws yuav tsum liv khaub ncaws ntau, tiam sis thaum nws niam liv khaub ncaws, nws pheej nres thiab mus rau hauv chav pw quaj mus txog thaum qhov mob ntawd ntaug zuj zus.
Thaum Txwj Laug Christofferson txiv paub li ntawd, nws ua twj ywm tsis noj su tas ib xyoos thiaj muaj nyiaj txaus yuav ib lub tshuab uas ua yooj yim lim khaub ncaws. Vim nws hlub nws tus poj niam, nws ua yam ntxwv txog kev txhawb nqa nws tsev neeg rau nws cov tub saib. Hais txog qhov zoo no, Txwj Laug Christofferson hais tias, “Kuv tsis tau paub txog kuv txiv txoj kev txi thiab kev hlub kuv niam thaum lub sij hawm ntawd, tiam sis vim kuv paub lawm, kuv hais rau kuv tus kheej hais tias, ‘Nws yeej yog ib tug txiv neej tiag tiag.’”4
© 2016 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/16. Pub txhais ua lus Hmoob: 6/16. Kev txhais Visiting Teaching Message, August 2016. Hmong. 12868 295
Xav Txog Qhov No
Qhov uas peb ib leeg hlub thiab saib xyuas ib leeg ua cas ho caw tau tus Ntsuj Plig tuaj rau hauv peb tsev?