Ol Femili Inap Stap Wantaim Ol Taim Ol Taim

Prishud pawa long bungim femili wantaim ol taim ol taim emi wanpela bikpela presen isave kam long God. Olgeta manmeri husait save long plen bilong hamamas igat laik long kisim dispela blesing. Insait tasol long ol seremoni blong pasim yumi wantaim we isave kamap insait long ol temple long Sios bilong Jisas Krais long Lata-dei Sen God save mekim tok promis long bungim femili wantaim ol taim ol taim

Prishud ki long mekim dispela samting ikamap ibin kam bek long graun taim propet Elijah ibin givim long Joseph Smith insait long temple long Kirtland. Ol propet insait long Sios bilong Jisas Krais long Lata-dei Sen ibin givim dispela ki bilong prishud long taim bipo ikam inap nau.

Seivia insait long ministri bilong Em taim Emi stap graun ibin toktok long pawa bilong silim ol femili wantaim Peter, nambawan wokman bilong Em, “Mi tok, wanem samting yu pasim long graun bai pas long heven; na wanem samting isave lus long graun bai lus long heven” (Matthew 18:18).

Insait long selestil kingdom tasol bai yumi ken stap wantaim femili ol taim ol taim Long hia bai yumi ken stap wantaim Papa God na Seivia, Propet Joseph Smith itok insait long Doctrine na Covenans olsem igat gutpela pasin hamamas istap.

“Taim Seivia kamap bai yumi lukim em olsem em istap nau. Bai yumi lukim emi man olsem yumi.

“Na wantaim dispela gutpela kain hamamas we em isave stap nau long graun bai stap wantaim yumi long heven tasol dispela kain hamamas bai kamap moa yet we yumi no save kisim nau” (D&C 130:1–2).

Dispela skripsa itok olsem bai yumi ken mekim dispela gutpela pasin insait long femili bilong yumi yet nau. Yumi ken soim olsem yumi laikim tumas ol femili blong yumi, husait istap laif na ol husait idai pinis, na yumi ken mekim wok bilong ol long kisim ol prishud ordinens long pasim yumi olgeta long heven.

Planti bilong yupela, yangpela na lapun, iwok long mekim dispela. Yu bin painim nem bilong ol tumbuna husait ino kisim dispela ordinens long silim yupela wantaim.

Planti bilong yupela igat femili husait ino bin sil yet wantaim ol femili ananit long prishud pawa. Planti igat femili istap laif yet husait ibin kisim prishud ordinens tasol ol ino save holim pas ol kovanans ol mekim wantaim Papa God. God ibai blesim yu na wantaim feit bilong yu bai yu inap halivim ol dispela femili. Yu igat promis ikam long God olsem disaipol blong em taim yu kisim ol lain ikambek long em.

“Na husait bai lukim yu, mi tu bai stap, bikos mi bai stap long poret bilong yu. Bai mi stap long rait sait bilong yu na Spirit bilong mi bai stap insait long lewa bilong yu, na ol angel bilong me bai raunim yu na holim yu” (D&C 84:88).

Olgeta dei mi save lukluk igo aut long opis windo bilong mi na mi save lukim ol manmeri i marit na kisim piksa long arere long ol naispela flawa na wara faunten. Sampela taim wanpela blong ol dispela man save karim niupela meri bilong em long liklik hap taim narapela man kisim piksa long marit bilong tupela. Olgeta taim mi save lukim dispela, mi save tingim sampela marit lain we mi save long ol, husat we liklik taim bihain long marit blong ol, tupela ibin halivim tupela yet taim laif ikamap hat. Ol wok iken pinis. Sampela pikinini iken gat hevi taim mama ikarim ol. Sik iken kam. Na sampela taim, pasin yumi save mekim long ol narapela olsem bai yumi laikim ol mekim long yumi, taim em isi, bai mekim yumi kamap gutpela lain na holim gutpela pasin we yumi no save luk save bipo olsem yumi igat.

Yumi mas mekim gutpela pasin wantaim femili bilong yumi na kisim igo insait long ai bilong God. Yumi mas traim long noken mekim rabis pasin. Yumi ken forgivim ol lain kwiktaim na forgivim olgeta samting. Yumi ken traim long mekim ol narapela lain hamamas moa long yumi yet. Yumi ken givim gutpela bel taim yumi toktok. Taim yumi traim long mekim ol dispela samting, bai yumi invitim Holi Gos long kam insait long femili bilong yumi na insait long laif bilong yumi.

Strongpela tingting bilong me em i olsem, wantaim halivim bilong God na sori long lewa bilong yumi, yumi ken luk save long wanem kain laif we yumi ken kisim ol taim ol taim Papa God save lovim yumi. Em laikim bai yumi go bek na stap wantaim em. Seivia, long pawa bilong dai na kirap bek bilong em mekim olsem yumi imas mekim sampela senis insait long lewa bilong yumi, long bai yumi iken go insait long temple, mekim tok promis we yumi ken holim strong, na bihain taim stap wantaim ol femili ol taim ol taim long seletil glori – yumi stap long haus bilong yumi gen.