Kapakap en Pwoson

Kapakap kaidehnte kitail en kin kosoi ong Koht. E wia ehu ansou me Koht oh Sapwellime serihkan kin wehwepene.

Ansou me kapakap kin wiawi ni pwungih, kitail kin wehkada pepehm en atail mohngiong kan ni lokaia mengei. Sahm Nanleng kin kalap ketkiheng pasapeng nan atail madamadau iangahki pepehm kan. E kin ketin rong kapakap mehlel me kitail kin wia ansou me kitail kin inouki kitail pahn peikiong Ih, sohte lipilipil soangen pasapeng oh ansou me e pahn ketin ketkihdo.

Kauno wiadahr inou wet ong irail koaros me wadek oh kapakapki duwen Pwuhk en Mormon:

“Oh ni ansouo me kumwail aleier mepwukat, I pahn kaweid kin kumwail, me kumwail en peki Koht, Sahm Soutuk, ni mwaren Krais, ma iei mepwukat sohte mehlel, oh ma kumwail pahn peki ni mohngiong mehlel, ni ineng mehlel, sang ni amwail pwoson Krais, e pahn ketin, kasalehiong kumwail mehlelo, sang ni manaman en Ngehn Sarawi.

“Oh sang ni manaman en Ngehn Sarawi, kumwail pahn kin esehla duwen mehlel en mehkoaros” (Moroni 10:4–5).

Inouo udahn mehlel. Aramas rar kei songehr oh kehnehr sang ni arail kapakap pweidahn inou kaselelo sang ahr alehdi kapai me kiheng irail peren mehlel. Inouo pil duduwehte nan atail kapakap koaros ma kitail men ese madamadau oh kupwur en Koht ong kitail. Kitail kak doadoahngki ansou me kitail kin alehdi kaweid sang ladu en Koht me ahneki mweimwei en kiheng kitail kaweid. Karasepe, kitail kak doadoahngki ansou me kitail karonge padahk en nan tiepene lap. Kitail kak doadoahngki ansou me kitail ale padahk sang misineri karakarahk kan me Koht malipedahr sang soukohp ieias. E pil kak doadoahk ansou me kitail kin ale kaweid sang pisop de prans president.

Wiepen kapakap en pweida nan atail mour me mengei. Kitail anahne peki pwe kitail en ese dahme mehlel sang kapakap ohng Sahmo ni mwaren Sises Krais. Kitail anahne peki ni mongiong mehlel, me wewehki kitail pahn mehlelki atail pahn kapwaiada pasapeng sohte lipilipil me Koht anahne sang kitail. Oh atail ineng mehlel pahn pwilsang atail pwoson Sises Krais.

Aramas me raparapahki mehlelo me wadek Pwuhk en Mormon mwohn arail pepdaisla oh kasarawihla kak alehdi pasapeng me pwuhko mehlel oh alehdi kadehde me Joseph Smith kawehwehda sang ni manaman en Koht. Mwurin atail kasarawihengehr en wia tohn Mwomwohdiso, Ngehn sarawi kak wiahla kempoakepahtail pwehn kin kamehlelehiong kitail padahk mehlel teikan. Eri, ansou koaros me kitail kin kapakap ni pwoson, kitail kak koapwoaroapwoarki me Ngehn Sarawi pahn kadehdehieng kitail me Sises iei Mesaia, Koht Sahm ieias, oh Ira poakpoake kitail oh koaros Sapwellimen Sahm Nanleng serihkan.

Ih ehu kahrepe me miehki inou ehu sang nan Pwuhk en Mormon me koasoia kitail pahn ahneki limpoak unsek nan atail mongiong ansou me Ngehn Sarawi pahn kadehde ong kitail me Sises iei Krais: “Oh ma emen pahn kin ohpampap oh nan mohngiong karakarahk, oh kin wehkada sang ni manaman en Ngehn Sarawio me Sises iei Krais, e kin udahn ahneki limpoak unsek” (Moroni 7:44).

Mie ansou mwahu en kakairada palingenitail nan rahn Sarawi en Kaisihsol koaros. Rahn Sarawi en Kaisihsol kak seweseikitail duwehte dahme Alma oh nein Mosiah pwutak kau wia, ni ahr kapakap oh kaisihsolki irail en esehla padahk mehlel kan pwe irail en kak padahngkihong mehn Laman akan sang ni manaman, mweimwei, oh limpoak (tehk Alma 17:3, 9).

Rahn Sarawi en Kaisihsol atail kapakap oh kaisihsol kin ehupene. Ong kapai en me semwehmwe, kitail kin kiheng pisop de prans president meiroang en kaisihsol me pahn sang ni wen mwenge me kitail sohte kang ansou en mwenge riau. Atail madamadau kan oh kapakap kan kin kolahng Soundoaro oh irail me E kupwuriki kitail en papah sang atail kosoia arail anahn en pali ngehn oh paliwar.

Atail kapakap oh ineng kan kak ekis duwehla Sapwellimen Soundoaro ni ansou me kitail kin kaisihsolki kitail en ohpampap, mengei en alehdi padahk, oh limpoak. Oh duwehte dahme e wia, kitail kapakap en esehla kupwuren Sahmo ong kitail oh kapwaiada.