Iren Mahsen en Padahk en Pas, Oaktohpe 2014
Misin Sarawi en Sises Krais: Pilawa en Komour
Onopiki audepen padahk wet ni kapakap oh rapahki en ese dahme komwi en ehukihong mehteikan. Ia duwen wehwehki mour oh misin en Sounkomouro eh pahn kalaudehla omw pwoson Ih oh kapaiada irail akan me komw kin tetehk sang padahk en pas? Pwehn alehdi iren kapehse kapatapat, tehk reliefsociety.lds.org.
Pwoson, Peneinei, Sawas
Sises masanih, “Ngehi me pilawahn komour me kohdihdo sang nanleng: ma mehmen pahn tungoale pilawa wet, e pahn momour kohkohlahte.” (Sohn 6:51). “Sises padahkieng kitail, Sapwellime tohnpadahk kan, me kitail en peki rehn Koht rahn koaros pilawahn—sawas oh ketihnain—kitail anahne ong rahno,” Elder D. Todd Christofferson emen Pwihn en Wahnpoaron Ehk riemeno kosoia. “Sapwellimen Kauno luhk … kasalehda limpoak en Koht, me kin ketin wehwehki anahn tikitik en Sapwellime serihkan nan rahn koaros oh kin kupwurki sewese emen emen irail. E ketin mahmahsanih me kitail kak peki ni pwoson Ih ‘me kupwursapan oh kalahngan ong aramas koaruhsie.’ (James 1:5).”1 Ni atail wehwehki me Sises Krais pahn apwaliala atail anahn akan, kitail pahn sohpeilahng Ih pwe kitail en ale ketihnain en palingenitail.
Elder Jeffrey R. Holland sang Pwihn en Wahnpoaron Ehk riemeno luke kitail en “towehda seiloak en tohnpadahk en Krais en mahs ako me kin inangih pilawa en komour—irail me sohte pwurala ahpw kohdo Reh, mihmi Reh, oh diarada me sohte emen irail me kak kohla reh pwe irail en kak ale doareperail oh komourla.”2
Pwuhk Sarawi Kapatapat kan
Sohn 6:32–35; Alma 5:34; 3 Nephi 20:3–8
Sang Pwuhk Sarawi Kan
Sises Krais wie padapadahkih pokon ehu me tohtohsang aramas 4,000. Mwurin rahn siluh, E ketin mahsanihong Sapwellime tohn padahk ko: “I poakelahr pokon wet, pwe … solahr kanarail kisin mwenge:
“Oh ma I pahn kadar irailla ni imwarail kan sohte mwenge, irail pahn lipwoumasala nanial kan. …
“Oh Sapwallime tohnpadahkko ahpw patohwanohng, Se pahn patohwan sang ia kisin sak nan sapwtehn wet me pahn itar ong pokon wet?
“Sises eri keinemwe rehrail, mahsanih, lopwon en pilawa depe mie rehmwail? A irail patohwanohng, Meh isuh.”
Krais eri ketin “ale lopwon isuhwo, oh loulouki, e ahpw ketin pilitikipeseng oh ketikihong sapwellime tohnpadahk ko, tohnpadahk ko ahpw uhd nehkohng pokono; …
“Oh pil mie kisin mwomw kei rehrail: oh e ketin loulouki, oh patohwanohng irail en nehkohng pokono.
“Irail koaros kepin konot oh medla: oh irail kihpene luhwen konotoko wiahda kopwou isuh.” (Kilang Mark 8:1–9).
© 2014 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/14. Kamanaman ong kawehwe: 6/14. Kawehwehpen Visiting Teaching Message, October 2014. Pohnpeian. 10870 885
Medewe Met
Ansou me kitail kin patohdo rehn Krais, ia mwomwen eh kin ketihnainih kitail?