Peb Puas Tau Npaj?

Nyob ib ncig thaj chaw uas thaum ub kuv nyob thiab ua hauj lwm, lub Koom Txoos khiav ib txoj kev ua hauj lwm yug qaib; cov neeg hauv tej pawg ntseeg hauv koog zej zog twb ua hauj lwm pub dawb ua li no. Feem ntau yog ib qho uas lawv khiav zoo, es twb muab ntau txhiab lub qe thiab ntau tus qaib rau tus npisov lub tsev rau khoom. Tiam sis tej lub sij hawm, vim lawv yog cov neeg nyob hauv lub nroog uas ua hauj lwm pub dawb yug qaib ua rau lawv tej tes sawv hlwv thiab ua rau lawv nyuaj siab thiab txhawj xeeb.

Piv xam hais tias, kuv yeej yuav nco ntsoov txog lub sij hawm thaum peb cov tub hluas uas tuav lub Pov Thawj Hwj Aloos tau sib sau ua ke los tu qhov chaw yug qaib thaum lub caij nplooj ntoo hlav. Cov tub hluas uas txaus siab thiab nquag heev tuaj rau qhov chaw yug qaib thiab rho cov nyom thiab khaws khib nyiab sai sai ces muab tej ntawd hlawv. Thaum sawv ntawm tej qhov hluav taws loj loj ntawd, peb tau noj nqaij thiab ib leeg pab ib leeg zoo siab vim peb tau ua hauj lwm zoo heev.

Tiam sis, muaj ib qho teeb meem loj heev. Qhov uas peb nrov nrov thiab rauv hluav taws ua rau tag nrho 5,000 tawm tus poj qaib ntxhov siab es ua rau lawv hle plaub thiab tsis nteg qe lawm. Tom qab ntawd peb txaus siab cia muaj nroj tsuag kom peb thiaj tau qe ntau ntxiv.

Txhua tus mej zeej hauv lub Koom Txoos uas tau pab cov uas xav tau kev pab yeej nco ntsoov thiab tsis khuv xim qhov uas nws tau pab li ntawd. Peb ib txwm paub khwv ua hauj lwm, saib xyuas nyiaj txiag, vam khom yus tus kheej, thiab faib rau lwm tus.

Peb yuav tsum nco ntsoov tias tus txheej txheem rau khoom zoo tshaj plaws yog qhov uas txhua tsev neeg hauv lub Koom Txoos yuav muaj zaub mov, khaub ncaws, thiab thaum muaj peev xwm ua, lwm yam khoom kom ua neej tau ntxiv. Tus Tswv lub tsev rau khoom kuj muaj cov mej zeej hauv lub Koom Txoos uas rau siab ntseeg siv sij hawm, tej txuj ci, kev muaj peev xwm, kev siab hlub, tej khoom uas muab cob rau Vajtswv, thiab tej nyiaj txiag. Tus npisov siv tau tej kev pab no pub rau cov uas xav tau kev pab.

Peb yaum kom txhua tus Neeg Ntseeg hauv Hnub Nyoog Kawg kom lawv ua li kev txawj ntse thaum lawv npaj, tsis siv nyiaj ntau dhau, thiab tsis txhob tiv nqis ntau heev uas tsis tas muaj. Muaj ntau tus neeg ntxiv uas yuav txawj kov yeej tej teeb meem ntawm nyiaj txiag yog tias lawv muab zaub mov tseg cia thiab tsis tshuav nuj nqis. Niaj hnub no peb pom hais tias ntau tus tau ua qhov fab ntxeev ntawm tej lus ntuas no: lawv muab nuj nqis tseg nqis thiab tsis tshuav muaj zaub mov.

Kuv rov qab hais qhov uas Thawj Pawg Thawj Tswj Hwm tau tshaj tawm ob peb xyoos tas los:

“Tau ntau xyoo cov thawj coj ntuas Haiv Neeg Ntseeg hauv Hnub Nyoog Kawg kom lawv npaj rau lub caij nyuaj los ntawm qhov uas lawv muab nyiaj me ntsis tseg cia. Ua li ntawd ua rau lawv nyob nyab xeeb thiab nyob zoo heev. Txhua tsev neeg muaj kev lav ris khwv kom muaj li xav tau raws li lawv muaj peev xwm ua.

“Txawm nej nyob qhov twg hauv lub ntiaj teb los, peb yaum kom nej sim saib nej muaj nyiaj txiag npaum li cas kom nej thiaj npaj tau rau kev txom nyem. Peb yaum kom nej tsis txhob siv nyiaj ntau; tswj nej tus kheej thaum nej yuav khoom kom txhob tiv nqis ntau. Them nej tej nqi sai li sai tau, thiab ua rau nej tus kheej dim ntawm txoj kev ua qhev no. Cia li pheej tseg nyiaj me ntsis kom ceev nyiaj txiag zuj zus mus.”

Peb puas tau npaj rau kam ceev nyob hauv peb lub neej? Peb tej txuj ci puas zoo tag nrho? Peb puas ua neej raws li kev vam meej? Peb puas muaj tej yam uas tau muab tshwj tseg? Peb puas ua raws li Vajtswv cov lus txib? Peb puas mloog cov yaj saub tej lus qhia? Peb puas tau npaj pub peb tej khoom rau cov pluag thiab cov txom nyem? Tus Tswv puas pom zoo rau peb?

Peb lub caij nyoog no muaj kev kub ntxhov ntau. Feem ntau peb yuav tsis paub txog yav tom ntej; yog li ntawd, peb yuav tsum npaj rau tej yam uas peb tsis paub tseeb txog. Thaum txog lub sij hawm yuav tsum txiav txim, ces lub sij hawm npaj tseg twb dhau mus lawm.